Yeremi-aq 31
31
1Haû Yhûmsîng Garai taî pyo é gi, “Haú hkûn, Ngò gi, Isira-elaq é yhûmhtu bànshoq é Garai Gasang dùt râ nghut mù, yhángmòq gi, Ngá é byu pé dùt kôrâ nghut lhê.” gâ ri.
2Haû Yhûmsîng Garai shî su ga taî ri;
“Shâm mai wó lùt é byu pé gi, yòso má jeju myang hkam yù bekô nghut ri;
Ngò gi, lé mù, Isira-elaq byu pé lé bánno nhâng râ nghut lhê.” gâ ri.
3Haû Yhûmsîng Garai gi, góhkûn#31:3 Góhkûn gâ é lé, we we mai ga le wó taî lhê. ngo lé htoq shit mù,
“Ngò gi, nang lé, ahtum abyùq é chyitdàp myìt èq chyitdàp bê nghut lhê;
Ngò gi, nang lé, ru gîng nyi é jeju myìt mai lâng taû yù bê nghut lhê.
4Zo-myi gyíng nghut é Isira-elaq ê, Ngò gi, nang lé dum saî xuq to râ nghut mù,
nàng gi, saî xuq tô é hui râ nghut lhê.
Nàng gi, náng é zìngtaú pé lé dum wàq yù mù,
gabú myìt mai mahkôn gó râ matú htoq ê râ nghut lhê.
5Nàng gi, Samariq bùm pé má,
tsibyiq hkyâm pé dum saí râ nghut lhê;
hkyâm saí bang gi, ho kôrâ nghut mù,
tsibyiq shi myàng zo kôrâ nghut lhê.
6Ehprim bùm pé má,
‘Lé keq, ngá-nhûng é Garai Gasang nghut é, haû Yhûmsîng Garaî chyáng ê râ matú,
Zi-un Bùm má dòq ê sháng.’ ga,
wú zúng é bang wùt garû taî é buìnyì jé râ nghut lhê.” gâ ri.
7Haû Yhûmsîng Garai shî su ga taî ri;
“Yakup é matú gabú mahkôn hkôn keq;
byù myû wuì mâ é ushuq é matú wùt garu keq.
‘Yhûmsîng Garai ê, Isira-elaq mai nyi myìt gyó tô é,
Náng é byu pé lé, hkyi yù àq.’ nghû taî hu luî,
hkya-on kúngtôn keq.
8Wú keq; Ngò gi, mautsûng mau mai shuî lò mù,
myìdàm htoq ló htâng é mai shuî tsîng yù râ nghut lhê.
Yhángmòq eq rahá, myòqjìt bang eq hkyî hten bang le,
zogûng wun é myiwe wuì eq zo hkû nò no é myiwe wuì le,
bo lòm râ nghut mù, byù mòqmó taû lò kôrâ nghut lhê.
9Yhángmòq gi, ngaù u chyang lé kôrâ nghut lhê;
yhángmòq gi, yhángmòq lé Ngò shuî taû lo é hkûn, dûng tôngbán kôrâ nghut lhê.
Ngò gi, yhángmòq lé, yhángmòq a htûng lèqbàt râ nghut é,
wuìlàng yàm pê é rá é hkyô mai shuî lò râ nghut lhê;
hkâsu mù gâ le, Ngò gi, Isira-elaq é yhâng wa nghut mù,
Ehprim gi, Ngá é yùqzo zo-mún nghut ri.
10Byù myû wuì ê, haû Yhûmsîng Garaî é dang lé gyo keq;
‘Isira-elaq byu pé lé lhoqpyo pyâm é Sû gi,
yhángmòq lé shuî tsîng yù râ nghut mù,
sau zúng sû su, Yhâng é sau hpúng lé wú zúng râ nghut lhê.’ nghû,
mau we mâ é zinlóng pé jé shoq taî pyô keq.
11Hkâsu mù gâ le, haû Yhûmsîng Garai gi, Yakup lé hkyi yù râ nghut mù,
yhángmòq htoq wum-o je bò bâng é lòq mai yhángmòq lé hkyi htoq yû râ nghut lhê.
12Haû mù, yhángmòq gi, Zi-un Bùm gùng pé má lé luî, gabú garu kôrâ nghut lhê;
yhángmòq gi, haû Yhûmsîng Garaî é jeju nghu é,
gùqzò muilhum, tsibyiq wing asik, tsanlun xû, sau bainám zo eq no zô pé wó é yánmai,
gabú byam chyu kôrâ nghut lhê.
Yhángmòq gi, wuì rago hpyûn tô é hkyâm su dùt kôrâ nghut mù,
myìt myo ûng wôm é hui kôrâ a nghut lo.
13Haú hkûn, zo-myi zô pé gi, gabú luî mahkôn gó kôrâ nghut mù,
zorâm zô pé eq mangzô pé le, haû eq rajung za gabú kôrâ nghut lhê.
Ngò gi, yhángmòq é iyon hkyô lé, gabú hkyô dùt nhâng mù,
yhángmòq yón kuq nyi é malaî, yhángmòq lé nhiktíng hkyô eq gabú hkyô byi râ nghut lhê.
14Ngò gi, hkyangjông pé lé, agùn agó é jejû èq nhik dìk nhâng mù,
Ngá é byu pé lé, Ngá é jejû èq gyi gyi dau dau myàng zo nhâng râ nghut lhê.” gâ ri;
haû gi, Yhûmsîng Garai taî pyo ri.
15Haû Yhûmsîng Garai shî su ga taî ri;
“Rama gâ é jowò má,
yón kuq é eq ngau garû é htê lé wó gyô ri;
Rahkela gi, yhang zô pé a nyi byùq lo kô é yánmai,
ngau nyi é eq nhik a wó tíng dùt ri.” gâ ri.
16Haû Yhûmsîng Garai shî su gâ ri;
“Nàng ngau é mai ngap byùq mù,
náng é ngaùbyi hkâhtoq lo;
hkâsu mù gâ le, nàng zui saî é eq rajung za ahpau wó râ nghut lhê;
yhángmòq gi, gye pê é mau mai taû lò kôrâ nghut lhê.” gâ ri;
haû gi, Yhûmsîng Garai taî pyo ri.
17“Haû mù, náng é awùt ashîn pé gi, htâng má myòqbyù jang jòq râ nghut lhê;
náng é zodù wuì gi, yhûmsing é mau má taû lò kôrâ nghut lhê.” ga le taî ri;
haû gi, Yhûmsîng Garai taî pyo ri.
18Hau htoq agó, “Ngò gi, Ehprim mai,
‘Ngò gi, a gyau shî é no su, Nàng èq mhoqshit é hui bê;
gè gè yhang, ngò gi, mhoqshit é hui bê nghut ri.
Nàng gi, ngá é Garai Gasang nghut é, haû Yhûmsîng Garai nghut é yánmai,
ngo lé hkyi xe yù laq, ngò taû lò râ nghut lhê.
19Ngò gi, hkyô nghoq ló byùq é htâng má,
dum myìt lhîng bê nghut lhê;
ngò gi, sê gyô hkyang é htâng má,
ngá é wànggàng bàt bê nghut lhê.
Ngò gi, rám pyàt lhê é yubàk marâ é yánmai,
hoq hpu luî, gùng-yuì hui bê nghut lhê.’ ga yón ngau é htê lé hkyak wó gyo râ nghut lhê.
20Ehprim gi, Ngò myìt nguì ô nau é,
ngò chyit é zo nghut lhê, a nghut lhí?
Ngò gi, yhang lé tan hkangmó,
yhang lé ru myìtbûn nyi ashî nghut lhê.
Haû mù, Ngò gi, yhang lé myìt tuî nyi é nghut lhê;
Ngò gi, yhang lé gyai yhang shogyo nhikmyîn é nghut lhê.” ga le,
haû Yhûmsîng Garai taî pyo ri.
21“Hkyô shit pyang zîng pé xuq aq;
nàng sô é hkyô nghut é,
hkyô mó lé shit é masàt lhô xuq aq;
zo-myi gyíng nghut é Isira-elaq ê,
taû lò àq; náng é wà pé shut taû lò àq.
22Myìt i-kyí a zung é byìzo Isira-elaq ê,
hkâ-myháng jé shoq sô nâ wún râ lhú?
Haû Yhûmsîng Garai gi, yùqgè lé myiwê èq wú magûm byi râ htûngli asik lé,
myìdàm htoq má to râ nghut lhê.” ga le taî ri.
23Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; “Ngò gi, yhángmòq lé shúm zung é mai shuî taû lo é hkûn, Yudaq mau eq haú mâ é wà pé má nyi é bang gi, ‘Kô lam é wà nàng ê, chyoiyúng é bùm nàng ê, haû Yhûmsîng Garai gi, nang lé shimân byi sháng gàq.’ gâ é dang dum taí kôrâ nghut lhê. 24Yudaq mau eq haú mâ é wà pé má nyi é bang gi, yò mú zui zo bang eq sau bainám rém zô é bang le mù, haú má rahá nyì kôrâ nghut lhê. 25Ngò gi, ngú é bang lé wum-o sik byi mù, yón kuq é bang lé nhiktíng byi râ nghut lhê.” gâ ri.
26Haú u, ngò gi, yhup bûn lò mù, wú kat le, ngò gyai yhang yhup ngón byùq é lé myang ri.
27Haû Yhûmsîng Garai taî pyo é gi, “Wú keq; Isira-elaq mau eq Yudaq mau má, byù myui eq shigu gaunyhaú a-myui hkyô é ahkyíng jé lô râ nghut lhê. 28Ngò gi, yhángmòq lé nùt htoq pyâm é, hpyoq hpyi pyâm é, tu mhuq pyâm é, lhoqhtên pyâm é eq byò dàn byò sho huí nhang é lé wú gôn é su, yhángmòq lé dum xuq mù, hô hkyô kat é lé wú gon râ nghut lhê.” gâ ri; haû gi, Yhûmsîng Garai taî pyo ri. 29“Haú buìnyì pé má, byu pé gi,
‘Mó wuî gi, chyin é tsibyiq zo mù,
zodù wuì gi, zuì kyum bum akô.’ ga taí lo kôrâ a nghut.
30Hau é malaî, yùq hkangmó gi, yhûmsing é marâ é yánmai shî râ nghut lhê; chyin é tsibyiq shi zô é sû ó yùq le, zuì kyûm râ nghut lhê.” le gâ ri.
31Haû Yhûmsîng Garai taî pyo é gi,
“Isira-elaq byu pé eq le, Yudaq byu pé eq le,
Ngò dangshikaq asik tô é buìnyì jé râ nghut lhê.
32Dangshikaq haû gi, yhángmòq é îchyí îwâ pé lé,
Ngá é lòq èq Egutuq ming mai shuî htoq ló é hkûn,
yhángmòq eq tô tô é dangshikaq su dùt râ a nghut.
Hkâsu mù gâ le, Ngò gi, yhángmòq é yhûmsîng hpó nghut to kôle,
yhángmòq gi, Ngá é dangshikaq lé lhoqhpyoq pyâm akô nghut ri.” gâ ri;
haû gi, Yhûmsîng Garai taî pyo ri.
33Haû Yhûmsîng Garai taî pyo é gi,
“Haú buìnyì pé lai jáng, Ngò gi, Isira-elaq byu pé eq dangshikaq shî su nghû to râ nghut lhê.
Ngò gi, Ngá é târâ lé, yhángmòq é myìt má kat to byi mù,
yhángmòq é i-myìt nhiklhum má kâ tap to byi râ nghut lhê.
Ngò gi, yhángmòq é Garai Gasang dùt râ nghut mù,
yhángmòq gi, Ngá é byu pé dùt râ nghut lhê.
34‘Haû Yhûmsîng Garai lé sé keq.’ ga rayùq eq rayùq taî lhum kômù,
yhûmsing é yhûmkyochang lé mhoq byi râ a nghut lo;
hkâsu mù gâ le, je tiq é mai je ko sû jé shoq,
bànshoq bang gi, Ngo lé sé bekó râ nghut lhê.
Ngò gi, yhángmòq é agè ashop hkyô lé mara hkyut byi râ nghut mù,
yhángmòq é mara lé a myìtbun byi lo râ nghut lhê.” gâ ri;
haû gi, Yhûmsîng Garai taî pyo ri.
35Nyí lé tsô byi râ matú buì tô to mù,
myín lé tsô byi râ matú lha-mó eq kyî pé lé hkunmó hkyô to luî,
wuìlhêng toq mying hum râ matú,
wuìshuq lung-aû lé nhaû toq kat é,
haû Wum-o a-tsam dìk shoq bò Sû Yhûmsîng Garai gâ é myìng wùn sû,
Yhûmsîng Garai shî su ga taî ri;
36“Hkyô tô é hkunmó shí pé Ngá é myòq hí mai byùq byùq jáng za shèq,
Isira-elaq gi, hkâ-nhám le, Ngá é byù myû ra-myû a dùt lo râ nghut lhê.” gâ ri;
haû gi, Yhûmsîng Garai taî pyo ri.
37Haû Yhûmsîng Garai shî su ga taî ri;
“Ahtoq mauhkûng lé wó ké mù,
a-ô myìdàm é a-pûn awang lé wó gôn htoq jáng za shèq,
Ngò gi, Isira-elaq é awùt ashín bànshoq lé,
yhángmòq kut é múzó é yánmai, he-ngìk pyám râ nghut lhê.” gâ ri;
haû gi, Yhûmsîng Garai taî pyo ri.
38Haû Yhûmsîng Garai taî pyo é gi, “Hananela mâchya mai Wàhkum Chyûn gâ é jé shoq, Ngá é matú wà shî lé dum xuq é buìnyì pé jé râ nghut lhê. 39Wà kyo lé kê é gi, haú mai nyâng za Garep kong má jé, haú mai Go-a jowò má lhing jé ló râ nghut lhê. 40Màng pé jòq é eq myiwap hut bum é langhkaû bànshoq le, yò pé bànshoq mai buìhtoq hkyam mâ é Kidron Langhkaû jé luî, haú mai Myang Hkum htúngchyûn jé shoq gi, haû Yhûmsîng Garaî é matú chyoiyúng é jowò dùt râ nghut lhê. Wà haû gi, hkâ-nhám le, nùt htoq pyâm é eq lhoqhtên pyâm é hui râ a nghut lo.” gâ ri.
Currently Selected:
Yeremi-aq 31: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.