Lukɨ 7

Aamiyaraavɨ maremwaaidere lɨmwangeburɨnesɨ.

(Matɨyui 8:5-13; Jonɨ 4:43-54)

1A'mwera kadɨka wɨ'nya'ne gamɨre yagaalya mena wɨdaka sabadaa'nyɨ anga Kaapanɨyamɨ sabanna yɨ'mavaawɨna. 2Saba a'mwe atɨlyaraavɨre sɨvɨla atɨraalya aawɨlasaraavɨ maremwaaide akwai mwaalɨna. Sare sai gamɨre yaasɨwa'wawɨnyai sarɨna tewaanya wɨvu'nadei. Yɨ wɨdaayade dazai sagaa' nalaaya' kɨnɨnnakei mena balya'neba yadaa'nyɨ 3aawɨlasaraavɨ maremwaaidei “Jizaazai bamwaalɨka!” kadɨka wɨ'nyɨna yaka Juyaraavɨre a'mwe naanga pwaraavɨ dara wɨdaasɨna “Gɨmɨ ba'gɨzɨ nɨmɨre nyɨdaayaderɨ tewaanya javada'gaideigɨ daaka?” 4Wɨdaasɨna kya' sahwara Jizaazaryawɨnna yɨ'mavaawɨna yɨna yeva sahwarɨ wɨdɨna yeva yagaala dɨragɨnna wɨdɨna “Sai a'mwe tewaanyarɨnera. Gɨmɨ yɨnɨga wi'na dɨhaimwaderɨnera. 5Sare' dare'nesɨ. Sai nemɨ Juyainaavɨna tewaanya wɨvu'naderɨnera. Sai yune gamɨ sai nemɨre lotuange' madakerɨnera.” 6Sara wɨdɨna kye' sahwarajɨ Jizaazai ye'mwannɨguna yaka angeyaba aya kɨbanna mena yɨ'mavaawɨna kya' aawɨlasaraavɨ maremwaaide dazai gya'mwe pwaraavɨ maryaasɨna yɨna kya' Jizaazarɨ yagaalya' dara wɨja'nera makabɨna “Naangeigɨ, nɨmɨnyawɨnna bya'neigɨnyɨ taanga nagɨzaavɨwɨdɨka! Sare' dare'nesɨ. Nɨmɨ a'mwe tewaanyainyɨ daaka! Nɨmɨre angevɨ bwidɨza'na nɨmɨ yɨnɨga wi'na nawɨ'nyaigɨbɨsainyɨ daaka! Tewaanyaigɨnyɨnera. 7Sarevɨdaa'nyɨ nɨmɨ kwainyɨ yawɨ'mwa ‘Nɨmɨ a'mwe nawɨ'nyainyɨ daaka! Nabaai gɨmɨnyawɨnna yɨnɨga wi'na wɨdeinyɨ daaka!’ Aawa. Gɨmɨ yune yagaalya'na kada'gɨzɨ nyɨdaayadei ayɨna tewaanya yɨma'nana! 8Sare' dare'nesɨ. Nɨmɨ kwainyɨ a'mwe naangera nyɨmaremwaaidɨvɨ' wawɨnya nyɨjaavadɨvɨsainyɨ. Sareinyɨ mwaaidɨ nabaai nɨmɨre aawɨlasara kɨnɨnnakeinyɨ kwaakewɨ nyɨmwaaihasara. Yɨ nabaai nɨmɨ pwarɨ kuda'mujɨ ‘Gɨmɨ dɨwona!’ yɨ sai kaanna wɨna yadelyɨ. Nabaai nɨmɨ pwarɨ kuda'mujɨ ‘Gɨmɨ kaaja!’ sai kaanna bɨna yadelyɨ. Nabaai nɨmɨre yaasɨwa'wawɨnyarɨ wɨdɨna ‘Gɨmɨ wawɨnya sasare sa' ja!’ Sara kuda'mujɨ yɨ sai wawɨnya sa' yɨna yadelyɨ. (Sarevɨdaa'nyɨ yune yagaalya'na kada'gɨzɨ nyɨdaayadei tewaanya yɨma'nadelyɨ.)” 9Sara wɨdasaabɨna kya' Jizaazai yagaala dazavɨ kadɨka wɨ'naka atɨka maru'na'na yaka gɨnyɨma'nyɨna yaka kwala bwa'naanya' mɨdɨdapiya saraavɨ wɨdɨna “Sarɨmɨnyɨ anga menyabadaa'nya sarɨna yɨhɨthɨvanɨge. Yune Yɨzɨrelɨ kɨbadaa'nyɨ yawɨralɨmwanga sasare sabwi kɨnɨnnaka a'mwe pwarɨ mabɨramaaryainyɨ.” 10Sara wɨdɨna kya' aawɨlasaraavɨ maremwaaidei maryasaabaka a'mwe dazara angevɨna ayɨna wɨna yeva wawɨnya wɨdaayaderɨ maamɨdaryai mena yɨma'nakerɨ tɨnna wanganna.

Jizaazai yaanyɨwaakevɨrerɨ ayɨna yɨdɨkaavake'nesɨ.

11Dɨvi maalɨkegaa' mwanyavɨ anga naanga pɨbanna Nenɨ wo'nɨkebanna kaanna wɨna. Gamɨre mɨdɨdɨvɨta kwarajɨ kwala bwa'naanya naangerajɨ ye'mwannɨguna. 12Ye'mwannɨguna yadaapi sai kaadihɨta anga naangeyabanya dazayaba aya kɨbanna badaa'nyɨ, yɨthaa, a'mwe bainɨka pwarɨ makabɨna. A'mwe bainɨka dazarɨ ganaange' kaimɨraaya yune gave dazahwainanyalyɨyasɨ. A'mwe sa' yaanyɨwaakesɨ. Anga naanga dazabadaa'nya a'mwe kwala bwa'naanya naangera a'mwe dazasɨ ye'mwannɨgavɨna. 13Sara yɨna kye' Naangei a'mwe dazavɨ tɨnna wanganna yaka gamɨnyɨna kale yenyɨ'nyɨna yaka a'mwevɨ wɨdɨna “Kɨnna madɨnnera!” 14Sara wɨdɨna yaka aya kɨba gidɨku' wɨlɨna yaka a'mwe bainɨkei yɨla'dɨ'nyɨya yɨ'bɨnya savɨ asa' dathɨwanna kya' a'mwe barɨyɨ'bɨnya sa' makabadaapiyara sana dakulɨna yɨna yadapi wɨdɨna “Mɨgɨnyaigɨ gɨmɨnyɨ gɨthɨvanɨge. Dɨthɨkaaka!” 15Sara wɨdɨna kya' mena bainɨka dazai dɨkaa'na yaka dɨkavamwaaina yaka yagaalya' gaai dɨna. Sara yadaa'nyɨ sai a'mwe dazarɨ ganaangevɨna wɨmaarina. 16Sarevɨdaa'nyɨ a'mwe yuyara lɨka naanga yɨna yeva Gotɨyarɨne yaya' byaannake' munya ke'beva makina. Sahwara dɨna “Nemɨnyɨ pɨropetɨya naangei Gotɨyarɨ wɨ'nawɨjɨwaakadei mena kima'naabɨka!” Nabaai dɨna “Gamɨre a'mweinaavɨ gaimwanga ya'ne Gotɨyai mena bakelyɨreva.” 17Dɨna kye' a'mwera Juthɨya yuyabajɨ yuya bularaawia kɨbajɨ yamaryadɨvɨ' gamɨ yaka sanna yagaaikɨwɨnya bathɨwɨna.

Jonɨ gamɨre pwaraarɨ Jizaazaryawɨnneraarɨ wɨdasaabake'nesɨ.

(Matɨyui 11:2-19)

18Jizaazai yaka yuya dazangɨna Jonɨmɨre mɨdɨdɨvɨsara kalavuzangevɨ Jonɨmɨ wɨjɨwaakɨna. 19Sarevɨ Jonɨ gamɨre pwaraarɨ jaka wɨdɨna yaka Naangerɨ wɨja'ne yagaala pɨrɨ' makwɨya'neraarɨ wɨdaasɨna. Sai saraarɨ wɨdɨna “ ‘A'mwe bathelyɨra,’ Juyaina dadaanyaigɨ sahwaigɨ bahɨnyaigɨ dɨngaka? Pwarɨna yemwalaadeina dɨngaka?” 20Wɨdasaabɨna kya' a'mwe pwaraala dazaraai gamɨnyawɨnna mena yɨ'ma'na yɨna yagɨla wɨdɨna “Jonɨ Bavɨtaazɨya Yadei gɨmɨnyawɨnna nehɨmaryasɨwaabɨkeinaalyɨra. Sai dara dɨwa' ‘ “A'mwe bathelyɨra,” dadaanyaigɨ sahwaigɨ bahɨnyaigɨ dɨngaka? Pwarɨna yemwalaadeina dɨngaka?’ ” 21Wɨdɨna kyagi dazahɨgaa' a'mwe kwalaalyaraavɨ tewaanya yavada'gaidaa'nyɨyagaa'. Nalaaya dala nabinabinya kɨnɨnnakeraavɨjɨ nabalya taanga wɨjaaya'ne kɨnɨnnakeraavɨjɨ yɨmakera kɨnɨnnakeraavɨjɨ tewaanya yavada'gaina. Nabaai tɨbɨnya kwalaalyara, yange'na yavada'gaidaa'nyɨ tɨnna yenyɨna. 22Sara yavada'gaina yaka Jonɨmɨreraarɨ yɨwaarasa'na ja'nawɨdɨna “Kaanya wawokɨlyɨ Jonɨmɨ duthɨthaakwila! Dahaa' tɨnna wangadi' kadɨka wɨ'nɨwaalyangɨna duthaawila! A'mwe tɨbɨnyara tɨnna ayɨna yenyɨna, sɨvɨla kayaa'nanyara kaanya yamarina, samatanakeraavɨre kɨlaakejɨka nawɨ'nya yɨma'nyɨna. Nabaai a'mwe kadɨka mu'nyɨmu'nyara yagaalyangɨ kadɨka wɨ'nyɨna, a'mwe bainɨkera ayɨna dɨkaa'na, a'mwe gɨlyɨvɨ'maayaraavɨ yagaala tewaanya' wɨjɨwaakɨna yadɨnyainyɨ. Sasarera sara yɨvanɨga'. 23Nabaai a'mwei nɨmɨnyɨ lɨmwangebwina yawɨta kwalaalya myaja sare sai yɨlaaya yada tewaanaanga yɨnɨkelyɨ.” Jizaazai Jonɨmɨna sara wɨda'.

24Jonɨ maryasaabaka saraai mena kaanna wodaakɨlyɨ kwala bwa'naanyaraavɨ Jonɨmɨna wɨdɨna “A'mwera maayabanna tɨnna bewarɨ wanganya'neihi wɨwa'daataihɨlaka? Suya pɨrɨ' yɨhusa' galalɨwihɨrakerɨ'bɨsarɨ tɨnna wanganya'neihi wɨwa'daasaihi dɨngaka? 25Aawa. Tɨnna bewarɨ wanganya'neihi wɨwa'daataihɨlaka? Baazɨ'ma'nya wolasa baazɨ'ma'nɨkerɨ wanganya'neihi wɨwa'daasaihi daaka? Yɨthaanyi! Baazɨ'ma'nya nawɨ'nyɨnaangenna wakadɨvɨ' kɨlaakejɨkɨne gɨlyɨvɨta nawɨ'nyanna kɨnɨnnaka sasara a'mwe dazara kingɨyaraavɨre angengɨ mwaaidɨvɨsare. Sasarerabɨtarɨ mɨ'. 26Aawa. Tɨnna bewarɨ wanganya'neihi wɨwa'daataihɨlaka? Pɨropetɨya Gotɨyarɨ wɨ'nawɨjɨwaakadei dɨngaka? Yo, sarɨmɨnyɨ yɨhɨthɨvanɨge. Sai pɨropetɨyai yaka kɨrɨ' yɨ pɨropetɨyaraavɨreburɨ wavɨlavɨkelyɨ. 27Nabaai a'mwe yune dazahwarɨna Bukuya' yɨda'nɨkerɨnera. Dara dɨnɨ'

‘Yɨthaa, nɨmɨre yagaalya' makwɨya'nerɨ maryasaabɨdeinyɨ.

‘Sɨnnawɨ gɨmɨnyɨ yɨbwaramakwaanna gyathelyɨ.

‘Sai gɨmɨnyɨna tusa' maryovɨrawakɨna yadelyɨ.’

Sara dɨnɨkesɨ. 28Sarɨmɨnyɨ yɨhɨthɨvanɨge. Jonɨ Kwaakevakɨ a'mweraavɨdaa'nyara yɨma'nɨgata yuyaraavɨ wavɨlavɨkelyɨ. A'mwe Gotɨyai maremwaalademɨlɨ' yɨma'najamɨlɨ' yuna maalɨkemɨlɨ' mwaaloriyamɨlɨ' kɨrɨ' Jonɨmɨ wavɨlavademɨlɨkɨra.” 29Sara wɨdɨna kya' sahwara kadɨka wɨ'neva a'mwerajɨ a'mwe taakɨzɨya maa'dɨvɨsarajɨ sahwara dɨna “Yo, Gotɨyare sabwi yɨda'maraangebulyɨ.” Jonɨmɨ sahwara bavɨtaazɨya maaresare. 30Kɨrɨ' nabaai Perɨzɨyarajɨ kɨwɨnyangɨ yawɨ'dɨvɨta sɨdu'nakerajɨ Jonɨmɨ bavɨtaazɨya maaretara mɨ'. Sarevɨdaa'nyɨ sahwara Gotɨyai wibwarɨdakwadaa'nyɨya nawɨ'nya savɨ bule'na wɨjaavesare.

31Jizaazai dɨna “Sarevɨdaa'nyɨ nɨmɨ dazagaa'ne a'mweraavɨna ke'ba'nanya berɨ' yɨhɨthɨma! Sahwara gatha'dara a'mweraavaka! 32Sarera darebaaibɨsamɨlɨke. Avaannya'ne kaimɨraayamɨlɨka angwaasabanna mwaaidɨvɨ' kaimɨraaya pɨmɨlɨkaavɨna jaka dangadɨvɨsamɨlɨke (Jonɨ yaasɨwakebwi myaderɨna)

‘Kwala maa'nya'ne gware maku'manɨgo.

Kɨrɨ' “Kwarame aala!” dɨvanɨgave!’

(Nɨmɨ angyɨrɨ'maasabwi yadɨnyainyɨna)

‘Nemɨ baryangɨne kɨdaata dɨvanɨgo.

Kɨrɨ' sarɨmɨre kɨdalaala mabwalayɨhɨravaawivanɨke!’

33Sare' da'dare'nesɨ. Jonɨ Bavɨtaazɨya Yadei bɨna yɨna yaka pɨgasa bɨretɨya tɨka manyɨ, yuyagaa' waainɨya tɨka manyɨ. Sare'na nabaai sarɨmɨ dɨna ‘Yɨmakei kɨnɨnnakelyɨ.’ 34A'mweraavɨne Kaimɨraayai bɨna yɨna yaka tɨka wapaa nada waainɨyasɨ nadaa'nyɨ sarɨmɨ dɨna ‘Yɨthaanyi! Sai a'mwe tɨka kwalaalya nadelyɨra. Sara yada waainɨya kwalaalyajɨ nadelyɨ. Yaawaryaibɨsalyɨ. Sai a'mwe taakɨzɨya maa'dɨvɨsaraavɨjɨ a'mwe kayaa'na gɨrɨkita'nanyaraavɨjɨ sahwaraavɨ kwɨya'mwelyɨra.’ Sara dadɨvɨsaihɨlyɨ. 35Kɨrɨ' Jonɨjɨ sainaai Gotɨyare sɨdusabwine kaimɨraayainaai wawɨnya nawɨ'nya yɨvanɨgolyainaalyɨ. Wawɨnya sa sɨdu'nakera dara yawɨranganna ‘Gotɨyare sɨduta tewaanyabwina sara yɨvanɨgi. Yɨda'maraangesɨra.’”

A'mwe kayaa'nanya pɨrɨ' Jizaazare sɨvɨlyɨrɨ welivananya' purake'nesɨ.

36Perɨzɨya pwai gamɨjɨ tɨka wapaaya bye'mwannanya'na Jizaazarɨ wɨdɨna. Sara wɨdɨna kya' Perɨzɨya dazare angevɨna kaanna wɨna yaka tɨka munne savɨ mwaalɨna. 37Yɨthaa! Anga naanga dazaba a'mwe kayaa'nanya yade' mwaalɨna. Sare sa' “Jizaazai anga Perɨzɨya dazare angevɨ tɨka wapaaya nɨvanɨkeva,” wɨ'nyɨna. Sarevɨ a'mwe daza' gamɨre kayaa'nanyanna yawɨraka sitala (sɨla alɨvezɨta) saadaaya nawɨ'nyaange' yɨ'nɨke' makabɨna yɨna yaka 38wɨlaabɨna yɨna yaka Jizaazaryaba bulyɨmagɨ aya kɨba sɨvigɨ'nyɨryawɨ gidɨku' bulagaidaa'na yɨna yaka kɨnna dɨwaainyɨna. Kɨnna dɨwainadaa'nyɨ gamɨre kɨdalaalya Jizaazare sɨvɨlyɨrɨ bwalaravaawɨna kya' gannya mɨjata saamɨnyasɨ yaalɨka yɨmwanna. Sara mi'na yaka gamɨre sɨvɨlyɨrɨ bu'buta kwalaalya biwɨna yaka welivananya saadaayasɨ sɨvɨlyɨrɨ yevu'na. 39Sara yɨna yadaa'nyɨ Perɨzɨya gamɨnyɨ wɨjɨvwarɨjɨmaa'naka dazai sasarevɨ tɨnna wanganaka sɨmunyavɨ dara yawɨ'na “A'mwe dathai sai pɨropetɨya nebulyai mwaalajɨ kwajɨ a'mwe gamɨnyɨ ata dathɨwamanɨka savɨ kyawɨranganadɨka! Nabaai gamɨre kɨburɨjɨ kyawɨranganadɨka! Yɨ daza' a'mwe kayaa'nanya yade' mwaalɨke'nanyɨ.” 40Sara yawɨ'na kya' Jizaazai gamɨre sɨmunyaburɨna ja'nawɨdɨna “Saaimonɨ, yagaala pɨrɨ' gɨthɨde' warɨ'.” Wɨdɨna kya' sai wɨdɨna “Nejɨwaakadɨnyaigɨ dɨnyɨdana!” 41Sara kuda' wɨdɨna “A'mwe pwaraai a'mwe pwarɨ dinaaya' kɨnɨnnakeraai. Pwai dinaaya' naanga naanga (K500) wɨwarɨkei, nabaai pwai yune kɨbawe (K50) wɨwarɨkei. 42Saraai dinaaya daza' yɨnɨga wi'na yɨkaderaai mɨka! Sarevɨdaa'nyɨ a'mwe sai ‘Saraaihɨre dinaaya maarɨderaaihi mɨ',’ wɨdɨna yadelyɨ. Nabaai sarevɨdaa'nyɨ dazahwaraarɨdaa'nyɨ pwai sahwarɨna tewaanya naanga wɨvu'nɨvanɨkei aaihwalaka?” 43Wɨdɨna kya' Saaimonɨ dara ja'nawɨdɨna “Nɨmɨ yawɨ'manɨge. A'mwe dazai dinaaya naange' mi'nanya' dakɨwakei dɨngaka!” Sara wɨdɨna kya' sahwarɨ wɨdɨna “Gɨmɨre yawɨbwata yɨwaanya' yɨda'nanyasɨra.” 44Wɨdɨna yaka a'mwe dazayɨmagɨnna gɨnyɨma'nyɨna yaka Saaimonɨmɨ wɨdɨna “Gɨmɨ a'mwe dathava davɨ tɨnna mwanganyɨjɨwaana! Angyɨrɨ'maasaraavɨna Juyaina yadaanyabaaibɨ' gɨmɨre angevɨ kabwimwa nɨmɨre sɨvɨlyavɨ aalya yɨnya'ne' nyɨjawaanyaigɨ mɨka. Kɨrɨ' a'mwe datha' gamɨre kɨdaraaibɨrɨkesɨ nɨmɨre sɨvɨlyɨraarɨ nyɨwakesɨra. Sara yaka gannya mɨjasasɨ yaalɨka nyimwamwakesɨra. 45Gɨmɨ bu'buta maranyɨwaanyaigɨ mɨka! Kɨrɨ' nabaai nɨmɨ bwimwegaa'daasɨ yaka kuna dahaakɨgaasɨ a'mwe datha' nɨmɨre sɨvɨlyawaarɨ bu'busa' kuna maranyɨvanɨka. 46Nɨmɨre mɨnyagɨnyavɨ welivananyasɨ nyɨvu'mwaanyaigɨ mɨka! Kɨrɨ' a'mwe datha' nɨmɨre sɨvɨlyawaarɨ welivananya saadaayasɨ nyɨvu'mwakeinyɨra. 47Sarevɨdaa'nyɨ gɨmɨnyɨ gɨthɨvanɨge. Dazahɨrɨ' kayaa'nanya kwalaalyabwi yadevɨ gamɨre kayaa'nanya daza marasɨ'mwe'na, sarevɨdaa'nyɨ sahɨrɨ' nɨmɨnyɨna yuna nebwina wɨvu'nɨvanɨkesɨ. Kɨrɨ' a'mwei kayaa'nanya maalɨkemɨlɨ' yaderɨ nɨmɨ marasɨ'nɨwɨja sa' yɨ sai nɨmɨnyɨna yuna maalɨ'na wɨvu'nadelyɨ.” 48Wɨdɨna yaka sahɨrɨvɨ wɨdɨna “Gɨmɨre kayaa'nanya mena gɨmarasɨ'mwengɨra.” 49Wɨdɨna kya' a'mwera gamɨjɨ wapeyɨ'bɨnyavɨ ye'mwannemwaalesara kumɨ sahwaraavɨ gaai dɨnyɨna “A'mwe kayaa'nanyabwi marasɨ'mwaka dazai bewai dɨngaka?” 50Sarevɨ Jizaazai a'mwe savɨ wɨdɨna “Nɨmɨnyɨ dɨragɨnna nyɨlɨmwamwaanya'na gɨmɨnyɨ kayaa'nanyabwina gɨvadaihasamaa'mwe'gɨnyɨ. Gɨmɨ kaanna wawo'gɨzɨ gɨmɨre munyɨ' kwaamu' kave nayaa gwarana!”

Currently Selected:

Lukɨ 7: byr

Highlight

Copy