Lukɨ 12

Kwaasɨ javwina nayaa yavada'gainya'nesɨ.

(Matɨyui 10:26-33; 12:32; 10:19,20)

1Sarevɨ a'mwe kwala bwa'naanyavɨne taawɨzanɨya naangera yɨ'bwa'nyɨna yeva pwaraavɨre sɨvɨlyangɨ dɨhɨbainadɨvɨ' yuneba mɨjahɨbalakɨna. Yuneba mɨjahɨbalakɨna yadapi sɨnnawɨ gamɨre mɨdɨdɨvɨsaraavɨ gaai wɨdɨna “Perɨzɨyaraavɨre yɨzɨyavɨna nayaa javada'galayawɨrila! Kumɨre kwaasɨya sabwina yɨhɨthɨvanɨge. (Bɨretɨya yavɨkaryadɨvɨ' yɨzɨya' yuneba pamidakɨna yadevaaibɨ' Perɨzɨyaraavɨre kwaasɨya sabwina sarɨmɨnyɨ yuneba nulayɨhwaradɨka!) 2Yuya sa bwakakɨna yɨnɨke yɨ ku'maaya yama'mawakɨna yadengɨ. Nabaai yuya kuku'nyɨ yagaalya yawɨrangabɨ'dengɨ. 3Sarevɨdaa'nyɨ sarɨmɨ yagaala yuya jɨhɨnyavɨ dadɨvɨsa yɨrɨkevɨ a'mwera kadɨka wɨ'nɨpɨ'dere. Nabaai yagaala yuya sarɨmɨ angengɨ kusawɨ kadɨkengɨ yuna kavena a'mabyahaala dadɨvɨsa, yɨ sare sa angevɨ munyaba yɨladaavapɨjɨ wɨjɨwaakɨpɨ'dengɨ.

4Nɨnnya nya'mweihi, sarɨmɨnyɨ dara yɨhɨthɨvanɨge. A'mwera sarɨmɨre kɨlaakejɨ' yuna baimwagakya ya'na lɨka mipɨnera! Sare'na nabaai dɨvi ayahi pɨnɨjɨ yɨpɨ'dera mɨ'. 5Sarɨmɨ lɨka jiderɨna yɨhibwarɨdaakwɨdeinyɨ. Sai Gotɨyai tamakojɨ dɨvi dɨragɨnya' kɨnɨnnakei a'mweraavɨ Dɨkevɨ kewɨnɨ maralɨvaramanne dazarɨna lɨka jideihɨlyɨ. Yo, sarɨmɨnyɨ yɨhɨthɨvanɨge. Dazahwarɨna lɨka nayaa jideihɨlyɨ. 6Binna atɨlyara nɨgwia maalɨka pukaalyɨna mubadɨvɨsɨkaai daaka! Sare'na kɨrɨ' Gotɨyai yuta sasare gave saina navɨka yadei mɨ'. 7Aawa. Sarevɨ sahwai sarɨmɨre mɨnyagɨnyangɨya mɨjata yuyangɨ ata mena gimanɨkengɨ. Sare'na lɨka mipɨnera! Binna kwalaalyaraavɨne nɨgwiangɨ sarɨmɨ mena wavɨla'nɨkeihɨlyɨra.

8Sarɨmɨnyɨ yɨhɨthɨvanɨge. A'mwe gazaizai nɨmɨnyɨna a'mweraayaba jalɨkurakajai ‘Sahwarɨ mɨdɨdɨnyainyɨ,’ yɨ A'mweraavɨne Kaimɨraayai sai kwai dazarɨna Gotɨyare ejelɨyaraayaba jalɨkurakadelyɨ ‘Sahwai nɨmɨrelyɨra.’ 9Kɨrɨ' pwai nɨmɨnyɨna a'mweraayaba jalɨkurakajai ‘Mamɨdɨnyadɨnyainyɨ,’ yɨ dazarɨna Gotɨyare ejelɨyaraayaba ‘Nɨmɨrei mɨka,’ jalɨkurakadelyɨ. 10Gazaizai A'mweraavɨne Kaimɨraayarɨna bɨraizɨka wɨdazai, yɨ Gotɨyarɨ kudozɨ gamɨre kayaa'nanya sa' marasɨ'nadelyɨ. Kɨrɨ' Kurya Tewaanyarɨna yagaaibɨraizɨka dazai, yɨ Gotɨyai gamɨre kayaa'nanya sa' marasɨ'nadei mɨ'. 11Nabaai kotɨya'na lotuangengɨ maremwaaidɨvɨsaraayabajɨ ga'maanɨyaraayabajɨ yawɨbwa'dɨvɨsaraayabajɨ yɨhɨmakwodɨvɨ' sarevɨ yawɨta kwalaalya mi yadɨvɨ' sɨmunya dara myawɨpɨnera! ‘Nemɨ yagaalya' gara wɨrɨvɨkɨraadeinaavaka? Be yagaala wɨdaatheinaavaka?’ 12Sare' dare'nanyɨ. Dazahɨrɨsavɨ dazahaasagaa' Kurya Tewaanyai sarɨmɨre yagaala wɨdɨpɨne' kihɨzaavojɨ duzideihɨlyɨ.”

Gɨlyɨvɨkɨravɨnakei navɨ'navɨka yadevwine ke'ba'nanyavɨnesɨ.

13Kwala bwa'naanyavɨ a'mwe pwai wɨdɨna “Wɨjɨwaakadɨnyaigɨ nehɨrɨnɨmaangei kabaimwa'dɨ' nyɨdaakaangei gɨlyɨvɨta yuya maa'mwa'dɨkelyɨ. Sahwarɨ duthathe'na gɨthɨwana. Gɨlyɨvɨsa tɨnnyaba jaapalojɨ pimagɨnyavaa' nyɨjaavade'na.” 14Wɨdɨna kya' sai wɨdɨna “Gatha'darevaka! Kɨrɨmɨnyɨ yawɨbwata'neinyɨ aaihwai nyɨdahɨlakɨwakainyaka! Gɨlyɨvɨsa jaapala yɨhɨthaaya'neinyɨ daaka!” 15Sara wɨdɨna yaka kumɨnyɨ wɨdɨna “Sarɨmɨ mala jɨwannyɨla! Nayaa javarannemwaalyɨla! Gɨlyɨvɨsangɨna tɨganaarya nyɨpɨdɨka! A'mwe gɨlyɨvɨta naanga kwalaalyajɨyai, sai gamɨre gɨlyɨvɨta dazangɨna gaalyabwi kɨnɨnnakei daaka!” 16Wɨdɨna yaka ke'ba'nanya pɨrɨ' wɨdɨna “A'mwe pwai gɨlyɨvɨkɨravɨnakei gamɨre wawɨnyajɨ' tɨka munne kwalaalya maarakejɨkɨ. 17Sarevɨne'na a'mwe dazai gannya sɨmunyavɨ dara yawɨrakelyɨ ‘Aka, nɨmɨ dainyɨ gara yɨwɨneke! Nɨmɨre tɨka munne yuya yɨnɨga mari'bwarakɨde ange kuneinyɨre!’ 18Dɨna yaka sai dɨna ‘Yɨ, nɨmɨ dara yɨdesɨ. Nɨmɨre anga yuya tɨka munne marikwakadɨnya sa wo'daala'mujɨ yune naangenna naangenna madɨdeinyɨra. Sara mada'mujɨ nɨmɨre witɨya yuyajɨ gɨlyɨvɨta yuyajɨ anga dazangɨ mari'bwarakɨdeinyɨra. 19Sara ya'mujɨ nabaai nɨmɨre kuryarɨ wɨdɨna “Kuryaigɨ, kwarame kwalaalyangɨne tɨka munne yɨnɨga waradengɨra. Sarevɨ dahaa' kave a'gaaye dɨmwaaide'nanyɨ. Tɨka wapaajɨ nadɨ waainɨyajɨ nadɨ yɨlaaya yadɨ dɨmwaaide'nanyɨ.” ’ 20Sara dɨna kya' kɨrɨ' Gotɨyai sahwarɨ wɨdɨna ‘A'mwe sɨmumaayaigɨ! Yuna dahaasagaa' sawɨta davɨ dɨvaideigɨnyɨ. Gɨmɨre kuryarɨ maarɨdelyɨ. Sare'na gɨlyɨvɨta yuya yovɨgaipwakɨvanɨgɨnya yɨ sa aaihwai maaradengaka! Gɨmɨ aawa!’ 21Sasarebaaibɨ' Gotɨyarɨna nawɨ'nya naangebura maayai, Gotɨyarɨna gɨlyɨvɨkɨravɨnakei mamwaalyɨ yajai gɨlyɨvɨta gannyanne kwalaalya naanga mari'bwarakadei gamɨre kuryai waryaanyai yɨma'nadelyɨra.”

Gotɨyarɨ nayaa lɨmwadaanyaburɨnesɨ.

(Matɨyui 6:25-34)

22Gamɨre mɨdɨdɨvɨsaraavɨ wɨdɨna “Sarevɨ sarɨmɨnyɨ yɨhɨthɨvanɨge. Sarɨmɨre mwaalyabwina sɨmunya kwalaalya myawɨpɨnera! Sara yawɨ'dɨvɨ' dara nadɨpɨka! ‘Nemɨ tɨka munne benɨ naadeinaavaka?’ Nabaai sarɨnnya kɨlaakejɨkaavɨna sɨmunya kwalaalya myawɨpɨnera! Sara yawɨ'dɨvɨ' dara nadɨpɨdɨka! ‘Nemɨre kɨlaakejɨkɨ be yaawiajɨ baazɨ'ma'naadeinaavaka?’ 23Sare' dare'nanyɨ. Gaalyabwi sabwi naangebulyɨ. Tɨka nya'nennanya sa maalɨkengɨ. Nabaai kɨlaaka sajɨ' naangejɨkɨra. Baazɨ'ma'nya sa maalɨkengɨra. 24Yusaraavɨna jawɨranganyɨla! Witɨya wia burɨdɨvɨtara mɨ'. Tɨka munne gimujayɨ'bwarakaabadɨvɨtara mɨ'. Kumɨre tɨka munne angejɨ anga yuhwakamaarya'nejɨ kunere. Kɨrɨ' Gotɨyai tɨka wapaaya wɨjaavadere. Sare'na sarɨmɨ a'mweihi yusaraavɨ yuna naanga wavɨla'dɨvɨsaihi midaaka! 25Sarɨmɨjɨya pwai sɨmunya kwalaalya yawɨrajai sangirɨ' kɨbawamaalɨ'na pɨrɨsɨ gamɨre mwaalyagaa'na yɨbwa'mwagannei daaka! 26Sarevɨdaa'nyɨ sarɨmɨ sare maalɨka samɨlɨ' mi yɨpɨneihi mwaaibɨza' yɨ yuya pɨnɨnna sɨmunya kwalaalya be'na yawɨ'manɨga'! 27Sarɨmɨ mayawaa' pwasangɨna jawɨranganyɨla! Tɨretɨya mihwiadɨvɨsangɨ. Kwaabɨyɨvɨta marɨlyadɨvɨsangɨ. Kɨrɨ' sarɨmɨnyɨ yɨhɨthɨvanɨge. Kɨgaakuna Kingɨya Solomonɨ gamɨre nɨgwɨlalaaka byaannaka yuya yɨwaala yɨwannyaakelyɨ. Kɨrɨ' mayawaa' pwata dazabaaibɨ' sahwai gamɨre yɨwaala tewaanya kɨnɨnnakei mɨ'! 28Wawɨnyangɨ dahaa' kurɨvaarɨya waayɨke sare sa yune mwanyagaa' davapɨjɨ dɨkevɨ sɨtovɨyavɨ marirapɨ'dengɨ. Nabaai yaasɨwakurɨvaarɨya sa, yɨ sangɨ Gotɨyai yɨwaala yɨwagɨthaakwadengɨ. Sarevɨdaa'nyɨ yɨ sarɨmɨ dɨragɨnna maalɨ'na lɨmwadɨvɨsaihi kurɨvaarɨya sa yuna naanga wavɨla'dɨvɨsaihɨrɨ yɨhɨvaazɨ'makwadei daaka! 29Sarevɨ sarɨmɨ yawɨrɨkwaasa kwalaalya myɨpɨnera! ‘Nemɨ tɨka wapaaya benɨ naadeinaavaka? Aalya benɨ naadeinaavaka?’ Nabaai sɨmudaadaanya myawɨpɨnera! 30Sare' dare'nesɨ. Kwaaka davakɨ Naangerɨna malɨmwagyadɨvɨsara ajɨmya yuyangɨyara wapaaya aalya gɨlyɨvɨta sazanna bɨramaarya'nera sɨmunya kwalaalya yawɨ'dɨvɨsare. Sarɨmɨ yuya sasarenna yɨhɨmudaasada sanna Sɨrɨnɨmaangei mena yawɨ'manɨkelyɨ. 31Sare kɨrɨ' Gotɨyai a'mweraavɨ maremwaaide' bɨramaasa'na sɨmunya jawɨryide'nanyɨ. Sara kyawɨrapɨri yuya daza kɨnɨjɨ yɨhɨzaavadelyɨ.

(Matɨyui 6:19-21)

32Sarɨmɨ sipɨzipɨya maalɨkevaasɨyaihi lɨka mipɨnera! Gamɨre maremwaaide' yɨhɨzaaya'nei Sɨrɨnɨmaangei yagaalya' mena jamungajakelyɨ. Sare' yɨlaaya yakelyɨ. Sare'na lɨka mipɨnera! 33Sarɨmɨre gɨlyɨvɨsa mubya yapɨjɨ sare nɨgwianna wɨmudaasɨvanɨkeraavɨ gaimwange'na yanga duzaayidengɨ. Sara kyapɨri Sɨgunyavɨ gɨlyɨvɨta nawɨ'nyanna nawɨ'nyanna sarɨmɨnyɨne warade'nanyɨ. Sɨgunyavɨya gɨlyɨvɨsa yuneba dɨmari'mwanade mɨ'. Sara kyapɨri Sɨgunyavɨ sarɨmɨnyɨne nɨgwɨpaawɨzɨya kayaaka minyɨ yade waradengɨ. Sarevɨ nabaai kukera kuka mamaraabyadɨvɨsangɨ. Saba maa'nyaannyɨkera tɨka manyadɨvɨsangɨ. 34Sare' dare'nanyɨ. Sarɨmɨre gɨlyɨvɨta nawɨ'nyanna nawɨ'nyanna warɨkebanna yɨ dazahɨbanna sarɨmɨre sɨmunya yawɨrɨbainyɨna jidevera.

Naangerɨna lɨmwadɨvɨsara tavaravana mwaaibɨ'de'na dɨnɨke'nesɨ.

35Tavaravanane'na sarɨmɨre kwaabɨhannya ke'banna gɨ'mwagayɨra'napɨjɨ munnaanya dɨvadathɨvainyɨla! Sara yapɨjɨ laamɨvananya' yewɨtawakapɨjɨ tavaravana dɨmwaalyɨla! 36A'mwera kunnya naangerɨna mudɨkangeyaba munne naangeyabadaa'nyai bazarɨna yawɨ'dɨvɨ' yemwaaidɨvɨtabaaibɨ'na jemwaalyɨla! Nabaai ‘Sai bozɨ kaanyavɨ mala kabaramojɨ kaanya' yɨme'nya'bɨ' basamaraana!’ dapi jemwaalyɨla! 37Naangei bozɨ gamɨre wɨdaayadɨvɨsara nayaa baihana'dɨvɨ' se mwaryadapi wanganojɨ yɨlaaya yada sarevɨ wɨdaayadɨvɨta dazara yɨlaaya yadɨvɨ' tewaanaanga yɨnɨkerera. Naanga nebulya'na yɨhɨthɨvanɨge. Naangei sai gamɨ sai kwaabɨhannya' tu'na gɨ'mwagayɨra'nojɨ munnaanya' padathɨvainojɨ gamɨreraavɨ ‘Yɨ'bɨnyavɨ walamwaaibɨkajɨ,’ wɨdathelyɨ. Sara yojɨ gamɨ sai tɨka wapaaya buzaavadelyɨ. 38Nabaai sai sawɨsavɨ kalawawegaa' bathei dɨngaka? Yɨrɨ'jɨhɨnyagaa' bathei dɨngaka? Sara bazai tɨnna dara wanganaja' ‘O, se mwarijɨhava!’ Yɨ wɨdaayadɨvɨta sara yɨlaaya yadɨvɨ' tewaanaanga winaderera. 39Da'dare' jawɨrila! ‘Angevɨ gyakwalaangei mena yawɨrajɨ kwajɨ “A'mwe kukei sagaa' bathei daaka!” a'mwe kuka dazai angevɨ kadavalɨvɨramakula' sahwarɨ kwanganakadɨka!’ 40Nabaai sarɨmɨ kwaihɨlyɨ nayaa tavaravana dɨmwaalyɨla! A'mweraavɨne Kaimɨraayai gave pɨgaa' bathehaa'na sarɨmɨ jawɨryidehaa' ‘Dahaasagaa' mabi yadelyɨra,’ yɨ dazagaasagaa' bathelyɨra. Sare'na tavaravana dɨmwaalyɨla!”

(Matɨyui 24:45-51)

41Sagaa' Pitai wɨdɨna “Naangeigɨ, ke'ba'nanya daza'na yune nemɨnyɨne' dahanedɨvanɨgɨna? A'mwe yuya kwaraavɨjɨne' dahanedɨvanɨgɨna?” 42Sara wɨdɨna kya' Naangei wɨdɨna “Yɨ, maremwaaide sɨmunya nawɨ'nya kɨnɨnnakei gannya wawɨnyavɨ nayaa lɨmwaga'dei aaihwalaka? Dazahwai sarɨ gannya naangei gamɨre wɨdaayadɨvɨsaraavɨ maremwaalya'nerɨ dahɨlakadelyɨ. Maremwaalya sahwai sahwaraavɨnegaa' kima'nojɨ wapaaya saza yanga wɨjaaya'nelyɨ. 43Gamɨre naangei ayɨna kaanya bya'negaa' sɨnnawɨ wɨdakabaaibɨ' sara yaderɨ yɨ yaasɨwa'wawɨnya dazarɨ tɨnna dara kwanganori yɨ sarevɨ yɨlaaya naanga yada tewaanaanga winadelyɨ. 44Nebulya'na yɨhɨthɨvanɨge. Naangei gamɨre gɨlyɨvɨta yuyangɨ maremwaala ya'nerɨ dahɨlakadelyɨ. 45Kɨrɨ' yaasɨwa'wawɨnya dazare sɨmunyavɨ dara yawɨrajai ‘Nɨmɨre naangei yarai mabi yannei dɨngaka,’ wawɨnya wɨdaayadɨvɨsaraavɨjɨ wɨdaayadɨvɨsangɨjɨ mala tamɨna. Sara tamɨbainadaa'da tɨka munne naangejɨ biyaayajɨ nyɨna yada yɨmaka wɨlɨbainadaa'na. 46Sahwai sasara yɨbainadaa'dori yaasɨwa'wawɨnya dazare naangei yɨrɨka pɨgaa' ayɨna bɨna yadelyɨ. Baza sagaa' sarɨkɨ wɨdaayadei yemwaala yadei mɨ'. Nabaai yɨrɨka gave pɨgaa' sahwai yawɨrangadei mɨ'. Kayaa'na yɨna yadaawori naanga dazai sahwarɨ yuna woripu'na yadelyɨ. Sara yada a'mwe malɨmwagyadɨvɨsaraavɨre tɨvɨkɨsaburɨ ye'mwagamwaaihɨna yadelyɨ. 47Wɨdaayade dathai gamɨre naangere saburɨ mena yawɨ'da kɨrɨ' tavaravana myada naangere saburɨ mamɨdɨnyade sarerɨ naangei mala dɨragɨnna tamɨna yadelyɨ. 48Kɨrɨ' wɨdaayadei sɨmunya myawɨryai naangere saburɨ gamɨnyɨ mala yɨnɨga tamannerɨna, sa'na naangei mala maalɨ'na tamɨna yadelyɨ. A'mwe kwalaalya maa'dɨvɨsara ayɨna kwalaalya wɨrɨvɨkɨradere. Nabaai a'mwera a'mwe pwarɨ gɨlyɨvɨta kwalaalya wɨjaavɨpɨjai yɨ sare sarɨ ‘Gɨlyɨvɨta kwalaalya pɨnɨjɨ nerɨvɨkɨrana!’ yawɨrapɨjɨ jaka wɨdɨpɨ'delyɨ.

Jizaazarɨna a'mwera maratangɨvala ya'nebwinesɨ.

(Matɨyui 10:34-36)

49Dɨke' kurɨya yaaye yɨngakɨnɨke nadevaaibɨ' a'mweraavɨ maratangɨvalya'neinyɨ Kwaakevakɨna bɨweinyɨ. Sarevɨ tewaanna yawɨ'manɨge dɨka daza' yɨme'nya'bɨ' yɨdathe'na. 50Taanginyavɨ (bavɨtaazɨyavɨ) nyɨvaihade' kɨnɨnnakeinyɨ. Dahaa' sara manyainyɨ nɨmɨre sɨmunya' taanga nyɨna'manɨke'na ‘Yarai yɨma'nade' tewaanyasɨ,’ yawɨ'manɨge. 51Sarɨmɨ nɨmɨnyɨna dahayawɨ'manɨgava? ‘Kwaakevakɨya yuyaraavɨ avaaizɨmunya wakya'nei bɨwakei dɨngaka!’ Aawa. Sarɨmɨnyɨ yɨhɨthɨvanɨge. Nɨmɨ a'mweraavɨ maratangɨvalya'neinyɨ bɨweinyɨra. 52Sare' dare'nesɨ. Dahaasɨ dɨvi kɨgaasɨ anga pɨrɨvɨ a'mwe atɨlya mwaalapɨriyangɨ pɨvakaai tangɨvainɨpɨ'dengɨ. Dawaai dasamɨlɨka pɨrɨwaarɨna sɨmunya ge' kɨnɨnnake mwaaibɨ'dengɨ. Nabaai pɨrɨwaai dawaai dasangɨna sɨmunya ge' kɨnɨnnakewaai mwaalyɨkadewaalyɨ. 53Kɨnɨdaai jaapainakɨlyɨ ganɨmaangei gevwi yawɨ'na, gawaalɨvaangei gevwi yawɨ'na yadi' mwaalyɨkaderaalyɨ. Nabaai kaimɨraayai gannya ganɨmaangerɨna gevwi yawɨ'na yadelyɨ. Kɨnaai jaapainakɨlyɨ ganaange' gevwi yawɨ'na, taaya' gevwi yawɨ'na mwaalyɨkadewaalyɨ. Nabaai kɨyataai jaapainakɨlyɨ a'mwe naange' gyaaya' gevwi yawɨ'na, gyaaya' gevwi yawɨ'na yadi' mwaalyɨkadewaalyɨ.”

Yɨma'naabathe pɨnɨnna sɨmunya yawɨsabwinesɨ.

(Matɨyui 16:2-3; Maakɨ 8:11-13)

54A'mwe kwala bwa'naanyangɨjɨ wɨdɨna “Nyɨlyai walakadimagɨ yɨraaya tɨnga yemina yadaa'nyɨ sarɨmɨ tɨnna sara wangadɨvɨ' yɨme'nya'bɨ' dara dadɨvɨsaihɨlyɨ ‘Ai, burɨke' bwalarade'nanyɨra.’ Sara deva yadapi yɨ sara yɨma'nyɨna. 55Nabaai yɨhuta dɨragɨnya' saawɨtɨyɨmagɨdaa'nyɨ badevɨ tɨnna wangadɨvɨ' sarɨmɨ dadɨvɨkɨ ‘Nyɨlya' tɨrɨkwaa'dɨka nade'na yɨwaka.’ Yɨ sare sa' yɨma'nyɨna yadesɨ. 56Kwaasɨ yadɨvɨsaihi, Kwaakevakɨya saburɨjɨ sɨgunyavɨya saburɨjɨ tɨnna nayaa yawɨrangadɨvɨsaihɨlyɨ. Sare kɨrɨvɨdaa'nyɨ kɨrɨ' dahaasa sabwine'na Gotɨyai yɨvanɨka aaya kaavɨlya'na sɨmunya myawɨranganyɨvanɨgasa' baa'na yadɨvɨkaka!

(Matɨyui 5:25,26)

57Sarɨmɨ saihi nɨmɨnyɨna sɨmunya nayaa mamaryawɨbwaryadɨvɨ' ‘Sai yɨda'maraangelyɨ,’ be'na yadɨvɨkaka! 58Sare' dare'nesɨ. Kotɨya'neigɨ a'mwe pwalyɨ tutaanyavɨ kaanya ye'mwannɨgwodi' a'mwe sai kotɨya gɨmarya'nelyɨ saraaihi tutaanyavɨ kaanya kuna wodi' yɨ dazagaa' yagaalya' yune'na jamungajakya' jideraaihɨlyɨ. Sahwai yawɨbwa'deryawɨnna nagɨmakwodɨ'de'na. Sara kagɨmakwawojɨ yɨ yawɨbwa'dei pɨlɨzɨmaanɨyarɨ kagɨmaaryojɨ pɨlɨzɨmaanɨyai kalavuzangevɨ nagɨmwaaihadɨka! 59Gɨmɨnyɨ gɨthɨvanɨge. Kalavuzanga dazavɨ yarai jahalya'makwodeigɨ mɨka! Aayagaa' gɨmɨre yadɨnya naanga sannajɨ maalɨka sannajɨ yune'na tɨvɨkɨra'gɨzɨyagaa'nanyɨ. Gotɨyai nagɨmaryawɨbwaradɨka!”

Currently Selected:

Lukɨ 12: byr

Highlight

Copy