Yeremi-aq 48
48
Moba Mau Eq Sêng É Danglù
1Moba mau eq sêng é danglù gi, shî su gâ ri;
Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri;
“Nebo wà gi, htên gyòp byùq râ nghut é yánmai, dingnyé wó ri.
Kiri-ahtim wà gi, hoq hpû é eq hpyoq yu ló pyâm é hui râ nghut mù,
hau é gingtíng jowò le, hoq hpû é eq hpyoq hpyi pyâm é hui râ nghut lhê.
2Moba mau gi, hkya-on kúngton é hui râ a nghut lo;
Heshibon wà má, byu pé gi,
‘Lé keq; ngá-nhúng gi, byù myû haú lé lhoqhtûm pyám sháng.’ ga hpàqchyî haq da kôrâ nghut lhê.
Matmen wà ê, nàng le chamchyuîyuì zîm byùq râ nghut lhê;
shâm gi, nang lé châng hkat râ nghut lhê.
3Gyo keq, Horona-im wà mai,
‘Lú lhum bàt zìk hkyô ô! Htên byòq hkyô ô!’ ga,
wùt ngaù htê htoq nyi ri;
4Moba mau gi, htên byùq râ nghut lhê;
haú mâ é zoshâng zô pé wùt ngaù kôrâ nghut lhê.
5Yhángmòq gi, ngaùhkyûng ngaùyang eq so uchyang,
Luhit bùm shut dòq e ló akô nghut ri;
Horona-im shut gyó e ló é hkêgyó má ló kô é hkûn,
htên byòq byùq hkyô lé dìk shoq hpuzô é ngaù htê lé wó gyô akô nghut ri.
6Hpâng keq! Núngmòq é chyungxe lùt râ matú dìn keq;
yòso mâ é mhanhpup su dùt nyì keq.
7Hkâsu mù gâ le, núngmòq gi, núngmòq kut é múzó pé eq sùtzè pé lé lùmhkaû kô é yánmai,
núngmòq le chyup yu é hui kôrâ nghut lhê;
Hkemosha hparà le, yhâng é hkyangjông pé eq zaugun wuì le mù,
shúm dông chyup shuî ló é hui râ nghut lhê.
8Lhoqhten lhoqhpyoq sû gi, wà hkangmó má lé htim râ nghut mù,
rawà lháng wó lùt râ a nghut.
Haû Yhûmsîng Garai taî tô bê nghut é yánmai,
langhkaû gi, htên byòq byùq mù,
pá mau gi, htûm byùq râ nghut lhê.
9Moba mau gi, chamchyuîyuì jòq sâ to râ nghut mù,
haú má xo tsing hpyûn to keq;#48:9 Dang yán shí lé, Moba mau wó hpang lùt shoq, dùng tap byi keq ga le wó taî lhê.
haú mâ é wà pé gi, byù le a nyì,
chamchyuîyuì dùt byùq râ nghut lhê.
10Haû Yhûmsîng Garaî é múzó lé agon za kut hkyut é sû gi, dâkam pyâm é hui sháng gàq;
byù sat é mai yhûmsing é shâm lé she taû yu é sû gi, dâkam pyâm é hui sháng gàq.
11Moba mau gi, yambú rayam eq rayam má a hut htòt é nghut mù,
yambú hkaû má myìt tô é tsibyiq wing su,
zorâm hkûn mai myang bánnô nyì bê nghut luî,
gó-mau má shúm zung é a hui nghut ri.
Haû mù, yhâng é màn gi, hí lhê su nghut mù,
yhâng é namngón shôm gi, a htaî byùq nghut ri.” gâ ri.
12Haû Yhûmsîng Garai taî pyo é gi,
“Nghut kôlhang, Ngò gi, yhang lé yam mai hut htoq pyám râ byu pé nhang kat é buìnyì pé jé râ nghut mù,
yhángmòq gi, yhang lé hut htoq pyám râ nghut lhê.
Yhángmòq gi, yhâng é yam pé lé akôm kut pyám mù,
yhâng é yambú pé lé bàt hkyop pyám kôrâ nghut lhê.
13Haû mù, Isira-elaq byu pé gi, yhángmòq lùmhkau é Behtela hparà é yánmai,
hoq hpû é hui kô é su,
Moba mau bang gi, Hkemosha hpara é yánmai,
hoq hpû é hui kôrâ nghut lhê.
14‘Ngá-mòq gi, sârhe pé; majan zan kûng é bang nghut lhê.’ nghû,
núngmòq hkâsu wó taí kôrâ lhú?
15Moba mau gi, lhoqhtên pyâm é hui râ nghut mù,
haú mâ é wà le zân ung yu pyám é hui râ nghut lhê;
yhâng chyáng mâ é je réng je kûng é zorâm wuì gi,
sat pyâm é hui râ matú gyó e ló bekô nghut ri.” gâ ri;
haû gi, Wum-o a-tsam dìk shoq bò Sû Yhûmsîng Garai gâ é myìng wun é Hkóhkâm hpó taî pyo ri.
16“Moba mau htên byòq byùq râ ahkyíng jé lô bê nghut ri;
yhang hui zo râ wuîhke jamjau hpuzo hkyô gi, hân jé râ nghut lhê.
17Yhâng é awui ayàm má nyi é bang bànshoq,
yhâng é myìng lé sê é bang bànshoq gi,
yhâng é matú iyon yon keq.
‘Gingtîng é eq hpung bo é hkóhkâm dumbáng gi,
hkâsu mù gyuî byùq lhê lhâ!’ nghû taí keq.
18Dibon jowò má nyi é byu pé ê,
núngmòq é hpung bô jang mai gyó lô mù,
kyuq huî é myigùng má zùng keq;
hkâsu mù gâ le, Moba mau lé lhoqhtên pyâm é sû gi,
núngmòq lé htim râ matú dòq lé lô mù,
núngmòq é gingtíng wà mó pé lé lhoqhten lhoqhpyoq pyám râ nghut lhê.
19Aro-era wà má nyi é bang ê,
hkyô yàm má yàp mù tu wú keq;
‘Haî dùt bekô lhú?’ nghû,
hpang nyi é yùqgè wuì eq hpang lùt lo é myiwe wuì lé myi keq.
20Moba mau gi, htên byòq byùq mù, hoq hpû é hui zô ri.
Ngaùhkyûng ngaùyang kut mù, wùt garû ngaù keq!
Moba mau gi, htên byòq byùq bê nghut ri ga,
Arinon wuìlàng yàm má taî htoq kyo aq.
21Târâ jéyáng hkyô gi, pá mau mâ é,
Holon, Yaza eq Mehpat,
22Dibon, Nebo eq Bet Dibilahtim,
23Kiri-ahtim, Bet Gamula eq Bet Me-on,
24Keri-ot, Bozira eq Moba mau mâ é wê é chyâng é wà pé bànshoq htoq má jé bê nghut ri.
25Moba mau mâ é wum-o nghu é hkyuî gi, hpyit pyâm é hui mù,
yhâng é lòqbú gi, gyuî byùq bê nghut ri.” ga,
haû Yhûmsîng Garai taî pyo ri.
26“Moba mau gi, haû Yhûmsîng Garai lé gyáng dang taî é yánmai,
yhang lé shuq wùt nhâng keq.
Moba mau gi, yhang hpat tô é má galhu lhu mù,
lùmù gànsâng jang dùt pyám sháng gàq.
27Nàng gi, Isira-elaq lé lùmù gànsang é a nghut lhí?
Nàng, yhâng é hkyô lé taí hkangmó, rhoi é dông yhang lé ulhîng hê râ matú,
yhang gi, hkau bang eq rahá nghut nyi é lé, nàng myang chyup wú é lhú?
28Moba mau má nyi é bang ê,
wà pé lé tô pyâm to mù, lùq bùm pé má nyì keq.
Lùqhkyûng donghkun má
sut saî é hpûngkyui su nghut nyî keq.
29Moba mau bang nghutbûn é hkyô lé ngá-mòq wó gyo bê nghut lhê;
yhángmòq gi, gyai yhang myìt myhâng nghutbûn akô myhî-nhung!
Yhángmòq gyáng dang taî é, nghutbûn é, myìt myhang é eq myìt myhâng nghutbûn é hkyô pé gi,
hkâ-í yhang kô ri myhî-nhung.
30Yhángmòq nhikjum yô é gi, hai a-kyû a bo é lé, Ngò sê lhê;
yhángmòq nghutbûn é hkyô gi, haî a dùt nghut ri.” ga,
haû Yhûmsîng Garai taî pyo ri.
31“Haû mù, Ngò gi, Moba maû é hkyô lé iyon yôn ngaù râ nghut lhê;
Ngò gi, Moba mau gón é matú wùt ngaù râ nghut lhê;
Ngò gi, Kira Hareset byu pê é matú yón ngaû râ nghut lhê.
32Sipma mâ é tsibyiq nuî ê, Ngò gi, Yazera é matú ngau é htoq,
náng é matú ngaù byî lhê.
Náng é akoq pé gi, wuimau jé shoq nui dán mù,
Yazera nhông lháng jé bê nghut ri.
Lhoqhten lhoqhpyoq sû gi, náng é kyô shu yòq mâ é shi pé eq
tsibyiq shi pé lé lhoqhtên pyám bê nghut ri.
33Gabú byam chyu hkyô eq gabú myìt ngón hkyô gi,
Moba mau mâ é yò pé eq kyôshi myuishi ngaí é maumyî mai byùq ló byùq bê nghut ri.
Tsibyiq shi pyik jang mai tsibyiq wing a yuì lo râ matú Ngò xaû pyám bê nghut lhê;
gabú byam chyu htê mai tsibyiq shi pyik râ a nghut lo;
garu htê htoq kôlhang, gabú garu htê a nghut lo.
34Heshibon mai Ele-ale eq Yahazi jé shoq,
Zora mai Horona-im eq Egilat Shelishiya jé shoq,
yhángmòq é wùt ngaù htê baú byíng to bê nghut ri;
hkâsu mù gâ le, Nimrim mâ é wuì pé lháng kân byùq bê nghut ri.
35Ngò gi, Moba mau má, myhang é hparà noq jowò pé má
hkungga pé nhong é eq,
yhángmòq é hparà hpôlhô pé lé namngón jung nyhê nhông byî é bang lé,
lhoqhtûm pyám râ nghut lhê.” ga,
haû Yhûmsîng Garai taî pyo ri.
36Hau htoq agó, “Haû mù, Ngá é i-myìt gi, Moba maû é matú, sámpyí htê su le,
Kira Hareset byu pê é matú, sámpyí su le, yón ngaû râ nghut lhê.
Yhángmòq hkong tô é sùtzè gi, htûm byùq bê nghut ri.
37Yùq hkangmó é uxâm eq nhutmui gi,
wùq pyâm é hui bê nghut ri;
yùq hkangmó é lòq gi, lhoqcheq pyám mù,
yùq hkangmó é hpyidum gi, jimê tsâng to bê nghut ri.
38Ngò gi, a-kyû a bo é yambú lé lhoqhkoq pyâm é su,
Moba mau lé lhoqhkoq pyám bê nghut é yánmai,
Moba mau mâ é yhûmhkûng bànshoq eq
byù zîng é jowò pé má,
iyon yon hkyô mai lai luî, haî le a jòq nghut ri.” ga le,
haû Yhûmsîng Garai taî pyo ri.
39Hau htoq agó, “Moba mau gi, hkâ-í yhang gyòp byùq bu-nhung!
Hkâ-í yhang ngaùhkyûng ngaùyang dùt bu-nhung!
Moba mau gi, hoq hpu luî, zùt taû byùq bu-nhung!
Moba mau gi, yhâng é lhînghkyùq mâ é bang bànshoq é hí má,
lùmù gànsâng hkyô eq gyùq chiq hpo mó dùt bê nghut ri.” le gâ ri.
40Haû Yhûmsîng Garai shî su ga taî ri;
“Wú keq! Gyè gi, zùn su dâng lé lô mù,
Moba mau htoq má yhâng é dung èq lé nghop to râ nghut lhê.
41Keri-ot lé wó zân ung yu pyám mù,
gingtíng gyèdap pé lé wó zân ung yu pyám byi râ nghut lhê;
haú buìnyì má, Moba mau mâ é sârhe pê é myìt gi,
zo hkû nò no é myiwe myhî é myìt su dùt bùm râ nghut lhê.
42Moba mau bang gi, haû Yhûmsîng Garai lé gyáng é dang taí bekô nghut é yánmai,
byù myû ra-myû a dùt loshoq lhoqhtûm pyám râ nghut lhê.
43Moba mau mâ é byu pé ê, gyùq chiq hpo, dong eq dumzo pé gi,
núngmòq lé láng tô ri.” ga,
haû Yhûmsîng Garai taî pyo ri.
44“Gyùq chiq hpo mai hpâng sû ó yùq nghut kôle,
dong má byìt gyó wâng râ nghut lhê;
dong mai dô htoq lo é sû gi,
dumzo má myí byùq râ nghut lhê;
hkâsu mù gâ le, Ngò gi,
Moba mau lé mara dam byî é zànwut jé nhâng râ nghut lhê.” ga,
haû Yhûmsîng Garai taî pyo ri.
45“Wó hpang lùt htoq é bang gi, myòqbyù jang a jòq é za,
Heshibon wà é buìshûm ô má yàp tô bum akô;
hkâsu mù gâ le, Heshibon wà mai myi htoq lô mù,
Sihon wà mai myishâm htoq lô luî,
Moba mau mâ é maukyo mauchyûn eq
gyáng é dang garû taí bâng é ují lagùng má nyé gyó râ nghut lhê.
46Moba mau ê, nàng gi, dingnyé wó ri!
Hkemosha hpara é byu pé gi, htûm byùq bê nghut ri;
náng é yùqzo byìzô pé gi,
shúm zung é eq chyup shuî ló é hui bekô nghut ri.
47Nghut kôlhang, Ngò gi, jé lô râ buìnyì pé má,
Moba mau mai shúm zûng huî é bang lé dum taû lò nhâng râ nghut lhê.” ga,
haû Yhûmsîng Garai taî pyo ri.
Moba mau má jé râ târâ jéyáng é hkyô gi, shî má htáng bê nghut ri.
Currently Selected:
Yeremi-aq 48: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.