Lukɨ 5

Jizaazai gamɨre mɨdɨdɨvɨta sɨnnawɨnyaraavɨ jaka jɨvwaramaa'na yake'nesɨ.

(Matɨyui 4:18-22; Maakɨ 1:16-20)

1Pɨgaa' aalɨbunya Ganezaaretɨ maangebaarɨ daavɨna. A'mwe kwala bwa'naanya' gamɨnyɨ yuneba gɨhɨpalemwaaina Gotɨyare yagaalyavɨna kadɨka wɨ'nya'nere. 2Aalɨbumaangebaarɨ botɨya pukaai wa'dɨ'nyɨ kɨrɨ' a'mwe jawɨnya maarya'nera botɨyɨkaarɨ yagalya'ma'na yɨna yeva jawɨnya mwagi'nya'ne jawɨgɨlya aalya lɨvayɨna yesarera. 3Daavɨna yaka kwala bwa'naanya' yuneba gɨhɨpalemwaalesaraavɨ tɨnna wanganna yada botɨya pukɨ dɨkwosɨ'na. Botɨya sɨ' Saaimonɨmɨrikɨ. Sara yaka botɨyɨkɨ gyakwalaangerɨ wɨdɨna “Botɨya dɨkɨ kengina maalɨkɨbaweba jɨtawaasa!” Sagaa' botɨyɨkɨ yɨlamwaaina yaka kwala bwa'naanyangɨ wɨjɨwaakɨna. 4Yagaala mena wɨjɨwaakɨna yakegaa' Saaimonɨmɨ wɨdɨna “Botɨyɨ' aalyavɨ tɨnnyaba pɨzɨ'gwana jɨtavamakulaawa! Sara ya'gɨzɨ kɨrɨmɨ jawɨnya maarya'ne jawɨgɨlya' dakyɨla!” 5Sara wɨdɨna kya' Saaimonɨ wɨdɨna “A'mwe naangeigɨ dahaa' sawɨta darɨkɨ nemɨ yuyaina yagɨyagɨ wawɨnya yɨvanɨgoine. Sara yadaa kɨrɨ' jawɨnya aane pɨnɨ kɨnɨ maa'manɨgoina mɨ'. Sare' kɨrɨ' gɨmɨ dɨwaanya'na jawɨgɨlya' marakɨma!” 6Sara yɨna yagɨla jawɨnya kwalaalya naanga bulaminyɨna yadaapiyagaa' jawɨgɨlya' maramumwɨnyɨrɨjɨ yɨna. 7Sara kya' sagaa' botɨya pukɨ mwaaidakiya kumɨjɨyaraarɨ jaka wɨdɨna yagɨla kɨrɨmɨnyɨ gaimwange'na akwebwata yɨna kyagi sara yɨkabɨna kyagi botɨya sɨkaarɨ jawɨnya yunebanna yeku'nyɨna. Sagaa' botɨya sɨkaai kewɨnɨ makwalaawɨjɨ yɨna. 8Sara yɨna yadaa'nyɨ Saaimonɨ Pitai tɨnna wanganna yaka Jizaazaryawɨ sɨvigɨ'nyɨryawɨ walaruta'nyɨna yɨna yaka dɨna “Naangeigɨ, nɨmɨ kayaa'nanyabwi kɨnɨnnakeinyɨna nyagalya'mava'gɨzɨ dɨwona!” 9Sare' dare'nesɨ. Sahwai jawɨnya yuya maareta sangɨ tɨnna wanganaka lɨka yɨwaainyɨna. Nabaai a'mwe gamɨjɨ ye'mwannamwaaleta kwarajɨ sara kwara lɨka yɨwaainyɨna. 10Nabaai sabaaibɨ' Sevathiyare kaimɨraayaraai Jemɨzalyɨ Jonɨjɨ saraai Saaimonɨmɨ ye'mwannayadisaraai kwaraalyɨ lɨka yɨwaainyɨna. Pitai lɨka yɨwaainyɨna yaka sara wɨdɨna. Sara wɨdɨna kya' Jizaazai Saaimonɨmɨ wɨdɨna “Lɨka minnera! Dahaa'daa'nyɨ a'mweraavɨ gaala mwaalya'neraavɨ maarɨ maarya jɨtheigɨnyɨra.” 11Wɨdɨna kya' maangebaarɨ tɨyawɨnna botɨyɨkaai yɨtavamakulaawɨna yɨna yeva yuya sa saba yovɨgaipwakɨna yeva sahwarɨ mɨdɨnyɨna ye'.

Jizaazai samatanaka pwarɨ tewaanya yavada'galake'nesɨ.

(Matɨyui 8:1-4; Maakɨ 1:40-45)

12Jizaazai anga naanga pɨba mwaaidɨ'nyɨ, yɨthaa, a'mwe pwai gamɨre kɨlaakejɨkɨ yunebanna samate wa'dɨ'nyɨyai mwaalɨna. Sai mwaalɨna yaka Jizaazarɨ tɨnna wanganna, gamɨre sɨnnyɨkɨ kwadaai walaruta'nyɨna yaka sahwarɨ dɨragɨnna yɨdaanganna “Naangeigɨ, gɨnnya sɨmunyavɨ sara yawɨ'dɨza' yɨnɨga wi'na tewaanya nyavada'gaidɨnneigɨnyɨ.” 13Sara yɨdaanganna kya' asa' yɨwɨbwa'na yaka sahwarɨ asa' dathɨwanna yaka wɨdɨna “Sɨmunyavɨ sara yawɨ'mwa. Tewaanya jɨma'nana!” Sara wɨdɨna kya' yɨme'nya'bɨ' samate sa' mena yɨwɨna. 14Mena yɨwɨna kya' “A'mwera nɨmɨnyawɨnna yaasɨwa'na nabɨpɨdɨka!” daka dɨragɨnna wɨdɨna “Sarevɨ a'mwe aane pwai kwarɨ nujɨwaakɨdɨka! Aawa. Gɨmɨre kɨlaakejɨ' Gotɨyarɨna mubɨthɨka yɨra'derɨ pɨrizɨyarɨ duzɨwainaawa! Sara ya'gɨzɨ Mozɨzai dakabaaibɨ' yɨra'nade' dɨka nasɨ'nade gɨmɨnyɨna girayadelyɨra. Sarevɨdaa'nyɨ a'mwera gyawɨrangabɨ'derera ‘O, sare samate' mena jɨwɨwaka!’ ” 15Sara dɨragɨnna wɨdɨna kya' kɨrɨ' sanna yɨhusɨnna yɨnnagɨ'mavaka kuna naangeba yɨ'namarina. Sara yadaa'nyɨ sarevɨdaa'nyɨ kwala bwa'naanya kwalaalya gamɨnyawɨnna yɨkabɨna. Gamɨre yagaalyavɨ kadɨka wɨ'nya'nera kumɨre nalaaya marasɨ'nya'najɨ yɨkabɨna. 16Yɨkabɨna yadaapi kɨrɨ' yuyagaa' sai a'mwera mamwaalyɨgasaba woda gavei Gotɨyarɨ wɨdadelyɨ.

Jizaazai ata sɨvɨla bainɨkerɨ tewaanya yavada'galake'nesɨ.

(Matɨyui 9:1-8; Maakɨ 2:1-12)

17Pɨgaa' sai wɨjɨwaakɨna yadaa'nyɨ Perɨzɨya pwarajɨ kɨwɨnya dɨnɨkengɨna maremwaaidɨvɨsarajɨ sara mwaalɨna. Anga yuyabanyadaasɨ Galɨli sɨmagɨdaasɨ Juthɨya sɨmagɨdaasɨ Jeruzaalemɨ sɨmagɨdaasɨ yɨkabevere. Sarevɨ Naangere dɨragɨnya' Jizaazarɨ wɨla'dɨ'nyɨ nalaavɨnakeraavɨ tewaanya yavada'galya'nei mwaalɨna. 18Sara mwaalɨna yadɨ'nyɨ, yɨthaa, a'mwe pwara a'mwe pwarɨ yɨ'bɨnyavɨ makabɨna. A'mwe dazare yagɨnya yuya mena bainɨkei. Sare sarɨna “Angevɨ marikwavamakulaawɨna yawaajɨ gamɨnyawɨ aya kɨba gidɨku'nawakaana!” deva 19kɨrɨ' kwala bwa'naanya'na yesarera. Kwalaalyara mɨjahɨbalakɨna yadapi nalaavɨnaka sarɨ makulaawia'ne tutaanya aane pɨrɨ' minyadɨ'nyɨ bɨrɨbɨrya yɨ'maareva. Sarevɨdaa'nyɨ angevɨ munyabanna bamaraga'nɨgilaawɨna yɨna yeva angevɨ munyabanna daburaabɨna. Mena daburaabɨna yeva yɨ'bɨnyavɨ yɨla'dɨ'nyɨyarɨ maralaa'mwanna yɨna yeva wɨlyabaarɨ a'mweraayaba tɨnnyaba kewɨnɨ kave yɨbwa'mwagaasɨna yeva Jizaazarɨ kusɨmagɨ walakɨna. 20Walakɨna kye' kumɨre gamɨnyɨne'na lɨmwanga saburɨ yawɨranganaka wɨdɨna “A'mweigɨ, gɨmɨre kayaa'nanya mena gɨmarasɨ'mwana.” 21Wɨdɨna kya' Kɨwɨjarajɨ Perɨzɨyarajɨ kumɨ sara yagaaikwalaalya dɨnyɨna “A'mwe dazai yuna bewai dɨngaka! Gotɨyarɨna yagaaibɨraizɨka yɨvanɨka sala! Kayaa'nanya sangɨ yɨnahu marasɨ'nadei a'mwei pwai mɨka. Sa' Gotɨyai wawɨnya' yune gave sahwaresɨra.” 22Dɨnyɨna yadaapi Jizaazai kumɨre sɨmunya yawɨ'daapiyangɨ mena yawɨranganna yaka kumɨnyɨ dara ja'nawɨdɨna “Sarɨmɨre sɨmunyangɨ sɨmugwalaalya yaasɨwa'na yawɨ'manɨgasa' be'neka! 23Kaveya ya'ne pɨrɨwaai berɨwaalaka! Nabaai nɨmɨ dɨwɨja' dɨngaka? ‘Gɨmɨre kayaa'nanya mena marasɨ'mwana?’ Nabaai nɨmɨ dɨwɨja' dɨngaka? ‘Gɨmɨ daava'gɨzɨ kaanya dɨwona?’ Aawa. Yuyawaai naangewaalyɨ. 24Kɨrɨ' sarɨmɨnyɨna ‘Sahwara nayaa dara yawɨpɨka! “A'mweraavɨne Kaimɨraayai Kwaaka davakɨne'na kayaa'nanyanna yɨnɨga wi'na marasɨ'nya'nei dɨragɨnya kɨnɨnnakelyɨ,” ’ dena yɨma!” A'mwe gannya yagɨnya yuya mena bainɨka sarɨ dara wɨdɨna “Gɨthɨwa. Gɨmɨ daava'gɨzɨ gɨnnya yɨ'bɨnya' maara'gɨzɨ gɨnnya angevɨneigɨ kaanya dɨmakwona!” 25Sara wɨdɨna kya' a'mwe dazaraavɨre tɨnnyarɨ yuna sagaasagaa' sai daavɨna yaka kɨgaa' yɨlarake' maarɨna yɨna yaka gannya angevɨna kaanna wɨna. Sarevɨ sai Gotɨyarɨne yaya' munyaba makina yada kaanna wɨna. 26Kaanna wɨna kya' yuyara atɨka maru'nakulɨna yeva Gotɨyarɨne yaya' byaannake' munyaba makina yadɨvɨ' lɨka yɨwainɨgulɨna yeva dɨna “Dahaa' nemɨ nabinya pɨburɨ wangamwona!”

Jizaazai Livaayarɨ jaka jɨvwaramaa'na yake'nesɨ.

(Matɨyui 9:9-13; Maakɨ 2:13-17)

27Dɨvidaa'nyɨ yagalya'ma'na yada taakɨzɨya maa'dɨvɨta angevɨ taakɨzɨya maa'de pwai Livaayai wo'nɨkei mwaaidɨ'nyɨyarɨ tɨnna wangamabɨna yaka wɨdɨna “Dɨnyɨmɨdɨnaama!” 28Wɨdɨna kya' daavɨna yaka yuya sa saba yagalya'mawakɨna yɨna yaka Jizaazarɨ mɨdɨnyɨna.

29Sara yakei Livaayai gannya angevɨ gamɨnyɨne tɨka wapaaya yɨdɨka naanga yɨna. A'mwe taakɨzɨya maa'dɨvɨta kwalaalyarajɨ a'mwe kwalaalya pwarajɨ walamwaaina yɨna yeva saraalyɨ tɨka wapaaya ye'mwannanyɨna. 30Sahwarajɨ ye'mwannanyɨna yadaapi Perɨzɨyarajɨ kumɨrera Kɨwɨjarajɨ sara gamɨre mɨdɨdɨvɨsaraavɨ maamayagaala wɨdɨna. Sahwara wɨdɨna “A'mwe taakɨzɨya maa'dɨvɨsarajɨ gɨrɨkita'nanyarajɨ sarɨmɨ tɨka wapaayajɨ aalyajɨ be'na ye'mwannanɨvanɨgava!” 31Maanga wɨdɨna kye' Jizaazai wɨrɨvɨkɨ'na “A'mwe maamɨdaryara dotaayaraavɨna wɨgainadera mɨka. Aawa. Yune nalaavɨnaka sarana wɨgainadere. 32Nɨmɨ a'mwera ‘Nemɨ yɨda'maraangeinera,’ dɨdɨvɨsara sɨmunya mudɨke' yawɨramaapɨkajɨ jaka jɨvwaramaarya'neinyɨ bɨweinyɨ mɨka! Aawa. A'mwe gɨrɨkita'nanyara sɨmunya mudɨke' yawɨpɨ'de'na jaka jɨvwaramaarya'neinyɨ bɨweinyɨra.”

Gotɨyarɨna tɨka munnengɨ kɨmaakɨya dakyabwinesɨ.

(Matɨyui 9:14-17; Maakɨ 2:18-22)

33Sagaa' gamɨnyɨ dara wɨdɨna “Jonɨmɨrera tɨka munnengɨ kɨmaakɨya dakadɨvɨsare. Sara yadɨvɨ' Gotɨyarɨ saamɨnyagaa' wɨdadɨvɨsare. Sabaaibɨ' Perɨzɨyainaavɨre kwarajɨ avaala sara yadɨvɨsare. Sare' kɨrɨ' gɨmɨrera kɨmaakɨya madakyadɨvɨ' tɨka wapaayajɨ aalyajɨ tɨka nɨvanɨgave!” 34Sara wɨdɨna kye' Jizaazai sahwaraavɨ wɨdɨna “Mudɨkangegaa' a'mwe pwaraavɨre kwɨya'mwei kwala maarya'nei a'mwe dazai sarajɨ kuna ye'mwannemwaaidori sarɨmɨ tɨka munne yɨnɨga kɨmaakɨya dakɨpɨneihi daaka! Aawa. 35Kɨrɨ' dɨvi sagaa' kumɨnyɨ a'mwe kwala maarya'ne dazarɨ kipalamakwopɨjɨ yɨ dazagaa' kuna tɨka munne kɨmaakɨya dakɨbɨ'derera.” 36Wɨdɨna yaka ke'ba'nanya' sahwaraavɨ wɨdɨna “Baazɨ'ma'nya gaalyavɨdaa'nyɨ pɨmɨlɨ' davamaarojɨ baazɨ'ma'nya lihɨ'nɨka yawakevɨ mɨwɨrya'nei a'mwei aane pwai kwai mɨka! Aawa. A'mwe pwai sasara yaja' baazɨ'ma'nya mudɨke' kayaaka yɨgaladelyɨ. Nabaai kwaabɨyɨvɨta davamaaraja gaala mudɨkemɨlɨ' baazɨ'ma'nya yawaka daza'bɨ' avaaina wannadewaai mɨ'. 37Nabaai a'mwe aane pwai kwai aalya waainɨya mudɨke' meme kɨlaaka aya yawakevɨ maradɨngi'dei mɨ'. Aawa. Pwai sara yajai waainɨya gaala mudɨke' aalɨmaagwala bilamari'bwarakada kɨlaake' maramumwɨnyɨrojɨ kwaakevakɨna bwaladɨma'naawɨna. Sara yojɨ nabaai meme kɨlaaka kɨrɨsɨ kayaaka yɨnyɨna. 38Kɨrɨ' a'mwei meme kɨlaaka yune gaala mudɨkevɨna waainɨya gaala mudɨke' maradɨngikadelyɨ. Yɨ tewaanyasɨ.” 39Gamɨre wɨjɨwaakya mudɨkevɨna sai wɨdɨna “Nabaai yuyagaa' a'mwei aalya waainɨya aya yawake' mena nadei aalya mudɨke'na wɨvu'nade' mɨ'. Sare' dare'nesɨ. Yuyagaa' aya yawake'na yawɨ'na yada dadelyɨ ‘Aya yawake' waburyasɨra.’ ”

Currently Selected:

Lukɨ 5: byr

Highlight

Copy