Versets bíblics populars de TDP 8

Comparteix

Sɛnɛ, ka n yiri koa li ka dɔ̃, mà kaa Lawa, Dɛnaa Lawa na á pàã kɔ ka la, ká tɔ́n bɛa gɔn mànan lɛn yɛ. A na á bɛ zɛnaa á nyaa, mà asɛ lɛ kɔ kɔn la mɛn wɔ ka ka digolon ne, mà bɛ á tɔn a giala la, haalɛ pelo.

A bɛ́ á fuu nyaa ka nɛ, á toa bòo ka kũ, a din wusoo á *maánə kɔ ka la. Bɛ n màn-bii lɛa, ka goã doɛ̃ wa, ka digolon dɔn dinin nə goã doɛ̃ wa. A na á zɛnaa miɛ̃ á nyaa ka nɛ, mà màn-bii dinsɔɔ̃ bie minbuiin nɛ toe wa, sɛnɛ, boo woo boo boe Lawa lɛ-n, bɛ lɛ n min toe.

Kaa Lawa, Dɛnaa Lawa zii sɔsɔɔ mɛn tɔ wɔ ka nɛ, lɛ̀ pusi don bii, ka n yiri koa bɛ li. A na á fuu nyaa ka nɛ, á n da ka gɔ́ɔ̃ li, màn mɛn bɛ́ toɛ, a ka gɔ́ɔ̃gɔ́ɔ̃ ǹ taasiɛ dɔ̃, bɛ̀ ka á re asɛ a gɔn waa ǹ boon kɛn tamaɛ, hinlaa bɛ̀ ka a re ǹ tamaɛ wa.

Ka nyan taasɛ ka dinin gɔ́ɔ̃ nɛ: mà ka dinin doa laanka ka dinin pàã na á toa, ká bɛa gɔn mànan kɛn lɛn yɛ wa.

Ma bɛ́ kaa Lawa, Dɛnaa Lawa a gɔn waa ǹ boon mɛnɛn pii ka-n pelo, a sii yɔrɔ bɔ ǹ boon laanka a landa boon ne, ka yiri bɔ, ka nyan bɛn da ka gɔn para-a, n ka yiri yǎa kiɛ̃ boe ka kaa Lawa, Dɛnaa Lawa lɛ-n wa.

Ka dɔ̃ ka bɛ lɛ-n kəni, mà kaa Lawa, Dɛnaa Lawa lɛ n giɛ li a ka doroo, ka díi bɛ́ a nɛ doree lɔn.

Ka á re màn bii walan ka kã. Ka goã bɛ̀ ka barka da kaa Lawa, Dɛnaa Lawa lɛ nɛ, gána sonbore kɛa lɛa, á kɔ ka la.

Ka kaa Lawa, Dɛnaa Lawa lɛ a gɔn waa ǹ boon tamaa, ka kɔ a dùũ siin lɛ, ka nyɛ́ɛ baa nɛ.

Á din don kɛ lɛ nɛ, á maánə kɔ ka la ká bii, ka digolon dinin nə goã bɛa màn-bii lɛ doɛ̃ wa. A ka yii puusə kɔ miɛ̃, á n da ka gɔ́ɔ̃ li, màn mɛn bɛ́ toɛ kaa biɛ̃ ǹ bǐɛ̃ kɔ.

Ka á re màn bii ka kã, ka á re kion sonboren doe ka giã ǹ nɛ, kaa tɔɔ dadaran laanka kaa tɔɔ bisinin tá re mɔnɛɛ, ka á re wɔrɔ gigiã laanka sana gigiã yii ka màn sonbore tɔrɔ tumaa nɛ. Sɛnɛ, ka nyan nə n saa bɛ li ka ka dinin gole kɔ, ka yiri bɔ ka kaa Lawa, Dɛnaa Lawa-n wa. A din na á ka waa á ka bɔ Ezipti gána a bɛ̀rɛbaa nɛ.

Kaa Lawa, Dɛnaa Lawa lɛ n die woe ka kiɛ gána sonbore ne. Bɛa gána lɛ a mu bǎãn nə́ mɔnaa. Mu pìãn tá a nɛ, ǹ mu n soe diə bǎãn laanka kele bǎãn nɛ. A n gána lɛa, *belee n bǐɛ̃ koe a nɛ, *ɔrzi ni, rezɛ̃ nɛ, gɔ́rɔ nɛ, grenadie da nɛ. Gána nɛ, *olivie nyɔɔ n yii a nɛ, ka zoo ne. Ǹ ba re kaa màn-bii zoɛ̃ walan, bɛ̀ ǹ tɔn kɔ ka la wa, màn kɔn dɔ a re nyaabiɛ ka ganaa wa. Fɔlɔ n yii bɛa gána lɛ a kɔlɔn li, ǹ zan bɔ a kelen la.

Ma bɛ́ gɔn waa ǹ boon mɛnɛn tumaa pii ka-n pelo ke, ka n yiri koa li, ka kɔ ǹ lɛ. Bɛ á re toɛ ka yii goã koo, ka mɔnaa, ka boo la ka wɔ gána kɛ nɛ, Dɛnaa Lawa nə́ n liɛ mà asɛ á re koe ka digolon la.

Bɛa lɛ̀ pusi kɛ lɛ gɔ́ɔ̃ nɛ, kaa dɔnkɛn nə pɔpɔsɛ ka ganaa wa, ka gòãn nə yuyu wa.

A din na á ka kaa tɔ-wɔ ganaa don kaara kɛ nɛ, nyɛ́ɛ da ǹ bǎã lɛa. A piɛ̃maa-n ka miɛ̃ babaraan laanka tonən ne. Bǎã gere ne, mu ba a-n wa. Sɛnɛ, a din lɛ na á mu bɔ gɛ̀fu kaka nɛ, á kɔ ka la.