Lukɨ 4
4
Saataanɨ Kayaa'nanyai Jizaazarɨ yɨjɨwaala wia'na yaamɨjɨ walapapalakya wiakebwinesɨ.
(Matɨyui 4:1-11; Maakɨ 1:12-13)
1Kurya Tewaanyai Jizaazarɨ yuneba wɨlamwaaidɨ'nyɨ Aalya Jothanɨyavɨ yagalya'ma'na yɨna yaka ayɨna kaanna wɨna. Sarevɨ a'mwamaayabanna Kurya Tewaanyai sahwarɨ yɨbwarɨdaakuna yadaa'nyɨ 2sai a'mwera mamwaalyɨgata dazaba mwaalɨna yadɨ'nyɨ yɨrɨka a'mwe pwaraare sɨvɨla atɨraalya (40) bwodaa'nyɨyagaa' Kotɨya Maryadei kayaa'nanya'na yaamɨjɨ walapapalakɨna. Yaamɨjɨ walapapalakɨna yadaa'nyɨyagaa' sai wapaaya aane kɨrɨ' pɨrɨ' tɨka manyɨ kya' dɨvidaa'nyɨ mɨjɨka wina. 3Mɨjɨka wina yadaa'nyɨ sagaa' Kotɨya Maryadei wɨdɨna “Nabaai gɨmɨ ‘Gotɨyare Gawaalɨvaangeinyɨ daakajɨ,’ yɨ sɨla dazarɨ duthana! ‘Sɨlya'gɨ bɨretɨya jɨma'nana!’ ” 4Wɨdɨna kya' Jizaazai ja'nawɨdɨna “Bukuya' dara dɨnɨ' ‘Yune bɨretɨya'nanya' sa' a'mwerɨ gaala yɨnɨga wɨjaavade' mɨka! (A'mwerɨ kuryarɨ yɨvaimwagathe' mɨ'!)’ ” 5Mi'na wɨdɨna kya' mugunya naangevɨna makilaawɨna yaka sare' yɨme'nya'bɨ' Kwaakevakɨya maremwaaidɨvɨta kingɨyaraavɨne yuya sangɨ wibwarɨdaakuna. 6Yɨna yaka Kotɨya Maryadei wɨdɨna “Maremwaaidɨvɨta yuya dɨragɨnya daza gɨmɨnyɨ gɨzaavɨdeinyɨra. Dazahɨnɨngɨne byaanna dɨragɨnyajɨ gɨzaavɨdeinyɨ. Yuya gɨthɨwe daza nɨmɨre yuya mena yɨma'nɨnɨkengɨra. Sare'na nɨmɨ ‘A'mwe pwarɨ wɨjaavɨma!’ dɨwɨja', yɨ nɨmɨ wɨjaavɨna yɨdeinyɨra. 7Nabaai gɨmɨ walaruta'na'dɨzaigɨ nɨmɨnyɨ lotuya nyɨmaryɨjaigɨ sarevɨdaa'nyɨ yuya daza gɨmɨre yɨma'nadengɨra.” 8Sara wɨdɨna kya' Jizaazai wɨrɨvɨkɨ'na “Bukuya' dara dɨnɨ'
‘Gɨmɨ Naangerɨ gɨmɨre Gotɨyarɨ yɨlaaya nayaa dumarya!
‘Yune gave sahware wawɨnyanna nayaa lɨmwaga'na jɨtheigɨnyɨ.’ ”
9Wɨdɨna kya' Jeruzaalemɨna yɨbwarɨdaakuna yɨna yaka Gotɨyare Angevɨ yuna munya ke'bevanna yɨlamarakaawɨna yaka wɨdɨna “Nabaai gɨmɨ ‘Gotɨyare Gawaalɨvaangeinyɨ daakajɨ,’ davadaasɨ kewɨnɨnna dɨthɨkwosɨka! 10Sare' dare'nesɨ. Bukuya' dara dɨnɨ'
‘Gamɨre ejelɨyaraavɨ kudozɨ gɨmɨnyɨ nayaa gɨmaremwaaibɨ'derera.’
11Nabaai
‘Sɨla pwai gɨmɨre sɨvɨlyarɨ nagɨmwinadɨka!
‘Sahwara kumɨre asajɨ maragɨlɨmwagapɨ'derera.’
Sara dɨnɨke'nesɨ.” 12Sara wɨdɨna kya' Jizaazai ja'nawɨdɨna “Yagaalya' dara dɨnɨ' ‘Gɨmɨ Naangerɨ gɨmɨre Gotɨyarɨ yaamɨjɨ minnera! Gotɨyare sɨmunya' wa'dori yune gɨnnya sɨmunyavɨdaa'nyɨ sara minnera!’ Sara dɨnɨkesɨ.” 13Mi'na wɨdɨna kya' Kotɨya Maryadei walapapalakya dala pɨnɨnnanya yaamɨjɨ mena yaka Jizaazarɨ yagalya'ma'na yaka pɨgaa'nei yemwaaina ya'.
Galɨli Jizaazai wawɨnya' mudɨ'na yamaarake'nesɨ.
(Matɨyui 4:12-17; Maakɨ 1:14-15)
14Kurya Tewaanyare dɨragɨnyavɨ Jizaazai Galɨlinei ayɨna wɨna ya'. Sarevɨdaa'nyɨ gamɨnyɨne yagaalya' anga saba yuyaba yɨ'namarya'. 15Sarevɨ yuyagaa' a'mweraavɨ kumɨre lotuangengɨ wɨjɨwaakɨna. Sara wɨjɨwaakɨna yadaa'nyɨ a'mwe yuyara gamɨnne yaya' byaannake' munyaba makina yadɨvɨkɨ.
Naazaretɨ mwaalyara Jizaazarɨna “Aala!” desa'nesɨ.
(Matɨyui 13:53-58; Maakɨ 6:1-6)
16Jizaazai Naazaretɨnei kaanna wɨna. Sɨnnawɨ maalɨkegaa', sai anga naanga dazaba mwaalakelyɨ. Sara mwaalaka naanga yɨma'nakelyɨ sahɨba. Sai yuyagaa' yadevaaibɨ'na kwazaakegaa' lotuangevɨ wɨlaawɨna. Wɨlaawɨna yaka Gotɨyare yagaalya' tɨnna danganya'nei daavɨna. 17Sarerɨ bukuya pɨropetɨya Aazaayai wɨjaake' dɨnɨke' wɨjaavɨna. Wɨjaavɨna kya' bukuya' maratɨlaayɨna yaka yagaalya' dara yɨda'nɨkevɨ wanganna
18“Naangere Kuryai nɨmɨnyɨ nyɨmwaalɨka.
Sarevɨdaa'nyɨ gɨlyɨvɨ'maayaraavɨna yagaala tewaanya' wɨjɨwaakya'neinyɨ
Welivananya' dɨngɨna nyadevɨ nɨmɨnyɨ nyɨdahɨlakakeinyɨ.
Kalavuzɨyaraavɨ dara wɨjɨwaakya'neinyɨ nyɨmaryasaabakeinyɨ
‘Kalavuzɨwawɨnyavɨ yagalya'mavapi kaanya dɨwila!’
‘A'mwe tɨbɨnyaihi tɨnna ayɨna danganyɨla!’
Taanga yɨhyadeihi taanga sa' marasɨ'nya'neinyɨ
Nayaa tewaanyaihi yɨhɨmwaaihya'neinyɨ nyɨdasaabakeinyɨ.
19Naangere tewaanyagaa' na padaihasamaaryagaa'na wɨjɨwaakya'neinyɨ.”
Sara tɨnna wanganna, wɨdɨna yaka 20bukuya' marabuku'na yaka maremwaalyarɨ ayɨna wɨjaavɨna yaka wɨjɨwaakya'nei walamwaaina. Sarevɨ a'mwe yuya lotuangevɨ mwaaidapiyara tɨnnya' yune gave sahwarɨna yɨ'bwaranganna yesalyɨ. 21Walamwaaina yaka sahwaraavɨ gaai wɨdɨna “Dahaasagaa' Gotɨyare pɨkarya daza' yuna nebwina yɨma'nɨwaka. Sarevɨ sarɨmɨ kadɨka mena wɨ'nɨwaasagaa' nebwina yɨma'nɨwaka.” 22Sara wɨdɨna kya' sahwarɨne yayavɨ munyaba makidɨvɨ' yagaala nawɨ'nya gamɨre maangikɨdaa'nyɨ wɨdakevɨna atɨka maru'na'na yeva dɨnyɨna “Ai, a'mwe dazai Jozepɨyare kaimɨraayai midaaka!” 23Dɨnyɨna kye' sahwaraavɨ wɨdɨna “Naanga nebulyasɨ. Sarɨmɨ yagaala ke'ba'nanya datha' dɨnyɨjideinyɨ ‘Dotaigɨ gɨmɨre kɨlaakejɨkɨ nayaa javada'gainadeigɨnyɨ.’ Anga Kaapanɨyamɨ yagɨnyabaaibɨ'na, sa kadɨka mena wɨ'nongɨ nabaai gɨmɨre anga dava gɨmɨre kɨlaakejɨ'bɨsaba avaala sahɨbaaibɨ'na ja!” 24Sara wɨdɨna yaka wɨdɨna “Nebulya'na yɨhɨthɨvanɨge. Gannya angeba pɨropetɨya aane pwai kware yagaalyavɨ kadɨka mu'nyadɨvɨsarera. 25Yɨthaanyi, naanga nebulyavɨnyɨ. Yɨhɨthɨvanɨge. Pɨropetɨya Yɨlaajaregaa' Yɨzɨrelɨ saba yaanyɨwaaka kwalaalya mwalyaasangɨra. Dazagaa' kwarame dawaai da' yaka lawe ata purɨdaa'nyɨ pu'na wavɨla'daa'nyɨ nyɨla naangegaa' yada burɨka mi yada anga yuyaba yuneba mɨjɨka naange' yɨma'nyɨna yaakegaakɨra. 26Kɨrɨ' Yɨzɨrelɨdaa'nya yaanyɨwaaka pɨrɨyawɨnna Gotɨyai Yɨlaajarɨ mamaryaasɨ yɨna ya'. Aawa. Sai Sarepaatɨ Saaithonɨ sɨmagɨnnerɨ yune menyabanya' yaanyɨwaaka pɨrɨvɨ mɨjɨke'na wɨgaimwagya'nerɨ maryaasɨna. 27Sabaaibɨ' Pɨropetɨya Yɨlaazare sahɨgaa' Yɨzɨrelɨ saba a'mwe samatanaka kwalaalyara mwaalɨna yadapi kɨrɨ' sahwaraavɨ myavada'galawɨmwaaihi kyaa' tewaanyara mima'nyaasare. Aawa. Yune menyabanyarɨ Sɨrɨyadaa'nya Nemaanɨ sahwarɨ yavada'galawɨmwaaihɨna yaakelyɨ.” 28Jizaazai sara wɨdɨna kya' a'mwe yuyara lotuangevɨ mwaaleva yagaala savɨ kadɨka sara wɨ'nyɨna yeva sɨnna tɨka yune davɨna. 29Sɨnna tɨka yune davɨna kwia' daavɨna yeva anga naanga saba mwasɨlaa maryaasɨna. Kumɨre anga naanga dazaba mugunya pɨrɨvɨ yɨlamannaawodɨ'nyɨyaba. “Davaanyavɨ kewɨnɨ sahwarɨ lɨvaramaana!” deva sahwarɨ kumɨre anga yɨlamannadɨ'nyɨya davaamaangebaarɨ kaanya makuna. 30Kaanya makuna kye' kɨrɨ' sahwai kumɨnyɨ tɨnnyaba pɨraaihɨ'nyɨna yaka kaanya mena wɨna.
Jizaazai yɨmakerɨ maanga wɨdaasake'nesɨ.
(Maakɨ 1:21-28)
31Sai Kaapanɨyamɨna walaawɨna. Anga naanga sa' Galɨli mannɨkesɨ. Walaawɨna yaka Juyaraavɨre kwazaakegaa' wɨjɨwaakɨna yɨna. 32Sare savɨ sahwara kadɨka wɨ'nyɨna yeva atɨka maru'na'muluna. Sai dɨragɨnya naange' kɨnɨnnakei wɨjɨwaakya nawɨ'nya' wɨdake'na atɨka maru'na'muluna. 33Lotuangevɨ a'mwe pwai mwaalɨna. Sahwarɨ yɨmakei wɨmwaaidɨ'nyɨyalyɨ. Sai mwaalɨna yada jaka naanga danganna 34“Akai! Naazaretɨdaa'nyɨ Jizaazaigɨ, nemɨnyɨ gara ya'neigɨ bahɨneka? Nemɨnyɨ kayaaka neyɨgalya'neigɨ bahɨneigɨ daaka? Gɨmɨnyɨna sɨmunya mena gyawɨ'mwa. ‘Gɨmɨ Gotɨyare tewaanya nawɨ'nyaangeigɨ daaka!’ yawɨ'mwa!” 35Jaka sara danganna kya' kɨrɨ' Jizaazai maanga wɨdɨna “Yɨmakeigɨ maange' bɨpala'gɨzɨ a'mwe sarɨ jahalya'makwona!” Sara maanga wɨdɨna kya' a'mweraayaba yɨmaka dazai a'mwe sarɨ kwaakewɨ yɨvatawakɨna yɨna yaka sarɨ kayaaka migalyɨ yaka sarɨ yagalya'makuna. 36Sara yagalya'makuna kya' a'mwe yuyara lɨka yɨwainɨgulɨna yadɨvɨ' kumɨ sara dara dɨnyɨna “Yagaala sasare sa' be yagaalavaka? A'mwe naangeibɨsai dɨragɨnnakei yɨmakeraavɨ dɨragɨnna wɨdɨwake' sahwara kadɨka wɨ'neva a'mweraavɨ yagalya'maveva kaanna wɨwaasarera.” 37Sarevɨdaa'nyɨ Jizaazarɨne yagaalya dazɨmagɨ anga yuneba yamarina ya'.
Jizaazai kwalaalyaraavɨ tewaanya yavada'galake'nesɨ.
(Matɨyui 8:14-17; Maakɨ 1:29-34)
38Sagaa' Jizaazai daavɨna yaka lotuanga savɨ yagalya'ma'na yaka Saaimonɨmɨre angevɨna wɨlaawɨna. Saaimonɨmɨre ganyaalɨmaangevɨ bɨ'bɨ'nalaaya' wiadaa'nyɨyavɨ. Wɨlaawɨna kya' “Sahɨrɨvɨ wɨgaimwagana!” yawɨreva gamɨnyɨna yɨdaanganna. 39Yɨdaanganna kye' sahɨrɨyaba aya kɨba gaidavaabɨna yɨna yaka bɨ'bɨ'nalaaya sa' maanga wɨdɨna. Sare' bɨ'bɨ'nalaaya sa' yagalya'makuna. Yuna sagaasagaa' a'mwe daza' dɨkaa'na yɨna yaka kumɨnne wapaaya yovɨrawakɨna ya'.
40Nyɨlyai gaai walakyagaa' Juyaraavɨre kwazaake' mena yɨwawakegaa' sawɨtɨrɨnyaburɨ a'mwe kwɨya'mwanakera nalaaya dala nabinabinyajɨyaraavɨ sahwaryawɨnna makabɨna. Mi'na makabɨna kye' sai gamɨre asa' a'ba yɨlakadaa'nyɨ a'mwe yuya sare saraavɨ tewaanya ayɨna yavada'gaina. 41Nabaai yɨmakera a'mwe kwalaalyaraavɨ yagalya'ma'dɨvɨ' yuna kaanna wɨna. Yɨmaka dazara jaka naanga danganna “Gɨmɨ Gotɨyare Gawaalɨ'gɨnyɨra.” Sahwara sɨdu'naka dare'na yawɨ'dɨvɨsa'na “Sai Kɨraazɨtɨyai daaka! Gotɨyai dahɨlakaka maryasaabakei daaka!” jaka sara danganna. Jaka danganna yadaapɨjɨ sahwai mayagaala wɨdɨna kya' sahwara maanga bɨpaina yeva kaanna wɨna.
(Maakɨ 1:35-39)
42Yɨrɨka gaai pu'daa'nyɨ anga saba yagalya'ma'na yɨna yaka a'mwera mamwaalyɨgasɨmagɨnna kaanna wɨna. Kaanna wɨna kya' kwala bwa'naanya sahwarɨna bɨrɨbɨrya yɨna yeva gamɨnyawɨnna yɨkuna. “Nemɨnyɨ neyagalya'mavojɨ nawodɨka! Gamɨnyɨ dahalalɨmwagaana!” yawɨreva yɨkuna. 43Kɨrɨ' sahwai wɨdɨna “Gotɨyai maremwaaide yagaala tewaanya' anga naanga pɨbanyajɨ wɨjɨwaakɨma! Wawɨnya daza' ya'neinyɨ Gotɨyai nyɨdasaabakeinyɨ.” 44Sarei nabaai Juyaraavɨre lotuangengɨ yagaalya' wɨjɨwaakɨna ya'.
Currently Selected:
Lukɨ 4: byr
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
Lukɨ 4
4
Saataanɨ Kayaa'nanyai Jizaazarɨ yɨjɨwaala wia'na yaamɨjɨ walapapalakya wiakebwinesɨ.
(Matɨyui 4:1-11; Maakɨ 1:12-13)
1Kurya Tewaanyai Jizaazarɨ yuneba wɨlamwaaidɨ'nyɨ Aalya Jothanɨyavɨ yagalya'ma'na yɨna yaka ayɨna kaanna wɨna. Sarevɨ a'mwamaayabanna Kurya Tewaanyai sahwarɨ yɨbwarɨdaakuna yadaa'nyɨ 2sai a'mwera mamwaalyɨgata dazaba mwaalɨna yadɨ'nyɨ yɨrɨka a'mwe pwaraare sɨvɨla atɨraalya (40) bwodaa'nyɨyagaa' Kotɨya Maryadei kayaa'nanya'na yaamɨjɨ walapapalakɨna. Yaamɨjɨ walapapalakɨna yadaa'nyɨyagaa' sai wapaaya aane kɨrɨ' pɨrɨ' tɨka manyɨ kya' dɨvidaa'nyɨ mɨjɨka wina. 3Mɨjɨka wina yadaa'nyɨ sagaa' Kotɨya Maryadei wɨdɨna “Nabaai gɨmɨ ‘Gotɨyare Gawaalɨvaangeinyɨ daakajɨ,’ yɨ sɨla dazarɨ duthana! ‘Sɨlya'gɨ bɨretɨya jɨma'nana!’ ” 4Wɨdɨna kya' Jizaazai ja'nawɨdɨna “Bukuya' dara dɨnɨ' ‘Yune bɨretɨya'nanya' sa' a'mwerɨ gaala yɨnɨga wɨjaavade' mɨka! (A'mwerɨ kuryarɨ yɨvaimwagathe' mɨ'!)’ ” 5Mi'na wɨdɨna kya' mugunya naangevɨna makilaawɨna yaka sare' yɨme'nya'bɨ' Kwaakevakɨya maremwaaidɨvɨta kingɨyaraavɨne yuya sangɨ wibwarɨdaakuna. 6Yɨna yaka Kotɨya Maryadei wɨdɨna “Maremwaaidɨvɨta yuya dɨragɨnya daza gɨmɨnyɨ gɨzaavɨdeinyɨra. Dazahɨnɨngɨne byaanna dɨragɨnyajɨ gɨzaavɨdeinyɨ. Yuya gɨthɨwe daza nɨmɨre yuya mena yɨma'nɨnɨkengɨra. Sare'na nɨmɨ ‘A'mwe pwarɨ wɨjaavɨma!’ dɨwɨja', yɨ nɨmɨ wɨjaavɨna yɨdeinyɨra. 7Nabaai gɨmɨ walaruta'na'dɨzaigɨ nɨmɨnyɨ lotuya nyɨmaryɨjaigɨ sarevɨdaa'nyɨ yuya daza gɨmɨre yɨma'nadengɨra.” 8Sara wɨdɨna kya' Jizaazai wɨrɨvɨkɨ'na “Bukuya' dara dɨnɨ'
‘Gɨmɨ Naangerɨ gɨmɨre Gotɨyarɨ yɨlaaya nayaa dumarya!
‘Yune gave sahware wawɨnyanna nayaa lɨmwaga'na jɨtheigɨnyɨ.’ ”
9Wɨdɨna kya' Jeruzaalemɨna yɨbwarɨdaakuna yɨna yaka Gotɨyare Angevɨ yuna munya ke'bevanna yɨlamarakaawɨna yaka wɨdɨna “Nabaai gɨmɨ ‘Gotɨyare Gawaalɨvaangeinyɨ daakajɨ,’ davadaasɨ kewɨnɨnna dɨthɨkwosɨka! 10Sare' dare'nesɨ. Bukuya' dara dɨnɨ'
‘Gamɨre ejelɨyaraavɨ kudozɨ gɨmɨnyɨ nayaa gɨmaremwaaibɨ'derera.’
11Nabaai
‘Sɨla pwai gɨmɨre sɨvɨlyarɨ nagɨmwinadɨka!
‘Sahwara kumɨre asajɨ maragɨlɨmwagapɨ'derera.’
Sara dɨnɨke'nesɨ.” 12Sara wɨdɨna kya' Jizaazai ja'nawɨdɨna “Yagaalya' dara dɨnɨ' ‘Gɨmɨ Naangerɨ gɨmɨre Gotɨyarɨ yaamɨjɨ minnera! Gotɨyare sɨmunya' wa'dori yune gɨnnya sɨmunyavɨdaa'nyɨ sara minnera!’ Sara dɨnɨkesɨ.” 13Mi'na wɨdɨna kya' Kotɨya Maryadei walapapalakya dala pɨnɨnnanya yaamɨjɨ mena yaka Jizaazarɨ yagalya'ma'na yaka pɨgaa'nei yemwaaina ya'.
Galɨli Jizaazai wawɨnya' mudɨ'na yamaarake'nesɨ.
(Matɨyui 4:12-17; Maakɨ 1:14-15)
14Kurya Tewaanyare dɨragɨnyavɨ Jizaazai Galɨlinei ayɨna wɨna ya'. Sarevɨdaa'nyɨ gamɨnyɨne yagaalya' anga saba yuyaba yɨ'namarya'. 15Sarevɨ yuyagaa' a'mweraavɨ kumɨre lotuangengɨ wɨjɨwaakɨna. Sara wɨjɨwaakɨna yadaa'nyɨ a'mwe yuyara gamɨnne yaya' byaannake' munyaba makina yadɨvɨkɨ.
Naazaretɨ mwaalyara Jizaazarɨna “Aala!” desa'nesɨ.
(Matɨyui 13:53-58; Maakɨ 6:1-6)
16Jizaazai Naazaretɨnei kaanna wɨna. Sɨnnawɨ maalɨkegaa', sai anga naanga dazaba mwaalakelyɨ. Sara mwaalaka naanga yɨma'nakelyɨ sahɨba. Sai yuyagaa' yadevaaibɨ'na kwazaakegaa' lotuangevɨ wɨlaawɨna. Wɨlaawɨna yaka Gotɨyare yagaalya' tɨnna danganya'nei daavɨna. 17Sarerɨ bukuya pɨropetɨya Aazaayai wɨjaake' dɨnɨke' wɨjaavɨna. Wɨjaavɨna kya' bukuya' maratɨlaayɨna yaka yagaalya' dara yɨda'nɨkevɨ wanganna
18“Naangere Kuryai nɨmɨnyɨ nyɨmwaalɨka.
Sarevɨdaa'nyɨ gɨlyɨvɨ'maayaraavɨna yagaala tewaanya' wɨjɨwaakya'neinyɨ
Welivananya' dɨngɨna nyadevɨ nɨmɨnyɨ nyɨdahɨlakakeinyɨ.
Kalavuzɨyaraavɨ dara wɨjɨwaakya'neinyɨ nyɨmaryasaabakeinyɨ
‘Kalavuzɨwawɨnyavɨ yagalya'mavapi kaanya dɨwila!’
‘A'mwe tɨbɨnyaihi tɨnna ayɨna danganyɨla!’
Taanga yɨhyadeihi taanga sa' marasɨ'nya'neinyɨ
Nayaa tewaanyaihi yɨhɨmwaaihya'neinyɨ nyɨdasaabakeinyɨ.
19Naangere tewaanyagaa' na padaihasamaaryagaa'na wɨjɨwaakya'neinyɨ.”
Sara tɨnna wanganna, wɨdɨna yaka 20bukuya' marabuku'na yaka maremwaalyarɨ ayɨna wɨjaavɨna yaka wɨjɨwaakya'nei walamwaaina. Sarevɨ a'mwe yuya lotuangevɨ mwaaidapiyara tɨnnya' yune gave sahwarɨna yɨ'bwaranganna yesalyɨ. 21Walamwaaina yaka sahwaraavɨ gaai wɨdɨna “Dahaasagaa' Gotɨyare pɨkarya daza' yuna nebwina yɨma'nɨwaka. Sarevɨ sarɨmɨ kadɨka mena wɨ'nɨwaasagaa' nebwina yɨma'nɨwaka.” 22Sara wɨdɨna kya' sahwarɨne yayavɨ munyaba makidɨvɨ' yagaala nawɨ'nya gamɨre maangikɨdaa'nyɨ wɨdakevɨna atɨka maru'na'na yeva dɨnyɨna “Ai, a'mwe dazai Jozepɨyare kaimɨraayai midaaka!” 23Dɨnyɨna kye' sahwaraavɨ wɨdɨna “Naanga nebulyasɨ. Sarɨmɨ yagaala ke'ba'nanya datha' dɨnyɨjideinyɨ ‘Dotaigɨ gɨmɨre kɨlaakejɨkɨ nayaa javada'gainadeigɨnyɨ.’ Anga Kaapanɨyamɨ yagɨnyabaaibɨ'na, sa kadɨka mena wɨ'nongɨ nabaai gɨmɨre anga dava gɨmɨre kɨlaakejɨ'bɨsaba avaala sahɨbaaibɨ'na ja!” 24Sara wɨdɨna yaka wɨdɨna “Nebulya'na yɨhɨthɨvanɨge. Gannya angeba pɨropetɨya aane pwai kware yagaalyavɨ kadɨka mu'nyadɨvɨsarera. 25Yɨthaanyi, naanga nebulyavɨnyɨ. Yɨhɨthɨvanɨge. Pɨropetɨya Yɨlaajaregaa' Yɨzɨrelɨ saba yaanyɨwaaka kwalaalya mwalyaasangɨra. Dazagaa' kwarame dawaai da' yaka lawe ata purɨdaa'nyɨ pu'na wavɨla'daa'nyɨ nyɨla naangegaa' yada burɨka mi yada anga yuyaba yuneba mɨjɨka naange' yɨma'nyɨna yaakegaakɨra. 26Kɨrɨ' Yɨzɨrelɨdaa'nya yaanyɨwaaka pɨrɨyawɨnna Gotɨyai Yɨlaajarɨ mamaryaasɨ yɨna ya'. Aawa. Sai Sarepaatɨ Saaithonɨ sɨmagɨnnerɨ yune menyabanya' yaanyɨwaaka pɨrɨvɨ mɨjɨke'na wɨgaimwagya'nerɨ maryaasɨna. 27Sabaaibɨ' Pɨropetɨya Yɨlaazare sahɨgaa' Yɨzɨrelɨ saba a'mwe samatanaka kwalaalyara mwaalɨna yadapi kɨrɨ' sahwaraavɨ myavada'galawɨmwaaihi kyaa' tewaanyara mima'nyaasare. Aawa. Yune menyabanyarɨ Sɨrɨyadaa'nya Nemaanɨ sahwarɨ yavada'galawɨmwaaihɨna yaakelyɨ.” 28Jizaazai sara wɨdɨna kya' a'mwe yuyara lotuangevɨ mwaaleva yagaala savɨ kadɨka sara wɨ'nyɨna yeva sɨnna tɨka yune davɨna. 29Sɨnna tɨka yune davɨna kwia' daavɨna yeva anga naanga saba mwasɨlaa maryaasɨna. Kumɨre anga naanga dazaba mugunya pɨrɨvɨ yɨlamannaawodɨ'nyɨyaba. “Davaanyavɨ kewɨnɨ sahwarɨ lɨvaramaana!” deva sahwarɨ kumɨre anga yɨlamannadɨ'nyɨya davaamaangebaarɨ kaanya makuna. 30Kaanya makuna kye' kɨrɨ' sahwai kumɨnyɨ tɨnnyaba pɨraaihɨ'nyɨna yaka kaanya mena wɨna.
Jizaazai yɨmakerɨ maanga wɨdaasake'nesɨ.
(Maakɨ 1:21-28)
31Sai Kaapanɨyamɨna walaawɨna. Anga naanga sa' Galɨli mannɨkesɨ. Walaawɨna yaka Juyaraavɨre kwazaakegaa' wɨjɨwaakɨna yɨna. 32Sare savɨ sahwara kadɨka wɨ'nyɨna yeva atɨka maru'na'muluna. Sai dɨragɨnya naange' kɨnɨnnakei wɨjɨwaakya nawɨ'nya' wɨdake'na atɨka maru'na'muluna. 33Lotuangevɨ a'mwe pwai mwaalɨna. Sahwarɨ yɨmakei wɨmwaaidɨ'nyɨyalyɨ. Sai mwaalɨna yada jaka naanga danganna 34“Akai! Naazaretɨdaa'nyɨ Jizaazaigɨ, nemɨnyɨ gara ya'neigɨ bahɨneka? Nemɨnyɨ kayaaka neyɨgalya'neigɨ bahɨneigɨ daaka? Gɨmɨnyɨna sɨmunya mena gyawɨ'mwa. ‘Gɨmɨ Gotɨyare tewaanya nawɨ'nyaangeigɨ daaka!’ yawɨ'mwa!” 35Jaka sara danganna kya' kɨrɨ' Jizaazai maanga wɨdɨna “Yɨmakeigɨ maange' bɨpala'gɨzɨ a'mwe sarɨ jahalya'makwona!” Sara maanga wɨdɨna kya' a'mweraayaba yɨmaka dazai a'mwe sarɨ kwaakewɨ yɨvatawakɨna yɨna yaka sarɨ kayaaka migalyɨ yaka sarɨ yagalya'makuna. 36Sara yagalya'makuna kya' a'mwe yuyara lɨka yɨwainɨgulɨna yadɨvɨ' kumɨ sara dara dɨnyɨna “Yagaala sasare sa' be yagaalavaka? A'mwe naangeibɨsai dɨragɨnnakei yɨmakeraavɨ dɨragɨnna wɨdɨwake' sahwara kadɨka wɨ'neva a'mweraavɨ yagalya'maveva kaanna wɨwaasarera.” 37Sarevɨdaa'nyɨ Jizaazarɨne yagaalya dazɨmagɨ anga yuneba yamarina ya'.
Jizaazai kwalaalyaraavɨ tewaanya yavada'galake'nesɨ.
(Matɨyui 8:14-17; Maakɨ 1:29-34)
38Sagaa' Jizaazai daavɨna yaka lotuanga savɨ yagalya'ma'na yaka Saaimonɨmɨre angevɨna wɨlaawɨna. Saaimonɨmɨre ganyaalɨmaangevɨ bɨ'bɨ'nalaaya' wiadaa'nyɨyavɨ. Wɨlaawɨna kya' “Sahɨrɨvɨ wɨgaimwagana!” yawɨreva gamɨnyɨna yɨdaanganna. 39Yɨdaanganna kye' sahɨrɨyaba aya kɨba gaidavaabɨna yɨna yaka bɨ'bɨ'nalaaya sa' maanga wɨdɨna. Sare' bɨ'bɨ'nalaaya sa' yagalya'makuna. Yuna sagaasagaa' a'mwe daza' dɨkaa'na yɨna yaka kumɨnne wapaaya yovɨrawakɨna ya'.
40Nyɨlyai gaai walakyagaa' Juyaraavɨre kwazaake' mena yɨwawakegaa' sawɨtɨrɨnyaburɨ a'mwe kwɨya'mwanakera nalaaya dala nabinabinyajɨyaraavɨ sahwaryawɨnna makabɨna. Mi'na makabɨna kye' sai gamɨre asa' a'ba yɨlakadaa'nyɨ a'mwe yuya sare saraavɨ tewaanya ayɨna yavada'gaina. 41Nabaai yɨmakera a'mwe kwalaalyaraavɨ yagalya'ma'dɨvɨ' yuna kaanna wɨna. Yɨmaka dazara jaka naanga danganna “Gɨmɨ Gotɨyare Gawaalɨ'gɨnyɨra.” Sahwara sɨdu'naka dare'na yawɨ'dɨvɨsa'na “Sai Kɨraazɨtɨyai daaka! Gotɨyai dahɨlakaka maryasaabakei daaka!” jaka sara danganna. Jaka danganna yadaapɨjɨ sahwai mayagaala wɨdɨna kya' sahwara maanga bɨpaina yeva kaanna wɨna.
(Maakɨ 1:35-39)
42Yɨrɨka gaai pu'daa'nyɨ anga saba yagalya'ma'na yɨna yaka a'mwera mamwaalyɨgasɨmagɨnna kaanna wɨna. Kaanna wɨna kya' kwala bwa'naanya sahwarɨna bɨrɨbɨrya yɨna yeva gamɨnyawɨnna yɨkuna. “Nemɨnyɨ neyagalya'mavojɨ nawodɨka! Gamɨnyɨ dahalalɨmwagaana!” yawɨreva yɨkuna. 43Kɨrɨ' sahwai wɨdɨna “Gotɨyai maremwaaide yagaala tewaanya' anga naanga pɨbanyajɨ wɨjɨwaakɨma! Wawɨnya daza' ya'neinyɨ Gotɨyai nyɨdasaabakeinyɨ.” 44Sarei nabaai Juyaraavɨre lotuangengɨ yagaalya' wɨjɨwaakɨna ya'.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.