KECHENG 9
9
Noah Pen Arnam Kechechak
1Noah aphan lapen asomar aphan Arnam ahirjume pilo, latum aphan pulo, “Chanri-chanjaira pirthe paplengsetnon.#Kech 1.28 2Pirthe athak pi kedo-an lapen kangjar avo atum, longle athak keklim api an, lapen talo along a-ok kedo-an nangphan pherepo lapen pherepikpo; lahei nangridengsi hodai-et-lo. 3Kereng-et amar an nangphan, lapen nangphan kelirtir arvo ason nangkepi asonthotsi, Ne nangphan asontin amar nangpi-et-lo. 4Nang, achethe pen monit a-ok-le choche-chotnon, lapen pi a-ok seta la avi kedolang a-ok chochedetnon, pima vi along chethe do.#Kech 7.23-24; 17.10-14; Levi 19.26; Keth 12.16,23; 15.23 5Mane jongsi monit apran endet pulote, alangliphan aduk pipo, lapen Monit kepathi aphan kepathi api aphan seta kethi anpin aduk Ne piji. 6Monit aphan ke Arnam asonthotsi pinchong-lo, la apotsi monit inut pran karmut abangphan monitsi la aphanta pathipo.#Kech 1.26; Keba 20.13 7Nangsomar chanri-chanjai nangpo, ongdungsi la pirthe adang paplengset nangji.”#Kech 1.28
8Noah lapen asomar aphan Arnam pulo, 9“Langtha, nang lapen nangso-nangsu Ne kechejok aloh chepathiktang-lo, 10lapen kereng-et kepinchong api an, vo atum, chainong, lapen nanglong kedo pi amar an pen, telong pen nangkebar an pen chepathirlo. 11Laso alam pensi Ne nangpen chechak-lo: Ne chechak-lo, langthepi pen ajok mononphi seta kereng-et amar an pavirvelo; langthepi puthot pirthe pavirve lo. 12Nang lapen kereng-et amar api an pen Ne kaike kethirver akechejok angthek lahelo, 13inghun-heihei along Ne thai bi po. La ke pirthe pen Ne kechepathik angthek-lo. 14Sining-inghun Ne inghun-heihei pen kedipthip ahut lapen mukak nangkeklang ahut, 15Ne nangphan lapen pi amar an aputhak chemathapo lapen kereng-et api an aputhak langthepi pen ajok pavirvelo. 16Inghun-heihei along mukak nangklang lote Ne la langpo lapen Ne pen kedo-an pirthe athak kereng-et amar angbong kaike kedover akechechak alam chemathadampo. 17La ke kereng-et amar an aphan Ne kechechak angthek-lo.”
Noah Lapen Alanglisopomar Atum
18Telong pen kebar Noah asomar atum ke Shem, Ham, lapen Japheth. (Ham ke Kanaan apolo.) 19La bangkethom Noah asopo atum ke pirthe athak kedo-an arat atum aphusar atumlo.
20Noah, inut saiketiki abang, si drakhaberi ke-echeng amonit lo. 21Alangli ajehak adrakha-ahorlang jundet aphi la ingrithamlo, ape chephlokjok lo, lapen apehem along reng-angse tilailo. 22Kanaan apo Ham abang apo reng-angse ketilai thek-longsi, la barsi akorte banghini aphan thanlo. 23Anke Shem lapen Japheth choi epak ponsi la angchun pu pu ot papringsi pehem arlo aphi chiruibom pen dambomlo, lapen halatum apo aphan pe pa-umlo, lapen apo areng-angse kethek-longle detji aphansi latum amahang chetevarvedet-lo. 24Noah kebur thu ahut laphan asopo akebisi abang kopi klemtang-loma la chechinilo, 25alangli pulo,
“Kanaan aphan isi ahirjuno!
La akorte atum aban plangpo.
26 Hemphu Arnam aphan keropinon, Shem a-Arnam aphan!
Kanaan ke Shem aban plangpo.
27Japheth#Ibri penke kebat aphan Arnam pangthur nang!
La aso-asu Shem arat pen padorapnang!
Kanaan ke Japheth aban paplang lonang.”
28Langthepi aphi Noah ningkan 350 reng-lo, 29lapen kethi ahut alangli arta ningkan 950.
Currently Selected:
KECHENG 9: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
