KASAUKAN 26
26
Minayan i Isak giu' ra Bandar Girar
1Giu' ra pagun no, nasauk poyo bitilan, koson nasauk ra paat ri Abragam ragili. Ongoi i Isak ra bandar Girar, tuum ra Raja' Abimilik, raja' ru ulun ru Palistin no. 2Intalang Tuhan riso am indagu, “Pai' ongoi ra pagun ru Misir, ayan ayuk ra pagun tuluon Kuno rirun. 3#Kas. 22:16-18Ayan no ragiti, alungin am barakaton Tokou. Pataakon Ku titikop ru wilayah ti rirun am papag muno. Suguton Ku atan ondo' binantu' Kuno ri ama' muli i Abragam. 4Aniin Tokou ra papag masuang, koson kinasuang ru butitin giu' ra limbowon am pataakon Ku risilo titikop ru wilayah ti. Ngaangai' bansa' ra tana' ti makibarakat Raki' koson ra Aku nambarakat noyo ra papag muno. 5Barakaton Tokou, sabap giminagaya' i Abragam Raki' am binaya' no ngaangai' ukum am susuban Kuno.”
6Ginio ra ayan boo i Isak giu' ra bandar Girar. 7#Kas. 12:13; 20:2Paat ra mangkuot mamagun ru Girar riso intor ri Ribika, taamon ri Isak ra boborok ruandu' nano. Marara' io mambala' ra i Ribika andu' nano, sabap ra malaa' io potoyon ru ulun koson mangalap ri Ribika ondo' mantalur kaga' no. 8Kukula' buoi noyo i Isak minayan ra giu' no, sangarawan raginio ibol Raja' Abimilik ra gigimpalan nano, am kakito no i Isak mangalok-alok ri Ribika. 9Piawo' boo ru Raja' Abimilik i Isak am indagu, “Andu' mu i Ribika, kua indagu kou ra boborok ruandu' muno?”
Taam i Isak, “Guang ku potoyon aku amon ru mambala' ra io andu' kuno.”
10Indagu raja' no, “Atan binaal muno ramon? Tutului marulug ru sangulun intor ra ulun kuno andu' muno, mosonsol kou sabap ra sala maino.” 11Pakaraa' ru Raja' Abimilik ngaangai' ulun nano, kono, “Osoi lumaat ri Isak ti kapoam andu' nano, ulun no potoyon.”
12Pagitanom i Isak ra sampug ra pagun raginio am bilor raginio niayuk nangkumos io ra maatus kinauli' no intor ra tinanom nano, sabap ra binarakat io ru Tuhan. 13Kinalangkaya' ri Isak no riminuang poyo am liminangkaya' io kaga'. 14Nangusolon boo ulun ru Palistin no riso, sabap ra io masuang ulipon, kambing, domba am sapi'. 15Pumpuni' boo ru ulun ru Palistin no ngaangai' tulubong ondo' kinali ru ulipon ri Abragam ama' nali, bulintok i Abragam lakat poyo naayag i.
16Indagu boo i Abimilik ri Isak, “Iruani' pagun maiti, sabap ra makakuasa' kou poyo intor ramon.” 17Iruani' boo ri Isak pagun raginio am pangkim io ra limayak Girar am ayan ra giu' no ra kukula' buoi. 18Kalio' saguli' ri Isak tulubong ondo' kinali ra bulintok i Abragam naayag, am ondo' pinumpunan ru ulun ru Palistin ra kakapatoi ri Abragam. Inggalani' ri Isak tulubong-tulubong raginio koson ra pinainggalan ru ama' nali.
19Paat ra ulipon-ulipon ri Isak mangkali ra tulubong ra limayak raginio, pakakali ilo ra taur ru timug ondo' bubuluak mingkual. 20Kaa' ulun magagalung ru bibiag ra bandar Girar makimansangor ra ulun magagalung ru bibiag ri Isak, konilo, “Akai ra timug ti.” Ginio ra inggalani' ri Isak tulubong raginio “Pansangaran”.
21Pangkali poyo ulipon-ulipon ri Isak ra tulubong ra bokon, am pansasangor ilo niayuk intor ra tulubong raginio. Ginio ra inggalani' ri Isak tulubong raginio “Pantulaan”. 22Banding io intor ra giu' no am pangkali ra tulubong ra bokon poyo. Ragino ti, kolondo' mansasangor. Ginio ra inggalani' ri Isak tulubong no “Kalabusan”. Indagu io, “Raino, nanaak Tuhan ritakau ra kalabusan mayan ra pagun ti, am malabaan takau ragiti.”
23Ugar i Isak intor ra giu' no am ongoi io ra bandar Birsyiba. 24Rondom raginio minintalang Tuhan riso am indagu, “Aku noyo i Aki Kapuuno' ri Abragam ama' muli. Pai' kalaa', sabap ra sindungin Tokou, barakaton Tokou am kasuangon Ku papag muno, sabap ra ginio noyo bantu' Kuli ri Abragam ulipon Kuli.” 25Pambaal boo i Isak rondo' altar ra giu' no, am samba ra Tuhan. Pangkim i Isak ra giu' no am pangkali ulipon-ulipon nano ra tulubong ra bokon.
Nabantuan ri Isak am Raja' Abimilik
26 #
Kas. 21:22
Ratong boo Raja' Abimilik intor ra bandar Girar nabaya' ri Agujat pambilin nano, am i Pikgol tingganai ru saujor nano, koson tumuum ri Isak. 27Indagu boo i Isak risilo, “Kua ratong kau tuum raki'? Sala' kia ka mangasisang kau raki' am paugaro' min aku intor ra pagun mino?”
28Taam ilo, “Raino makapandai akai ra Tuhan manindung rirun, ginio sabap ra guang mai mabantu' takau. Pagibot no, 29koson okou kalo lumaat ramon am koson niayuk akai kalo lumaat rirun. Giminonsoi akai rirun am nopoloso rirun mugar ra kaansayan. Mapandayan toojo ra nambarakat Tuhan no rirun.” 30Pambaal boo i Isak risilo ra rondo' bunsag, am pagagakan am pagiginum ilo. 31Suabon no, nokorondom ilo sigagama' nabantu' ondo' makasegel ra ibot. Pintor i Isak risilo am pantuliar ilo koson ra rarangan.
32Paat ra orou raginio niayuk, ratong ulipon-ulipon ri Isak am pambala' riso ra tulubong ondo' kinali nilono. Konilo, “Nakatuum akai ra timug.” 33Inggalani' ri Isak tulubong raginio “Pagibatan”. Ginio noyo pupuun ru bandar raginio ininggalanan ra Birsyiba.#Birsyiba: Ralalom ragu Ibrani, inggalan ti makaarati' ra “Tulubong Pagibatan” kapoam “Tulu' Tulubong” (Ilai' ra 21:31).
Ruo ngaulun andu' ri Isau intor ra bansa' ru bokon
34Paat ra umur ri Isau apat ngoopor ngambilor, panangandu' io ruo ngaulun ruandu' ru ulun ru Git, i Judit anak ruandu' ri Biiri am i Basmat anak ruandu' ri Ilon. 35Karuruo ngaulun andu' ri Isau no mapangiluk ra guang ri Isak am i Ribika.
Currently Selected:
KASAUKAN 26: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
