Lukɨ 14

A'mwe Perɨzɨya pware angevɨ Jizaazai mwaalake'nesɨ.

1Kwazaaka pɨgaa' pɨrɨkɨ Perɨzɨyaraavɨ maremwaaidere angevɨ Jizaazai tɨka wapaaya nya'nei wɨna. Wɨna yaka sara nadaa'nyɨ kumɨ nayaa baihana'na. 2Nayaa baihana'na yadaapi, yɨthaa, a'mwe pwai, gannya kɨlaakejɨ' mɨlamakinɨkei, sare sai gamɨnyaba aya kɨba bamwaaina. 3Aya kɨba bamwaaina kya' Jizaazai kɨwɨnyangɨ maremwaaidɨvɨsaraavɨjɨ Perɨzɨyaraavɨjɨ yɨdaanganna “Kwazaakegaa' nemɨ nalaavɨnakeraavɨ tewaanya yavada'galaanne' tewaanya' dɨngaka? Aawa dɨngaka?” 4Yɨdaanganna kya' sahwara kadɨka wɨ'nabalakulɨna yadapi a'mwe sarɨ maarɨna yɨna yaka tewaanya yavada'gaina yaka gannya angebannerɨ wɨdaasɨna. 5Wɨdaasɨna yaka sarevɨ wɨdɨna “Sarɨmɨjɨya pwai kavi'nɨnnyavɨ gamɨre kaimɨraaya pwai bulɨmakaawoya kwai kwalyɨ'naraawojɨ kwazaakegaa' a'mwe sai yɨme'nya'bɨ' malɨvamakɨlyɨ yadei daaka!” 6Sarevɨdaa'nyɨ ayɨna muja'nawɨjɨ yɨpɨnerera.

7A'mwera tɨka munne dazavɨnera badaapi namwaalyɨta nawɨ'nyangɨna “Mwalaana!” dadɨvɨ' yadaapi sahwai tɨnna wanganna yaka sarevɨdaa'nyɨ ke'ba'na yagaala pɨrɨ' wɨjɨwaakɨna. Sai wɨdɨna 8“Nabaai a'mwe pwai mudɨkangegaa'ne munne naanga savɨna jaka gɨthɨjɨmaa'najaigɨ namwaalyɨta nawɨ'nyavɨ mamwaaidɨnnera! A'mwe mudɨkanga sahɨrɨsɨyai a'mwe pwarɨ gɨmɨnyɨne yayavɨ gwavɨlavɨka pwarɨ jaka nujɨvwarɨjɨmaa'nadɨka! 9Nabaai sasara yaja' yɨ a'mwe yuyaraaihɨrɨ jaka yɨhizɨvwarɨjɨmaa'najai dara gɨthathelyɨ ‘A'mwe daahawai namwaalyɨta daaha' maarana!’ Sara kyojɨ gɨmɨ wagɨla naange' maarɨna ya'gɨzɨ gamɨnyɨ dusɨmagɨdaasɨ kewɨnɨna walyamwalaawɨna jɨtheigɨnyɨ. 10Namwaalyɨta nawɨ'nyavɨ yarai mwaalya'nebwi jɨtheigɨ mɨ'. Aawa. A'mwe pwai jaka gɨthazaigɨ munne savɨna wo'gɨzɨyaigɨ yune aaya tɨyawɨnna dɨmwaaideigɨnyɨ. Gɨmɨ sara yɨja' a'mwe gɨmɨnyɨ jaka gɨthazai sai bɨna yojɨ gɨthathelyɨ ‘Nya'mweigɨ, namwaalyɨta naanga nawɨ'nya dava davɨ bilamwaala!’ Sai sasara kyojɨ a'mwe yuyaraavɨre tɨnnyarɨ yaakima'nyaigɨ mwaala'gɨzɨ tɨka wapaaya je'mwannanadeigɨnyɨ. 11Sare' dare'nanyɨ. Gazaizai yune gamɨnne yaya' munyaba makɨlajai Gotɨyai dalaangewɨ marulawakɨna yadelyɨ. Kɨrɨ' pwai yaya' gamɨnyɨna mamakinyɨ yajai yɨ sarɨna Gotɨyai gamɨnne yaya' munyaba makɨladelyɨ.”

12Sagaa' sai tɨka munne savɨna jaka jɨvwarɨjɨmaa'naka a'mwerɨ wɨdɨna “Nabaai gɨmɨ tɨka munne naanga pɨrɨ' yɨdɨka yɨjaigɨ gɨmɨnyɨ gwaja'mweraavɨjɨ jɨthaa'jɨhwaaravaavɨjɨ gɨmɨre avaaitawejɨkɨyaraavɨjɨ gɨmɨre angebanya avaaimwaalya gɨlyɨvɨkɨravɨnakeraavɨjɨ Gotɨyai tɨvɨkɨta gɨzaaya'neigɨ jaka mudɨnneigɨnyɨ. Nabaai dɨvidaa'nyɨ gɨmɨnyɨ jaka kagɨthapɨjɨ kumɨre angengɨ gɨmɨre tɨka wapaaya yɨdɨka wɨdaayɨja sanna nanaawɨdɨka! Sara kya'gɨzɨ Gotɨyare wɨrɨvɨkɨta dɨmaa'deigɨ mɨ'! 13Aawa. Gɨmɨ tɨka munne yɨdɨka naanga ya'gɨzɨ yɨ a'mwe gɨlyɨvɨ'maayaraavɨjɨ a'mwe kɨlaaka kayaaka yɨma'nɨnɨkeraavɨjɨ sɨvɨla kayaa'nanyaraavɨjɨ a'mwe tɨnna tɨbɨnyaraavɨjɨ duzɨmaa'nadeigɨnyɨ. 14A'mwe sasare sara tɨka munne gɨmɨre sanna ayɨna gɨrɨvɨkɨpɨ'dera mɨ'. Sare'na yɨlaaya yadɨ tewaanaanga gyɨnadeigɨnyɨ. Sare' dathare'nesɨ. Dɨvi a'mwe yɨda'maraangeraavɨ kavi'nɨnnyavɨdaa'nyɨ ayɨna yɨdɨkaavajahaa' Gotɨyai tɨka munne daza gɨrɨvɨkɨradeigɨnyɨ.”

Tɨka munne naangevɨna ke'ba'na dɨnɨke'nesɨ.

(Matɨyui 22:1-10)

15A'mwe saraavɨdaa'nya pwai gamɨjɨ tɨka wapaaya ye'mwannanyɨna yada yagaala dazavɨ kadɨka wɨ'nakei sahwarɨ wɨdɨna “A'mwe Gotɨyai a'mweraavɨ maremwaaidevɨ tɨka munne najai sai yɨlaaya yada tewaanaanga yɨnadelyɨ.” 16Wɨdɨna kya' sahwai wɨdɨna “A'mwe pwai ‘Tɨka munne naanga yɨdɨka yɨma!’ daka a'mwe kwalaalyaraavɨ tɨka munne savɨna yɨkabya'neraavɨ jaka mena wɨdakere. 17Nabaai tɨka munne sa nya'negaa' mena kɨbawa kima'na' gamɨre wɨdaayaderɨ wɨdaasɨna kya' a'mwe sɨnnawɨ jaka wɨjɨvwarakeraavɨ wɨdaawɨna. Sai dara wɨdɨna ‘Sarɨmɨ kaajɨla! Yuya tɨka wapaaya sa tɨvi mena yovɨgaipwakɨwona.’ 18Kɨrɨ' a'mwe yuya dazara sɨmunya pɨrɨvɨ yagaalya' dɨna yeva wɨdɨna ‘Nemɨ mwawaanneinera.’ A'mwe pwai wɨdɨna ‘Nɨmɨ wawɨnya pɨjɨ' mena mubena tɨnna wanganaawɨdera. We', munne savɨ yuna wɨdeinyɨ mɨka!’ 19Nabaai pwai wɨdɨna ‘Nɨmɨre wawɨnya ya'ne bulɨmakaawoya mena mubeneinyɨra. Sara mubɨwe sa yaamɨjɨ yaawɨde'nanyɨ. We', munne savɨ yuna wɨdeinyɨ mɨka!’ 20Nabaai pwai wɨdɨna ‘Yuna dahaasagaa' mudɨkange' madeneinyɨra. Sɨdɨraaya' mena maareneinyɨra. Sareinyɨ yuna wɨdeinyɨ mɨka!’ 21Yuyara avaaina ‘Aala!’ wɨdɨna kye' wɨdaayade dazai ayɨna wɨna yaka sasare sabwine'na gamɨre a'mwe naangerɨ wɨdɨna. Wɨdɨna kya' angevɨ gyakwalaangei sɨnna tɨka wɨda'daa'nyɨ gamɨre wɨdaayaderɨ wɨdɨna ‘Yarala! Tutaanya naangebanyana yarai wawa'gɨzɨ anga naangebanna yɨnɨguka tutaanya maalɨka yuyabanyanajɨ dɨwodeigɨnyɨ. Sara wawa'gɨzɨ a'mwe gɨlyɨvɨ'maayaraavɨjɨ a'mwe kɨlaaka kayaaka yɨma'nɨnɨkeraavɨjɨ a'mwe tɨnna tɨbɨnyaraavɨjɨ a'mwe sɨvɨla kayaa'nanyaraavɨjɨ sasare sara mari'bwaramarya'gɨzɨ nɨmɨre angevɨna dɨmakadeigɨnyɨ.’ 22Sara wɨdɨna kya' wɨdaayade dazai sara yaka dɨna ‘Naangeigɨ, gɨmɨre yagaalyavɨ mena gɨmɨdɨmwana. Kɨrɨ' namwaalyɨta pɨnɨ sɨhumale pɨnɨ yaasɨwa' warɨna.’ 23Wɨdɨna kya' naangei gamɨre wɨdaayaderɨ wɨdɨna ‘Tutaanya yuya naangebanya wawa'gɨzɨ wawɨnyabanya wawɨdɨvɨmaangebaraavɨ yamaryadɨ a'mweraavɨ a'mwemɨlɨkaavɨ bulamari'bwarɨmwaaihya! “Nɨmɨre ange' yunebanna yana!” dena yawɨ'manɨgena. 24Sare' dare'nesɨ. Gɨmɨnyɨ gɨthɨvanɨge. A'mwe yuya dazara sɨnnawɨ kɨgaa' nɨmɨ jaka jɨvwarɨjɨmaa'nera nɨmɨre tɨka wapaaya yɨnɨga wi'na nagaangabɨ'dera mɨka.’ ”

A'mwei sɨmunya nayaa pada'galayawɨrojɨ Jizaazarɨ mɨdɨnya'nebwinesɨ.

(Matɨyui 10:37-38)

25Jeruzaalemɨna kuna woda kwala bwa'naanya naangera gamɨjɨ kaanya yamarina yadaapi sahwai gɨnyɨma'nyɨna yaka wɨdɨna 26“Gazaizai nɨmɨnyawɨnna bazai, kɨrɨ' sai ganɨmaangerɨjɨ ganaangevɨjɨ gannya a'mwevɨjɨ kaimɨraayangɨjɨ gathaa'gahwaaravaavɨjɨ gya'mwengɨjɨ nabaai gannya gaala kɨrɨvɨjɨ sangɨna tewaanya naanga wɨvu'najai nabaai nɨmɨnyɨna tewaanya maalɨ'na wɨvu'najai yɨ sahwai nɨmɨre nyɨmɨdɨdei myɨma'nyɨ yannelyɨra. 27A'mwei balya'nei gannya yɨta yovihɨrarannɨke' mamarikwayɨ yojɨyai nyɨmɨdɨnajai yɨ sahwai nɨmɨre nyɨmɨdɨdei myɨma'nyɨ yannelyɨra. 28Sare' da'dare'nesɨ. Sarɨmɨjɨya pwai ‘Anga saamɨnaanga ke'mwewɨnya pɨrɨ' madɨma!’ dozɨyai yɨ sai kave kwaamu' mwaalojɨ anga dazavɨne nɨgwia'na sɨmunya nayaa yawɨradelyɨ. Sai yawɨrade ‘Nɨgwia anga savɨne' yɨnɨga wi'na majɨ'mwannya'ne' dɨngaka?’ 29Nabaai yune'na sasara mi yaja', yɨ dɨvidaa'nyɨ simɨnye' mena laabozɨya kɨrɨvɨ anga sa' yunebanna majɨ'mwannade' mɨ'. Sarevɨ a'mwe yuyara tɨnna wanganna yɨna yapɨjɨ a'mwe dazarɨ yagaaibɨraizɨka buthangamuna nyɨpɨdɨka! 30Dara wɨdɨna ‘A'mwe dazai anga daza' madɨthaakuna yɨna yaka nɨgwia'na majɨ'mwannya'nei mi yannelyɨra.’ 31Nabaai kingɨya pwai kingɨya pwalyɨ mala bwa'nya'nei, yɨ sarei nayaa kwaamu' mwaalojɨ sɨmunya nayaa yawɨradelyɨ. Gamɨ sare aawɨlasara (10,000) tenɨ taawɨzanɨyarajɨyai dara yawɨ'na ‘Kingɨya sahware aawɨlasara (20,000) tɨwedi taawɨzanɨyarajɨyalyɨ malya' yɨnɨga wi'na bwa'nɨdeinyɨ dɨngaka? Aawa dɨngaka?’ Sare savɨne'na yune'na yawɨrojɨyai 32sai yawɨ'na ‘Malya' yɨnɨga wi'na mwavɨla'muneinyɨ daaka!’ yawɨrojɨ, yɨthaanyi, gamɨre yɨkamaangei mena saamɨnyaba kuna yɨdori, sai a'mwe pwara maryaasɨna yadelyɨ. Maryaasajara wawapɨjɨ malyavɨ woyagaala dahidɨwagaawia ya'nera. 33Sasare sahɨbaaibɨ' sarɨmɨjɨya gazaizai gannya gɨlyɨvɨta yuya sangɨna bule'na mujaayɨ yajai, yɨ sahwai nɨmɨre nyɨmɨdɨdei myɨma'nyɨ yannelyɨra.

(Matɨyui 5:13; Maakɨ 9:50)

34Sarevɨdaa'nyɨ yɨhɨthɨma! Saala sa yuna nawɨ'nyaangengɨ. Kɨrɨ' nabaai saalya' gamɨre yɨrɨla mi'na kadozɨ yɨ ayɨna gannya saalya' nawɨ'nya' nemɨ gara kyawaajɨ yɨma'nannevaka! 35Sasare saala sa' wawɨnyangɨ nemɨ yɨnɨga wakaanne mɨ'. Nabaai bulɨmakaawoyangɨre lɨkejɨ yɨnɨga wi'na marirakurakaanne mɨ'. Nemɨ yaasɨwa'na bwakɨrasɨ'daanyangɨ. A'mwei kadɨ'nakei yagaala daza' sai kadɨka nayaa wɨ'nana!”

Currently Selected:

Lukɨ 14: byr

Highlight

Copy