Nhông Jaú 13
13
Yàpjèq Nòlì Eq Sêng É Cháng Ra Târâ Pé
1Haû Yhûmsîng Garai gi, Mosheq eq Arun lé, 2“Byù rayùq yùq, yhâng é sho-kuq má achap chap dùt é, a nghut jáng, a-kyap dùt é, a nghut jáng, abòq bòq hpyu é nghut mù, yàpjèq nòlì lhô lho é nghut jáng, yhang lé, hkyangjong hpó Arun chyáng nghut nghut, yhâng é yùqzô pê chyáng mâ é hkyangjong rayùq chyáng nghut nghut, shuî ê ra râ nghut lhê. 3Hkyangjong hpó gi, haú yùq é sho-kuq mâ é nò dàm lé jep wú ra râ nghut lhê; nò dàm mâ é sho-maú hpyu byùq luî, nò dàm haû hkûng wang tô é nghut jáng, haû gi, sho-kuq má yàpjèq nòlì lhô lhô bê nghut ri. Hkyangjong hpó gi, haú yùq lé ban jep wú jáng, yhang lé, htûngli dông a sanséng nghû hpyit byi ra râ nghut lhê. 4Sho-kuq mâ é bòq bòq hpyu é jang má, hpyû za hpyû mù, dàm a hkûng wang to, sho-maú le a hpyu byùq é nghut jáng, hkyangjong hpó gi, nò dàm dàp sû haú yùq lé baú gótû kut nyhit nyí nyhi to ra râ nghut lhê. 5Nyhit nyí nyí má, hkyangjong hpó gi, yhang lé dum jep wú mù, nò dàm haû sho-kuq má a yom byùq, a byo jàt dùt é nghut jáng, haú yùq lé baú gótû kut nyhit nyí dum xoq nyhi to ra râ nghut lhê. 6Nyhit nyí nyí má, hkyangjong hpó gi, yhang lé dum jep wú mù, nò dàm haû a byo jàt é za yom ló bê nghut jáng, haú yùq sanséng bê nghû hpyit byi ra râ nghut lhê. Haû gi, yô chap é za nghut lhê. Yhang gi, yhâng é mèbu lé chi ra râ nghut lhê; haû jáng, yhang gi, sanséng râ nghut lhê. 7Nghut kôlhang, yhang lé sanséng bê ga hpyit byi râ matú hkyangjong hpô chyáng yhâng é gùng jep wú nhang é htâng má, yhâng é achap chap dùt é jang gi, yhâng é sho-kuq má byo ló é nghut jáng, hkyangjong hpô chyáng, yhâng é gùng ê dum jep wú nhâng ra râ nghut lhê. 8Hkyangjong hpó gi, haú yùq lé lhom jep wú mù, yhâng é sho-kuq má achap chap dùt é byo dàp to bê nghut jáng, yhang a sanséng nghû hpyit byi ra râ nghut lhê; haû gi, sho-kuq má yàpjèq nòlì alhô lhô bê nghut ri.
9Byù rayùq yùq, sho-kuq má yàpjèq nòlì dàp bê nghut jáng, yhang lé hkyangjong hpô chyáng shuî ê ra râ nghut lhê. 10Hkyangjong hpó gi, yhang lé jep wú mù, yhâng é sho-kuq má achap chap hpyu tô é eq sho-maú hpyu byùq é nghut jáng le, achap chap dùt tô é má sho ne tô é nghut jáng le, 11haû gi, sho-kuq má yàpjèq nòlì xau dàp tô é nghut lhê mù, yhang lé a sanséng nghû hpyit byi ra râ nghut lhê. Yhang gi, a sanséng gû nghut bê yánmai, yhang lé baú gótû kut nyhi to a ra nghut ri.
12Haû yàpjèq nòlì gi, yhâng é sho-kuq má ra-mîng é byo ló mù, hkyangjong hpó myang é eq rajung za, haû gi, nò dàm dàp su é sho-kuq bànshoq má, ulhum mai hkyî jé shoq dàp to é nghut jáng, 13hkyangjong hpó gi, haú yùq lé jep wú mù, ragung é nò dàp nghop to bê nghut jáng, haú yùq lé sanséng bê nghû hpyit byi ra râ nghut lhê. Yhang gi, ragung é hpyu tô bê nghut é yánmai, sanséng bê nghut ri. 14Nghut kôlhang, yhâng é gùngsho, shô ne lo é hkûn gi, yhang a sanséng dùt byùq râ nghut lhê. 15Hkyangjong hpó gi, shô ne lo é lé myang é hkûn, yhang lé a sanséng nghû hpyit byi râ dùt lhê. Shô ne é gi, a sansêng é nghut lhê; haú yùq gi, yàpjèq nòlì dàp bê nghut ri. 16Shô ne é htâng má dum hpyu lo é nghut jáng, yhang gi, hkyangjong hpô chyáng ê dum shit ra râ nghut lhê. 17Hkyangjong hpó gi, yhang lé lhom jep wú mù, nò dàm dum hpyu byùq bê nghut jáng, nò dàm dàp sû haú lé sanséng bê nghû hpyit byi ra râ nghut lhê. Haú hkûn, yhang gi, sanséng berâ nghut lhê.
18Byù rayùq yùq, yhâng é sho-kuq má byìng yùq luî, dum ge byùq é htâng má, 19haû byìng yùq é jang má, achap chap dùt lo é, a nghut jáng, nè hpyû hpyû mâ é abòq bòq dùt lo é hkûn, yhang gi, yhâng é gùng lé hkyangjong hpô chyáng ê shit ra râ nghut lhê. 20Hkyangjong hpó gi, lhom jep wú mù, sho-kuq hkûng wang tô é eq sho-maú hpyu byùq é nghut jáng, haú yùq lé a sanséng nghû hpyit byi ra râ nghut lhê. Haû gi, byìng hkô mai dùt htoq lo é yàpjèq nòlì nghut ri. 21Nghut kôlhang, hkyangjong hpó lhom jep wú é hkûn, sho-maú le a hpyu byùq, sho-kuq le a hkûng wang lo é za, yom ló bê nghut jáng, hkyangjong hpó gi, yhang lé baú gótû kut nyhit nyí nyhi to ra râ nghut lhê. 22Haû gi, sho-kuq má byo ló nyi é nghut jáng, hkyangjong hpó gi, yhang lé a sanséng nghû hpyit byi ra râ nghut lhê; haû gi, yàpjèq nòlì nghut ri. 23Nghut kôlhang, haû nè hpyû hpyu é ahkô le roq za nghut to mù, byò le a byo jàt é nghut jáng, haû gi, byìng hkô za nghut lhê mù, hkyangjong hpó gi, yhang lé sanséng bê nghû hpyit byi ra râ nghut lhê.
24Byù rayùq yùq, yhâng é sho-kuq má myi nyé hkô dàp luî, myi nyé hkô mâ é ne tô é sho má, nè hpyû hpyu é, a nghut jáng, abòq bòq hpyu é dùt htoq lo é hkûn, 25hkyangjong hpó gi, abòq bòq haú lé jep wú ra râ nghut lhê; sho-maú hpyu byùq mù, sho-kuq hkûng wang tô é nghut jáng, haû gi, myi nyé hkô mai dùt htoq lo é yàpjèq nòlì nghut bê. Hkyangjong hpó gi, yhang lé a sanséng nghû hpyit byi ra râ nghut lhê; haû gi, yàpjèq nòlì nghut ri. 26Nghut kôlhang, hkyangjong hpó jep wú le, myi nyé hkô mâ é sho-maú le a hpyû, sho-kuq le a hkûng wang ló é nghut mù, yom ló bê nghut jáng, hkyangjong hpó gi, haú yùq lé baú gótû kut nyhit nyí nyhi to ra râ nghut lhê. 27Nyhit nyí nyí má, hkyangjong hpó gi, haú yùq lé dum jep wú ra râ nghut lhê; haú hkûn, sho-kuq má haû byo myín ló é nghut jáng, hkyangjong hpó gi, yhang lé a sanséng nghû hpyit byi ra râ nghut lhê; haû gi, yàpjèq nòlì nghut ri. 28Nghut kôle, haû ahkô le roq za nghut to mù, sho-kuq má byò le a byo jàt é za, yom ló byùq é nghut jáng, myi nyé hkô mâ é achap za nghut lhê mù, hkyangjong hpó gi, yhang lé sanséng bê nghû hpyit byi ra râ nghut lhê; haû gi, myi nyé é dàm hkô za nghut ri.
29Yùqgè nghut nghut, myiwe nghut nghut, ulhum má, a nghut jáng, âmhtáng má nò dàm dap é nghut jáng, 30hkyangjong hpó gi, nò dàm haú lé jep wú ra râ nghut lhê; nò dàm haû gi, hkûng wang to mù, xâm, a nghut jáng, nhutmui gi, huî huî tsaí tsaí zâ dùt byùq é nghut jáng, hkyangjong hpó gi, yhang lé a sanséng nghû hpyit byi ra râ nghut lhê; haû gi, ulhum mâ é, a nghut jáng, âmhtáng mâ é yàpjèq nòlì nghut ri. 31Nghut kôlhang, nò dàm haú lé hkyangjong hpó jep wú é hkûn, sho-kuq le a hkûng wang ló, haú má sho-maú nòq le a yùq tô é su dùt é nghut jáng, hkyangjong hpó gi, nò dàm dàp sû haú yùq lé baú gótû kut nyhit nyí nyhi to ra râ nghut lhê. 32Nyhit nyí nyí má, hkyangjong hpó gi, nò dàm haú lé jep wú ra râ nghut lhê; nò dàm haû gi, a byo ló é htoq agó, haú má huî hui é sho-maú le a yùq, sho-kuq le a hkûng wang ló é nghut jáng, 33yùqgè nghut nghut, myiwe nghut nghut, dàm dap tô é jang mai lai luî, yùq tô é sho-maú pé lé wùq pyám ra râ nghut lhê; hkyangjong hpó gi, haú yùq lé baú gótû kut nyhit nyí nyhi to ra râ nghut lhê. 34Nyhit nyí nyí má, hkyangjong hpó gi, nò dàm haú lé dum jep wú ra râ nghut lhê; nò dàm haû gi, sho-kuq má a byo ló é htoq agó, sho-kuq le a hkûng wang ló é nghut jáng, hkyangjong hpó gi, yhang lé sanséng bê nghû hpyit byi ra râ nghut lhê. Yhang gi, yhâng é mèbu lé chi ra râ nghut lhê; haû jáng, yhang gi, sanséng berâ nghut lhê. 35Nghut kôlhang, yhang sanséng bê ga hpyit byî é htâng má, nò dàm haû sho-kuq má byo ló é nghut jáng, 36hkyangjong hpó gi, haú lé jep wú mù, nò dàm haû sho-kuq má byo tô é lé myang é nghut jáng, huî hui é sho-maú lé wú nó a ra lo; yhang gi, a sanséng nghut ri. 37Nghut kôle, hkyangjong hpó myang é eq rajung za, nò dàm gi, roq dùt to mù, haú má sho-maú nòq yùq to bê nghut jáng, nò dàm dàp sû haû gi, ge byùq bê nghut mù, sanséng bê nghut luî, hkyangjong hpó gi, yhang sanséng bê nghû hpyit byi ra râ nghut lhê.
38Yùqgè nghut nghut, myiwe nghut nghut, sho-kuq má abòq bòq hpyu dàp tô é nghut jáng, 39hkyangjong hpó gi, yhang lé jep wú ra râ nghut lhê; abòq haú pé gi, nòq hpyû hpyu é nghut jáng, haû gi, sho-kuq mai dùt htoq lo é, myìt chiq a râ jung a-kyap za nghut ri; yhang gi, sansêng ri.
40Byù rayùq gi, xâm gyùt mù, udung dùt kôle, sansêng ri. 41U hí xâm gyùt pyám mù, ngedéng kôle, yhang gi, sansêng ri. 42Nghut kôlhang, yhâng é udung má, a nghut jáng, ngedéng má, nè hpyû hpyu é nò dàm dàp é nghut jáng, haû gi, yhâng é udung, a nghut jáng, ngedéng mai dùt htoq lo é yàpjèq nòlì nghut ri. 43Hkyangjong hpó gi, yhang lé jep wú ra râ nghut lhê; yhâng é udung, a nghut jáng, ngedéng má wâm tô é nò dàm gi, nè hpyû hpyu é nghut jáng, 44haú yùq gi, yàpjèq nòlì dàp é nghut mù, a sanséng nghut ri. Hkyangjong hpó gi, yhâng é ulhum mâ é nò dam é yánmai, yhang lé a sanséng nghû hpyit byi râ râ nghut lhê.
45Haû sû é yàpjèq nòlì dàp é sû gi, jèq é mèbu wùt mù, yhâng é xâm hpyap hkyô to luî, myòqdong a-o túm lé nghop pyâm to mù, ‘A sanséng! a sanséng!’ nghû wùt garu ra râ nghut lhê. 46Yàpjèq nòlì haû ru dap nyî nyî, yhang gi, a sanséng nghut ri. Yhang gi, xuq tô é wàp shinggan má yhang baú nyì ra râ nghut lhê.
Mhungzúng Dàp É Mèbu Eq Sêng É Cháng Ra Târâ Pé
47Mhungzúng záng pyâm é mèbu nghut é, saumaú mèbu, nú nhâm é ji mêbu, 48saumaú lé, a nghut jáng, nú nhâm é jihkyîng lé, wòqgân èq wòq é eq lòq èq nìk é pán, sho-kuq mèbu eq sho-kuq èq saî é zè pé eq séng luî gi, 49mèbu, sho-kuq mèbu, wòqgân èq wòq é pán, lòq èq nìk é nú nhâm é pán, sho-kuq èq saî é zè bànshoq má mhungzúng záng jáng gi, nyuì nyuì nè nè dùt é nghut jáng, haû gi, mhungzúng nghut bê mù, hkyangjong hpó lé ê shit ra râ nghut lhê. 50Hkyangjong hpó gi, záng tô é jang má jep wú mù, zè haú pé lé gótû kut nyhit nyí tô to ra râ nghut lhê. 51Nyhit nyí nyí má, yhang gi, haú lé dum jep wú ra râ nghut lhê; mhungzúng haû, wòqgân èq wòq é pán pé, lòq èq nìk é nú nhâm é pán pé, sho-kuq mèbu pé eq sho-kuq èq saî é zè pé má byo dàp ló é nghut jáng, haû gi, hke zô ló nyi é mhungzúng nghut ri; zè haú pé gi, a sanséng nghut ri. 52Haû mù, yhang gi, mhungzúng záng bê nghut é, saumaú lé, a nghut jáng, nú nhâm é jihkyîng lé, wòqgân èq wòq é eq lòq èq nìk é pán, sho-kuq èq saî é zè pé lé nyhê hkyô pyám ra râ nghut lhê. Haû gi, hke zô ló jung mhungzúng nghut é yánmai, zè haú pé lé hkyak nyhê hkyô pyám ra râ nghut lhê.
53Nghut kôlhang, hkyangjong hpó jep wú é hkûn, mèbu, wòqgân èq wòq é pán, lòq èq nìk é zè pé eq sho-kuq èq saî é zè pé má mhungzúng haû a byo jàt é nghut jáng, 54yhang gi, mhungzúng záng bê zè haú pé lé chî pyám nhâng ra râ nghut lhê. Hau htâng, yhang gi, haú lé gótû kut nyhit nyí xoq tô to ra râ nghut lhê. 55Zè haú lé chî pyâm é htâng má, hkyangjong hpó gi, haú lé dum jep wú ra râ nghut lhê; mhungzúng haû gi, a byo ló kôle, isâm a htaî é nghut jáng, haû gi, a sanséng nghut ri. Mhungzúng záng é ahte shut nghut nghut, ahtoq shut nghut nghut, bànshoq lé nyhê hkyô pyám ra râ nghut lhê. 56Haú lé hkyangjong hpó dum jep wú é hkûn, chî pyâm é htâng má mhungzúng haû yom ló byùq é nghut jáng, yhang gi, mèbu, sho-kuq mèbu, wòqgân èq wòq é pán, lòq èq nìk é zè pé nghut é mèbu mâ é mhungzúng záng é pé lé lâng cheq pyám ra râ nghut lhê. 57Nghut kôlhang, mhungzúng haû gi, mèbu, wòqgân èq wòq é pán, lòq èq nìk é zè pé eq sho-kuq èq saî é zè pé nghut é mèbu pé má dum htoq lo é nghut jáng, haû gi, mhungzúng dum bùq htoq bê nghut ri; mhungzúng dàp é bànshoq lé gi, nyhê pyám ra râ nghut lhê. 58Mèbu, wòqgân èq wòq é pán, lòq èq nìk é zè pé eq sho-kuq èq saî é zè pé lé chî pyám luî, mhungzúng a dàp lô é nghut jáng, radàm dum chi ra râ nghut lhê. Haú hkûn, haû gi, sansêng byùq râ nghut lhê.” ga taî ri.
59Shí pé gi, saumaú mèbu, nú nhâm é ji mêbu, wòqgân èq wòq é pán, lòq èq nìk é zè eq sho-kuq èq saî é zè pé má mhungzúng záng é eq sêng luî, sansêng é eq a sansêng é lé hpyit byi râ cháng ra târâ pé nghut lhê.
Currently Selected:
Nhông Jaú 13: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.