JUANIS 3

I Jisus am i Nikodimus

1Mokoondo' sangulun tingganai ru ugama Jaudi intor ra ulun ru Parisi, makainggalan ri Nikodimus. 2Sarandaman ragili ongoi io tuum ri Jisus am indagu, “Mangingila', makapandai akai ra Okou no sinusub ri Aki Kapuuno' mongoi pangila'. Sabap ra kolondo' sangulun pana makapambaal ra kaimuagan koson ra baalon Muno, amon ru kalo indanganon io ri Aki Kapuuno'.”

3Taam i Jisus, “Balain tokou toojo: Kolondo' sangulun pana masauk ra ulun ri Aki Kapuuno'#masauk ra ulun ri Aki Kapuuno'; Harfiah: Pamarintaan ri Aki Kapuuno'. amon ru kalo anakon io saguli'.”#saguli'; kapoam intor ra rasawat.

4Pangkuot i Nikodimus, “Ati kulaan ulun nasukor maanak saguli'? Kalo lair makasubol saguli' ra binunakan ru ina' nano am maanak ra kainduo!”

5Taam i Jisus, “Balain tokou toojo: Kolondo' sangulun pana masauk ra ulun ri Aki Kapuuno' amon ru kalo anakon ulun no intor ra timug am Ambiluo ri Aki Kapuuno'. 6Lalagang anakon ru ulun, kaa' ulun anakon saguli' ru Ambiluo ri Aki Kapuuno'. 7Pai' pangimuag amon ru mindagu Aku ra musiti' kou anakon saguli'!#saguli'; kapoam intor ra rasawat. 8Angin sumoyob ra ati ayuk kasagaan nano; maining ayuk bolos no, kaa' kalo mapandayan mu intor kapoam ulian nano. Nogondo' niayuk baal ru ulun anakon saguli' ru Ambiluo ri Aki Kapuuno'.”

9Pangkuot poyo i Nikodimus, “Ati kulaan gitio masauk?”

10Taam i Jisus, “Okou sangulun mangingila' kauligan ra Israil, kua pai' kou pakarati' ragitio? 11Balain tokou toojo: Akai ti mampaintutun ramuyun ra atan napandayan am nakito mai, kaa' marara' kau mangapu. 12Kalo mangintopot kau ra pinabala' Kuno ondo' masauk ra tana' ti, atan boo kulaan akau mangintopot amon ru balain takamin ondo' masauk giu' ra suruga'? 13Kolondo' sangulun pana nakaaloi ra suruga', suai Anak ru Ulun ayuk, ondo' timinuun intor ra suruga'.

14 # Un. 21:9 Koson kukuo gangsa' pinainsawat ra tataun ri nabi Musa giu' ra tana' kaagisan, nogondo' niayuk ra Anak ru Ulun musiti' painsawaton koson raginio. 15Maa' raginio moonong ulun ondo' mangintopot Riso mokoowot ra kaayagan motopot am mantilayun. 16Sabap ra maayo kaga' guang ri Aki Kapuuno' ra ulun ru tana' ti, saboi nanaak Io ra Anak Langkuir Nano, maa' raginio moonong ulun ondo' mangintopot Riso kalo mapuso, kaa' mokoowot ra kaayagan mantilayun.#maayo kaga' guang ri Aki Kapuuno' ra ngaangai' ra tana' ti…mokoowot ra kaayagan mantilayun; kapoam; Motogom kaga' i Aki Kapuuno' ra ulun ru tana' ti saboi pinataak No Anak Langkuir Nano, maa' raginio moonong ulun ondo' mangintopot ra Anak no kalo mapuso kaa' mokoowot ra kaayagan motopot am mantilayun. 17Sabap ra i Aki Kapuuno' nanusub ra Anak Nano mongoi ra tana' ti sala' ka mongoi pangakim ra ulun, kaa' mongoi pamayag risilo.

18Osoi ayuk mangintopot ra Anak no kalo ukumin. Kaa' osoi ayuk kalo mangintopot Riso, inukum noyo sabap ra kalo nangintopot io ra Anak Langkuir ri Aki Kapuuno'. 19Gitio noyo ukuman ti: sinda no nakaratong noyo ra tana' ti, kaa' ulun masaga' poyo ra kalandaman intor ra sinda sabap ra ondo' baalon nilai malaat. 20Osoi ayuk mambaal ra kalaatan masisang ra sinda am marara' matong ra sinda, maa' raginio ondo' baalon nilo ra malaat no kalo makasalula'. 21Kaa' osoi ayuk gumagaya' ra kasagaan ri Aki Kapuuno',#kasagaan ri Aki Kapuuno'; harfiah: katapatan. io ti matong ra sinda, maa' raginio makasalula' ra io totopot gumagaya' ra kasagaan ri Aki Kapuuno'.”

I Jisus am i Juanis Mampariu'

22Kopongo ragili i Jisus am maamaya' Nano minongoi ra Judia. Minayan Io ra giu' i nababaya' risilo ra kukula' buoi liliwa' nampariu' ra ulun. 23-24#Mat. 14:3; Mrk. 6:17; Luk. 3:19-20Paat ragili i Juanis kalo poyo inaput. Nampariu' io ra ulun giu' ra Ainun, kalo maalur intor ra pekan Salim, sabap ra maayo timug ra giu' no. Ulun minongoi pakiriu' ri Juanis ra giu' i.

25Intor raginio, kukula' ngaulun maamaya' ri Juanis nagagansang ra sangulun ru Jaudi#sangulun ru Jaudi; Kukula' naskhah nakalair: kukula' ngaulun ru Jaudi. ra kaulayan mambagu' sumugut ra ugama Jaudi. 26Ongoi ilo boo ri Juanis am indagu, “Mangingila', Io ondo' nababaya' rirun am pinaintutun muno ramon giu' ra sandaup ru Sungoi Jordan i, raino Io pana mampariu' am ngaangai' ulun mongoi boo Riso.”

27Kaa' taam i Juanis, “Kolondo' atan ayuk pana maapu ru sasangulun amon ru kalo i Aki Kapuuno' mangani'. 28#Jua. 1:20Akau galama' sasi' ra mokoondo' ragu kuno ramuyun ra, ‘Aku ti sala' ka Mamamayag ondo' sinusub ri Aki Kapuuno' i, kaa' aku ti sinusub ayuk sumigulu Riso.’ 29Koson niayuk ra paguguatan: Ungkuyon uatin mokoowot ra andu'; kaa' mamparangan ra ungkuyon uatin ti ondo' mangkirongog riso pana maansukan. Ginio nai ra raino ti maansukan aku toojo, 30sabap ra Io ti musiti' masauk ra maatang toojo am aku kalo boo.”

Io ondo' matong intor ra suruga'

31Io ondo' matong intor ra suruga' maatang intor ra ngaangai'. Kaa' io ondo' intor ra tana' ti, ulun io tupo ru tana' ti; am ragu nano pana intor ayuk ra baal ru tana'. Kaa' Io ondo' matong intor ra suruga' maatang intor ra ngaangai'. 32Mampaintutun Io ra norongog am nakito Nali, kaa' kolondo' sangulun pana mangintopot ra kaintutunan Nali. 33Kaa' osoi ayuk mangintopot ra kaintutunan Nano, io no mangiou ra i Aki Kapuuno' no motopot. 34Io ondo' sinusub ri Aki Kapuuno' mampasaboi ra ragu Nano, sabap ra kalo palasin i Aki Kapuuno' mangani' Riso ra Ambiluo Nano. 35#Mat. 11:27; Luk. 10:22Ama' no motogom ra Anak Nano, am nangani' ra ngaangai' kuasa' Nano Riso. 36Maa' raginio osoi ayuk mangintopot ra Anak no mokoowot ra kaayagan motopot am mantilayun. Kaa' osoi ayuk kalo gumagaya' Riso no, kalo mokoowot ra kaayagan no, kaa' mantilayun i Aki Kapuuno' masisang riso.

Currently Selected:

JUANIS 3: TMT

Highlight

Copy