KASAUKAN 29
29
Nakasaboi i Jakub ra baloi ri Laban
1Paginjul poyo i Jakub am ongoi ra pagun tampilon sirangon ru pagun ru Kanaan. 2Pulali' no nakakito ra tulubong ra limayak no, am talu ngantimungan domba nagupu' ra kiing no. Tulubong raginio papainuman ru ulun magagalung no ra domba nilo, am tiningkapan tulubong no ra batu maayo. 3Makatimung ngaangai' domba no ra intok raginio, luiron ru ulun-ulun magagalung batu pinatingkop no am painumon nilo domba-domba. Mopongo raginio luiron nilo patingkopo' saguli'.
4Pangkuot boo i Jakub ra ulun-ulun magagalung, “Rangan kau, ati intor minti?”
Taam ilo, “Intor akai ra Aran.”
5Pangkuot poyo i Jakub, “Nakaulig kau kia ri Laban anak ungkuyon ri Nagor?”
Taam ilo, “Iou, nakaulig akai.”
6Pangkuot io poyo, “Moonsoi io kia?”
Taam ilo, “Moonsoi ayuk. Ilai', ginio i Ragil, anak ruandu' ri Laban no minatong nangayur ra domba ru ama' nano.”
7Indagu i Jakub, “Lakat poyo matawang am kalo poyo nasuku' paat ra domba-domba paumposon ra kandang. Kua pai' min painumo' am pongkotopo' saguli'?”
8Taam ilo, “Kalo mabaal mai ginio, suku' makatimung ngaangai' domba am maluir mai batu pinatingkop no, am painumon mai boo domba-domba.”
9Lakat ayuk poyo i Jakub magindagu risilo, ratong i Ragil nabaya' ra domba ru ama' nano. 10Pakakito i Jakub ri Ragil nabaya' ra domba ru kamaman nano i Laban, ongoi i Jakub ra tulubong no, luiro' no batu pinatingkop am painumo' no domba-domba. 11Alaki' no boo i Ragil am pantangi' ra naansukan. 12Indagu io ri Ragil, “Aku anak ri Ribika, pongkotob ruandu' ru ama' muno.”
Pasimbul boo i Ragil uli' ra baloi am pantunung ra ama' nano. 13Kaining ri Laban tanou ri Jakub akon nano, pasimbul io rapog riso. Ganggali' no, alaki' no am ibito' no ra baloi. Katunung ri Jakub ngaangai' ondo' nasauk no, 14indagu i Laban riso, “Sotopot no okou ti raraa' am kual kuno ayuk poyo.” Ayan i Jakub ra giu' no buoi sansila'.
Nangandoi i Jakub ri Laban koson manangandu' ri Ragil am i Liya
15Indagu boo i Laban riso, “Kalo moonsoi nangandoi kou raki' am kolondo' taakin kuno rirun sabap ra pabukat tokou. Kula' kia gaji' pakibayarin muno raki'?” 16Makaanak i Laban ruo ngaulun ruandu', inggalan ru katuaan no i Liya am pupusan no i Ragil. 17Makamato i Liya ra malaut,#malaut; kapoam kalo malaga'. kaa' makainan ri Ragil ra moonsoi am mantalur bulos nano. 18Malaai i Jakub ri Ragil, ginio sabap ra taam io, “Mangandoi aku rirun buoi tulu' ngambilor, amon ru mataak mu anduon ku i Ragil.”
19Taam i Laban, “Moonsoi poyo paanduin ku i Ragil no rirun ka io anduon ru bokon, ayan noyo raki'.” 20Pangandoi boo i Jakub buoi tulu' ngambilor koson manangandu' ri Ragil, am buoi ru ginio ra pamaguangan ri Jakub koson kukula' ngoorou ayuk sabap ra laai no ri Ragil.
21Indagu boo i Jakub ri Laban, “Nakatulu' ngambilor noyo, makitaak aku rirun ra anduon ku i Ragil no.” 22Pambaal i Laban ra bunsag paguguatan am pampiau ra ngaangai' ulun ru giu' no. 23Kaa' rondom raginio, sala' ka i Ragil inataran ri Laban ri Jakub, kaa' i Liya, am rulugo' io ri Jakub. (24Pataako' niayuk ri Laban ulipon ruandu' nano ininggalanan ri Jilpa no ri Liya ra uliponon.) 25Suabon raginio, kalimani' boo ri Jakub ra i Liya rinulug nano. Ongoi io boo ri Laban am indagu, “Kua gitio pinamakuan muno raki'? Nangandoi aku koson manangandu' ri Ragil. Kua ruungo' mu aku?”
26Taam i Laban, “Maya' ra kaulayan ragiti, kalo pasiguluon uoto' boborok no intor ra maayo nano. 27Inaani' polos katuluan ru bunsag paguguatan ti maampus, am pataakon ku niayuk i Ragil no rirun, amon ru masaga' kou mangandoi raki' buoi tulu' ngambilor poyo.”
28Pangiou i Jakub am kaampus bunsag no, pataako' ri Laban anak ruandu' nano i Ragil ri Jakub, masauk ra andu'. (29Pataako' niayuk ri Laban ulipon ruandu' nano ininggalanan ri Bilga ri Ragil ra uliponon.) 30Rulugo' ri Jakub i Ragil am tagamin no kaga' i Ragil intor ri Liya. Pangandoi io boo ri Laban buoi tulu' ngambilor poyo.
Anak-anak ri Jakub
31Pakakito Tuhan ra kalo tinagaman toojo i Liya koson ri Ragil, baalo' ru Tuhan no i Liya makapaganak kaa' i Ragil tabanang. 32Kaapang i Liya am paganak sangulun anak ungkuyon. Kono, “Nakito ru Tuhan no kapaganan kuno, am raino tumogom ralaki kuno raki'.” Inggalani' no boo anak raginio i Rubin.#Rubin: Inggalan ti bolos no koson ragu Ibrani ondo' makaarati' ra “ilai', sangulun anak ungkuyon” am “nakito noyo kapaganan kuno”. 33Kaapang poyo i Liya am paganak sangulun anak ungkuyon. Kono, “Pinataak poyo ru Tuhan no anak ragitio sabap norongog No ra kalo tagamin aku toojo.” Inggalani' no boo anak raginio i Simion.#Simion: Inggalan ti bolos no koson ragu Ibrani ondo' makaarati' ra “rongog”. 34Kaapang poyo i Liya am paganak poyo sangulun anak ungkuyon. Kono, “Raino, maaru' ralaki kuno lumampit toojo raki' sabap talu noyo anak ungkuyon inanak kutu.” Inggalani' no boo anak raginio i Liwi.#Liwi: Inggalan ti bolos no koson ragu Ibrani ondo' makaarati' ra “nabangkil”. 35Kaapang poyo igondo' i Liya am paganak sangulun anak ungkuyon. Kono, “Raino ti, mongompor aku ri Aki Kapuuno'.” Inggalani' no boo anak raginio i Jiuda.#Jiuda: Inggalan ti bolos no koson ra ragu Ibrani ondo' makaarati' ra “ompor”. Kopongo raginio kalo boo naganak i Liya.
Currently Selected:
KASAUKAN 29: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
