Nhông Jaú 16
16
Mara Hkô Htaí Hkungga Nhông Buìnyì
1Haû Arun é yhang zô nhiktâng, Yhûmsîng Garaî é hí má chyâng ê kômù, shi byùq kô é htâng, haû Yhûmsîng Garai gi, Mosheq lé dáng nyo ri. 2Yhûmsîng Garai, Mosheq lé dáng nyo é gi, “Nungmang Arun lé, yhang a shi byùq sháng gàq, sàksé dò htoq mâ é jeju dò a-myhi lé kyo tô é pán-gyang hkaû mâ é Chyoiyúng Htâng é Jowò má wàng naù hkangmó hkâwâng nghû taí aq; hkâsu mù gâ le, jeju dò a-myhi htoq mâ é mhut má Ngò htoq shit nyi é nghut lhê.
3Arun gi, Chyoiyúng Htâng é Jowò má shí dông wàng ra râ nghut lhê; yhang gi, mara hkyut hkunggâ é matú nohtó zo radu eq myi nyhé hkunggâ é matú saulo radu chûng ra râ nghut lhê. 4Yhang gi, chyoiyúng nú nhâm é jihkyîng ahte bu wùt mù, gùng má htèp dùt é nú nhâm é ahte buhîng wùt luî, nú nhâm é jihkyîng hpyihit hit mù, nú nhâm é jihkyîng uhtup htup ra râ nghut lhê. Haú pé gi, chyoiyúng é wùtbu wùtmè pé nghut ri; haû mù, yhang gi, haú pé lé a wùt shi-má gùng chi ra râ nghut lhê. 5Yhang gi, Isira-elaq shiwa byù hpúng mai, mara hkyut hkunggâ é matú bainám lo í du eq myi nyhé hkunggâ é matú saulo radu yù ra râ nghut lhê.
6Haû mù, Arun gi, yhâng é mara hkyut hkunggâ é matú nohtó lé nhông byi mù, haú lé, yhang eq yhâng é yhûmbyù wui é mara hkô htaí hkungga kut ra râ nghut lhê. 7Hau htâng, yhang gi, bainám lo í du lé, zùphpong zúm hkum, haû Yhûmsîng Garaî é hí má shap shit ra râ nghut lhê. 8Hau htâng, yhang gi, bainám haû í du lé, Yhûmsîng Garaî é matú radu, nhang pyám râ matú radu kut hkyîn shosé shê mù, hkyin yù ra râ nghut lhê. 9Arun gi, Yhûmsîng Garaî é matú záng é bainám lé, mara hkyut hkunggâ é matú nhông byi râ nghut lhê. 10Nghut kôlhang, nhang pyám râ âng é bainám lé gi, haû Yhûmsîng Garaî é hí má duì gù lé shap shit luî, hkô htaí hkunggâ é matú chûng mù, yòso shut nhang pyám râ nghut lhê.
11Arun gi, yhâng é mara hkyut hkunggâ é matú nohtó lé yu lé mù, yhang eq yhâng é yhûmbyù wui é mara hkô htaí hkungga kut luî, nohtó haú lé, yhâng é mara hkyut hkunggâ é matú sat ra râ nghut lhê. 12Yhang gi, namngón shôm myihkoq má, Yhûmsîng Garaî hí má jòq é hkungga gyàp htoq mâ é gyúng é myigye kat pyîng yù mù, nú é namngón jung mún í tsup byíng shoq tsup yû luî, pán-gyang ahkaû shut yu wàng ra râ nghut lhê. 13Yhang gi, a shi byùq râ matú, namngón jûng é myihkau lé, haû sàksé dò ahtoq mâ é jeju dò a-myhi má hkaû gyun nhâng shoq, namngón jung lé, Yhûmsîng Garaî é hí mâ é myi má kat nyhé ra râ nghut lhê. 14Yhang gi, nohtó hau é sui ra-am lé yù mù, yhâng é lòqnyhuî èq jeju dò a-myhî é buìhtoq hkyam má hpyûn gyun ra râ nghut lhê; hau htâng, yhang gi, sui ra-am lé, lòqnyhuî èq jeju dò a-myhi hí má nyhit dâm hpyûn gyun ra râ nghut lhê.
15Hau htâng, yhang gi, shiwa byu pê é matú mara hkyut hkungga kut râ bainám lé sat mù, hau é sui lé, pán-gyang ahkaû shut yu wang ló luî, nohtô é sui lé kut é su, jeju dò a-myhi má le, hau é hí má le, hpyûn gyun râ nghut lhê. 16Haú dông mai, yhang gi, Isira-elaq byu pê é a sansêng é hkyô eq yhángmòq târâ lu laî é gumlau toq hkyô bànshoq é yánmai, Chyoiyúng Htâng é Jowo é matú, mara hkô htaí hkungga kut râ nghut lhê. Hau htoq agó, yhang gi, yhángmòq é a sansêng é agùng má jòq tô é Zùphpong Zúm é matú le, haú dông kut râ nghut lhê. 17Ó yùq le, Chyoiyúng Htâng é Jowò má mara hkô htaí hkungga kut râ matú Arun wang é hkûn mai, yhang eq yhâng é yhûmbyù wui é matú le, Isira-elaq shiwa byù hpúng bànshoq é matú le, mara hkô htaí hkungga kut mù, dum htoq lo é hkûn jé shoq, zùphpong zúm hkaû má ge nyi to râ a nghut.
18Hau htâng, yhang gi, haû Yhûmsîng Garaî é hí má jòq é hkungga gyàp má htoq lé mù, hau é matú mara hkô htaí hkungga kut luî, nohtó sui ra-am eq bainám sui ra-am lé yù mù, hkungga gyàp é hkyuî pé bànshoq má bùt râ nghut lhê. 19Yhang gi, hkungga gyàp haú lé le, yhâng é lòqnyhuî èq sui ra-am lé nyhit dâm hpyûn gyun luî, lhoq sanséng mù, Isira-elaq byu pê é a sansêng é hkyô mai, haú lé lhoqchyoi lhoqyúng yû râ nghut lhê.
20Arun gi, Chyoiyúng Htâng é Jowo é matú le, zùphpong zúm é matú le, hkungga gyàp é matú le, mara hkô htaí hkungga ban kut jáng, haû kângsoq dui é bainám lé yu lé râ nghut lhê. 21Yhang gi, yhâng é lòq í lòq lé, haû kângsoq dui é bainám é ulhum htoq má ke byi mù, Isira-elaq byu pê é yubàk mara bànshoq nghut é, yhángmòq é agè ashop hkyô eq gumlau toq hkyô bànshoq lé mara yín yû luî, hau é ulhum htoq má ke byi mù, wò byî tô é byù lé, yòso shut bainám haú lé kôn ê nhâng mù, nhang pyám râ nghut lhê. 22Bainám haû gi, yhángmòq é yubàk mara bànshoq lé chamchyuîyui é jowò shut wun ê râ nghut mù, byù haú yùq gi, bainám haú lé yòso shut ê nhang pyám râ nghut lhê.
23Hau htâng, Arun gi, zùphpong zúm má wàng mù, yhang, Chyoiyúng Htâng é Jowò má wang é hkûn wùt é nú nhâm é jihkyîng mèbu pé lé hkyut mù, haú má tô to râ nghut lhê. 24Yhang gi, chyoiyúng é jowò má gùng chi luî, yhâng é mèbu wùt râ nghut lhê; hau htâng, yhang gi, htoq lô luî, yhang eq sêng é myi nyhé hkungga le, shiwa byu pé eq sêng é myi nyhé hkungga le, nhông byi luî, yhâng é matú le, shiwa byu pê é matú le, haú lé mara hkô htaí hkungga kut byi râ nghut lhê. 25Yhang gi, mara hkyut hkunggâ é xû lé le, hkungga gyàp htoq má nyhé râ nghut lhê.
26Yòso má bainám haú lé ê nhang pyâm é sû gi, yhâng é mèbu pé lé chî pyám mù, yhâng é gùng lé le chi ra râ nghut lhê; hau htâng má shèq, xuq tô é wàp má ge wàng râ nghut lhê. 27Haû mara hkô htaí hkungga kut râ matú Chyoiyúng Htâng é Jowò má yu wang é suî é mara hkyut hkungga nohtó eq bainám é gùng lé, wàp shinggan má wàq htoq ê mù, sho-kuq, sho eq hkyi pé lé nyhê hkyô pyám ra râ nghut lhê. 28Haú pé lé nyhê hkyô pyâm é sû gi, yhâng é mèbu lé chî pyám mù, yhâng é gùng lé le chi ra râ nghut lhê; hau htâng má shèq, xuq tô é wàp má ge wàng râ nghut lhê.
29Núngmòq é matú ahtum abyùq hkyô tô é hkunmó gi, shí dông nghut lhê; núngmòq yhang nghut kôle, núngmòq chyáng lé bíng é bang nghut kôle, lha-mó nyhit hkyap hkyap raxê nyí má, hai mú le a zuî é za, yhûmsing gùng lé hkûm zing pyám ra râ nghut lhê. 30Hkâsu mù gâ le, haú nyí má, núngmòq lé lhoq sanséng byi râ nghut é, núngmòq é matú, mara hkô htaí hkungga kut byi râ nghut lhê. Haú hkûn, núngmòq gi, haû Yhûmsîng Garaî é hí má núngmòq é yubàk mara bànshoq mai sanséng râ nghut lhê. 31Buìnyì haû gi, nô yù râ bánno buìnyì nghut mù, yhûmsing gùng lé hkûm zing pyám ra râ nghut lhê; haû gi, ahtum abyùq hkyô tô é hkunmó nghut lhê. 32Yhâng wâ é hkô htaí hkyangjong mó kut râ matú, sô kat namngón xû bùt hui mù, wò byi huî é sû gi, mara hkô htaí hkungga kut ra râ nghut lhê. Yhang gi, chyoiyúng nú nhâm é jihkyîng mèbu wùt mù, 33Chyoiyúng Htâng é Jowo é matú le, zùphpong zúm é matú le, hkungga gyàp é matú le, hkyangjông pé eq shiwa byù hpûng bànshoq é matú le, mara hkô htaí hkungga kut ra râ nghut lhê.
34Núngmòq é matú ahtum abyùq hkyô tô é hkunmó gi, shí dông nghut lhê; mara hkô htaí hkungga gi, Isira-elaq byu pê é yubàk mara bànshoq é matú razàn má radá za kut râ nghut lhê.” ga taî ri.
Haû mù, Arun gi, Mosheq lé Yhûmsîng Garai hkunmó hkyô tô é eq rajung za kut bê nghut ri.
Currently Selected:
Nhông Jaú 16: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.