Yeremi-aq 49
49
Ammon Mau Eq Sêng É Danglù
1Ammon byu pé eq sêng é danglù gi, shî su gâ ri;
haû Yhûmsîng Garai taî le,
“Isira-elaq má yùqzo a nyì lhí?
Isira-elaq chyáng a-myû hkûngxoq a nyì lhí?
Haû sû é nhîng, Molek hparà gi, haî mù Gat mau lé sing yu lhê lhú?
Yhâng é byu pé gi, haî mù wà pé má nyi bum lhê lhú?” gâ ri.
2Haû Yhûmsîng Garai shî su ga taî pyo ri;
“Nghut kôlhang, Ammon byu pé nyi é Raba wà má,
Ngò, majan htê lhoqhtoq é buìnyì jé râ nghut lhê;
haú hkûn, wà haû gi, a-pyâng bùm dùt byùq mù,
hau é awui ayàm mâ é wà pé gi, myi nyé byùq râ nghut lhê.
Haú hkûn, Isira-elaq gi, yhang lé hkat htoq pyâm é bang lé,
hkat htoq pyám râ nghut lhê.” gâ ri;
haû gi, Yhûmsîng Garai taî ri.
3“Heshibon wà ê, Ai wà mó htên byòq byùq bê nghut é yánmai,
ngaùhkyûng ngaùyang kut àq!
Raba wà má nyi é bang ê, wùt ngaù keq!
Jimê tû wùt mù, iyon yon keq;
hkyâm kyâm tô é ayàm pé mai
shí shut hé shut din lhîng keq;
hkâsu mù gâ le, Molek hparà gi,
yhâng é hkyangjông pé, zaugun wuì eq rahá
shúm dông chyup shuî ló é hui râ nghut lhê.
4Náng é langhkaû pé gi, kyôshi myuishi ngaí lhê nghû,
haî mù nghutbun dang taî lhê lhú?
A jujúm é Ammon byìzo ê,
nàng gi, náng é sùtzè lé lùmhkaû mù,
‘Ngo lé, ó yùq lé htim râ lhú?’ ga taî é nghut ri.
5Ngò gi, náng é lhînghkyùq má nyì bâng é yánmai,
náng chyáng gyùq chiq hpo jé nhâng râ nghut lhê;
núngmòq yùq hkangmó gi, hkat htoq pyâm é hui râ nghut mù,
hpang byo wún bang lé shuî tsîng yù râ byù le a nyì râ nghut lhê.” ga,
haû Yhûmsîng nghut é, Wum-o a-tsam dìk shoq bò Sû Yhûmsîng Garai taî pyo ri.
6“Nghut kôlhang, Ngò gi, htâng má, shúm zung byùq é Ammon byu pé lé
dum taû lò nhâng râ nghut lhê.” ga,
haû Yhûmsîng Garai taî pyo ri.
Edom Mau Eq Sêng É Danglù
7Edom mau eq sêng é danglù gi, shî su gâ ri;
haû Wum-o a-tsam dìk shoq bò Sû Yhûmsîng Garai shî su ga taî ri;
“Teman mau túm má hpàqchyî byéng-yá a jòq lo lhí?
Nhik gyîng é bang hpàqchyî a htoq lo kó lhí?
Yhángmòq é hpàqchyî byéng-yá gi, byùq byùq bê nghut lhê lhí?
8Dedan wà má nyi é bang ê,
zùt hpang ló mù, nìk é lùqhkyûng má haq to keq;
hkâsu mù gâ le, Ngò gi, Eso lé mara dam byî é buìnyì má,
yhâng chyáng byò dàn byò sho hkyô jé nhâng râ nghut lhê.
9Tsibyiq shi hpyoq bang náng chyáng lé é nghut jáng,
yhángmòq shi gyó myhit to byî lhê, a nghut lhí?
Myín lé hkau bang lé é nghut jáng,
yhángmòq o é gû za hkaû yu akô, a nghut lhí?
10Nghut kôlhang, Ngò gi, Eso lé gùngchîn kut pyám râ nghut lhê;
Yhang a wó haq to loshoq, yhang haq é jowò pé lé
lhoqbyông htoq byi râ nghut lhê.
Yhâng é a-myû hkûngxoq pé,
yhâng é gu-mang wuì eq yhûmkyochang pé gi,
htûm byùq bê nghut mù, ó yùq le,
11‘Náng é chuízô pé lé nyhi hkyô to aq;
yhángmòq lé ngò chyungxe duì nhâng râ nghut lhê;
náng é chuimó myhî pé le
ngo lé ge lùmhkau lhê.’ ga taî é a nyì lo.” gâ ri.
12Haû Yhûmsîng Garai shî su ga taî ri; “Mara dam nghu é góm lé shuq a gíng é bang lháng, shuq ra kôrâ nghut le gi, nàng le haî mù mara dam byî é a hui dùt râ lhú? Gè gè yhang, nàng gi, wó lùt râ a nghut, haú lé shuq ra râ nghut lhê.” gâ ri. 13Haû Yhûmsîng Garai taî pyo é gi, “Bozira wà mó gi, htên byòq byùq mù, nhîng pyám hkyô, gyùq chiq hpo alhô agàn eq lùmù gànsâng jowò dùt râ nghut mù, haú mâ é wà pé bànshoq ahtum abyùq htên byòq byùq râ nghut lhê nghû, Ngá gûng Ngò dâkam lhê.” gâ ri.
14Haû Yhûmsîng Garaî chyáng mâ é danglù Ngò wó gyô ri;
“Núngmòq zùp zing mù, Edom mau lé ê htim keq!
Majan zan râ matú toq keq!” ga ê taí râ lagyo,
byù myû wui chyáng nhang kat bê nghut ri.
15“Wú aq; Ngò gi, nang lé, byù myû wuì má je tiq é a-myû dùt nhâng mù,
waxâng zô wui èq wú tiq é hui nhâng râ nghut lhê.
16Lùqpyoq pé má nyì mù, myhang é bùm gùng pé má nyì sû ê,
nàng lhoqhtoq é gyùq chiq hkyô eq,
nàng myìt myhang é hkyô gi, nang lé mhaú zô yù bê nghut ri.
Nàng gi, zùn su myhang é jowò má sùt saí kôlhang,
Ngò gi, nang lé haú mai lhoqhkyô pyám râ nghut lhê.” ga,
haû Yhûmsîng Garai taî pyo ri.
17“Edom mau gi, gyùq chiq hpo dùt râ nghut lhê;
haú mai laî ló é bang bànshoq gi, yhang hui zô é ihkyùp é yánmai,
gyùq hong byùq mù, taî hpoî pyám kôrâ nghut lhê.
18Sodom wà, Gomora wà eq
hau é awui ayàm mâ é wà pé lé lhoqhtûm pyâm é su,
Edom mau gi, byù rayùq le nyì râ a nghut;
haú má byù lé nyî râ le a nghut.” ga,
haû Yhûmsîng Garai taî ri.
19Hau htoq agó, “Gyai yùq yúng é mhan nú yô má lé htim râ matú,
Yodan làng yàm mâ é sik púng mai hkanghkyi dòq lo é su,
Ngò gi, Edom mau mâ é byu pé lé, dàn lòq tung haú mau mai hkat htoq pyám râ nghut lhê.
Haú mau lé ùp râ matú, hkyin tô é hui sû lé Ngò wò byî to râ nghut lhê.
Ngò su dùt é eq Ngo lé htuqhtíng nau é sû gi, ó nghut lhê lhú?
Sau zúng sû ó yùq gi, Ngo lé wó htuqhtîng lhê lhú?” le gâ ri.
20Haû mù, haû Yhûmsîng Garai mai, Edom mau lé htuqhtíng râ hen tô é hkyô lé le,
Teman mau má nyi é bang lé htuqhtíng râ htung tô é hkyô lé le, gyo keq;
sau hpúng mâ é sau zô pé yhángmòq gi,
she hkyut ló byùq é hui râ nghut lhê;
haû su dùt é yánmai, yhángmòq nyi é mhan nú yô lé,
chamchyuîyuì dùt nhang to râ nghut lhê.
21Yhángmòq htên byòq byùq é htê yánmai,
myìdàm htoq gi, nán byùq râ nghut lhê;
yhángmòq wùt ngau garû é htê lé gi,
Nhông Nè jé shoq lháng wó gyo râ nghut lhê.
22Wú keq, gye pé gi, zùn su, han dik é dông dâng yôn gyó lô mù,
Bozira mau htoq má yhâng é dùng pyo nghop to bê nghut ri.
Haú buìnyì má, Edom mau mâ é sârhe pê é i-myìt gi,
zo hkû nò no é myiwe wui é i-myìt su dùt bùm râ nghut lhê.
Damasikuq Wà Eq Sêng É Danglù
23Damasikuq wà eq sêng é danglù gi, shî su gâ ri;
“Hamat wà eq Aripat wà gi, a ge é lùdang pé wó gyo bekô nghut é yánmai,
gyùq ngha bùm bekô nghut ri.
Yhángmòq gi, myìt wum gyuî gyòp byùq bekô nghut mù,
wuìshuq lung-aû wuìlhêng toq é su, wuîhke jamjau hpuzô nyì bekô nghut ri.
24Damasikuq wà gi, wum gyuî byùq bê nghut mù,
hpâng râ matú lhîng bê nghut ri;
yhang gi, gyùq nán nyî bê nghut ri;
yhang gi, zo hkû nò no é myiwe myhí su,
no hpuzo mù, yón kuq é hui bê nghut ri.
25Ngò myìt nguì ô naù luî, hkya-on huî é wà gi,
haî mù luî tô pyâm é hui bê lhú?
26Gè gè yhang, yhâng é zorâm wuì gi, wà hkyô pé má lèqbàt tô bùm râ nghut lhê;
haú nyí má, yhâng é gyèzô pé bànshoq gi, lhoqzîm pyâm é hui kôrâ nghut lhê.” ga,
haû Wum-o a-tsam dìk shoq bò Sû Yhûmsîng Garai taî pyo ri.
27Hau htoq agó, “Ngò gi, Damasikuq wàhkûm pé lé myi tap kat râ nghut mù,
haû gi, Ben Hadat é gingtíng jowò jé shoq nyé gyó râ nghut lhê.” ga le taî pyo ri.
Kedara Up Eq Hazora É Mau Pé Eq Sêng É Danglù
28Babelon hkóhkâm Nebuhkatneza èq lhoqhtên pyâm é, Kedara up eq Hazora é mîngdán pé eq sêng é danglù gi, shî su gâ ri;
haû Yhûmsîng Garai taî le,
“Toq keq; Kedara up lé ê htim luî,
buìhtoq hkyam mâ é byu pé lé lhoqhtûm pyám keq.
29Gye pé gi, yhángmòq é zúm pé eq sau hpúng pé lé le,
yhángmòq é pán-gyang pé, zè pé eq gola-uk pé bànshoq lé le, lú yu pyám byi mù,
‘Lhînghkyùq má gyùq chiq hpo chyat ô!’ ga,
htê mó èq taî kyuq kôrâ nghut lhê.
30Hazora mau má nyi é bang ê, Babelon hkóhkâm Nebuhkatneza gi,
núngmòq lé htuqhtíng râ haq htung to bê nghut mù,
núngmòq lé a ge é hkyô kut râ hên bê nghut é yánmai,
hân hân hpâng mù, nìk é lùqhkyûng pé má nyì keq hkoi!” gâ ri;
haû gi, Yhûmsîng Garai taî pyo ri.
31Haû Yhûmsîng Garai taî pyo é gi,
“Toq keq; gyùq chiq hkyô eq wê gâng to mù,
haî lé le a myìt chiq ra luî, wà hkum pé eq hkumkyáng pé a râ é za,
myìt myo myìt chiq hkyô a jòq é za yhang baú nyi é a-myû lé ê htim keq.
32Yhángmòq é gola-uk pé lé gi, lú kôn ló pyám byi mù,
yhángmòq é no hpúng pé gi, wó lú yu é majan zè dùt byùq râ nghut lhê.
Ngò gi, xâm nyhâm dûng tô é a-myû lé jowò hkangmó má hkat pyo hâng kat mù,
lhînghkyùq mai yhángmòq chyáng byò dàn byò shoq hkyô jé nhâng râ nghut lhê.” gâ ri;
haû gi, Yhûmsîng Garai taî pyo ri.
33Hau htoq agó, “Hazora mau gi, dànghkuî pê é hkyûng dùt mù,
ahtum abyùq chamchyuîyuì dùt byùq râ nghut lhê;
haú má byù rayùq le nyì râ a nghut;
haú má byù lé nyî râ le a nghut.” le gâ ri.
Elam Mau Eq Sêng É Danglù
34Yudaq hkóhkâm Zedeki-a ùp hi é u má, Elam mau eq séng luî, myìqhtoi Yeremi-aq chyáng haû Yhûmsîng Garaî chyáng mai mungdang jé é gi,
35haû Wum-o a-tsam dìk shoq bò Sû Yhûmsîng Garai shî su ga taî ri;
“Wú keq; Ngò gi, Elam maû é lai nghu é,
yhâng é wum-o achyûng lé lhoqhkyop pyám râ nghut lhê.
36Ngò gi, Elam mau lé,
mauhkûng myi chyûn mâ é laì myí lai èq mùt nhâng râ nghut mù,
yhángmòq lé maumyî myi chyûn shut hkat pyo hâng kat râ nghut luî,
Elam mau mâ é shúm byu pé a jé é ra-mau lháng a jòq râ nghut lhê.
37Hau htoq agó, Ngò gi, Elam mau lé,
yhángmòq é gye pê é hí má le,
yhángmòq lé sat pyám naû bâng é hí má le, lhoqngha pyám râ nghut lhê;
Ngò gi, Ngá é nhikjum mó yo hkyô nghut é,
byò dàn byò sho hkyô lé yhángmòq chyáng jé nhâng râ nghut lhê.
Ngò gi, yhángmòq lé lhoqhtûm pyâm é jé shoq,
sham èq yhángmòq lé châng hkat râ nghut lhê.” gâ ri;
hau gi, Yhûmsîng Garai taî pyo ri.
38“Ngò gi, Ngá é hkóhkâm tángmyhâng lé Elam mau má tsung to mù,
yhâng é hkóhkâm eq zaugun wuì lé lhoqhtûm pyám râ nghut lhê.” ga,
haû Yhûmsîng Garai taî pyo ri.
39“Nghut kôlhang, Ngò gi, jé lô râ buìnyì pé má,
Elam mau mâ é shúm zûng hui bang lé shuî taû lò râ nghut lhê.” ga,
haû Yhûmsîng Garai taî pyo ri.
Currently Selected:
Yeremi-aq 49: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.