Maakɨ 2
2
Jizaazai yagɨnya bainɨkerɨ yɨdɨkavamwaaiha'.
(Matɨyui 9:1-8; Lukɨ 5:17-26)
1Sawɨta pɨjaa' kajɨnna' sai Kaapanɨyamɨna ayɨna yagalaawaka bamwaaina ya'. Bamwaaidɨ'nyɨ dara wɨ'nesa' “Anga aya mwaaidevɨ damwaalɨ'!” 2Sara deva kwala yɨ'bwa'nyɨna ye'. Kwala yɨ'bwa'nyɨna yeva tɨkuryaba daavanneba kune pɨba madaayɨ yeva angavɨne' mwasabanne' bamwaihwodapi yagaalya' wɨjɨwaakɨna ya'. 3Wɨjɨwakadaa'nyɨ pwara makabɨna kye' a'mwe daraai daraalyara kɨlaaka yagɨnya bainɨkerɨ marikwavamakabɨna ye'. 4Marikwa'na yeva “A'mwe kwalaalyara damwaaihava!” deva kwala bwa'naanyavɨne'na Jizaazaryawɨnna mabamakulyara angevɨ a'ba bamaraga'nɨgilaawɨna yɨna yeva munyaba Jizaazai wɨlamwaaidɨsɨyaba kwavɨsa' daburaabɨna yeva yagɨnya bainɨkei yɨ'bɨnnakerɨ marala'mwagakɨna ye'. 5Marala'mwagakɨna kye' Jizaazai kumɨre lɨmwangebwi yawɨranganna “A'mwe dara ‘Jizaazai dɨragɨnaangei a'mwerɨ tewaanya negaimwagathelyɨra,’ yawɨreva makabɨwaava,” Jizaazai yawɨraka yagɨnya bainɨkerɨ wɨdɨna “Nyɨbwaalɨ', gɨmɨre kayaa'nanya gɨmarasɨ'mwa.” 6Sara wɨdɨna kya' Kɨwɨjara pwara saba mwaaleva kumɨre kunya yawɨ'na 7“A'mwe dai yagaala sa' baa'na dɨvanɨka! ‘Gotɨyarɨ wavɨla'mweinyɨ,’ dathɨvanɨka! Kayaa'nanya aai marasɨ'nadelaka! Gotɨyai gavei marasɨ'nadelyɨra. Sare' Gotɨyarɨ yagaaibɨraizɨka dɨwakei daaka!” yawɨranganna ye'. 8Yawɨrangadaapi yɨme'nya'bɨ' Jizaazai gannya sɨmunyavɨ yawɨ'na “A'mwe dara sara jawɨ'manɨgava!” daka wɨdɨna “Sarɨmɨre sɨmunyangɨ sare' baa'na yawɨ'manɨgava! 9Darewaai naangewaai midaaka! Pɨrɨ' dare'. Yagɨnya bainɨkerɨ wɨdɨde' ‘Gɨmɨre kayaa'nanya gɨmarasɨ'mwa.’ Pɨrɨ' dare'. Wɨdɨde' ‘Dɨthɨkaaka! Yɨ'bɨnya' maara'gɨzɨ dɨmakwalyona!’ Yagaala yuya sawaai naangewaai midaaka! Nɨmɨ kuda'muri ‘Dɨthɨkaaka! Yɨ'bɨnya' maara'gɨzɨ dɨmakwalyona!’ sara yade'na 10sarɨmɨ yawɨ'na ‘Ai, Kwaaka davakɨ a'mwe sai kayaa'nanya marasɨ'nya'nei dɨragɨnnakelyɨ,’ jawɨryideihɨlyɨ. Sara jawɨryide'na A'mweraavɨne Kaimɨraayai yagɨnya bainɨkerɨ sara wɨdana!” 11A'mwerɨ wɨdɨna “Gɨthɨwa, ‘Dɨthɨkaaka! Gɨnnya yɨ'bɨnya' marikwava'gɨzɨ gɨnnya angevɨna dɨmakwalyona!’ ” 12Sara wɨdɨna kya' daavaka yɨme'nya'bɨ' yɨ'bɨnya' marikwa'na yaka kaanya walyodaa'nyɨ sare'na a'mwe yuyara tɨnna wanganna yeva atɨka maru'nakulɨna yeva Gotɨyarɨ yɨlaaya yeva “Sabwi nemɨ sara mwanganyainera,” dɨnyɨna ye'.
Jizaazai Livaayarɨ wɨda' “Nyɨmɨdɨnaama!”
(Matɨyui 9:9-13; Lukɨ 5:27-32)
13Jizaazai ayɨna walyoka aalɨbumaangevɨ mwaaidɨsɨ a'mwera yuyara yɨ'bwa'nyɨna yeva mwaaidapi Jizaazai wɨjɨwaakɨna ya'.
14Livaayai Alɨpɨyaazarei taakɨzɨya maa'dei taakɨzɨya maa'deva mwaaidɨ'nyɨ Jizaazai wangamabaka wɨdɨna “Nyɨmɨdɨnaama!” Mi'na wɨdɨna kya' daavɨna yaka mɨjɨwɨna ya'.
15Livaayare angevɨ Jizaazai namwaaidɨsɨ taakɨzɨya maa'dɨvɨsarari a'mwe kɨwɨnya maalɨ'na yadɨvɨsarari sara Jizaazalyɨ gamɨrerari saraayaba mwaalɨna ye'. Sare' dare'nesɨ. Kumɨ sara kwalaalyara gamɨnyɨ mɨdɨnesara. 16Namwaaidapi Kɨwɨjara Perɨzɨyara “Gamɨ salyɨ kɨwɨnya maalɨ'na yadɨvɨsarari taakɨzɨya maa'dɨvɨsarari je'mwannanɨvanɨgava!” deva gamɨreraavɨ wɨdɨna “Taakɨzɨya maa'dɨvɨsarajɨ kɨwɨnya maalɨ'na wɨyadɨvɨsarajɨ saraayaba baa'na nɨvanɨka!” wɨdɨna. 17Yagaala sa' wɨdɨna kye' Jizaazai wɨ'nakei wɨdɨna “Dotarɨna nabalɨmaayara wɨgainadera mɨ'. Aawa. Nabalɨnakera wɨgainadere. Sare'na nɨmɨ sainyɨ a'mwe yɨda'maraangebulyɨyainajɨyaraavɨ jɨvwaramaarya'neinyɨ mabye. Aawa. Kɨwɨnya maalɨ'na yadɨvɨsaraavɨne'nanyɨ.”
Wapaaya manya'nesɨra.
(Matɨyui 9:14-17; Lukɨ 5:33-39)
18Pɨgaa' Jonɨmɨrerajɨ Perɨzɨyarajɨ “Gotɨyarɨna wapaaya manaannera!” deva navɨka mwaaidapi pwara wɨlaabɨna yeva Jizaazarɨ wɨdɨna “Be'neka? Jonɨmɨrerari Perɨzɨyaraavɨrerari sara wapaaya manyara mwaalɨna yadapi kɨrɨ' gɨmɨrera wapaaya baa'na nɨvanɨgava!” 19Wɨdɨna kye' Jizaazai wɨdɨna ya' “Mudɨkangeyabanne munne yadɨvɨsagaa' a'mwe' maarade mɨgɨnyai mwaaidozɨ a'mwe a'mwera tɨka munne manɨpɨne yɨpɨjara daaka! 20Mɨgɨnyai mwaaidoriyagaa' wapaa nɨpɨ'dengɨra. Pɨgasa kima'nojɨ kumɨnyabadaasai a'mwe' maarade mɨgɨnyai yɨpalasɨ'na kyapi sagaa' kumɨ sa wapaa tɨka manyɨ yɨpɨ'dengɨra. Sare' kanyɨpalasɨ'napɨri nɨmɨrera wapaaya manyɨ yɨpɨ'dengɨra.”
21Sare' Jizaazai gamɨre yagaala mudɨke'na wɨdɨna “Yɨvɨta gaalya' a'mwe pwai dakurojɨ ‘Yɨvɨta ayɨkɨ mɨwɨrɨma!’ myawɨryajai tewaanyalyɨra. Sara mɨwɨ'na yajɨ kwajɨ mɨwɨta'ne yɨvɨta yɨvɨsɨkɨ kayaaka kyadɨka! Yɨvɨta gaalyamɨlɨ' yɨvɨta ayɨkɨ kayaaka yade'na naanga lihɨ'na yadesɨra. 22Nabaai memekɨlaaka waainɨtalya' a'mwe aane pwai kwai waainɨtala ayavɨ waainɨya gaalya' mamaradɨngiki yadelyɨ. Sara maradɨngikaja' aalɨmaagwala bilamari'bwarakadaawori waainɨya' memekɨlaakevɨ kayaaka kyojɨ waainɨya' bwalaraawɨna yadesɨra kɨlaaka yuya tɨ'mɨwɨrojɨya. Sare' aawa. Waainɨya gaalya' memekɨlaaka mudɨkevɨ maradɨngikɨna yaja' tewaanya warɨna yadesɨra.”
Juyaraavɨre Kwazaakegaa'.
(Matɨyui 12:1-8; Lukɨ 6:1-5)
23Juyaraavɨre Kwazaaka pɨgaa' lɨlaajabɨta witɨziwawɨnyavɨ tɨnnyaba tusavɨ sai widavadaasɨ gamɨrera mɨdɨnaabɨna, mɨjɨka wiadaa'nyɨ witɨzɨla gimujɨna ye'. Sa'na kɨwɨnya dɨnɨke' “Kwaakaanya yamaryadɨvɨ' tusavɨ a'mwera witɨzɨla maapɨka!” dɨnɨkesɨra. 24Gimujɨna kye' Perɨzɨyara Jizaazarɨ wɨdɨna “Yɨthaa, Kwazaakegaa' dahaa' baa'na gimujɨvanɨgava! Kɨwɨnya sare'na warɨkesɨra. Sa pɨgaa' dɨhimujidengɨra. Kwazaakegaa' mipɨnera sabwi!” 25Sara wɨdɨna kye' Jizaazai wɨdɨna “Baa'na nyɨdɨwaava! Ne Devitɨ yaake pɨkarɨyɨkwiavɨ tɨnna mwanganyadɨvɨsaihi daaka? Devitɨjɨ gamɨjɨyarajɨ sara wapaaya kunera mɨjɨka wiadaa'nyɨ 26sipɨzipɨya Gotɨyarɨna Yɨra'de Naangei Avaayathai mwalyaakegaa' Devitɨ Gotɨyarɨna yɨra'de pwarɨ gɨrɨkulya'na wɨdaka Gotɨyare Angevɨ wɨlaabɨna kyaa' Gotɨyai tɨnna wanganya'ne gɨrɨkula wakyaasa kujayaa' maranyɨna yaa'. Gɨrɨkula sa mi'na kwaryaa' ‘Gotɨyare yɨra'dɨvɨsara gavera maranadɨvɨsarera,’ kɨwɨnya' sara dɨnɨkesɨra. Devitɨ Gotɨyarɨna yɨra'dei mamwalyaakei maranyɨna yaka nabaai gamɨjɨyaraavɨna wɨmaryaa'. Sare' Gotɨyai maiyagaala mujaa'.” 27Sara wɨdaka wɨdɨna ya' “Sɨnnawɨ Gotɨyai a'mweraavɨ yavɨkaryaka dɨvidaasɨ a'mweraavɨne'na Kwazaakegaa' wakyaa'. Sɨnnawɨ Kwazaakegaa' mwaryaka dɨvidaasɨ Kwazaakegaa'ne'na a'mweraavɨ myavɨkaryaa'. Arɨkewɨ. 28Sara yaake'na A'mweraavɨne Kaimɨraayai Kwazaakegaa'ne Naangei ‘A'mwera sara sara yɨpɨ'derera,’ wɨdadelyɨra,” wɨda' Jizaazai gamɨnyɨne'na.
Currently Selected:
Maakɨ 2: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
