JON 4

Jisu Lapen Samariapi

1Jon apar Jisu sangho kepaplang lapen baptisom kepi aphai ongmuchotbomlo pu alam Pharisi atum arjulong-lo pu Jisu chinilo. 2(Tebonta Jisu amethang amat ke badu aphanta baptisom pipelo, asangho atumsi baptisom pilo.) 3Lasi Jisu Judia adet otekangsi Galili adet damthujuilo. 4Kedam ahut alangli Samaria alongri angbongsi damnangkok-lo.

5Ansi Jisu Samaria alongri Saikar pu arongsopi nanglelo. Labangso arong-sopi ke Jakob amethang asopo aphan, atheke Joseph aphan kepitekang arit pen tebok-het-lo.#Kech 33.19; Jos 24.32 6Hadak Jakob alangtuk do. Tovar kevang apot lak-huisi Jisu halabangso alangtuk adung ingnilunlo. Halabangso ahut nerlo chitim anbak dolo.

7Inut a-Samariapi lang kesokjisi hadak vang-lo, lapen Jisu alangliphan pulo, “Neliphan kejun alang nepi-iktha.” 8Pima Jisu asangho atum ke kecho ahormu kenamdamjisi rongsopi dam-et-lo.

9Halabangso a-Samariapi alangli-phan thakdunsi pulo, “Nanglike Jihudi amonit, lapen neli ke inut a-Samariapilo. Tangte nangli kopusi neli pen kejun alang chohang-loma?” Pima Jihudi lapen Samaria atum angbong thangta che-un-e.#Ezr 4.1-5; Nehe 4.1-2

10Jisu thakdunsi pulo, “Nangli Arnam adan lapen nangli long pen lang kechohang abang aphan chini asonte nangli alangli long pen chohangji apot-lo, lapen alangli nangliphan chethe kepi alang nangpiji apot-lo.”

11Labangpi alangliphan pulo, “Akehai, nangli long lang kesok-i ajoton ave, lapen labangso alangtuk ke arnukkrung. Nangli hala chethe kepi alang konatsi longdampoma? 12Nelitum aphusar Jakobsi labangso alangtuk nelitum aphan pitekang-lo. Alangli sopo atum lapen achainong ahurta labangso alangtuk alangsi junlo. Jakob mute nangli themu kali, kalima?”

13Jisu thakdunsi pulo, “Labangso alang kejun abang aling ke ingitthu-jilang, 14bonta neli kepiji alang kejun abang aling ke kaita ingitthuthepinji. Neli alangliphan kepiji alang ke alangli bang arlo lang amek cheplangji lapen la alangliphan chethe kepi alang pisi kejut un-e achethe piji.”

15Labangpi alangliphan pulo, “Akehai, halabangso alang neliphan nepitha. Anke neli kaita ingitthuthepinpo, lapen neli ladak lang nangsokjokphlotpo.”

16Jisu alangliphan pulo, “Nangli penan chehangdamra ladak vangthunon.”

17Labangpi thakdunsi pulo, “Neli penan ave.”

Jisu thakdunsi pulo, “Nangli penan ave pu nangli kepu alam ahok. 18Nangli bangpho apinso pen chepangritang-lo, lapen non nangli pen kedorap rap abangta nangli penan binong kali. Nangli ahokpet alamsi nethanlo.”

19Labangpi pulo, “Neli chinilo, Hemphu! Nanglike Arnam amontrilo. 20Nelitum Samaria aphusar atum ke labangso anglong athaksi Arnam aphan archolo. Bonta Jerusalem arongsopi alongsi monit atum Arnam aphan ingduk-ardom nangji pusi nanglitum Jihudi atum ke pulo.”

21Jisu alangliphan pulo, “Neli lam kroitha, pei! Monit atum Po aphan labangso anglong athak lapen Jerusalem arongsopi alongta ingduk-ardomdedetji, lason ahut vangji. 22Nanglitum Samaria atum ke komat aphansi karchoma, lake nanglitum chinine. Bonta nelitum Jihudi atum ke komat aphansi karchoma, lake nelitum chinilo. Pima kejok ke Jihudi atum angbong pensi kevang. 23Bonta kangduk-kardom binong atum ke Arnam a-Karjong ajakong pen lapen ahokpet pensi Po Arnam aphan archoji, lason ahut nangleji; lapen nonta la nangletang-lo. Pima Po ke lason akarcho si keri. 24Arnam ke Karjong, lapen alangphan karcho atum anke Karjong lapen ahokpet pensi archo nangji.”

25Labangpi thakdunsi pulo, “Khristo vangji puke neli chini, lapen alangli vang-lote alangli ilitum aphan kadokave alam ethanji.”

26Jisu alangliphan pulo, “Halabang-so abang ke neli helo; alangli ke la nangli pen kechingkibom abang helo.”

27Halabangso ahut Jisu asangho atum nangchiruilo, lapen Jisu inut arloso pen kechingki thek-longsi manghuphrong-lo. Bonta halatum baduta labangpi aphan, “Nangli kopisi kenangji,” pu mate Jisu aphan, “Nangli labangpi pen kopi athesi kechingkima,” puta arjujedet-lo.

28Ansi labangso arloso lang atebuk che-o-tekangsi rongsopi chedamlo, lapen hadak kedo amonit atum aphan pulo, 29“Neli keklemtang akam an nekethanpet abang aphan nang-langdunhurtha. Alangli ke Khristo tahailo.” 30Lasi halatum rongsopi pen nangbarsi Jisu adung vang-lo.

31Halabangso ahut asangho atum Jisu aphan choningrisi pulo, “Kuru, nangli kopine chotha!”

32Bonta Jisu thakdunsi pulo, “Ne kechoji aphan ke nangtum kechini-nedet a-an do.”

33Lasi sangho atum lahin lahin charjuseroisi pulo, “Komane abang alangliphan kecho ahormu vanpitang-lobo?”

34Jisu latum aphan pulo, “Nephan neketoi abang aphan aning kehang akam keklempi lapen nephan nekepaklemtoi akam keklem kepatang helo ne anlo. 35‘Chiklo jonphli aphisi sok rotji,’ pusi nangtum pupu, kalima? Bonta ne nangtum aphan nangpulang, nangtum aphu chingthurra rit anat langtha: Sokke mentang-lo, rotme pametang-lo. 36Sok kerot abang anam long, lapen kejut un-e achethe aphan sok athe pangrum. Lasi sok kerik abang lapen kerot abang aning arong rap-rapji. 37Pima ‘Inut amonit ke chili kerik, anut kaprek amonit ke kerot,’ pu kepu alam ahok. 38Nangtum ketiki kalidet arit ajo nangtum sok kerotjisi ne nangtum aphan nangtoitang-lo. Anut kaprek atumsi hadak sai tikilo, lapen nangtum ke halatum keklem akam pen ale long-lo.”

39“Neli keklemtang akam an alangli nethanpet-lo,” pu halabangso arloso kepu alam pen apotsi halabangso arongsopi ake-ongpi a-Samaria atum Jisu aphan kroilo. 40Lasi Samaria amonit atum Jisu along vangsi halatum along kedoji aphan choningrilo, lapen Jisu hadak nini dokok-lo.

41Jisu kethan alam pen apot kekroi atum aphrang apar ongthumuchot-lo. 42Halatum labangpi aphan pulo, “Nangli kethan alam pen apot kali, bonta nelitum methang mamat alangli kethan alam arjulong-lo apotsi non nelitum kroilo. Lapen nelitum chinilo, alangli ke pirthe aphan kepajok abang binong-lo.”

Inut Saikhihemphu Asopo Aphan Jisu Kepame

43Nini aphi Jisu hadak pen barsi Galili adet damlo. 44Pima Jisu amethangsi pulo, “Arnam amontri ke amethang ahavar angbong ke aman longle.”#Mat 13.57; Mar 6.4; Luk 4.24 45Alangli Galili adet nangkele ahut Galili adet amonit atum alangli-phan chak-lo, pima kejok acho jun a-Meipi ahut halatum Jerusalem dunlo, lapen halabangso Ameipi ahut Jisu keklem akam an halatum thek dunlong-lo.#Jon 2.23

46Ansi Jisu Galili adet Kana arongsopi chedamthulo. Alangli lang pen drakha ahorlang kepaplang adim hadak helo. Hadak inut saikhihemphu dolo. Alangli sopo Kapernaum arong-sopi along sodet-lo.#Jon 2.1-11 47Jisu Judia adet pen Galili adet vangtang-lo pu arjulongsi alangli Jisu adung damlo, lapen Jisu alangli long Kapernaum arongsopi dunsi alangli sopo aphan keso kepameji aphan alangli Jisu aphan choningrilo. Pima alangli sopo thijidokdok-lo. 48Ansi Jisu alangliphan pulo, “Kemanghumeme akam hei hei lapen kemathadam un-edet akam kethe hei hei thek-longlete nanglitum kaita kroikre.”

49Saikhihemphu abang alangliphan pulo, “Hemphu, neli sopo thithe ako nangli neli long nangduntha.”

50Jisu alangliphan pulo, “Damnon, nangli sopo rengpo.” Halabangso saikhihemphu Jisu alam kroilo. Lasi alang hem chedamlo. 51Alangli tovar kedam ahut aban atum alangliphan chetongsi birta thanlo, “Nangli sopo reng-lo.”

52Alangli sopo ko-an apor ahut pensi keso keme pangcheng-loma pusi alangli halatum aphan arjulo. Halatum alangliphan thakdunsi pulo, “Patumi arni kangsam baji isi apor ahut pensi aphu keso hamlo.” 53Ansi halabangso aporchit ahutsi Jisu alangliphan, “Nang sopo rengpo,” pu pulo pu hala-bangso a-oso apo chemathadamlo. Lasi alangli lapen ahem ehum amonit Jisu aphan kroilo.

54Jisu Judia adet pen Galili adet vangdet aphi alangli batai hini aphong keklem kemanghumeme akam la helo.

Currently Selected:

JON 4: KARBIBSI

Highlight

Copy