Versets bíblics populars de Máfìù 6

Comparteix

Kɛɛ pɛ lɛ́ lɛ à mɔ̀ à wɔ̃̀ é die ka zò ká, é dieá pɛ séĩ́ làa, lɛ́ e kélɛ̀, Wálà zì tò‐mia‐là, wà wɔ̃́ lɛ́ à nàà mia ó kɛɛ. Yé aà kɛ kília, lɛ́ɛ̀ lo pɔɔ̀ séĩ́ nì e kília nɔɔ̀ ka lɛ̀ɛ.

À mɔ́ɔ̀ wɔ̃̀ mɔ̀ɔ, yékɛ̀ ká ka zò gɔ̃́ tòò mɔ́ɔ̀ wɔ̃̀ mɔ̀. Ƃii tòò zì zò‐gɔ̃́ bɛ̀iì lɛ à mɔ̀. Lúó séĩ́ zì wɔ̃́ nyɔ́ɔ̀ɔ lɛ ɓe. À mɔ́ɔ̀ wɔ̃̀ mɔ̀ɔ, ye wá ka mɔ̀ kɛɛ ká lúó dò zì là kpɔ́.

“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, yékɛ̀ ká kɛ zò‐gɔ̃́ zɛ̀ léɓèlè lɛ́ kà lo à ɓèlè, ɛ̃́ɛ̃́ pɛ́ kà lo à miì kɛ ká kɛ ɓe, ɛ̃́ɛ̃́ sɔ lɛ́ kà lo à naà ká dà ka gbĩ‐kpàla mɔ̀ɔ mɔ́ɔ̀ wɔ̃̀ mɔ̀. Kéa, kɛ̀ɓe wá dóo kpànazɛ̀ é dieá léɓèlè là? Ɛ́ɛ̃́ gbĩ‐kpàla bɛ̃̀ɛ̃ wá kpànazɛ̀ é dieá sɔ là?

Kɛɛ yé ɓaà dɔ í sɛ̀nɛ ɓoa, ì lo i píé kɛ́ì, í ká lé gbɛ̃̀ i bĩ̀ĩ̀, í sɛ̀nɛ ɓo i Dàa lɛ́ lɛ e bĩ̀ĩ̀pìàa lɛ̀ɛ. Yé aà kɛ kília, i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.

À mɔ́ɔ̀ wɔ̃̀ mɔ̀ɔ, zi lɛ́ lɛ ka mɔ̀ ká sɛ̀nɛ ɓo à káa, gɛ̃̀ e ké. ‘Ko Dàa lɛ́ i lɛ̀ía, i tɔ́ è kɛ tɔ́ lɛ́ lɛ mia séĩ́ lɛ̀ɛ tɔ́ yiè káa ká. I zì tò‐mia‐là è nu. Wɔ̃́ lɛ́ ɓà nàà à káa, è kɛ tã́ã̀ zèe lɛ̀ zí à kɛɛ̀ lɛ à ká lɛ̀ía lɛ́ ɓe.

Ì léɓèlè lɛ́ lɛ ko mɔ̀ kó sɔ̀lɔ̀ ɓoa, nɔ ko lɛ̀ɛ pɛ́nɛɛ.

Ì kã́ wɔ̃́ yɔɔ lɛ́ kɔaà kɛɛ mɔ̀, ɓá káá tã́ã̀, lɛ̀ zí kò kãá wɔ̃́ yɔɔ lɛ́ mia ò kɛ̀ ko káa mɔ̀, kɔ́áà kàà à ká tã́ã̀a lɛ́ ɓe.

Yékɛ̀ í nu ko ká lɛ̀ lɛ́ mia yí‐dã́‐wɔ̃̀ lɛ yía mɔ̀. Kɛɛ ì ko la Kɛ‐pɛ̀ Yɔɔ kɛ‐mìa kɛ̀lɛ̀.’

“Yé kaà kã́ wɔ̃́ yɔɔ lɛ́ mia ò kɛ̀ ka káa mɔ̀, lɛ́ kaà káá tã́ã̀a, ka lɛ̀í Dàà lɛ́ɛ̀ lo kã́ã̀ ka zìa mɔ̀, tó a káá tã́ã̀.

Kà mɔ̀ɔ̀ vɔ̀ lɛ́ ò dìè lɛ̀ía gɛ̃̀. Òó ɓu taa bɛ̃̀ɛ̃ kɛ ó gèe óò à kã, kɛ ó dùò gbã́ã́ lɛ̀í. É kɛ bɛ̃̀ɛ̃ kília, ka Dàa lɛ́ e lɛ̀ía, lɛ́ɛ̀ léɓèlè nɔ o lɛ̀ɛ. Ka wá kpànazɛ̀ é dieá o là?

“Yékɛ̀ ká dɔ‐pɔ̀ɔ̀ yàlà bɛ̀i ka dìè lɛ̀ɛ kpóṹ là zèe. Pɛ‐sìè‐pɛ̀ wà kàkpa óò pɛ sìè zèe. Ɛ́ɛ̃́ kã̀ã‐mìà óò ká lé wi zèe, tó wáà kã̀ã ɓò. Kɛɛ kà dɔ‐pɔ̀ɔ̀ yàlà bɛ̀i ka dìè lɛ̀ɛ Wálà‐pà. Pɛ‐sìè‐pɛ̀ wà kàkpa òó pɛ sìè yi, ɛ̃́ɛ̃́ kã̀ã‐mìà òó ká lé wí yi, kɛ ó kã̀ã ɓo. Ƃii lɛ̀ lɛ́ kà dɔ‐pɔ̀ɔ̀ lɛ yía, ka zò lɛ̀ɛ́ wɛ̀lɛ̀ à lɛ̀ mɔ̀.

“Mi nɔ́ɔ fé lɛ̀ɛ́ bɛ̀i kɛɛ̀ lùò ká mia wũ‐là‐mìà pèèlɛ lɛ̀ɛ e kíe ká. É kɛ̀á kília, mi doó‐mì lɔ̀ lɛ́ɛ̀ lo nyɛɛ̀ à mɔ̀, tó mi doó‐mì lɔ̀ áà kpɔ̀ à mɔ̀. Lɛ́ɛ̀ lo kɛɛ̀ wánà zɛ̀ mi doó lɛ̀ɛ, tó à nyìɛ e fɔ̃́ mi yé e tóa yí. Ìí bɛ̀i kɛɛ̀ Wálà là lùò ká, tó ɓáà kɛ̀ zeĩ́ pɛlèe là lùò ká.

Wálà lɛ́ è sɔ yèlè sùu nì mɔ̀ɔ. Sùu e kília lɛ pɛ́nɛɛ ɓe luú, kɛɛ yé tòò aà kɛɛ, óò lo à káà tíè. Yé mɔṹ lɛ kília, zi sùu kpɛɛ̀ lɛ́ è lo sɔ yèlèá ka yee ka mɔ̀ ké. Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo.

Kɛɛ yé ɓaà pɛ nɔ mi lɛ́ pɛ wá à kɛ̀lɛ̀ɛ lɛ̀ɛ, yékɛ̀ ɓá tó i kɔ̀ gbiè é wɔ̃́ lɛ́ i kɔ̀ yiè lɛ à kɛpìàa yí dɔ. É kɛ̀á kília, i zì pɛ‐nɔ‐kɔ̀ e kília lɛ́ɛ̀ lo kɛɛ̀ e bĩ̀ĩĩ̀ zɛ̀ ká. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.

“Kà ka yɛ́lɛ kɛ ka dìè píé ka zì yɛɓo lɛ́ à gbɛ̃̀ɛ̃̀ lɛ Wálà‐wɔ̃̀ mɔ̀ɔ kɛ̀ mia nyìɛ mɔ̀, kɛɛ mia ó ka gɛ̃̀ɛ mɔ́ɔ̀ wɔ̃̀ mɔ̀. Ká wɔ̃́ nì e kéa kɛ̀á mia nyìɛ mɔ̀ɔ, ka Dàa lɛ́ e lɛ̀ía lɛ̀ɛ́ ló ka fɔ́nɔ́ nɔɔ̀ à wɛ̃́ĩ̀.

“Yé kaà kɛ ka sṹũ yía, yékɛ̀ ká yolo kṹ, lɛ̀ zí mia lɛ́ ò o dìè wɛlɛ lia ò kɛ̀áa lɛ́ ɓe. Óò o wɛlɛ sìè kɛ mia ó o yí dɔ kélɛ̀ o o sṹũ yí. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀. Kɛɛ yé ɓie ɓaà kɛ i sṹũ yía, ì i wɛlɛ pɛ́lɛ́, í i wĩĩ́ dùò, yékɛ̀ mia gbɛɛ ó i kɛ̀ sṹũ yí míní sí. I Dàa lɛ́ lɛ e bĩ̀ĩ̀pìàa lɛ́ nɔ́ è lo à yí dɔɔ̀ɔ. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.