Marikuq 3

1Yesuq gi, târâjong má radàm dum wang e le, lòq ralòq ajum shi byùq é byù rayùq nyi to láng ri. 2Haú hkûn, haú má nyi tô é bang ra-am gi, Bánno Buìnyì má, Yesuq mai haú yùq lé lhoqgê byi râ lhú ga, mara hûn râ matú gyám wú nyi akô nghut ri. 3Yesuq gi, haû lòq jum shî sû lé, “Bànshoq bâng é hí má, toq yàp shit àq.” ga taî kat ri.

4Hau htâng, Yhang gi, haú má nyi tô é bang lé, “Bánno Buìnyì má, ge é múzó kut râ, a ge é múzó kut râ, byù chyungxe hkyî râ eq byù sat râ hkyô pé má, hká lhum kut le shèq târâ wang lhê lhú?” ga myî kat jáng, yhángmòq kúm gi, jit le a ga kó nghut ri.

5Haû mù, Yhang gi, nhik-yô nau é myìt èq haú bang lé lhing wú mù, yhángmòq myìt htan é hkyô lé, wú yón luî, haû lòq jum shî sû lé, “Náng é lòq nyhang kat àq.” ga taî kat jáng, haú yùq gi, lòq nyhang kat luî, yhâng é lòq gi, shoq za ge byùq bê nghut ri. 6Hau htâng má, Hparishe pé gi, htoq ló kômù, Yesuq lé hkâsu kut wó sat pyám râ hkyô lé, Herot é byu pé eq chôm hpyê lhûm bum akô nghut ri.

Byù Ajùm Ayò, Yesuq Htâng Cháng Kô É Hkyô

7Yesuq gi, Yhâng é chángzô pé eq rahá, nhông shut dum e ló le, Galile mau mâ é byù ajùm ayò gi, Yhâng htâng châng e ló bum akô nghut ri. 8Hau htoq agó, Yuda mau mâ é bang, Yerusalem wà mó mâ é bang, Idumi‑a mau mâ é bang, Yodan làng hé hpoq mâ é bang, Turuq wà mó eq Sidon wà mó awui ayàm jé shoq mâ é bang, ajùm ayò gi, Yhang kut nyi é hkyô bànshoq lé wó gyo kôjáng, Yhâng chyáng jé lé bum akô nghut ri. 9-10Yesuq gi, byù myo myo lé lhoqgê byî é yánmai, nòhpyo huî to bang gi, Yhang lé wó záng shoq ga, chyîn chyap wang ló bum akô. Byù lûm myo luî, Yesuq gi, Yhang lé a nhê pyet pyám sháng gàq ga, Yhâng é chángzô pé lé lhaî ralhum hen to nhang ri. 11Agè ashop é nàt pé gi, Yhang lé myàng hkangmó, Yhâng é hí má lêng ngòp to luî, “Nàng gi, Garai Gasâng é Yhangzo nghut ri.” ga luî, taî garû akô. 12Nghut kôlhang, Yesuq gi, Yhang ó yùq nghut é hkyô lé a taî byông htoq râ matú, tân hkúm kat ri.

Lagyo Kut Râ Byù Raxe Í Yùq Hkyin Yu É Hkyô

Mht 10:1-4; Luk 6:12-16

13Yesuq gi, bùm shut dòq ló mù, Yhang ô nau é bang lé ji kat luî, haú bang gi, Yhâng chyáng jé lé lo bum akô nghut ri. 14Haú hkûn, Yesuq gi, byù raxe í yùq lé hkyin yù luî, lagyo ayá byî ri; haú bang gi, Yhang eq rahá nyì râ matú le, mungdang hkô râ matú Yhang nhang htoq kat râ eq, 15nàt gâng pé lé hkat htoq râ ahko ahkáng wó râ matú le, nghut akô nghut ri. 16Haû raxe í yùq gi, Simun (Yesuq mai Petiruq ga myìng myhíng byi sû), 17Zebedi é yhang zô nhiktâng Yakuq eq yhang gu Yohan (Yháng nhiktâng lé Yesuq mai Bu-aneriga ga myìng myhíng byî ri; hau é lichyúm gi, maugum zô nhik gâ é nghut lhê.), 18Andire, Hpilip, Barihtolume, Mahte, Htomaq, Alahpe é yhang zo Yakuq, Htade, Zelutuq#3:18 Zelutuq gâ é gi, yhûmsîng zui saî é hkyô má gyai yhang myìt lòm shîrong é sû lé gâ lhê. Haú u lé, Isira-elaq byu pé gi, mîngdán lùthkyô wó râ matú shi-kùt nyi é hpúng bang lé, Zelutuq gâ lhê. dùt é Simun eq, 19Yhang lé àp pyám râ sû, Yudaq Isikarut pé nghut akô.

Yesuq Eq Bezebulaq

Mht 12:22-32; Luk 11:14-23, 12:10

20Hau htâng, Yesuq gi, yhûm má wang ló le, byù ajùm ayò dum zîng lé lô kômù, Yhang eq Yhâng é chángzô pé gi, zang zo hkyíng lháng a wó kó nghut ri. 21Yhâng é yhûmbyù wuì gi, haú hkyô lé wó gyo kôjáng, “Yhang, myìt a gying lo nghut ri.” ga luî, Yhang lé hung shuî yù râ matú, e akô nghut ri.

22Yerusalem wà mó mai gyó lé lo é târâ sará pé gi, “Shí yùq gi, Bezebulaq gâ é nàt gâng pê é zau lúng sû nghut rî-nhung! Yhang gi, nàt zaû é wum-o a-tsam èq za, nàt gâng pé lé hkat htoq pyâm é nghut ri.” ga taî bum akô nghut ri.

23Haû mù luî, Yesuq, yhángmòq lé wùt yù mù, dangtú dông taî é gi, “Tsádán gi, Tsádán lé hkâsu kut wó hkat htoq râ lhú? 24Mîngdán ralhum gi, ahkaû má byòq gâng lhûm nyì kô é nghut jáng, mîngdán haû wó gîng nyì râ a nghut. 25Yhûmhtu ralhum má le, i-kun byù yhangchang byòq gâng lhûm nyi é nghut le gi, yhûmhtu haû wó gîng nyì râ a nghut. 26Haû eq rajung za, Tsádán le, yhânggùng yhang lhoqhpyoq luî, gam hkoq nyi é nghut le gi, yhang wó nyi nyì râ a nghut, htûm byùq râ za nghut lhê. 27Ó yùq nghut kôle, wum-o bò sû lé hí tui zing pyâm é a nghut le gi, yhâng é yhûm má lú wâng mù, yhâng é sùtzè lé wó lú yû râ a nghut: Haú yùq lé hí tuî zing pyám jáng shèq, yhâng é sùtzè lé wó lú yû râ nghut lhê. 28Ngò, núngmòq lé teng za taí kôlé, byu pé kut shut é mara bànshoq eq rhoî dang taî pyâm é pé lé gi, mara wó hkyut pyám byî lhê. 29Nghut kôlhang, haû Chyoiyúng Sô lé rhoî dang taî pyâm é sû gi, hkâ-nhám le, mara hkyut byî é wó hui râ a nghut; haú yùq gi, ahtum abyùq yubàk wó sû nghut nyi ri.” gâ ri.

30Yhang haû su ga taî é gi, yhángmòq mai, “Yhang gi, agè ashop é nàt wó sû nghut ri.” ga kô é yánmai nghut ri.

Yesuq É Yhâng Nu Eq Yhang Gû Pé

Mht 12:46-50; Luk 8:19-21

31Hau htâng, Yesuq é yhâng nu eq yhang gû pé gi, jé lé mù, yhûm hkun má yàp to kôluî, Yesuq htoq lô râ matú, byù rayùq lé wang taí nhang akô nghut ri. 32Byù ajùm ayò gi, Yhâng é lhînghkyùq má zung tô akô; haú bang gi, Yhang lé, “Wú aq, náng nu eq nunggû pé gi, nang lé hui naû luî, shinggan má láng bum akô.” ga taî kyô akô nghut ri.

33Haú hkûn, Yhang gi, “Ô pé gi, Ngá nu eq Ngá gû pé nghut akô lhú?” ga myî kat ri.

34Hau htâng, Yhang gi, Yhâng é lhînghkyùq má zung hkyùq tô é bang lé wú mù, taî é gi, “Shí bang gi, Ngá nu eq Ngá é gu-mang wuì nghut bê! 35Garai Gasang ô nau é hkyô châng é sû ó yùq nghut kôle, Ngá gu, Ngá mang, Ngá nhá, Ngá nu chyat nghut bê.” gâ ri.

Currently Selected:

Marikuq 3: znot

Highlight

Copy