KECHENG 23
23
Sarah Kethi Lapen Abraham Thiri Kenam
1Sarah ningkan 127 arta an reng-long-lo. 2Bangpi Kanaan adet Hebron along si thilo, lapen bangpi kethi apot Abraham aning duk-lo.
3Alangli piso kethi abang arpum ketilai adim otekang si, Hitti aso along damsi pulo, 4“Nanglitum angbong neli inut bang adet amonit asonsi nangdo dunlo; ajehak alongle neliphan nejortha, anke nelipiso aphan neli pip unpo.”#Ibr 11.9,13; Akam 7.16
5Latum thak-lo. 6“Nelitum aphan arjutha, akehai. Nangli inut akangtangrak ajalin aphansi nelitum cholangding-lo; nelitum along kedo kemenei athiri along le nanglipiso aphan pipnon. Nelitum abang phutin ta thiri isi nangliphan nangkepiji aninghangpet, la apotsi bangpi aphan nangli pip unpo.”
7Anke halatum angno Abraham angphun patongki lo, 8lapen pulo, “Nanglitum jongsi nelipiso aphan ladak nepapip-long pulote kanghon pen Zohar asopo Ephron aphan 9la ahidi akung Makhpelah Alongku neliphan kepajorjile arjunon. La anam do-an pen neliphan kejorjile arjunon, ladak nanglitum angno, anke la isi athiri aphan neli chepahemphu unpo.”
10Akaprek a-Hitti atum penpen si Ephron ta rongsopi anghap kechingvai adim chongnidunlo; hadak kedo-an keparjulong-phrongjisi alangli thak-lo. 11“Arjutha, akehai; neli nangliphan hidi adang kangthim lapen la along kedo alongku nangpilo. Ladak neli monit atum angno, la neli nangliphan nangpilo, anke nanglipiso aphan nangli pip longpo.”
12Bonta Hitti atum angno Abraham angphun patongkilo, 13lapen kadokave ta karjulong-phrongjisi Ephron aphan pulo, “Nangli phan neli arju tamema, kanghon pen arjutha. Hidi adang kangthim neli namdetpo. Anam nelideng iktha, lapen hadak nelipiso aphan neli pippo.”
14Ephron thak-lo, 15“Akehai, longle anam ke rup dum 400 vet-elitum angbong lema! La along nanglipiso pip iknon.” 16Abraham chedondunlo lapen rat angno Ephron keparjulong-phrong alam dum 400 arup halaso ahut kedobom bepari atum alin ateng alangli linlo.
17Lasonsi Makhpelah along Ephron alongle, Mamre anihang, Abraham amar plang-lo. La hidi anta parloponlo, la along kedo alongku, lapen alongle akung kedo athengpi arong-heihei anta lo. 18Mei along kechetong a-Hitti atum an ta la Abraham akhilo pu hokdunlo.
19Anke Abraham Kanaan adet halaso alongku along si apiso Sarah aphan pip-lo. 20Lasi Hitti aso ahidi lapen la along kedo alongku isi athiri aphan Abraham alongle plang-lo.
Currently Selected:
KECHENG 23: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
