KECHENG 25
25
Abraham Akaprek Aso-asu
(1 Phur 1.32-33)
1Abraham anut kaprek piso enlo, la amen ke Keturah pulo. 2Alangli phan bangpi Zimran, Jokshan, Medan, Midianan, Ishbak, lapen Shuah amahang pathekpilo. 3Jokshan ke Sheba lapen Dedan, apolo, lapen Dedan aso-asu ke Asshurim, Letushim, lapen Leummim. 4Midianan asomar ke Ephah, Epher, Hanokh, Abida, lapen Eldaah helo. Lahei kedo-an ke Keturah aso-asulo.
5Isaak aphan Abraham kedo-an amar ta pi-et-lo; 6bonta la kerenglang ahut, akaprek apiso alangliphan mahang kepathekpi asomar an aphan alangli dan-heihei pilo. Anke lahei asomar aphan alangli ha Nihang adet, asopo Isaak pen kehelo adim toijuilo.
Abraham Kethi Lapen Kepip
7Abraham sarpame si amek chilong-lo, kethi ahut arta ningkan 175 an lo. 8Abraham pirthe kedo padu si lapen alangli kethi ahut sarlongpame, lapen arat aphan pangrumlo. 9Laphan asopo Isaak lapen Ishmael ha Makhpelah Alongku, Zoha Hitti asopo Ephron alongle Mamre ahidi-heihei anihang anat pipdamlo. 10La ke Hitti aso pen Abraham kenam alongle; hadak Abraham lapen apiso Sarah aphan pip-lo.#Kech 23.3-16 11Abraham thidet aphi, asopo Isaak aphan Arnam pahirjumelo, la “Nephan nekethek-long Kereng-et Abang Alangtuk” adungsi kedo.
Ishmael Aso-asu
(1 Phur 1.28-31)
12Sarah abanpi, Ijip asopi Hagar, Abraham aphan mahang kepathek aso, Ishmael, 13asomar lahei helo, latum mahang kethek angthun atengsi tok-lo: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, lapen Kedemah. 16Latum Kheikrehini aphusar atumlo, lapen latum amen ateng si rong-heihei amen lapen kepamukam adim-heihei amen irlo. 17Ishmael kethi ahut an ke arta ningkan 137 dolo. 18Ishmael aso-asu atum Havilah lapen Shur alongri, Assiria anat kedam atovar, Ijip anihang along si dolo. Latum Abraham aso-asu pen kedo chepahelo lo.
Iso Lapen Jakob Amahang Kethek
19Abraham asopo Isaak atomo ke lahelo. 20Bethuel (Mesopotamia pen inut Aram aso) lapen Laban asopi Rebeka angjir pen Isaak kechepangri ahut la arta ningkan 40 dolo. 21Pima Rebeka asomar ave, Isaak ke bangpi aphan Hemphu Arnam ardom pilo, alangli akardom Hemphu thak-lo, lapen Rebeka oso-chopathelo. 22Bangpi osocherop longpo, lapen latum mahang kethek aphrang, latum apei apok arlo lahin lahin chemarkot-lo. Bangpi pulo, “Kopi si nephan lapuson keplang-loma?” Lasi laso akethak kelongjisi bangpi Hemphu aphan arjulo.
23Bangpi aphan Hemphu pulo,
“Khei hini nangpok arlosi dolo;
Pu pu ahotur kechethur arat hini aphan nang mahang pathekpo.
Inut abang anut kaprek abangphan ingtang-muchotpo;
Akleng abang akebi aphan si ingdukpo.”#Rom 9.12
24Bangpi mahang kepathekji apor nangletang-lo, lapen bangpi osopomar cherop long-lo. 25Akleng abang prungchop, lapen la areng angmi kejanghu ape ason, la apotsi laphan Iso#Laso amen ke Seir along, aphi Iso asumar atum kedopathir alongrilo; Seir Ibri penke “angmijanghu abang” pu amen irlo. 26Akebi abang ke amahang kethek ahut Iso akeng cheripdunling, lasi laphan Jakob#Ibri penke “akengti” pusi amen irlo. Latum amahang kethek ahut an ke Isaak arta ningkan 60 lo.
Sokleng Ajakong Iso Kechejor
27Osomar atum thebomlo, lapen Iso ke inut kethekser asekar plang-lo, la ingtan kedam akai si aning kedok abang, bonta Jakob ke inut hemsi dojoi amonit. 28Iso aphan Isaak ke aning kedok, pima la Iso kevan api a-ok kecho aning-chepajang-lo, bonta Rebeka ke Jakob aphan si aning kedok.
29Arnisi, Jakob abang hantharvo ahan ketunbom ahut Iso abang sekar pen vang-lo. alangli ingchirpik-lo, 30lapen Jakob aphan pulo, “Ne kethisi kedolo; nephan ajehak ke-erring ahan nepitha.” (La apotsi la aphan Idom#Ibri pen “ake-ang” pulo.)
31Jakob thak-lo, “Nephan sonusok-leng ajakong nepilote ne nangphan la nangpidetji.”
32Iso pulo, “Chokpo! Ne kethiji dokdok-lo; nejakong nephan kopilo nekerap-po?”
33Jakob thak-lo, “Nang sokleng ajakong nepiji pura aphrang seme tangtha.”
Iso semetang si Jakob aphan la sokleng ajakong chepidet-lo.#Ibr 12.16 34Anke laphan Jakob ajehak ahim lapen han aninok ajehak pilo. La cholo lapen junlo, lapen thur si damjuilo. La helo Iso amethang sonu-sokleng ajakong aputhak kechematha.
Currently Selected:
KECHENG 25: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
