KECHENG 49
49
Jakob Kepadu Alamthe-heihei
1Jakob asomar atum aphan hangpet-lo, lapen pulo, “Nedung chingrum petnon, lapen mononphi nangtum aphan kopi plangjima ne nangthanpo”:
2“Vangpet-ra arjutha, Jakob asomar atum an.
Nangpo Israel alam arjutha.”
3“Reuben, nang neso akleng, nangke nejakong-lo
Lapen nekai angbong keplangsi a-nesolo,
Nesomar angbong an ning kechethenei lapen kangtangnei abang-lo.
4Nang ke ketosai alangthepi asonlo,
Bonta nangle anongkedonei abang kalidetji,
Pima ne-ke-enpangtar a-arloso pen nang irap-rap-lo
Lapen nangpo ahongplang pangthirthelo.
5‘Simeon lapen Levi atum kortetelo.
Latum kephangnojisi latum arisim che-ot-lo.
6Latum kechepalamso akechingki along ne dodunde,
Latum amei along ne dodunde,
Pima latum aningthi si monit pathilo
Lapen kepathu aphan latum chainong akeng palok-lo.
7Latum aning kethi aputhak pahirjunonang,
pima la phere memepik,
Lapen latum aning kesedeng aputhak,
pima la hingnopik.
Israel adang bithe ne latum aphan papratseiji.
La arat atum angbong ne latum aphan hijikjamji.’ ”
8“Judah, nangkorte atum nangphan nangrohurji.
Nang nanghotur atum aphan achethok tumlokpo.
Nangkorte atum nangphan ardomriji.
9Judah ke hingho ason,
Kepathiji api pathipo lapen angthor chedampo,
Chephajengsi domjoipo.
Baduta laphan padosojohai abang avelo.#Kela 24.8; Kepa 5.5
10Judah ke recho achin ot-longpo,
Lapen la aso-asu si kaiketa pangriverpo.
Det atum alanglilong dan#Ibri pen klardakde vanprelo.
11La adrakha rikang along gadha aso kokpo,
Drakha akemenei along.
La ape-ari keprungchop adrakha ahorlang avi along chechokpo.
12Drakha ahorlang kejun pen la amek ertanpo,
Chulang#Alangli mek ke hor aparta ikkoimu, alangliso ke chulang apar lokmu kejun apot la aso loktaipo.”
13“Zebulun ke talo akung si dopo.
La atalo akung ke telongpi aphan sining plangpo.
La ahoi Sidon anat an ta ledampo.”
14“Issakar ke gadha alonrek ta avedetji
Karlu athoila angbong ketilaichot agadha asonpo.
15Bonta la kesang aphan adim mesen asonsi chethekpo
Lapen longle ta laphan palangmesenpo.
Lasi la keponjisi athoila chethuipo
Lapen ban asonsi kam klemjokje detpo.”
16“Dan ke arat aphan inut kepangri abang plangpo,
Latum akaprek Israel akhei atum ason plangpo.
17Dan ke tovar akung apherui ason plangpo,
Tovar akung abi kedo apherui asonpo,
Losei akeng archu dunpo,
Anke kardon abang aphan aphi vardup-po.”
18“Nang akejok aphansi ne cholangding-lo, Hemphu.”
19“Gad aphan ke kethiparohum atumsi tengkhengpo,
Bonta la chetevarsi halatum aphan hungdunpo.”
20“Asher alongle mesen asok longpo.
La recho kechomeme a-an vanpipo.”
21“Naphtali ke kekatvir athijok-lo#Nephtali ke thengpi kehijikjam ason,
Kelangmeme ke-etjo arong kedo abang-lo.”
22“Joseph ke lang amek akung kedo ingnam gadha ason,
Inglong#Joseph ke langkung athengpi ason, athe ke-ong athengpile arpong anta kejirhet ason akeng-ri kedo alosei aso ason.
23La ahotur atum ketengkheng pasikpikji
Lapen laphan halatum athai lapen aso pen hungji.
24Bonta la thai chedothingji,
Lapen la ari chepangtang-lo#bonta latum athai ke keching-loktang, aphang angsi ke ingsek-i ason
Jakob a-Arnam Jakongtheparpik a-Bang ajakong pen ajok,
Kevi a-Bang, Israel aphan ke Rai a-Bang pen ajok.
25La nangpo a-Arnam si nangphan nangrap-lo,
Nangphan kepahirjume abang Jakongkethe Arnamsi
Angsong pen arve ason kedo-an ahirjume pilo
Lapen longle arlo pen karnukpik alang-heihei,
Ongdung achainong lapen osomar ahirjume pilo.
26Sok athe lapen mir-heihei#Ibri penke nangpo apar nepo ingtangmu ahirjume,
Hako anglongpi-heihei#Nephusar atumta lapuson ahirjume,
Kaike kedover anglong-heihei akelangmeme amar.
Lahei ahirjume Joseph aphuthak paklolongnang,
Akorte atumpen kepaprekvi abang atehang along padonang.”
27“Benjamin ke ejon kehingno amahar asonlo.
Adap lapen arnikangsam ta la pathilo lapen chodet-lo.”
28Lahei helo Israel khei krehini atumlo, lapen la helo abangphutin asomar aphan halatum apo chelon chit kechekak ahut keputekang alamthelo.
Jakob Kethi Lapen Kepip
29Anke asomar atum aphan Jakob hukumpilo, “Non ne kethitang nerat atum along dunpo, lasi nepo atum alongku, ha Hitti aso ahidi Ephron alongle nepipnon, 30Makhpelah along, Mamre anihang, Kanaan adet. Laso alongku lapen ahidi Abraham si Ephron pen kechepipji aphan namdunlo.#Kech 23.3-20 31Hadak si Abraham lapen alangli piso Sarah aphan pip-lo; hadaksi latum Isaak lapen apiso Rebeka aphan ta pip-lo. Hadaksi Leah aphanta pip-lo,#Kech 25.9-10; 35.29 32Hitti aso pen si hidi lapen la along kedo alongku namdet-lo. Nephanta hadak-le nepipnon.” 33Asomar atum aphan Jakob kepinkhat pajut si, alangli ijoilo, lapen thilot-lo.#Akam 7.15
Currently Selected:
KECHENG 49: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
