Gyung So 14
14
Shiwa Byu Pé Gumlau Toq É Hkyô
1Haú myîn, shiwa hpúng gón gi, htê mó lhoqmyhâng mù, wùt ngau garû bum akô nghut ri. 2Haû Isira-elaq byu pé bànshoq gi, Mosheq eq Arun lé pùt é dang taí kômù, shiwa hpúng gón gi, “Ngá-mòq gi, Egutuq ming má nghut nghut, shî yòso má nghut nghut ru shi byùq le lháng nghut bê wá! 3Haû Yhûmsîng Garai gi, ngá-mòq lé shâm má za shî byùq râ matú shí mau má shuî jé lhê lhú? Ngá-mòq é yhûmsîng myhî pé eq zodù wuì gi, lú shuî ló byùq é hui bekó râ nghut lhê. Egutuq ming shut taû ló le ru gê âbe hkaî?” ga taî bum akô nghut ri. 4Hau htoq agó, yhángmòq gi, rayùq eq rayùq, “Ngá-nhúng gi, ushuq rayùq hkyin yù mù, Egutuq ming shut shèq taû ló sháng.” ga taî lhûm bum akô nghut ri.
5Haú hkûn, Mosheq eq Arun nhiktâng gi, haú má zîng tô é Isira-elaq shiwa hpúng gón é hí má ngóm gòp tô akô nghut ri. 6Haû jó wú e é bang má bo lom é, Nun é yhang zo Yoshuq eq Yehpuna é yhang zo Hkalep gi, yhángnhik é mèbu lé lâng cheq pyám kômù, 7Isira-elaq shiwa hpúng gón lé, “Ngá-mòq jó ê wú laî lo é maumyî gi, myì gè mau gè mó yhang nghut ri. 8Haû Yhûmsîng Garai gi, ngá-nhúng lé gabú myìt ngui é nghut jáng, no-naú eq byo-î yui é mau haú má ngá-nhúng lé shuî wang ló mù, sing yù nhâng râ nghut lhê. 9Haû mù, Yhûmsîng Garai lé za gumlau hkâtoq kó. Haú mau mâ é byu pé lé hkâgyùq kó; haî mù gâ le, yhángmòq lé ngá-nhúng myui pyám râ nghut lhê. Yhángmòq lé mâgum tô é hkyô gi, byùq byùq bê; nghut kôlhang, haû Yhûmsîng Garai gi, ngá-nhúng eq rahá nghut nyi lhê. Yhángmòq lé hkâgyùq kó.” ga taî akô nghut ri.
10Nghut kôlhang, shiwa hpúng gón gi, yhángnhik lé lùqgòk èq dú sat râ ga taî bum akô nghut ri. Haú hkûn, Yhûmsîng Garaî é hpungwup shingkang gi, zùphpong zúm má Isira-elaq byù bànshoq bang lé htoq shit ri. 11Haû Yhûmsîng Garai gi, Mosheq lé, “Byù shí bang gi, hkâ-myháng jé shoq Ngo lé wú tiq he-ngìk pyâm nyì kôrâ lhú? Yhángmòq chyáng Ngò kut shit é làklaí alhô agàn pé lé myang to kôluî wá, hkâ-myháng jé shoq Ngo lé a lùmjíng kut nyî kôrâ lhú? 12Ngò gi, yhángmòq lé wúm èq shî nhâng luî, haú mau lé a sîng nhâng lo râ nghut lhê; nghut kôlhang, nang lé gi, byù myû mó dùt nhâng luî, yhángmòq htoq wum-o a-tsam je bò nhâng râ nghut lhê.” ga taî ri.
13Haú hkûn, Mosheq gi, Yhûmsîng Garai lé, “Haû jáng, Nàng gi, Náng é hpungwup a-tsâm èq byù shí bang lé Egutuq byu pê chyáng mai shuî htoq lo é nghut mù, haú hkyô lé Egutuq byu pé wó gyo râ za nghut lhê. 14Yhángmòq gi, shí mau má nyi é bang lé haú hkyô taî kyo râ nghut lhê. Shí mau mâ é bang gi, Nàng Yhûmsîng Garai, yhángmòq eq rahá nghut nyi é hkyô lé le, Nàng Yhûmsîng Garai lé, yhángmòq mai myòqdong hkyúm myàng bê hkyô lé le, yhángmòq é ahtoq má Náng é mhut jòq nyi é hkyô lé le, Nàng, nyí lé mhuthtui zìng mai, myín lé myi zîng mai, yhángmòq é hí má e ló byî é hkyô lé le wó gyô to gû nghut bê nghut ri. 15Nàng, byù shí bang bànshoq lé rayùq lháng a myhit to loshoq sat pyâm é nghut jáng, shî Náng é hkyô lé wó gyô é byù myû wuì gi, 16‘Haû Yhûmsîng Garai gi, Yhang dâkam é dông danghtum htûm tô é mau má byù shí bang lé a wó shuî jé é yánmai, yòso má yhángmòq lé sat pyám bê nghut ri.’ ga taí kôrâ nghut lhê.
17Ahkuî, Nàng taî pyo tô é eq rajung za Yhûmsîng Garaî é wum-o a-tsam lé tûn shit laq. Nàng taî pyo é gi, 18‘Haû Yhûmsîng Garai gi, luì za nhikjum a yô é htoq agó, chyitdàp myìt byíng to luî, yubàk mara eq gumlau toq hkyô lé mara hkyut byî é Sû nghut lhê. Nghut kôle, Yhang gi, mara bò sû lé mara dam a byî a kut é htoq agó, mó wui é marâ é matú, zo wuî lé sum myi bán jé shoq mara dam byî é Sû nghut lhê.’ gâ ri. 19Náng é chyitdàp myìt mó má cháng luî, Egutuq ming mai yhángmòq htoq lo é hkûn mai ahkuî jé shoq, Nàng, yhángmòq lé mara hkyut pyám byî nyi é su, byù shí bâng é mara lé hkyut pyám byi shi aq.” ga taî ri.
20Haú hkûn, Yhûmsîng Garai gi, “Nàng dûng é eq rajung za, Ngò, yhángmòq lé mara hkyut pyám byi bê nghut lhê. 21Nghut kôlhang, Ngò rû dui nyì mù, myìdàm gón má Yhûmsîng Garaî é hpungwup shingkang byíng zan tô é eq rajung za, 22Egutuq ming mai yòso shí má jé shoq, Ngò kut shit é làklaí alhô agàn eq Ngá é hpungwup shingkang lé myang é sû yùq hkangmó gi, Ngá é jì-no a gyô é htoq agó, Ngo lé raxê dàm chyam lìk wú kô é yánmai, 23yhángmòq é îchyí îwâ pé lé dâkam é dông danghtum htûm tô é mau lé, gè gè yhang a myàng kôrâ nghut lhê. Ngo lé wú tiq he-ngìk pyâm é sû ó yùq le, haú lé myàng râ a nghut. 24Nghut kôlhang, Ngá é duìnhâng zoshâng Hkalep gi, gótû i-myìt nhiklhum bò sû nghut mù, i-myìt nhiklhum bànshoq èq Ngá é htâng châng é sû nghut luî, Ngò gi, yhang lé, yhang ê jé bê mau má shuî ló mù, yhâng é awùt ashîn pé lé, maumyî haû sing yù nhâng râ nghut lhê. 25Haû Amalek byu pé eq Hkanan byu pé gi, langhkaû má nyi tô bum lhê nghut é yánmai, nàpmá toq luî, taû ló mù, Nhông Nè yàm cháng luî, yòso shut htoq e ló keq.” ga tu taî ri.
26Haû Yhûmsîng Garai gi, Mosheq eq Arun lé, 27“Hkâ-myháng jé shoq, agè ashop é byù hpúng shí bang, Ngò eq séng luî pùt é dang taî nyì kôrâ lhú? Ngò gi, pùt é dang taî é Isira-elaq byù shí bâng é mara hûn dang lé wó gyo bê nghut lhê. 28Haû mù, yhángmòq lé, ‘Ngò rû dui nyi é eq rajung za, Ngò wó gyô é núngmòq taî é jung hkangmó dông núngmòq lé Ngò kut râ nghut lhê ga haû Yhûmsîng Garai taî pyo ri. 29Núngmòq é màng pé gi, yòso shî má lèq gyó pyâm to râ nghut lhê; Ngò eq séng luî pùt é dang taí luî, jihpán má gùq lhôm é í xê zàn lai bê sû yùq hkangmó gi, 30núngmòq lé sîng nhâng râ nghû Ngò lòq tû luî dâkam tô é mau má, Yehpuna é yhang zo Hkalep eq Nun é yhang zo Yoshuq mai lai luî, ó yùq le wó jé râ a nghut. 31Gye pê èq lú shuî ló berâ ga núngmòq taî é núngmòq é zodù wuì lé Ngò shuî jé wâng mù, núngmòq he-ngìk pyâm é mau haú má ló ngón nhâng râ nghut lhê. 32Nghut kôlhang, núngmòq é màng pé gi, yòso shî má lèq to râ nghut lhê. 33Yòso shî má núngmòq é màng pé ban htûm byùq é hkûn jé shoq, núngmòq é zodù wuì gi, núngmòq a jujúm é yubàk é yánmai, myi xê zàn yhang hpu zô lhing wún kôrâ nghut lhê. 34Maumyî haú lé núngmòq myi xê nyí jó ê wú é má, ra-nyí lé razàn dông kut luî, myi xê zàn tup, núngmòq gi, yhûmsing é yubàk mara hpu zo mù, Ngò, núngmòq lé htuqhtîng é hkyô haî nghut é lé sé kôrâ nghut lhê.’ nghû taî kyo keq. 35Ngò, Yhûmsîng Garai gi, taí bê é eq rajung za, Ngo lé gumlau toq é, agè ashop é byù hpúng gón shî lé, gè gè yhang, haú hkyô pé kut râ nghut lhê. Yhángmòq gi, yòso shî má htûm byùq kôrâ nghut lhê; yhángmòq gi, shí jowò má shi byùq kôrâ nghut lhê.” ga taî ri.
36Haû mù, maumyî haú lé jó ê wú râ matú Mosheq nhang kat é bang mâ é, dum taû lò mù, haú mau eq sêng é a ge é hkyang lo shit luî, shiwa hpúng gón lé pùt é dang taí nhang é bang nghut é, 37haú mau mâ é a ge é hkyang shit é mara wò wó é bang gi, haû Yhûmsîng Garaî é hí má wúm hui zo luî, shi byùq bùm bekô nghut ri. 38Haú mau lé jó ê wú é bang mâ é, Nun é yhang zo Yoshuq eq Yehpuna é yhang zo Hkalep za wó byun akô nghut ri.
39Mosheq gi, Isira-elaq byu pé bànshoq bang lé haú hkyô shit kyo jáng, yhángmòq gi, gyai yhang yón ngaû bekô nghut ri. 40Yhángmòq gi, htang nàpkyó noq le, bum mau mâ é je myhang é jowò má dòq ló luî, “Ngá-mòq gi, ahkuî, haû Yhûmsîng Garai danghtum htûm tô é mau má dòq ló râ rì rì nghut bê. Gè gè yhang, ngá-mòq gi, mara shut bê ô!” ga taî akô nghut ri.
41Nghut kôlhang, Mosheq gi, “Núngmòq gi, haî mù, haû Yhûmsîng Garaî é hkunmó lé a cháng kô é lhú? Núngmòq kut é dông dùt râ a nghut! 42Hkâdòq ê kó; hkâsu mù gâ le, haû Yhûmsîng Garai gi, núngmòq eq rahá a nghut. Núngmòq dòq ê jáng gi, núngmòq é gye pê èq lhom zân ûng râ nghut lhê. 43Amalek byu pé eq Hkanan byu pé gi, haú má núngmòq lé lhom htim râ nghut lhê. Núngmòq gi, haû Yhûmsîng Garaî chyáng mai lhing ló byùq bekô nghut mù, Yhang gi, núngmòq eq rahá a bo lòm râ nghut é yánmai, núngmòq gi, shâm ô má lèq bùm râ nghut lhê.” ga taî ri.
44Nghut kôlhang, yhángmòq gi, Mosheq le, dangshikaq bo é Yhûmsîng Garaî é sàksé dò le, xuq tô é wàp mai a huî htòt é nghut kôle, yhángmòq é i-myìt lhoqhtân luî, haû bum mau mâ é je myhang é jowò má dòq e akô nghut ri. 45Haú hkûn, bum mau má nyi é Amalek byu pé eq Hkanan byu pé gi, gyó lé lô kômù, yhángmòq lé lé htîm ûng kôluî, Horama wà jé shoq châng hkat bàt akô nghut ri.
Currently Selected:
Gyung So 14: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.