Yeremi-aq 32
32
Yeremi-aq Yò Wui Yu É Hkyô
1Nebuhkatneza ùp é raxe shit zan zàn nghut é, Yudaq hkóhkâm Zedeki-a ùp é raxê zan zàn má, Yeremi-aq chyáng haû Yhûmsîng Garaî chyáng mâ é mungdang jé ri. 2Haú hkûn, Babelon hkóhkam é gyè hpúng gi, Yerusalem wà mó lé lóm tô é nghut luî, myìqhtoi Yeremi-aq gi, Yudaq hkóhkâm wâng mâ é chyungxe zúng bâng é wânghkaû má lúng tô ri.
3Hkâsu mù gâ le, Yudaq hkóhkâm Zedeki-a gi, Yeremi-aq lé haú má htóng lhûng to mù, yhang lé, “Nàng gi, haî mù haû su nghû myìqhtoi htoî lhê lhú? Nàng taî le, ‘Haû Yhûmsîng Garai shî su ga taî ri; Ngò gi, wà shî lé, Babelon hkóhkam é lòq má àp byî pyám berâ nghut mù, yhang gi, wà shî lé zân ung yù berâ nghut lhê. 4Yudaq hkóhkâm Zedeki-a gi, Babelon byu pê chyáng mai wó hpang lùt râ a nghut; yhang gi, Babelon hkóhkam é lòq má àp byî pyâm é hkyak hui mù, myòqdong hkyúm dang nyô luî, myòqdong myang lhum kôrâ nghut lhê. 5Yhang gi, Zedeki-a lé Babelon wà mó má shuî ló râ nghut mù, Zedeki-a gi, Ngò, yhang lé lé kûm é hkûn jé shoq haú má nyi nyì râ nghut lhê ga haû Yhûmsîng Garai taî pyo ri. Babelon byu pé lé nàng majan lhom zân é nghut jáng, nàng ûng râ a nghut.’ gâ ri.” ga taî ri.
6Haú hkûn, Yeremi-aq gi, “Haû Yhûmsîng Garaî é mungdang ngá chyáng shî su ga jé ri; 7náng é wa-mó Shalum é yhang zo Hanamela gi, náng chyáng jé mù, ‘Anahtot wà mâ é ngá é yò lé wui yù àq; hkâsu mù gâ le, nàng gi, je chyâng lhûm é buìnùm nghut mù, wui yù râ ahkáng wó sû nghut luî, haú lé wui yù râ wò jòq sû nghut lhê.’ ga taí râ nghut lhê.
8Haú hkûn, haû Yhûmsîng Garai taî é eq rajung za, ngá wa-mó é yhang zo Hanamela gi, chyungxe zúng bâng é wânghkaû má ngá chyáng lé jé mù, ‘Ben-yamin mau mâ é Anahtot wà má jòq é, ngá é yò lé wui yù àq; nàng gi, haú lé hkyi xe yù mù, sing yù râ ahkáng wó sû nghut é yánmai, nàng yhang haú lé wui yù àq.’ ga taî ri.
Haû gi, Yhûmsîng Garaî é mungdang nghut é lé ngò sê lhê; 9Haû mù, ngò gi, Anahtot wà mâ é yò lé ngá wa-mó é yhang zo Hanamela chyáng mai wui yù luî, yhang lé ngùnhtung í rung ngo che lik byî é nghut lhê. 10Danghtum htûm tô é laiká má ngá myîng kâ tap luî, dizìk htung mù, sàksé pé lé ji yù luî, ngùnhtung lé jàng mai lìk é nghut lhê. 11Ngò gi, zè wuì târâ jòq é eq rajung za, dizìk htûng tap tô é, danghtum htûm tô é laiká lé le, dizìk a htûng é za kâ htòt yu é laiká lé le yù mù, 12ngá wa-mó é yhang zo Hanamela é hí má le, danghtum htûm tô é laiká má yhûmsing myìng kâ tap é sàksê pê é hí má le, chyungxe zúng bâng é wânghkaû má zung tô é Yudaq byù bànshoq é hí má le, Mase-a é yhâng gashu, Neri-a é yhang zo Baruk lé àp byî é nghut lhê.
13Ngò gi, yhángmòq é hí má, Baruk lé shî su nghû dang sang é nghut lhê. 14‘Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; wui yù bê yò eq sêng é dizìk htûng tap tô é, danghtum htûm tô é laiká eq dizìk a htûng tap tô é, kâ htòt yu é, danghtum htûm tô é laiká lé yù mù, haû myáng myáng wó jòq gîng to râ matú tso yambú má kat to aq. 15Hkâsu mù gâ le, Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; yhûm pé, yò pé eq tsibyiq hkyâm pé lé, shí mau má dum wuì kôrâ nghut lhê.’ gâ ri.
16Ngò gi, Neri-a é yhang zo Baruk lé, haû wui yu é danghtum htûm tô é laiká àp byî é htâng má, haû Yhûmsîng Garai lé shî su nghû kyûdûng é nghut lhê;
17Ô, Ahko Ahkáng lhúnglháng wó Sû Yhûmsîng Garai ê, Nàng gi, Náng é a-tsam mó eq lhâm tô é lòqbú èq mauhkûng eq myigùng lé hpan to bê nghut ri. Nàng a wó kut é haî le a jòq nghut ri. 18Nàng gi, byù hkyîng mun lé chyitdàp myìt shit kôlhang, mó wui é yubàk mara dam lé, yhángmòq é zodù wui é tanghkoí má kat byi bê nghut ri. Hpungwup a-tsam mó eq wum-o a-tsam mó bo é Garai Gasang, Yhâng é myìng gi, Wum-o a-tsam dìk shoq bò Sû Yhûmsîng Garai gâ ri. 19Nàng htung tô é hkyô gi, kô hkìk mù, Nàng kut é múzó gi, hpungwup a-tsam bo ri. Náng é myòqjí gi, waxâng zo wuî bànshoq lé wú nyi é nghut mù, Nàng gi, yhángmòq é hkyô eq yhángmòq kut é múzó má cháng luî, yhángmòq lé tau byî nyi ri. 20Nàng gi, Egutuq ming má làklaí alhô agàn pé eq maúhpo múzó pé kut mù, hkû-nyí jé shoq, Isira-elaq ahtoq má le, waxâng zo wuî bànshoq bâng chyáng le xoq kut nyî luî, ahkuî jé shoq le, Náng é myìng hû nyì bê nghut ri. 21Nàng gi, làklaí alhô agàn pé eq maúhpo múzó pé lé tûn shit luî, wum-o mó bo é lòq eq lhâm tô é lòqbú èq, gyùq chiq hpo mó mai Isira-elaq byu pé lé Egutuq ming mai shuî htoq lô bê nghut ri. 22Nàng gi, yhángmòq é îchyí îwâ pé lé byi râ ga dâkam tô é maumyî nghut é, no-naú eq byo-î yui é mau shî, yhángmòq lé byi bê nghut ri. 23Yhángmòq gi, haú mau má wàng mù, haú mau lé sing yù bekô; nghut kôlhang, Náng é jì-no le a gyo, Náng é târâ pé le a cháng kó nghut ri. Yhángmòq kut râ matú, Nàng, yhángmòq lé hkunmó hkyô tô é lé le a kut kó nghut ri. Haû mù, Nàng gi, yhángmòq chyáng byò dàn byò sho hkyô shí pé bànshoq jé nhâng bê nghut ri.
24Wà haú lé zân yù râ matú zùmhtâng hkâsu kut saî tô é lé wú keq; shâm, mùtmó gyó é eq wúm gyó é yánmai, wà haú lé majan zân nyi é Babelon byu pê é lòq má wà haú lé àp byî pyám râ nghut lhê. Nàng ahkuî myang é eq rajung za, Nàng taî é dông dìk bê nghut ri. 25Babelon byu pê é lòq má wà haú lé àp byî pyám râ nghut kôle, Ahko Ahkáng lhúnglháng wó Sû Yhûmsîng Garai ê, Nàng gi, ngo lé, ‘Ngùnhtûng èq yò haú lé wui yù mù, sàksé pé lé ji yù àq.’ ga taí bê nghut ri.” ga taî ri.
26Haú hkûn, haû Yhûmsîng Garaî é mungdang Yeremi-aq chyáng jé é gi, 27“Ngò gi, waxâng zo wuî bànshoq é Garai Gasang, haû Yhûmsîng Garai nghut lhê. Ngò a wó kut é haî jòq lhê lhú? 28Haû mù, haû Yhûmsîng Garai shî su ga taî ri; Ngò gi, wà shî lé, Babelon byu pê é lòq má le, Babelon hkóhkâm Nebuhkatneza lé le àp byî pyám râ nghut mù, yhang gi, haú lé sing yù râ nghut lhê. 29Wà haú lé htîm nyi é Babelon byu pé gi, wà haú má wàng mù, wà haú lé nyhê hkyô pyám râ nghut lhê. Yhûmhkûng htoq má Balaq hparà lé namngón jung nyhê nhông byî é eq gótû hparà hpôlhô pé lé shuq jung hkungga hut hkyó byî é dông Ngo lé nhikjum lhoqyo bâng é yhûm pé lé le jâng nyhê hkyô pyám kôrâ nghut lhê.
30Isira-elaq byu pé eq Yudaq byu pé gi, yhángmòq é zorâm pyàt mai Ngá é hí má agè ashop é hkyô za kut nyî bekô nghut ri; gè gè yhang, Isira-elaq byu pé gi, yhûmsing é lòq èq saî é zè mai Ngo lé nhikjum lhoqyô akô nghut ri ga haû Yhûmsîng Garai taî pyo ri. 31Wà shî gi, xuq é nyí mai hkû-nyí jé shoq, Ngo lé nhikjum lhoqyo mù, nhikmó lhoqyô nyi é nghut luî, Ngò gi, haú lé Ngá é myòq hí mai lhoqhtên pyám râ dùt é nghut lhê. 32Hkâsu mù gâ le, Isira-elaq byu pé eq Yudaq byu pé nghut é, yhángmòq le, yhángmòq é hkóhkam pé eq zaugun wuì le, yhángmòq é hkyangjông pé eq myìqhtoî pé le, Yudaq byu pé eq Yerusalem wà mó má nyi é bang le, yhángmòq kut é agè ashop hkyô bànshoq èq Ngo lé nhikmó lhoqyô akô nghut ri. 33Yhángmòq gi, Ngá shut myòqdong a hû kô é za, nùnghtáng chyat lhik hu akô nghut ri; Ngò gi, yhángmòq lé adàm dàm mhoq kyo kôlhang, Ngò mhoqshit é hkyô lé a hkam yù kó nghut ri. 34Yhángmòq gi, Ngá é Myìng wun é yhûm má achaq achyut é hparà lhô pé kat to kômù, haú lé agòt a-û kut pyám bekô nghut ri. 35Yhángmòq gi, Molek hparà lé, yhángmòq é yùqzo byìzô pé nyhê nhông byi râ matú, Hinom Zo gâ é Langhkaû má Balaq hparà é kaúgyàp pé saî akô nghut ri; yhángmòq haû sû é achaq achyut hkyô kut é dông, Yudaq a-myû lé mara kut shut nhâng râ nghut é hkyô lé, Ngò hkunmó hkyô tô é le a nghut é htoq agó, Ngá é myìt má lháng a htoq wú é nghut lhê.
36Núngmòq gi, wà shi eq séng luî, ‘Wà shî gi, shâm, mùtmó gyó é eq wúm mó gyó é èq, Babelon hkóhkam é lòq má àp byî pyâm é hui râ nghut lhê.’ ga taî akô; nghut kôlhang, Isira-elaq é Garai Gasang, haû Yhûmsîng Garai shî su ga taî ri; 37Ngò gi, nhikjum mó yô é eq nhikmó-yô é mai yhángmòq lé Ngò hkat pyo hâng kat é mîngdán bànshoq mai, yhángmòq lé shuî tsîng yù mù, shí jowò má shuî taû lò luî, ngón za nyì nhâng râ nghut lhê. 38Yhángmòq gi, Ngá é byu pé dùt râ nghut mù, Ngò gi, yhángmòq é Garai Gasang dùt râ nghut lhê. 39Yhángmòq eq yhángmòq é zodù wuì bànshoq bang wó nyì ngón yùqyo nyì shoq, Ngo lé ayang gyùq hkúnggâ nyì kôrâ matú, Ngò, yhángmòq lé, i-myìt rahkat za dùt nhâng mù, hkyô rahkat za so nhâng râ nghut lhê. 40‘Ngò gi, hkâ-nhám le yhángmòq lé a tô pyâm é za gè hkyô ayang kut byî nyì râ nghut lhê; yhángmòq, Ngá chyáng mai hkâ-nhám le a lhing ló byùq râ matú, Ngo lé za gyùq hkúnggâ nyì râ myìt yhángmòq chyáng kat byi râ nghut lhê.’ nghû, Ngò, yhángmòq eq ahtum abyùq é dangshikaq tô to râ nghut lhê. 41Ngò gi, yhángmòq nyì ngón yùqyò râ hkyô kut byî é má gabú myìt ngón é nghut mù, Ngá é i-myìt nhiklhum bànshoq eq i-myìt sô lhum gón mai yhángmòq lé shí mau má nyi gîng to nhâng râ nghut lhê.
42Haû Yhûmsîng Garai shî su ga taî ri; Ngò gi, byù shí bâng chyáng gyai yhang wuîhke jamjau hpuzô é hkyô shí pé bànshoq jé nhang é su, yhángmòq lé Ngò danghtum htûm tô é jeju bànshoq, yhángmòq lé byi râ nghut lhê. 43‘Mîngdán shî gi, Babelon byu pê é lòq má àp byî pyâm é hui bê nghut mù, byù le a nyì, shigu gaunyhaú le a nyì, chamchyuîyuì jòq hâ to bê nghut ri.’ ga núngmòq taî é mîngdán shî má, yò pé dum myang wuì kôrâ nghut lhê. 44Ben-yamin mau, Yerusalem wà mó é awui ayàm mâ é wà pé, Yudaq mau mâ é wà pé, bum mau mâ é wà pé, buìwàng hkyam bùmhkyî pá pé mâ é wà pé eq Maupyî Mau mâ é wà pé má, yò pé lé ngùnhtûng èq myang wui yù mù, danghtum htûm tô é laiká kâ é eq dizìk htûng tap mù, sàksê pé ji yù kôrâ nghut lhê; hkâsu mù gâ le, shúm zung é bang lé Ngò dum shuî taû lò râ nghut lhê ga haû Yhûmsîng Garai taî pyo ri.” gâ ri.
Currently Selected:
Yeremi-aq 32: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.