Apozelɨyara 6

Wɨdaayadɨvɨta atina ata purɨdaasɨ pwaraalyaraavɨnesɨ.

1Dɨvi yɨrɨka sangɨ Jizaazare mɨdɨdɨvɨsara kwala naanga naanga yɨma'nadaapiyagaa' Gɨrikɨyagaala dadɨvɨsara Yɨvɨruyagaala dadɨvɨsaraavɨna kɨnɨmyagaala dɨnyɨna ye'. Gɨrikɨyagaala dadɨvɨsara dɨnesa'nanyɨ “Nɨgwɨmaayaraavɨ yanga wɨjaavadɨvɨsara, nemɨre sɨgɨraayangɨ wapaaya maalɨka wɨjaavadɨvɨ' kɨrɨ' Yɨvɨruyagaalya' dadɨvɨsangɨ naanga wɨjaavadɨvɨsarera.” 2Sara dɨdaapɨjɨ atɨraai sɨvɨlyɨrɨdaasɨ pwaraalyara mɨdɨdɨvɨta yuyaraavɨ jɨvwaramaa'na “Yuyaihi, jɨkabyɨla!” Jɨvwaramaa'na kye' yɨkabɨna kye' wɨdɨna ye' “Gotɨyare yagaalya' ya'mavaaja' yɨ'bɨnyavɨ wɨdayaade' wapaaya yanga wɨjavaade' yɨlaaya myɨvanɨgo. 3Aawa, nya'mweihi, nemɨre wawɨnya naange' Gotɨyare yagaalya wɨdadaanya savɨna a'mwe ati ata purɨdaasɨ pwaraalyaraavɨ kadahɨlakapɨjɨ sahwara wapaaya yange'na maremwaaibɨ'deraavɨ sara wɨmwaihaana! Sarɨmɨjɨyaraavɨna ‘A'mweraavɨ yunebanna Kuryai Tewaanyai wɨlamwaaidera sɨdu'nakera damwaaihava! Sahwara a'mwe tewaanyarera,’ jalɨkurakadɨvɨsaihi yawɨrapɨjɨ sahwaraavɨ dɨthahɨlakyɨla! 4Sara kyapɨjɨ yuyagaa' nemɨ sahwaina Gotɨyarɨ wɨjavulyɨ Gotɨyare yagaalya' wɨdaayabulyɨ kuna yaadeinera.” 5Wɨdaasadera sara kude' yuya kwala naange' dɨnyɨna “Yo, tewaanyasɨra.” Dɨnyɨna yeva Sɨtivenɨmɨ dahɨlake'. A'mwe sai Jizaazarɨ yuna dɨragɨnna lɨmwaga'delyɨ. Gamɨre sɨmunyavɨ Kurya Tewaanyai yuna wɨlamwaaida dɨragɨnna wɨmwaaihakelyɨra. Sɨtivenɨmɨ dahɨlakeva Pilipɨmɨjɨ Pɨrokoraazalyɨ Naaikenaamɨjɨ Taaimonɨmɨjɨ Paamenaazalyɨ Nikolaazalyɨ dahɨlakɨna ye'. Nikolaazai sai Anga Aadɨyokɨ mwaalyalyɨ. Sɨnnawɨ sai Maavei mwaalaka dɨvi Juyaraavɨrebwi wɨ'naka aayagaa' Jizaazarɨ wɨ'nakelyɨra. 6Mi'na dahɨlakɨna Wɨdaasaderaayawɨnna makabɨna kye' sahwara Gotɨyarɨ wɨdeva kumɨre wawɨnya'na dɨragɨnya wɨmwaaihya'na kumɨre mɨnyagɨnyangɨ ata dathɨwanna yɨna ye'.

7Jeruzaalemɨ yunebanna Gotɨyare yagaalya' kadɨka kuna wɨ'ne'. Kadɨka kuna wɨ'nadaapɨjɨ Jeruzaalemɨ mɨdɨdɨvɨsara kwala naanga naanga yɨma'nyɨna ye'. Nabaai Gotɨyarɨna mubɨthɨka yɨra'dɨvɨta kwalaalyara Naangerɨ lɨmwageva gamɨrebwi mɨdɨnna ye'.

Sɨtivenɨmɨ wɨla pwɨyesa'nesɨ.

8Sɨtivenɨmɨ yunebanna Gotɨyare yanga gaimwangebulyɨ dɨragɨnyabulyɨ kɨnɨnnakelyɨ. Sɨtivenɨ dɨragɨnaangei a'mweraayaba atɨka maru'nasa'nejɨ wɨjɨwaainya'ne dɨragɨnyajɨ yɨna ya'. 9Sara yaka yagaala wɨdadaasɨ gamɨre yagaala sɨnna tɨke'na a'mwe pwara maanga wɨde'. Maanga wɨdesara kɨgaa' Romɨyaraavɨna kalavuzɨwawɨnya yesa' dɨvi kalavuzɨwawɨnya yagalya'mave'. Yagalya'maveva dɨnyɨna “Nemɨ lotuanga mudɨkevɨna yɨkabaatheinera.” Sara dɨnesara Anga Saairini mwaalyarajɨ Anga Alekɨzaadɨrɨya mwaalyarajɨ sara yɨkabadɨvɨsarera. Sara maanga wɨdadaapɨjɨ Juya pwara Kwaaka Sɨlɨzɨyadaasarajɨ Kwaaka Ezɨyadaasarajɨ sara Sɨtivenɨmɨ maanga wɨdɨna ye'. 10Maanga wɨdɨna kye' Kuryai Sɨtivenɨmɨna sɨduta naange' kujaava' Sɨtivenɨ dɨragɨnna wɨdaka kumɨre yagaalya wavɨla'na ya'. 11Wavɨla'na yake'na sɨnna tɨka wɨda'daasɨ pwaraavɨ kwaasɨ yagaala wɨja'na nɨgwia wɨjaavɨna kye' sahwara kwaasɨ yagaala wɨdɨna “A'mwe dai Sɨtivenɨ Ne Mozɨzarɨnajɨ Gotɨyarɨnajɨ bɨrala wɨdadaasɨ kadɨka wɨ'nɨwoinera.” 12Kwaasɨ yagaala wɨdɨna wɨdɨna kye' a'mwerajɨ a'mwe naangerajɨ Kɨwɨjarajɨ sɨnna tɨka davɨna ya'. Sɨnna tɨka davɨna yadaasɨ Sɨtivenɨmyawɨnna yarai bɨna yeva galalɨmwanna yeva Kaajolɨyaraayabanna makuna ye'. 13Makuna yeva kwaasɨ yagaala wɨja'neraavɨ makulaabɨna kye' sara kwaasɨ yagaala wɨdɨna “A'mwe dai Gotɨyare Anga tewaanya davɨnajɨ Ne Mozɨzare kɨwɨnyavɨnajɨ bɨrala wɨdadelyɨra. 14Sare' dare'nesɨ. Kadɨka wɨ'nyɨna ‘Jizaazai Naazaretɨ mwaalyai Gotɨyare Ange' wo'dalasɨ'na yojɨ Ne Mozɨzai kɨwɨnyabulyɨya nedɨnɨke maryovimaa'nadelyɨra,’ sara kadɨka wɨ'nɨwo.” 15Mi'na wɨdɨna kye' Kaajolɨyaraavɨreba walamwaaina yesara Sɨtivenɨmɨ baihana'na yeva dara wanganesa' “Ai, dare sɨnnya' Gotɨyare mamaayare sɨnnya'bɨsa' dangamanɨgona byaanna yidaasɨ!”

Currently Selected:

Apozelɨyara 6: byr

Highlight

Copy