Lukɨ 6

Kwazaakegaa'ne Naangerɨnesɨ.

(Matɨyui 12:1-8; Maakɨ 2:23-28)

1Kwazaaka pɨgaa' witɨwawɨnyavɨ tusavɨ kaanya yamarina yadaa'nyɨ gamɨre mɨdɨdɨvɨsara witɨzɨla pɨnɨ gimujɨna yɨna yeva kumɨre asangɨ lɨlɨvɨwanna yeva tɨka nyɨna. 2Tɨka nyɨna kye' kɨrɨ' Perɨzɨya pwara dɨna “Gimujɨna yeva lɨlɨvɨwanna yɨwaasa' Kwazaakegaa'na kɨmaakesɨra. Sarɨmɨ be'na yɨvanɨgava!” 3Sara dɨna kye' Jizaazai wɨrɨvɨkɨ'na “Ne Devitɨ yaka dazanna pɨkarya dɨnɨkevɨ madanganyadɨvɨtaihi daaka! Dɨvanɨge dazagaa' sahwalyɨ gamɨrerari saraavɨ mɨjɨka yesagaa'. 4Devitɨ Gotɨyare Angevɨ wɨlaawɨna yɨna yaka bɨretɨya' Gotɨyaryaba wakyaasa' maarɨna yaka tɨka nyɨna. Bɨretɨya daza' a'mwe yuyaraavɨna kɨmaakɨya dakɨnɨkesɨ. Yune pɨrizɨyarana tɨka nya'nesɨ. Yɨ sare' kɨrɨ' Devitɨ tɨka naka gamɨre kwaraavɨjɨ wɨjayaakesɨ. Dazahɨrɨvɨ madanganyadɨvɨtaihi daaka! Sai yaasɨwa'na manyaake'na Gotɨyai maanga majaakelyɨ.” 5Wɨdɨna yaka wɨdɨna “A'mweraavɨne Kaimɨraayai kwazaakegaa'ne Naangelyɨ. (Kwazaakevɨ ‘Sa' nawɨ'nyabulyɨ. Sa' kayaa'nanyabulyɨ,’ dakannelyɨ.)”

(Matɨyui 12:9-14; Maakɨ 3:1-6)

6Kwazaaka pɨrɨkɨ Juyaraavɨre lotuangevɨ wɨlaawɨna yaka a'mweraavɨ yagaalya' wɨjɨwaakɨna. Sagaa' a'mwe pwai gamɨre aangasɨmagɨnya asi yaalɨka yɨnnɨkei mwaalɨna. 7Sarei mwaalɨna yadɨ'nyɨ Kɨwɨjarajɨ Perɨzɨyarajɨ Jizaazarɨ yawɨrabangana'na. “Yawɨranganaana! Kwazaakegaa' nalaavɨnakeraavɨ tewaanya yavada'galadei dɨngaka? Sara yaja' kotɨya' marya'neina yaana!” deva yawɨrabangana'na. 8Sara yadaapi kɨrɨ' kumɨre sɨmunyangɨ mena yawɨranganna yaka a'mwe dazarɨ asi yaalɨka yɨnnɨkerɨ wɨdɨna “Gɨmɨ daava'gɨzɨ tɨnnyaba dɨthaaka!” Wɨdɨna kya' sai dɨkavedaa'na. 9Sara yɨna kya' Jizaazai kumɨnyɨ wɨdɨna “Yɨhithaanganɨde'nanyɨra ‘Nabaai kwazaakegaa' tewaanyabwina yadaanya' yɨda'nanya' dɨngaka? Kayaa'nanyabwina yadaanya' yɨda'nanya' dɨngaka? Nabaai a'mweraavɨ padaihasama'daanyabwine' dɨngaka? A'mweraavɨ kayaaka yɨgaidaanyabwine' dɨngaka?’ ” 10Wɨdɨna yaka a'mwe yuyaraavɨ tɨnna wanganamarina yaka a'mwe dazarɨ wɨdɨna “Gɨmɨre asa' jɨwɨbwaka!” Wɨdɨna kya' a'mwei sara yɨna kya' gamɨre asa' ayɨna maamɨdarya yɨma'nyɨna. 11Yɨma'nyɨna kya' kɨrɨ' sahwara sɨnna tɨka yuna naanga davɨna yadaa'nyɨ kumɨ sara dɨnaawɨna “Nemɨ Jizaazarɨ gara yaadeinaavaka?”

Jizaazai gamɨre sɨvɨlɨrɨdaa'nya pwaraalyaraavɨ dahɨlakake'nesɨ.

(Matɨyui 10:1-4; Maakɨ 3:13-19)

12Dazagaa' “Nɨmwarɨna wɨdɨma!” daka mugunyavɨna yɨlaawɨna yɨna yaka Gotɨyarɨ wɨdɨna. Sawɨta dazagaasa sarɨkɨ Gotɨyarɨna kuna yɨdangadaa'nyɨ yune yɨrɨke'na mɨdaihɨrakɨna. 13Nyɨlyai bilyɨrɨ'na kya' gamɨre mɨdɨdɨvɨsaraavɨ jaka wɨdɨna kya' yɨkabɨna. Sara yɨkabɨna kye' sahwarajɨya sɨvɨlɨrɨdaa'nyɨ pwaraalyaraavɨ dahɨlakɨna yɨna yaka “Yaya' Apozelɨyaihɨlyɨ. (Nɨmɨre yagaalya'na yɨhɨthaasɨdeihɨlyɨra,)” wɨdɨna. 14Pwai Saaimonɨnyɨ. Sarei sarɨ Jizaazai “Pitaigɨnyɨ,” yaya sa' wɨdɨna. Nabaai Edɨruyai, Saaimonɨmɨ gahwaalaangelyɨ. Nabaai Jemɨzalyɨ Jonɨjɨ Pilipɨjɨ Baatolomyulyɨ 15Matɨyulyɨ Tomaazalyɨ. Nabaai Jemɨzai Alɨpɨyaazare gawaalɨkɨ. Nabaai Saaimonɨ yaya pɨrɨ' Selotɨma wo'nɨkelyɨ. (Selotɨ - gannya kwaakevakɨna yawɨ'dei.) 16Nabaai Juthaazai Jemɨzare gawaalɨkɨ. Nabaai Juthaazai Yɨzɨkerɨyotɨyalyɨ. Dɨvidaa'nyɨ sai Jizaazarɨ gamɨre yɨkamaangeraavɨna wibwarɨdaakwiai yɨma'nakelyɨra.

Yɨlaayabwina taangebwina sawaarɨnesɨ.

(Matɨyui 4:23-25)

17Dahɨlakakegaa' kewɨnɨ kumɨjɨ ye'mwannɨgwalaawɨna yeva kwaaka waraasaba daavɨna. Sahɨba gamɨre pwara kwalaalyarajɨ a'mwe kwala naangera, yuya Juthɨya sabadaasarajɨ Jeruzaalemɨdaasarajɨ saalaalyavɨ maangebaarɨ Anga Taayaajɨ Anga Saaithonɨjɨ sawaarɨ aya kɨbadaasarajɨ mwaalɨna. 18Gamɨre yagaalyavɨ kadɨka wɨ'nya'nera “Sahwai nemɨre nalaaya nemarasɨ'nade'nana! Nemɨnyɨ pwaraavɨ, yɨmakera taanga wɨjaayaraavɨ yɨmakeraavɨ wɨdaasade'nana!” yawɨreva yɨkabɨna. Sarera yɨkabɨna kye' tewaanya yavada'gaina. 19Sagaa' gamɨre dɨragɨnya' yɨna yaka yuyaraavɨ tewaanya wima'nake'na kwala bwa'naanya' yuyara “Gamɨnyɨ yune asa'na kime'nawaajɨ tewaanya neyavada'galade'nana!” Sara deva sara yeva tewaanya mwaalɨna.

(Matɨyui 5:1-12)

20Gamɨre mɨdɨdɨvɨsaraavɨ tɨnna maranganna yɨna yada wɨdɨna

“Yɨlaaya yadɨvɨ' tewaanaanga yɨnɨkeihɨlyɨ gɨlyɨvɨ'maayaihi.

Gotɨyai maremwaaidevɨ sarɨmɨ sahwaihɨre warɨke'nanyɨ.

21Yɨlaaya yadɨvɨ' tewaanaanga yɨnɨkeihi,

Dahaa' mɨjɨka yɨhivanɨkeihi

Dɨvi yunebanna napɨjɨ

Sarɨmɨnyɨ munya yɨhinade'nanyɨ.

Yɨlaaya yadɨvɨ' tewaanaanga yɨnɨkeihi,

Dahaa' kɨnna dɨwaainɨvanɨgasaihi

Dɨvidaa'nyɨ jɨka dɨhide'nanyɨ.

22A'mweraavɨne Kaimɨraayainyɨ nyɨmɨdɨdaapiya'na a'mwera sarɨmɨnyɨna sɨmɨlɨka wɨladere. Sara kwɨyojɨ sarɨmɨnyɨ yɨhɨthaasadɨvɨ' navaruyagaala yɨhɨthadɨvɨ' sarɨmɨnyɨne yaya yuna kayaa'na marihɨlaasɨna yɨhipɨ'dere. Nɨmɨnyɨne'na sara kihyapɨjɨ sare sa'na yɨlaaya yadɨvɨ' tewaanaanga yɨnɨkeihɨlyɨ. 23Sagaa' sasare sa' yɨhipɨja' yɨ yɨlaaya naanga yadɨvɨ' yɨlaaya nebwina kwarame jideihɨlyɨ. Yɨthaanyi! Sare' dare'nesɨ. Sɨgunyavɨ Gotɨyaryaba sarɨmɨre wɨrɨvɨkɨsa' yuna naangesɨ. Nabaai sare' dare'nesɨ. Sɨnnawɨ kwɨyakwarava kuvɨdaarava Gotɨyarɨ wɨ'nawɨjɨwaakadɨvɨsaraavɨ pɨropetɨyaraavɨ avaaina sasara yaasare tɨvɨkɨta nawɨ'nya maarya'neraavɨ.

24Sare kɨrɨ'

‘We'! Gɨlyɨvɨ'nakeihi sɨmunyangɨ tewaanya yɨhya'ne

Sarɨmɨ mena maaresa'na mala nayaa jɨwannyɨla!

Sareihi Gotɨyarɨ myawɨrya'neihi taanga wɨjaavɨna yɨhyadeihɨlyɨ.

25We'! Dahaa' yunebanna neva munya yɨhimwakeihi

Dɨvidaa'nyɨ mɨjɨka yɨhyade'na sarɨmɨ mala jɨwannyɨla!

Sareihi Gotɨyarɨ myawɨrya'neihi taanga wɨjaavɨna yɨhyadeihɨlyɨ.

We'! Dahaa' jɨka givanɨgasaihi mala jɨwannyɨla!

Dɨvidaa'nyɨ kɨnna dadɨvɨ' kɨdaraalya naanga bwalayɨhɨravaawadengɨ,

Sareihi Gotɨyarɨ myawɨrya'neihi taanga wɨjaavɨna yɨhyadeihɨlyɨ.

26We'! Yuyara sarɨmɨnyɨne yaya munyaba makibɨza'na yɨ nabaai mala jɨwannyɨla! Sare' dare'nesɨ. Sɨnnawɨ kwɨyakwarava kuvɨdaarava pɨropetɨya kwaasɨyaraavɨne yaya munyaba avaaina sasara makɨlyaasare tɨvɨkɨta kayaa'nanya maarya'neraavɨna.’

Yɨkamaangeraavɨna tewaanna wɨvu'nyabwinesɨ.

(Matɨyui 5:38-48; 7:12)

27Kɨrɨ' nɨmɨre yagaalya' kadɨka nyu'nɨvanɨgasaihɨrɨ yɨhɨthɨvanɨge. Sarɨmɨre yɨkamaangeraavɨna kale yɨhyana! A'mwera sarɨmɨnyɨna sɨmɨlɨka widaaworiyaraavɨ tewaanyabwina jideihɨlyɨ. 28A'mwera sarɨmɨnyɨ paasɨyagaala yɨhɨthɨpɨjaraavɨ gaimwangebwina duzideihɨlyɨ ‘Gotɨyai tewaanna yɨhyana!’ A'mwe bɨraiyagaala yɨhɨthɨpɨjaraavɨ gaimwange'na Gotɨyarɨ duzideihɨlyɨ. 29Nabaai a'mwe pwai gɨmɨre maangwɨdaanya pimagɨ kagɨramojɨ yɨ gɨmɨre maangwɨdaanya pimagɨ tamya'na gɨnyɨwannyɨna jɨtheigɨnyɨ. A'mwe pwai gɨmɨre yɨvɨsa' kagɨmwagi'nojɨ gɨmɨre baazɨ'ma'nya' maaraja'na kɨmaakɨya madakɨnnera! 30Nabaai gazaizai gɨlyɨvɨta pɨnɨnna kagithaanganojɨ sarɨ wɨjaavɨna jɨthelyɨ. A'mwe pwai gɨmɨre gɨlyɨvɨsa kagɨmaarojɨ ‘Ayɨna dɨnyɨjaama!’ dɨragɨnna mudangadɨnna! 31Sasare sabwi sarɨmɨ yawɨ'dɨvɨsabwina ‘A'mwera sara nyɨpɨka!’ dapi sasare sahɨbaaibɨ' kumɨnyɨ sara jideihɨlyɨ.

32Nabaai sarɨmɨnyɨna kale wiadevaaibɨ' sarɨmɨ a'mweraavɨna kale yɨhyaja' Gotɨyarɨ sarɨmɨnyɨ yanga gaimwanga ya'ne benɨ dɨmaaryideihɨlaka! Sare' dare'nesɨ. A'mwe kayaa'nanya kwarajɨ sahwaraavɨna kale wiade saraavɨna kale wiadere. Sareihi sahwaraavɨ wavɨla'manɨgasaihi daa! 33Sare' dare'nesɨ. Sarɨmɨ a'mwera tewaanna yɨhipɨjaraavɨ tewaanyabwina wiadɨvɨ' sarɨmɨnyɨ gaimwanga ya'ne benɨ dɨmaaryideihɨlaka! Yɨ a'mwe kayaa'nanya sara kwarajɨ sasare sabwi yɨna yadɨvɨsare. 34Sarɨmɨ gɨlyɨvɨta yaamata wɨjaaya'neihi yawɨ'na ‘Sa ayɨna nyɨjaavadelyɨ,’ Gotɨyarɨ sarɨmɨnyɨ gaimwanga ya'ne benɨ dɨmaaryideihɨlaka! ‘Avaalya ayɨna maarɨma!’ dadɨvɨ' kayaa'nanya kwarajɨ kayaa'nanya kwaraavɨ yaamata wɨjaavadɨvɨsare. 35Sare kɨrɨ' sarɨmɨ sarɨnnya yɨkamaangeraavɨna kale yɨhyana! Sahwaraavɨ nayaa tewaanyabwina jɨla! A'mweraavɨ gɨlyɨvɨta yaamata nayaa duzaayɨla! ‘Ayɨna nyɨrɨvɨkɨpɨ'dengɨra,’ sanna sɨmunya nyawɨpɨdɨka! Sarɨmɨ sara yɨpɨja', Gotɨyaryaba sarɨmɨre wɨrɨvɨkɨsa' yuna naangesɨ. Nabaai sarɨmɨ Gotɨya Munya Ke'bevanyare kaimɨraayaihi dɨmwaalyideihɨlyɨ. Sahwai a'mwera gamɨnyɨ ‘Su! Su!’ mujadɨvɨsaraavɨ a'mwe kayaa'nanya kwaraavɨ naange'na wiade'nanyɨ. Sarei yadevaaibɨ' tewaanna yɨpɨjaihi sasare sare kaimɨraayaihi dɨmwaalyideihɨlyɨ. 36Sɨrɨnɨmaanga Sɨgunyavɨyarɨ a'mwe yuyaraavɨna kale wiadevaaibɨ' a'mweraavɨna kale nayaa yɨhyana!

A'mweraavɨ yawɨbwa'deibɨ' maryawɨbwasabwinesɨ.

(Matɨyui 7:1-5)

37Sarɨmɨ a'mwe pwaraavɨ mamaryawɨbwaryadɨvɨ' ‘Kayaa'nanyarera,’ madɨpɨna! Sara majɨpɨjaihɨrɨna Gotɨyai kwalyɨ ‘Kayaa'nanyarera,’ dathei mɨka! Arɨkewɨ. Nabaai pwaraavɨ majɨdapɨnera! Sara majɨdayɨpɨjaihɨrɨ Gotɨyai kwalyɨ jɨdavadei mɨka! Arɨkewɨ. A'mweraavɨre kayaa'nanya sarɨmɨnyɨne dɨmarasɨ'nyideihɨlyɨ. Sara yɨpɨjaihɨre kayaa'nanya Gotɨyai yɨhɨmarasɨ'nadelyɨ. 38Sarɨmɨ a'mweraavɨ gɨlyɨvɨsanna yanga nayaa duzaayideihɨlyɨ. Sara yɨpɨjaihɨrɨ Gotɨyai yanga nayaa yɨhɨzaavadelyɨ. Yanga naanga naanga yɨhɨzaavadelyɨ. Maanga yunebanna yeku'nya'ne wɨjaavɨna, tɨvɨpalamihya yɨna, purata'nyɨna, naanga naanga wɨjaavɨna, kuneba mwari yada pɨnɨ bwalaraawɨna yade sabaaibɨ' yɨhɨzaavadelyɨ. Sare' dare'nesɨ. Yɨnɨga wi'nanya sarɨmɨ a'mweraavɨ wɨrɨvɨkɨ'dɨvɨsa yanga wɨjaaya dazahɨnɨngɨ Gotɨyai sarɨmɨnyɨ ayɨna yɨhɨrɨvɨkɨradelyɨ.”

39Ke'ba'na yagaala pɨrɨ' wɨjɨwaakɨna “A'mwe pwai tɨbɨnyai a'mwe tɨbɨnya pwarɨ tusarɨ' yɨnɨga yɨbwarɨdaakwannei dɨngaka! Aawa. Yuyaraai kavi'nɨnnyavɨ walaraawɨna yɨkaneraalyɨ. (Gotɨyarɨ myawɨryai Gotɨyareburɨ pwarɨ yɨbwarɨdaakwannei mɨka!) 40Nabaai sɨkulɨya yadei gamɨre wɨjɨwaakyarɨ wavɨlavadei mɨka! Gazaizai sɨkulɨya' mena yɨ'mwannojɨ gannya wɨjɨwaakyaibɨ' avaaina yɨma'nadelyɨ. 41Gɨmɨnyɨ ja'mwere tɨnnyarɨ yɨtɨrɨdɨrɨnya maalɨkemɨlɨ' wa'dɨ'nyɨ tɨnna wanganna. (Sare' daresɨ. Ja'mwere yɨwetawakya maalɨkemɨlɨ' wa'dɨ'nyɨyasɨ.) Tɨnna wanganna yaka kɨrɨ' gɨnnya tɨnnyarɨ yɨta naangewa' gwa'dɨ'nyɨyaigɨ nayaa be'na myawɨryaigɨnaka! 42Gatha'dara ya'gɨzɨ ja'mwerɨ yɨnɨga wi'na wɨdɨnneigɨnaka! ‘Nya'mwei, gɨmɨre tɨnnyarɨ yɨtɨrɨdɨrɨnya maalɨka gwarɨka sa' gɨthɨhaa'mwagɨdeinyɨra.’ Gɨmɨ tɨnna nayaa myennyaigɨ gɨmɨre tɨnnyarɨ yɨta naanga gwarɨka savaa'na sara gatha'dara duthatheigɨnaka! Kwaasɨyaigɨ, aayagaa' gɨmɨre tɨnnyarɨ gwarɨka yɨta naanga savaa' yune'na papurasɨ'na'gɨzɨ dɨvi tɨnna nayaa pada'galangana'gɨzɨ yɨtɨrɨdɨrɨnya maalɨka pɨmɨlɨ' ja'mwere tɨnnyarɨ warɨke' dɨvapurasɨ'deigɨnyɨ.

Yɨsasɨ gamɨre yɨsɨlyajɨ sangɨnesɨ.

(Matɨyui 7:17-20; 12:34-35)

43Sare' dare'nesɨ. Yɨta tewaanyɨ' yɨsɨla kayaa'nanya yɨ'nadi' mɨka! Nabaai yɨta kayaa'nanyɨ' yɨsɨla tɨka munne tewaanya yɨ'nadi' mɨka! 44Sare' dare'nesɨ. A'mwera yɨta gazɨsɨkɨ tɨka munnengɨ mena yawɨranganapɨjɨyara sahwara yawɨ'na ‘Sɨkɨre yɨsɨla nawɨ'nya yɨ'nɨwake'na yɨta tewaanyɨkɨra.’ Yɨta pukɨna yawɨ'na ‘Sɨkɨre yɨsɨla kayaa'nanya yɨ'nɨwake'na yɨta kayaa'nanyɨkɨra.’ Tɨka munnengɨ mena yawɨranganna yadɨvɨ' yawɨ'dɨvɨsare. Sare' dare'nesɨ. A'mwera yɨta pihɨyɨkɨre yɨsɨlya lannakengɨ maa'dɨvɨtara daa! Nabaai wɨla gɨraipɨwɨlyavɨ yɨsɨlya mubwawɨlyabaarɨ gimujadɨvɨta daa! 45A'mwe tewaanyai gamɨre sɨmunyavɨ nawɨ'naange wɨwarɨkei. Sarevɨdaa'nyɨ sai tewaanyabwina yadelyɨ. A'mwe kayaa'nanyai gamɨre sɨmunyavɨ kayaa'nanaange wɨwarɨkei. Sarevɨdaa'nyɨ sai kayaa'nanyabwina yadelyɨ. Sare' dare'nesɨ. Yawɨta sasare sa' sɨmunyavɨ yunebanna wɨla'de', yɨ sa' maangi' dadevulyɨ.

Anga maja pɨburaainesɨ.

(Matɨyui 7:24-27)

46Sarɨmɨ ‘Naangeigɨ! Naangeigɨ!’ be'na nyɨdangadɨvɨsaihɨlaka! ‘Naangeigɨ!’ nyɨdangadɨvɨta kɨrɨ' nɨmɨre yagaalyangɨ mamɨdɨnyɨ yɨpɨjaihɨlyɨ. 47Nabaai gazaizai nɨmɨnyawɨnna bozɨyai nɨmɨre yagaalyangɨ kadɨka nyu'nada yagaalyangɨ mɨdɨnajarɨ, gamɨrebwina sɨmunya jawɨryide'na yɨhibwarɨdaakwɨdeinyɨ. 48A'mwe dazai a'mwe pwai ‘Ange' madɨma!’ dada yadevaaibɨsalyɨ. Aayagaa' kavi'nɨnnya' lɨkɨwaidaawada kwaakevɨ kusawɨ yune sɨla naangevaakɨ gɨrɨkwidelyɨ. Sara yada nabaai dɨvidaa'nyɨ ange' sahɨvaakɨ a'badaa'nyɨ yɨlamadesɨ. Nabaai dɨvidaa'nyɨ aalyaaka naange' pu'da aalya' anga dazavɨ tɨvɨtawakɨna yadaasɨ kɨrɨ' mwalaraawi yɨna yadesɨ. A'mwe dazai ange' tewaanya madevɨna mwalaraawi. 49Kɨrɨ' pwai nɨmɨre yagaalya' kadɨka nyu'nada mamɨdɨnyɨ yajai, yɨ sai a'mwe pwai ange' kwaakevakɨ yaasɨwa' madathɨhɨdaakuna yadevaaibɨsalyɨ. Aayagaa' kwaakevɨ kusawɨ yune sɨla naangevaakɨ gɨrɨkwidei mɨ'. Dɨvi aalya sa' anga savɨ tɨvɨtawakɨna yadaa'nyɨ yɨme'nya'bɨ' walaraawɨna yada yɨnahu kayaaka yɨma'nyɨna.”

Currently Selected:

Lukɨ 6: byr

Highlight

Copy