Lukɨ 15

Sipɨzipɨyai yadaa'nɨkerɨna ke'ba'na yagaala dɨnɨke'nesɨ.

(Matɨyui 18:12-14)

1Pɨgaa' a'mwe taakɨzɨya maa'dɨvɨsarajɨ a'mwe gɨrɨkita'nanyarajɨ gamɨre yagaalya' kadɨka wɨ'nya'nera gamɨnyawɨnna yɨkabɨna yɨna. 2Yɨkabɨna yɨna yeva Perɨzɨyarajɨ Kɨwɨjarajɨ mayagaala yawɨ'na, dɨnyɨna “A'mwe dazai a'mwe gɨrɨkita'nanyarajɨ ye'mwannemwaaida tɨka ye'mwannanɨvanɨkelyɨreva.”

3Sai sarevɨ yawɨ'na yaka ke'ba'na yagaalya' wɨdɨna 4“A'mwe pwai sarɨmɨjɨyai sipɨzipɨya (100) waanɨ aadɨretɨya kɨnɨnnakei, nabaai sipɨzipɨya pwai sangineba yadaa'na kyojɨ sipɨzipɨyangɨ gyakwalaangei (99) naaidi naainɨyangɨ pimagɨ a'mwamaayaba yagalya'ma'na yojɨ kurɨvaarɨya nɨda'nadaapi kaanna wɨna sipɨzipɨya pwai yadaavajaina bɨramaarajahaa'na. Sarɨmɨjɨyai sara yadei midaaka! 5Mena bɨramaarojɨ gamɨre egwevɨ yɨlamarakwojɨ yɨlaaya naanga yada marikwavamakuna. 6Nabaai gamɨre angevɨ bamari'mavojɨ gamɨre gya'mweraavɨjɨ avaaimwaalyaraavɨjɨ jaka wɨjɨ'bwa'na kyojɨ sarera bi'bwa'nyɨna. Bi'bwa'nyɨna kyapɨjɨ sai wɨdɨna ‘Sarɨmɨ nɨmɨjɨ yɨlaaya dɨnye'mwannayɨla! Nɨmɨre sipɨzipɨya pwai yadaa'nɨkei nɨmɨ bɨrena mena bɨramaa'mwana!’ Sara wɨdathelyɨ. 7Sarɨmɨnyɨ yɨhɨthɨvanɨge. Sasarebaaibɨ', Sɨgunyavɨ mwaaidɨvɨsara yɨlaaya yadɨvɨsarera. A'mwe naaidi naainɨyara ‘ “Nemɨ yɨda'maraangeina,” dadaa sɨmunya mudɨkebwi yawɨramaarya'neina mamwaalyɨgoinera!’ yawɨ'dɨvɨsara yɨ sahwaraavɨna yɨlaaya myadɨvɨsasɨ. Kɨrɨ' a'mwe kayaa'na yade pwai sɨmunya mudɨkebwi yawɨramaarajarɨna yɨlaaya naanga yadɨvɨsasɨ.

Nɨgwi' yɨmaanɨnɨke'na dɨnɨke'nesɨ.

8Nabaai a'mwe pɨrɨ' nɨgwia atɨraalya kɨnɨnnake' dɨvi nɨgwia pu' yɨmaanyɨna. Da'dara yade' midaaka! Laamɨvananyai yewɨta'na yɨna yojɨ nɨgwi'na bwakɨranganna, bavuralangasɨwalyuna, kuna bɨrɨna yada yune bɨramaarajahaa'na. 9Mena bɨramaa'na yojɨ gamɨre gya'mwengɨjɨ gamɨre avaaimwaalyayuraavɨjɨ jaka wɨdɨna kyojɨ bi'bwa'nemwaaina kyapɨjɨ wɨdɨna ‘Nɨmɨjɨ yɨlaaya dɨnye'mwannayɨla! Nɨmɨre nɨgwia nawɨ'nya pu' yɨwɨwaki' mena bɨramaarena ayɨna mena maa'mwana!’ Sara wɨdathesɨ. 10Sarevɨdaa'nyɨ sarɨmɨnyɨ yɨhɨthɨvanɨge. Sasarebaaibɨ' a'mwe kayaa'na yade pwai sɨmunya mudɨkebwi yawɨramaaraja'na Gotɨyare mamaayara yɨlaaya yɨpɨ'dere.”

Mɨgɨnyai ganɨmaangerɨ yagalya'makwoke'na dɨnɨke'nesɨ.

11Nabaai wɨdɨna “A'mwe pwai mɨgɨnya pwaraai kɨnɨnnakei. 12Sarevɨ gahwaalaanga aaya wɨryaakei ganɨmaangerɨ wɨdɨna ‘Nɨmwai, nɨmɨ gɨlyɨvɨta yuyangɨna dara yawɨ'mwa “Naarɨmɨ yuya darainaarɨ dɨnehɨzaapalya! Sara jaapala'gɨzɨ nɨmɨnyɨnevaa' dahaa' yune'na dɨnyɨjaapalya!” ’ Wɨdɨna kya' kɨrɨnɨmaangei gamɨre gɨlyɨvɨta yuya sadaraarɨ wɨjaapalyɨna. 13Wɨjaapalyɨna yaka aaya wɨryaakerɨna wɨjaavɨna kya' sahwai saba maalɨkegaa' mwaalɨna yaka gamɨre gɨlyɨvɨta yuya mari'bwa'na yaka anga saamɨnya menya pɨwɨ pwaraavɨrewɨnna mwalaawɨna. Anga dazaba kuna mwaaida gamɨre gɨlyɨvɨsa yaasɨwa' mariwɨnama'na yɨna yaka gannya kayaa'nanya yade saburɨdaasɨ yuna gɨlyɨvɨ'maayai mwaalɨna. 14Sahwai gamɨre gɨlyɨvɨta yuya mena wasɨ'nakei mwaaidɨ'nyɨ dɨvidaa'nyɨ anga dazaba mɨjɨka naanga pɨrɨ' yɨma'nyɨna. Sara yɨma'nyɨna kya' sai gɨlyɨvɨta aane pɨmɨlɨ' muwaryadɨsɨ. 15Sarei anga dazabadaa'nya a'mwe pwarɨ wawɨnya' wɨdaayɨna. A'mwe sai gamɨre yaawarɨkurɨsabanna wɨdaasɨna yɨna yakei yaawaryaraavɨ maremwaaida yɨ'dɨvaina. (Juyaraavɨne wawɨnya sa' gɨrɨkita'nanya' warɨka kɨrɨ' yɨna.) 16‘Yaawaryara nadɨvɨsa nɨmɨre munya wi'na wiana!’ daka yakelyɨ. Sahwarɨ wapaaya wɨjaaya'nei a'mwe aane pwai kwai mɨ'. 17Sagaa' gamɨ kayaa'na mwaalake sabwine'na sɨmudaadaanya kwalaalya yawɨraka gamɨnyɨne'na nayaa yawɨ'na yaka dɨna ‘Nɨmɨnyɨ nɨmware yuya wawɨnya wɨdaayadɨvɨsara tɨka munne kwalaalya nadaapi kɨrɨ' dava yune nɨmɨ mwaaihe dainyɨ mɨjɨka naange' yuna jɨvanɨgena! 18Baa'nana! Nɨmɨ wɨladaa'na ya'mujɨ nɨnnya nɨmwaryawɨnna ayɨna wɨde'nanyɨ. Sara ya'mujɨ nɨmwarɨ dara wɨdɨdeinyɨ. Nɨmwai, nɨmɨ kayaa'nanyabwi sana yɨweinyɨ. Sɨgunyavɨya Gotɨyarɨjɨ gɨmɨnyɨjɨ kayaa'nanyabwi sana yɨweinyɨ. 19Dahaa' nɨmɨ a'mwe nawɨ'nyainyɨ mɨ'. Sare'na nɨmɨnyɨna ayawɨdaa'nyɨ “Nɨmɨre kaimɨraayalyɨra,” nyɨdɨnneinyɨ mɨka. Gɨmɨre wawɨnya gɨthaaya'neinyɨ dɨnyɨdahɨlakɨdeigɨnyɨra.’ 20Sarevɨ sai ganɨmaangeryawɨnnei kaanna wɨna. Sara kaanna wɨna yake sai menya keiba kuna widavadaa'nyɨ ganɨmaangei tɨnna maranganna. Tɨnna maranganna yɨna yaka ganɨmaangere kale sahwarɨna yenyɨ'nanganna wiadaa'nyɨ kaanyave'na walyuna yaka gannya kaimɨraayarɨ walyagalamujɨraawɨna yɨna yaka maangwɨdaanyaba bu'buta marina. 21Bu'buta marina yadaa'nyɨ gawaalɨvaangei wɨdɨna ‘Nɨmwai, nɨmɨ kayaa'nanyabwi sana yɨweinyɨ. Sɨgunyavɨya Gotɨyarɨjɨ gɨmɨnyɨjɨ kayaa'nanyabwi sana yɨweinyɨ. Dahaa' nɨmɨ a'mwe nawɨ'nyainyɨ mɨ'. Nɨmɨnyɨna ayawɨdaa'nyɨ “Nɨmɨre kaimɨraayalyɨra,” nyɨdɨnneinyɨ mɨka!’ 22Kɨrɨ' ganɨmaangei gamɨre yaasɨwa'wawɨnyaraavɨ wɨdɨna ‘Yarala! Sarɨmɨ baazɨ'ma'nya nawɨ'nyaangesɨ maarapɨjɨ makabapɨjɨ dɨvaazɨ'makwila! Sara mi'na yapɨjɨ nɨgwɨlalaaka nawɨ'nya dɨrɨmwila! Nabaai kwaari'masɨvɨlyai maarapɨjɨ dɨvaazɨ'makwila! 23Sara mena yapɨjɨyagaa' bulɨmakaawoya dɨwɨnya sɨgunnakei galyɨramakabapɨjɨ baramila! Nemɨ tɨka munne yabwakɨlanadaa yɨlaaya yaade'nanyɨ. 24Sare' dare'nanyɨ. Nɨmɨre kaimɨraaya dathai mena bainɨkei, kɨrɨ' dahaa' sai gaala ayɨna mwaalɨka. Mena yadakwokei, kɨrɨ' nemɨ ayɨna bɨramaa'mwolyɨra.’ Sara daka wapeyɨdɨka naanga pɨrɨ' yɨna.

25Yɨlaaya yadaapi aaya sɨraangei wawɨnyawɨ yɨbwa'nyɨna yaka dɨvidaa'nyɨ angebanna bɨna yaka anga kwala bwa'naanya bwamwaihodapiyabanna wɨlaabɨna yaka kadɨke' wɨ'nyɨna ‘Pɨradazajɨ tadɨvɨ' kwarame dahɨ'ma'manɨgava!’ 26Kadɨka wɨ'nyɨna yaka wɨdaayade pwarɨ jaka jɨvwarɨjɨmaa'nyɨna yɨna yaka sahwarɨ yɨdaanganna ‘Gatha'dara yɨvanɨgava?’ 27Yɨdaanganna kya' sai wɨdɨna ‘Jɨhwaalaangei ayɨna mena bɨwakerɨnereva. Sara bɨwakerɨna gɨmɨnyɨ gɨmaamaangei bulɨmakaawoya dɨwɨnyai maratamaka sahwarɨna yɨdɨka yakevɨnyɨra. Gannya kaimɨraayai kɨgaakuna mena yɨwɨnɨka kwai ayɨna mena maaraka maamɨdarya mwaaimwakerɨna yo'dakwɨya miwakerɨna yɨwake'nanyɨ.’ 28Nabaai sare kɨrɨvɨ aaya sɨraangei sɨnna tɨka wɨda'daa'nyɨ angevɨ wɨlya'na ‘Aala!’ yawɨ'na. Sara yawɨ'da'nadaa'nyɨ gannya ganɨmaangei mwasawɨnna bwalyuna yɨna yaka yagaala nawɨ'nya' bwalyawɨdɨna. 29Sara wɨdadaa'nyɨ ganɨmaangerɨ ja'nawɨdɨna ‘Yɨthaa, kwarame kwalaalya bodaa'nyɨyangɨ nɨmɨ gɨmɨre wawɨnya' lɨmwaga'dɨnyainyɨ. Yuyagaa' nɨmɨ gɨmɨre yagaalya' galagɨzekɨvaidɨnyainyɨ mɨka! Sare'na kɨrɨ' gɨmɨ memedɨwɨnyai pwai nɨmɨ nya'mwerajɨ yɨlaaya yadɨ yɨdɨka yanɨwɨnei nyɨ'daalyadɨnyainyɨ mɨka! Yuna aawaawa. 30Sarevɨ da gɨmɨre kaimɨraaya dathazai gɨmɨre gɨlyɨvɨta yuya dazaza a'mwe kayaa'na gɨrɨkita'nanyabwi yadɨvɨsamɨlɨkaavɨ yanga yaasɨwa'na wɨjavamaryada yuya gɨlyɨvɨsa yɨmɨngaasɨnakelyɨ. Sara yakei ayɨna bakerɨ, gamɨnyɨna kale kagiwa' bulɨmakaawodɨwɨnyai maratamagɨna yɨdɨka yɨvanɨgɨ.’ 31Sara wɨdɨna kya' sai wɨdɨna ‘Kaimɨraayaigɨ, gazagaasagaa' naarɨmɨnɨdainaai ye'mwannemwaaidasanɨdainaalyɨ. Sarevɨ nɨmɨre gɨlyɨvɨta yuya sa yune gɨmɨnyɨnannengɨ. 32Sare kɨrɨvɨ dahaasagaa' nemɨ yɨlaaya yaade'nanyɨ. Yɨlaaya sara yawaajɨ nemɨre munyɨ' tewaanya nawɨ'nya yɨma'nade'na. Gɨmɨre jɨhwaalaanga dazai mena yɨnahu bainɨka kwai, kɨrɨ' dahaa' gaalyai mwaaimwa'. Sai mena yagalya'makwokei kwai, kɨrɨ' dahaa' nemɨ ayɨna bɨramaa'mwolyɨ. Sare'na yɨlaaya davwi yakade' tewaanyasɨra.’ ”

Currently Selected:

Lukɨ 15: byr

Highlight

Copy