KECHENG 21
21
Isaak Amahang-kethek
1Sarah aphan Hemphu pahirjumelo, Alangli kechechak ateng, 2lapen bangpi oso chopathelo, lapen Abraham kesar ahut bangpi alangliphan inut sopo amahang pathekpilo. La amahang thekjipu apor Arnam kepu atengsi oso amahang thek-lo.#Ibr 11.11 3Laphan Abraham ke Isaak pusi amen irlo, 4lapen Isaak ni nerkep kechok ahut, laphan Abraham areng-rot-lo. Arnam hukum kepi ateng.#Kech 17.12; Akam 7.8 5Isaak amahang kethek ahut an ke Abraham arta ningkan 100 choktang-lo. 6Sarah pulo, “Neliphan Arnam ning arong lapen nepangnek long-lo. Abangphutin la karjulong aling abang ne pen ingnek-longpo.” 7Anke bangpi puthulo, “Sarah osomar chelanapo pu konatsi Abraham aphan pu-unpo? Seta alangli kesar ahut alangliphan ne inut sopo amahang pathekpilo.”
8Oso thebomlo, lapen la mokkechu ke-o arni, Abraham thedung akechopi sikpilo.
Hagar Lapen Ishmael Aphan Ketoi
9Arnisi Ishmael, Abraham aphan Ijip a-osopi Hagar mahang kepathek a-oso, Sarah asopo Isaak#Hako aloh along ke Sarah asopo; bonta Ibri along laso alam ave pen kepathubom ahut, 10Latum aphan Sarah thek-long-lo lapen Abraham aphan pulo, “Laso ban a-osopi lapen asopo aphan phlungjuinon. Laso a-osopi asopo nangkhi nanglongdunde det nangji, la nesopo Isaak si chepahemphulong nangji.”#Gal 4.29-30 11La Abraham aphan pasungpik-lo, pima Ishmael ta la asopolo. 12Abraham aphan Arnam pulo, “Laso a-oso lapen nangbanpi Hagar aphan nangkematha chepasungri. Sarah nangphan kopima nangkepu alingle klemnon, pima la Isaak pen ajoksi Ne nangphan nangkechak nangso-nangsu dopo.#Rom 9.7; Ibr 11.18 13Banpi asopi asopo aphan ta Ne ongdung asomar piji, anke latum isi akhei plangpo. La ta nangsolo.”
14Adapprang, Hagar aphan Abraham ajehak an lapen ok-reng athoila isithup alang pidunlo. Alangli Bangpi anung asopo pachebu si lapen toijuilo. Bangpi otekangsi Beersheba akejejangtang ajo damthap lo. 15Lang kedo-an ikdetsi bangpi oso aphan bap ajo bitekang-koksi 16lapen ingrup 200 kehelo ingni damlo. Bangpi#Isi hako aloh along ke Oso amethang chepulo, “Nesopo kethi ne chelangding un-e.” Hadak bangpi kangnilun un ahut bangpi kechiru pangcheng-lo.
17Oso kechiru Arnam arjulong-lo, lapen sining pen Hagar aphan Arnam apherangke ningjelo. “Hagar kopisi kechepasung-lo? Nang phereri. Oso akechiru Arnam arjulong-lo. 18Thurnon, la aphan humdam non, lapen padoknon, La aso-asu pen Ne isi thedung akhei paplangpo.” 19Anke bangpi amek Arnam ingpulo, lapen isi alangtuk thek-long-lo lapen bangpi damsi ok-reng athoila lang isithup paplengsi lapen ajehak oso aphan pilo. 20Oso along Arnam dodunsi thebomlo; la Paran akejejangtang ajo dosi inut kethekser asekar plang-lo. 21La aphan apei inut Ijip asopi piso palongpilo.
Abraham Lapen Abimelekh Angbong Kechechak
22Halaso ahut Abimelekh, Phikol pen damlo, la alang ron-armu ahemphulo, lapen Abraham aphan pulo, “Nangli keklem asontin along Arnam dolo.#Kech 26.26 23La apotsi neliphan nelisomar, mate neliso-nelisu aphan ne pachobeibe-detjile Arnam angno ladak isi aseme dengnon. Neli nangliphan kroi pamelo, la apotsi nangli ta neliphan lapen laso nangli kedo adet aphuthak kroithippo pura chechaknon.”
24Abraham pulo, “Neli chechak-lo.”
25Abimelekh aban atum langtuk kethi alam Abraham ke Abimelekh aphan pasimulo. 26Abimelekh pulo, “La komatsi keklemma neli chinine, lapen laso alam nonsi karju longchenglang.” 27Anke Abraham ajehak abiresak lapen chainong Abimelekh aphan pilo, lapen latum banghini angbong kechechak aloh chepathik-lo. 28Abraham amethang api ahur pen jonthroksi biresak aloso thak-lo, 29lapen alangliphan Abimelekh arjulo, “La nangli kopisi keklemloma?”
30Abraham thak-lo, “La jonthroksi abiresak aloso deng iktha. La keklem pen ajok, nangli chinilo, laso alangtuk nelisi ketuk abang lo pu.” 31Lasi laso adim Beersheba#Ibri penke “Kechak Alangtuk” mate “throksi alangtuk” pusi irlo, pima hadaksi latum banghini angbong chechak-lo.
32Beersheba along latum laso akechechak chepathikdet aphi, Abimelekh lapen Phikol ha Philistia anat damjuilo. 33Anke Beersheba along Abraham isi Tamarisk athengpi arong elo, lapen kaike kedover Arnam, Hemphu aphan archolo. 34Ajirdingklui an Philistia along Abraham dolo.
Currently Selected:
KECHENG 21: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
