Apozelɨyara 5

Ananaayazalyɨ Sapaairasɨ sayorɨnesɨ.

1Baanavaazai sara kujaava' kɨrɨ' A'mwe Ananaayazai mwaala'. Sare balaange' Sapaaira' yaya' wo'nɨkesɨ. Sai mwaalaka kɨrɨmɨre wawɨnya pɨrɨ' yaasaka 2gannya a'mwevɨ wɨdɨna “Naarɨmɨnyɨne nɨgwia pɨnɨ wakaka!” Wɨdɨna yaka Wɨdaasaderaavɨ pɨnɨ makuna yaka wɨjaavɨna. 3Sara wɨjaavɨna kya' Pitai wɨda' “Ananaayazai, Saataanɨ kagɨthɨwa' sara baa'na yɨwaa? Kwaasɨ yagaala Kuryai Tewaanyarɨ wɨdɨwaa ‘Nɨmɨre wawɨnya' yaasɨwe nɨgwia yuya warɨka!’ Kwaasɨ yagaala sa' baa'na wɨdɨwaana? 4Sɨnnawɨ wawɨnya myaasɨwaanyagaa' gɨmɨresɨ. Yaasa yagɨna nɨgwia gɨmɨrengɨ. Gɨnnya sɨdusavɨ kwaasɨya sarebwi baa'na wɨdɨwaana? A'mweraavɨ kwaasɨ yagaala majahɨ. Aawa. Gotɨyarɨ kwaasɨ yagaala wɨdɨwaana.” 5Sara kuda' Ananaayazai kadɨka wɨ'nakegaa' balɨna yaka wala'na ya'. Wala'na yake'na kadɨka wɨ'nesara lɨka naanga yesa'nanyɨra. 6Baryai wala'na kya' mɨgɨnyara daavɨna yeva gɨlaayarɨ yɨvɨ'dɨbuya pwɨyɨna yeva makuna yeva lɨkyɨrakɨna ye'.

7Dɨvi maalɨkegaa' (3 aawaaya) gamɨre balaange' sa'na kadɨka mu'nyaka angevɨ wɨlɨna. 8Wɨlɨna kya' Pitai wɨda' “Nyɨdana! Kɨrɨnnya wawɨnya'na nɨgwia da yuya dama'mwaai?” A'mwe' wɨda' “Yo, yuyangɨra.” 9Sara wɨdɨna kya' Pitai wɨda' “Sayoihi avaaina baa'na yawɨ'mwaala? ‘Naangere Kuryai navɨka mwaaladelyɨra,’ dathɨwaala? Yaamɨjɨya'na dathɨwaala? Yɨthaa, gɨmɨre a'mwerɨ lɨkyɨrakɨwaasaraavɨre sɨvɨlyangɨ tɨkuryaba du'nɨwaana! Sara gɨmakwalyɨpɨ'de'gɨnyɨra.” 10Mi'na kuda' sagaa' gamɨre sɨvɨlyaraaryaba yarai wala'na yaka balɨna ya'. Balɨna kya' mɨgɨnyara dara wanganesa' “O, mena davaimwaka!” Sara deva makwalyuna yɨna yeva gamɨre kwalaangeryaba wɨlalɨkyɨrakɨna ye'. 11Wɨlalɨkyɨrakɨna kye' Jizaazare kusɨlaanyavɨya yuyarajɨ a'mwe pwara kadɨka wɨ'nesarajɨ Gotɨyare dɨragɨnya' yawɨ'dɨvɨ' lɨka dɨkwosɨ'na ye'.

Dɨragɨnyajɨ atɨka maru'nasajɨ sangɨnesɨ.

12A'mweraayaba Apozelɨyara Jizaazai Wɨdaasadera wɨjɨwaainyajɨ atɨka maru'nasajɨ yɨna ye'. Sagaa' Gotɨyare Angevɨ Solomonɨmɨre yɨhulɨvɨlɨyavɨna Jizaazarera yɨkabɨna yadɨvɨsare. 13Yɨkabɨna yadɨvɨ' lɨka wɨrɨdaasɨ pwara kumɨnyabanna myɨkabi yɨna ye'. Kɨrɨ' a'mwera a'mwemɨlɨka dɨna “Sahwara a'mwe tewaanyarera.” 14Myɨkabi yɨna yadaapɨjɨ a'mwe pwara Jizaazarera yɨma'nyɨna ye'. Pɨgaa' pɨgaa' a'mwe kwara kwara a'mwe kɨnɨ kɨnɨ Naangerɨ wɨ'nesara Jizaazarera yɨma'nyɨna ye'. 15Wɨdaasadera yesa'na tusangɨ nabalɨnakeraavɨ makwalyaabɨna yeva yɨ'bɨnyangɨjɨ lamulyangɨjɨ wakɨna yeva a'ba yɨlawɨmwaaihɨna ye'. A'mwera sɨmunya yawɨ'na “Pitai kaanya kyamaryojɨ gamɨre a'mabaalyai nabalɨnakeraavɨ kɨma'bwa'nya yɨrɨna kyojɨ sahwara tewaanyara yɨma'nɨpɨ'derera,” yawɨ'na yeva sara yɨlawɨmwaaihɨna yesarera. 16Anga Jeruzaalemɨ saba anga pɨnɨngɨdaasɨ kwala naange' kunnya nabalɨnakeraavɨjɨ yɨmaka widɨvɨsaraavɨjɨ makabɨna kye' yuyara tewaanyaraavɨ yavada'gaina yɨna ye' Wɨdaasadera.

Apozelɨyaraavɨ kayaa'na yesa'nesɨra.

17Sagaa' Gotɨyarɨna Mubɨthɨka Yɨra'de Naangelyɨ gamɨjɨyara Jeruzaalemɨ mwaalyara Sazuzɨyarajɨ Wɨdaasaderaavɨna sɨnna tɨka wɨda'daasɨ dɨnyɨna ye'. Mi'na dɨnyɨna yeva wɨna yeva 18Wɨdaasaderaavɨ wɨla marapwɨyɨna yeva a'mweraavɨne kalavuzangevɨ wɨmwaaihɨna ye'. 19Wɨmwaaihɨna kye' kɨrɨ' sawɨsavɨ Naangere ejelɨyai mamaayai kalavuzangevɨya kaanya' baasɨna yaka mwasawɨ kumɨnyɨ jɨvwaramakwalyɨna yaka wɨda' 20“Gotɨyare Angevɨna wawopɨjɨ saba daavapɨjɨ a'mweraavɨ Gaala davwina duzɨla!” 21Sara kuda' sahwara yawɨ'na “Yo, sara yaana!” yawɨ'na yeva yɨrɨkevɨ Gotɨyare Angevɨ wɨlaawɨna yeva wɨjɨwaakɨna ye'.

Gotɨyarɨna Yɨra'de Naangelyɨ gamɨjɨyarajɨ sara Juyaraavɨre a'mwe naangeraavɨna jɨvwaramakabɨna “A'mweihi, nemɨ Yɨzɨrelɨyaraavɨ Kaajolɨyaina yɨkabaana!” Jɨvwaramakabɨna kye' yuyara mwaaleva kalavuzavɨ dameraavɨ wɨdaase' “Davanna Jizaazare yagaala wɨdadɨvɨsaraavɨ dɨmakabyɨla!” 22Kudaase' pwara kaanna wɨna yeva dara wanganesa' “O, sahwara mamwaalyɨ jɨhava!” Deva Kaajolɨyaraayawɨnna ayɨna waweva 23wɨde' “Kalavuzangevɨ yɨ'mavona dara wangamwo' ‘Kaanya lokɨya mena tihɨ'nadɨ'nyɨ kaanyangyaba damera nayaa daavɨna jɨwaava!’ Sara dona kɨrɨ' nemɨ kaanya baasona dara wangamwo' ‘Ai, pwara midaaka!’ ” 24Sara kude' Gotɨyare Angevɨna dameraavɨ maremwaaidelyɨ Gotɨyarɨne tamira'dɨvɨta naangerajɨ kadɨka wɨ'neva yawɨ'na “Sahwara gava mwaaihava? Gawɨnneraavaka?” 25Yaamɨjɨ kuna yawɨ'daapɨjɨ pwai wɨlaabɨna yaka wɨda' “Yɨthaanyɨla! Dɨnyu'nyɨla! Sarɨmɨ a'mweraavɨ kalavuzangevɨ wɨmwaihyawaaihasara Gotɨyare Angevɨ daa'dɨvɨ' a'mweraavɨ wɨjɨwaakɨvanɨgava.” 26Sara kuda' Gotɨyare Angevɨna dameraavɨ maremwaaidelyɨ gamɨre damerajɨ sara waweva kumɨnyɨ ayɨna makabɨna ye'. Damera Wɨdaasaderaavɨ mala maramyɨ ye'. “A'mwera sɨla nemɨnyɨna nanelɨwakɨpɨka!” deva mala maramyɨ ye'.

27Angevɨna kumɨnyɨ makulaabɨna yeva Kaajolɨyaraayaba wɨmwaaihɨna ye'. Wɨmwaaihɨna kye' Gotɨyarɨna Yɨra'de Naangei yɨwaara'na ya' 28“ ‘A'mwe darɨna mujɨwaakɨpɨnera!’ dɨragɨnna dɨragɨnna yɨhɨthɨwa'do kɨrɨ' gevwi gevwi yɨwaasaihɨla. Be'nana? Jeruzaalemɨ yuneba a'mwe yuyara sarɨnnya wɨjɨwaakyabwi kadɨka wɨ'nɨwaasaihɨlyɨra. Sabwina dɨna, ‘Sai balake'na Kaajolɨyara yesa'ne'. Gamɨre tawe' sahwaraavɨne tɨvɨkɨsa',’ dathɨvanɨga'?” 29Mi'na kuda' Pitalyɨ Wɨdaasade pwarajɨ wɨde' “Gotɨyai sara kanedozɨ sara yaanneinera. Gotɨyarɨna a'mwera sara kanedapɨjɨ sara myaanneinera! 30Yɨsavɨri sarɨmɨ Jizaazarɨ nilɨya tamarɨmwɨna kye' mena kabala' Ne sɨnnawɨnyaraavɨre Gotɨyai yɨdɨkaavakelyɨ. 31Kwaihwaainakei mena kamwaala' Gotɨyai gannya aangasɨmagɨ dɨragɨnyaba wɨmwaaihɨna kya' sai maremwaaidei nabaai kayaa'nanyaburɨ padaihasamaa'dei yɨma'na'. Kyɨma'na' Yɨzɨrelɨyaina ‘Nennya kayaa'nanyaburɨna sɨmunya mudɨkebwi yawɨramaraana!’ dawaajɨ Gotɨyarɨ gɨnyɨra'na kyawaajɨ nennya kayaa'nanya marasɨ'na neyadelyɨ. Sa' Gotɨyai nayaa yawɨ'manɨ'. 32Sangɨna nemɨ tɨnna wanganona nayaa yawɨrona yagaala sa wɨjalɨkurakɨvanɨgo. Nabaai, nebulya'na Kuryai Tewaanyai avaaina wɨjalɨkurakɨvanɨ'. Kuryai sarɨ Gotɨyai gannya yagaala mɨdɨdɨvɨsara yuyaraavɨna yanga wɨjaavadelyɨ,” wɨde'.

33Sa' Kaajolɨyara kadɨka wɨ'neva sɨnna tɨka naanga wɨda'daasɨ dɨna “Saraavɨ tamakaana!” 34Sara dɨna kye' kɨrɨ' pwai Kaajolɨyaraavɨ tɨnnyaba daavɨna ya'. Sai Perɨzɨyai Gamelɨyalɨ wo'nɨkelyɨ. Juyaraavɨre Kɨwɨnya wɨjɨwaakaderɨna a'mwe yuyara sɨmunya yawɨ'na “Sai Gotɨyare kɨwɨnya nayaa wɨjɨwaakɨvanɨkelyɨ,” yawɨ'na yeva gamɨre yaya' munyaba makɨlesalyɨ. 35Sai daavɨna yaka wɨda' “A'mwe saraavɨ mwasawɨnna marakaana!” Kuda' Wɨdaasadera mena kwalyawe' Kaajolɨyaraavɨ wɨda' “A'mweihi, Yɨzɨrelɨyaihi, a'mwe daraavɨna jide'na nayaa jawɨrila! 36Sare' dare'nesɨ. Kɨgaa' a'mwe pwai Tɨyuthaazai baka wɨdɨna ‘A'mwe naangeinyɨra.’ Wɨdɨna kya' a'mwe kwalaalyara (400) gamɨjɨ gaidaa'na kye' kɨrɨ' aamiyara Romɨyara Tɨyuthaazarɨ tamakɨna kye' pɨwɨnna pɨwɨnna gamɨre mɨdɨnesara yɨwɨnama'na yɨna yeva yɨmaanyɨna ye'. 37Yɨwɨnama'na yɨna kye' dɨvi Ga'maanɨyara yaya maaresagaa' dɨviyai Juthaazai Galɨli mwaalyai ‘A'mwe naangeinyɨ,’ kuda' a'mwe kwala naanga mɨdɨnaabɨna ye'. Kwala naanga mɨdɨnaabɨna kye' kɨrɨ' Juthaazarɨ tamɨna kye' sai balɨna. Balɨna kya' pɨwɨnna pɨwɨnna gamɨre mɨdɨnesaraavɨ tamayɨwɨnaasɨna ye'. 38Sara yesa'na yɨma'nɨke'na dahaa' yɨhɨthɨma! A'mwe daraavɨna myaanneine! Mwaaibɨka! Kumɨre yawɨsajɨ wawɨnyajɨ a'mweraavɨreburɨdaasa sara yetabaaibɨ' kayaaka yadengɨra. 39Kɨrɨ' Gotɨyareburɨdaasa kayaaka myɨgalyɨ yaadeinera. Dara nyawɨraadɨka! ‘O, nemɨ Gotɨyarɨ mala wɨramwoina daaka!’ ” 40Gamelɨyalɨ sara wɨdake' sara yɨna ye'. Wɨdaasaderaavɨ jaka wɨdeva pwaraavɨ wɨde' “A'mweraavɨ wɨlyabaalyɨ duramyɨla!” Mena kurame' Kaajolɨyara naanga wɨdɨna “Jizaazarɨ yaya'na yagaala mujɨwaakyɨ jideihɨlyɨra.” Wɨdɨna yeva kumɨre angengɨ yaasɨna ye'. 41Sarevɨdaa'nyɨ Kaajolɨyaraayawɨdaasɨ sahwara wɨna yeva dɨnyɨna “Gotɨyai nemɨnyɨna dara yawɨ'mwa' ‘Sahwara tewaanyara mwaaihasa'na Jizaazarɨne yayavɨna kayaa'na yɨpɨ'de' wi'nanyaraavɨ.’ Sara daka dɨragɨnna nemwaaihɨwakeina yɨlaaya yɨvanɨgoinera.” 42Sara dɨnyɨna yeva yɨrɨka gazagaasagaa' Gotɨyare Angevɨjɨ a'mweraavɨre angengɨjɨ saba Kɨraazɨtɨya Jizaazarɨna yagaala tewaanya' kuna wɨdadɨvɨkɨ. Nemɨnyɨna Jizaazarɨ Gotɨyai dahɨlakake'na kuna wɨjɨwaakadɨvɨkɨra.

Currently Selected:

Apozelɨyara 5: byr

Highlight

Copy