Nhông Jaú 15
15
Mòwìng Htoq Mù A Sanséng Dùt É Hkyô
1Haû Yhûmsîng Garai gi, Mosheq eq Arun lé, 2“Isira-elaq byu pé lé îsu nghû taí keq; ‘Yùqgè rayùq yùq, yhâng é yùqgè hking mai mòwìng htoq é nghut jáng, mòwìng haû gi, a sanséng nghut ri. 3Mòwìng haû gi, haú yùq é gùng mai htoq nyi é nghut nghut, nô byùq é u nghut nghut, haû gi, yhang lé a sanséng dùt nhâng râ nghut lhê. Yhâng é mòwìng mai a sanséng dùt nhang é gi, 4yhang lèq é hpyang hkâ le a sanséng râ nghut lhê; yhang zung é ze haî le a sanséng râ nghut lhê. 5Yhang lèq é hpyang má záng é sû gi, yhâng é mèbu chî pyám mù, yhâng é gùng lé chî pyám ra râ nghut lhê; yhang gi, myínhtâng jé shoq a sanséng dùt râ nghut lhê. 6Haû mòwìng htoq sû zung é zè má zung é sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
7Haû mòwìng htoq sû lé záng é sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
8Haû mòwìng htoq sû mai sanséng sû rayùq lé sôkan byé gyûn é nghut jáng, haú yùq gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
9Haû mòwìng htoq sû jî é zè haí jung le a sanséng râ nghut lhê; 10yhâng é a-ô mâ é zè lé záng é sû gi, myínhtâng jé shoq a sanséng râ nghut lhê; zè haú pé lé gùq yu é sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
11Haû mòwìng htoq sû mai yhâng é lòq lé wuì má a pyaû pyâm é za záng é hui sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
12Haû mòwìng htoq sû záng é, tso-au lé gi, lhoqhkyop pyám mù, sik èq saî tô é zè lé gi, kyûn chî pyám, kut ra râ nghut lhê.
13Yùqgè rayùq yùq, mòwìng htoq é mai ge byùq é nghut jáng, htûngli dông sanséng râ matú nyhit nyí láng wú ra râ nghut lhê; yhang gi, yhâng é mèbu lé chî pyám râ é htoq agó, yhâng é gùng lé le yui nyi é wuì èq chî pyám ra râ nghut lhê; yhang gi, sanséng berâ nghut lhê. 14Shit nyí nyí má, yhang gi, hpûngkyui í du, a nghut jáng, nghoqmyhû í du lé, zùphpong zúm hkum hí, haû Yhûmsîng Garaî é hí má, hkyangjong hpó lé byi ra râ nghut lhê. 15Hkyangjong hpó gi, mara hkyut hkunggâ é matú radu, myi nyhé hkunggâ é matú radu nhông byi ra râ nghut lhê. Haú dông mai, yhang gi, mòwìng htoq é yánmai, byù haú yùq é matú, Yhûmsîng Garaî é hí má mara hkô htaí hkungga nhông byi râ nghut lhê.
16Yùqgè rayùq gi, yhang baú shaúwing htoq jáng, ragung é chî pyám ra râ nghut lhê; yhang gi, myínhtâng jé shoq a sanséng dùt râ nghut lhê. 17Shaúwing záng é mèbu, a nghut jáng, sho-kuq zè haî le chî pyám ra râ nghut lhê; haû gi, myínhtâng jé shoq a sanséng dùt râ nghut lhê. 18Yùqgè rayùq, myiwe eq gùngsho zùm yàp é nghut jáng, yhángnhik í yùq é gùng chî pyám ra râ nghut lhê; yhángnhik gi, myínhtâng jé shoq a sanséng dùt râ nghut lhê.
19Myiwe rayùq gi, yhang lhôhking lé é hkûn, nyhit nyí yhang a sanséng râ nghut lhê; yhang lé záng é sû gi, myínhtâng jé shoq a sanséng râ nghut lhê.
20Yhâng é lhôhking lé é ayòq má, yhang lèq é haí jung le a sanséng râ nghut lhê; yhang zung é haí jung le a sanséng râ nghut lhê. 21Yhang lèq é hpyang má záng é sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê. 22Yhang zung é zè má záng é sû gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê. 23Yhâng é yhup hpyang má nghut nghut, yhang zung é zè má nghut nghut, záng é sû gi, myínhtâng jé shoq a sanséng dùt râ nghut lhê.
24Yùqgè rayùq, myiwe haû eq gùngsho zùm mù, yhâng é lhôhking suî èq záng é nghut jáng, yhang gi, nyhit nyí a sanséng râ nghut lhê; yhang lèq é hpyang le a sanséng râ nghut lhê.
25Myiwe rayùq, yhâng é lhôhking buìnyì lai shoq sui lé é, a nghut jáng, yhâng é lhôhking lai kôle, sui ru htoq nyi é nghut jáng, yhang gi, yhâng é lhôhking buìnyì u lé su, sui haû ru yui nyì nyì a sanséng râ nghut lhê. 26Yhang, sui xoq yui nyi é u lèq é hpyang gi, yhâng é lhôhking ayòq mâ é hpyang su, a sanséng râ nghut lhê; yhang zung é zè le, yhâng é lhôhking ayòq mâ é su a sanséng râ nghut lhê. 27Haú pé lé záng é sû gi, a sanséng râ nghut lhê; yhang gi, yhâng é mèbu lé chî pyám râ é htoq agó, yhâng é gùng lé le chî pyám ra râ nghut lhê; yhang gi, myínhtâng jé shoq a sanséng dùt râ nghut lhê.
28Yhang gi, suí yui é mai ge byùq é nghut jáng, nyhit nyí láng wú ra râ nghut lhê; hau htâng, yhang gi, htûngli dông sanséng râ nghut lhê. 29Shit nyí nyí má, yhang gi, hpûngkyui í du, a nghut jáng, nghoqmyhû í du lé, zùphpong zúm hkum hí má, hkyangjông chyáng yu lé ra râ nghut lhê. 30Hkyangjong hpó gi, mara hkyut hkunggâ é matú radu, myi nyhé hkunggâ é matú radu nhông byi ra râ nghut lhê. Haú dông mai, yhang gi, myiwe haû sui yuî mù a sansêng é yánmai, Yhûmsîng Garaî é hí má haú yùq é matú mara hkô htaí hkungga nhông byi râ nghut lhê.
31Haû mù, núngnhik gi, Isira-elaq byu pé, yhángmòq chyáng mâ é Ngá é sàksé zúm lé agòt a-û dùt nhâng mù, yhángmòq é a sansêng é hkyô má a shi byùq kó sháng gàq, yhángmòq lé a sanséng dùt nhang é zè pé eq san za kut gam hkoq pyám ra râ nghut lhê.’ nghû keq.” ga taî ri.
32Shí pé gi, mòwìng htoq su é matú le, yhang baú shaúwing htoq mù a sansêng byùq su é matú le, 33lhôhking ayòq u lhê é myiwê é matú le, yùqgè, a nghut jáng, myiwe awing htoq é matú le, htûngli dông a sansêng é myiwe eq gùngsho zum é yùqge é matú le, cháng râ é târâ pé nghut lhê.
Currently Selected:
Nhông Jaú 15: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.