MATHIU 13
13
Chhahli Wênte Nginthakthô
(Mak 4.1-9; Luk 8.4-8)
1Erejâjâko Jisu hum wah loatchhoan lahma josi ngenâng kalahma hahko tonglahma hethô wah. 2Ate tumlit ko khôanhûtah mihnyan heh jahmõang dângjunko khôankhoko chhangkat wah, ngale mihnyan heh jophako chepwah. 3Jisu ma nginthakthô keplahma thinnâng ajahthem ngin thôkoh wah.
Atema ngatwah, “tat en, rekthenâng mihnyan wathema chhahli wênchhoan eka. 4Atema pitnâng chhahli wênko, wanwanthe chhah pa lemkôngko chatjâeka, phumma wo heh hûlahma tuphhek eka. 5Wanwanthe chhahpa longrã khohko chatjâeka. Phumma hahpa alu ledang dângjunko chhahpa sitsiak koat eka. 6Phumma san chaanhông rienrien koatnyan chhahpa sanma ritsah eka; chenrãngma ngako, chhahrin pa alu lesut dângjunko sitsiak choakjâeka. 7Wanwanthe chhahpa suhbuk mongnâng chatjâeka, phumma suhbuk pa donglahma chhahpa tahbuk eka. 8Rohkomin, wanwanthe chhah heh hahsen nâng chatjâ lahma chhahbãng pumma chhahri hongrieka; wanwanthe ma châthe, wanwanthe ma roak erok, ngale wanwanthe ma roakrem chhahri hongrieka.”
9Ngale Jisu ma athôanko, “Nenâng nâ metong hènko tat en!” ngama ngalahma jekthô wah.
Nginthakthô pa chenni rãngma Thôwah a
(Mak 4.10-12; Luk 8.9,10)
10Erediko dijunte heh hûlahma Jisu nâng chhienwah, “mihnyan heh demnâng jabmîn poatko nangma nginthakthô pa chenni rãngma kep ekoa?”
11Jisu ma dânthâng wah, “rangkhethung Hahsông nginpa thinnâng ledang nenâng jetthuk rãng kepekãng. 12Hen mihnyan ma chenni komin cheieka, ere mihnyan ko ajah lêkohmin, erohkoba atenâng lephang leleng edanga; phumma hen mihnyan nâng chenjô aho dangeka, ere mihnyan kowah atema chenni cheieka erepemin tôanchhoan rêmin. 13Thin demnâng jabmîn poatko ngama nginthakthô kep ekangpa, thinma esûwak a, rohkomin khemah, ngale thinma ejetat wak a, rohkomin jettatmah, ba jetlomah. 14Erohwah Isaia mõngma thôtah nginpa thin khohnâng toangtang dangkaera:
‘Are mihnyan hehma chentojô mejetat akomin, lejet tatmin;
thinma chentôjô mesû akomin, lejet khemin,
15Chenrãngma ngako thinhung thinrin pa batah,
thinnâ memin tattumah,
ngale mitmemin khetumah. Joban ma ngaeka,
‘Eroh ledang ngako, thin mitma chenkhetah,
ngale nâma chentattah,
Ngale thin hungma chenjetlotah,
ngale ngatânâng chenngak hûwaktha, Joban ma ngaeka,
ngale ngama thin chenme siettek.’
16“Phumma ne chentô khengraangsen a! nemitma khe eken, ngale nâmemin tat eken. 17Ngama nenâng nginlinlin thôkoh eka, ajahthem mõngama hehma ngale toangtang mihnyan hehmemin, nema chenni khe eken a, erepa khehun eka, rohkomin thinma chohkhe mah, ngale nema chenni tat eken a, erepa chohtat huneka, rohkomin thinma chohtatmah.
Jisu ma Chhahli Wênte Nginthakthô pa Ngaksên Thôkoh
(Mak 4.13-20; Luk 8.11-15)
18“Tat en, chhahli wênte nginthakthô pa chenni nâng thakthô eka, ngale ekowah he en. 19Hen akomin rangkhethung Hahsông nginpa chohtat lahma lejetlo dangeka, ere mihnyan heh lemkông nâng chatjâte chhah rãngrãng. Juchhih hûlahma thinhung nâng Joban ngin wêntah heh nyen chhoan eka. 20Longrã khohnâng chatjâte chhah rãngrãng pa, henma komin Joban nginpa chohtat rienrien khuhah nâhah kepte heh. 21Rohkomin erengin pa thinhung khennâng lulitlit lupmah, erohwah thin lekrõngmah. Erohwah, chenthu Joban jabkhab junma chêmchei ba mihma chêmthukko, thinma lemlienma ethinphea. 22Suhbuk mongnâng chatjâte chhah rãngrãng heh dangeka, Joban nginpa chohtat lahma hei angem roandông rãng sekmah patritte mihnyan heh, thin hungko chhu alu dânghun pumma Joban nginpa tangbuk eka, erohwah thinma ari hongrimah. 23Ngale hahsen nâng wênte chhah rãngrãng heh dangeka, Joban nginpa chohtat lahma jienjet loatte mihnyan heh: wawathe ma châthe, wawathe ma roak erok, ngale wawathe ma roakrem hongri eka.”
Hin Nginthakthô
24Jisu ma thinnâng ahan nginthakthô min thôkoh wah: “Rangkhethung Hahsông pa arerãngrãng. Mihwa pumma ate pitko chhahli lisen wênkat eka. 25Jâthe rangpen nâng anga nga jup diko, ran hûlahma chhah heh demko hin johwênthien kolahma ngakchhoan eka. 26Chhahbãng pa donglahma chhahpo chhahri riiphûngko, hin pemin hôngphoak wah. 27Ere mihwa haapa wãng lahma Atenâng ngatwah, ‘Tângte, nangma nang pitko chhahli lisen wênwah dangmohne; chenwah are hinheh hongphoak eka?’ 28Atema dânthâng wah, ‘Arepa ran hehma wênhû eka’, phumma haa hehma Atenâng ngatwah, ‘nima hinheh phuphe kaea?’ 29Tângtewa ma dânthâng wah, ‘nekphu pheka en,’ ‘chenrãngma ngako, nema hinheh phuphe poatko chhahmin hinheh demnâng môangjoh phuphe en. 30Chhah pa mamun munko, chhah ngale hinnii aroamma chendonga. Erediko ngama chhah khente hehnâng hinpa bângphuphe lahma roapkhhek lahma wennâng thhekrãng echien ang. Ngale erediko chhah pa khen lahma pumnâng sekthien rãng ethôkoh ang.’ ”
Jokangken Nginthakthô
(Mak 4.30-32; Luk 13.18,19)
31Jisu ma thinnâng eredikomin ahan nginthakthô thôkoh wah: “Rangkhethung Hahsông pa arerãngrãng. Mihnyan wathema jokangken keplahma ate pitnâng wênkat eka. 32Are jokangken pa chentô wah kenrinthôan, rohkomin ere kenpa mehongphoak tahko chentô noma adongthôan dangeka. Bãng rãngrãng danglahma ate phak hehnâng wo heh memin arup rupeka.”
Wichhi Nginthakthô
(Luk 13.20,21)
33Jisu ma eredikomin thinnâng ahan nginthakthô thôkoh wah: “Rangkhethung Hahsông pa arerãngrãng. Dihiaknyu wathema wichhi pa toak roakbelii pheban demko sakmîn lahma pheban pa phangtang mabiet bietja thien eka rãngrãng.”
Jisu ma Nginthakthô Demnang Thôkoh
(Mak 4.33,34)
34Jisu ma mihnyan hehnâng chentôpa nginthakthô demnâng thôkoh wah; Atema nginthakthô demnâng ledangma chenmin thôkohho. 35Arepa atema mõng hehma jabtah nginpa toangtang dângrãng moatwah:
“Nga thin demnâng jabmînko nginthakthô demnâng ejabmîn ang;
Rangbâng hahbâng thuwah lelep jetthin heh ngama thinnâng ethôkoh ang.”
Jisu ma Hin Nginthakthô pa Ngaksên Thôkoh
36Chenthu Jisu loangchhang pa phethien lahma humkhen nâng lupwângko, ate dijunte heh ate tânâng junwãng lahma Atenâng ngatwah, “Pitwah hin nginthakthô pa chenni nâng ngaeka erepa ninâng ngaksen thôkohhi.”
37Jisu ma dânthâng wah, “Chhahli lisen wênte pa Mihnyan Chhapa; 38Pitpa are hahtokkhoh pa; chhahli lisen pa rangkhethung Hahsông nâng tâchoh wângte mihnyan heh; hinpa Juchhih rãng dângte mihnyan heh; 39ngale hinken wênkohte ranpa joak ajo heh. Chhah pômûn pa rangle hahkho thôan sanpoat pa, ngale chhah munchoan khênte heh Joban ngintatte heh. 40Chenroh hinheh khôanphu lahma wennâng thhek eka, ererãngrãngjô rangle hah thôan sanpoat komin dângmin: 41Mihnyan Chhama ate ngintatte heh ate Hahsông khen wah mihnâng pap phoangmoat thukte ngale ahan chentô kaamchhih moatte heh khôansiet rãng echien chhoan a, 42ngale thinma ereheh pap wendô khohko ephekat a, phumma eretheko thin asep nungma pâchupkek lahma etongwak a. 43Erediko Joban chha heh thin Wa Hahsông theko sanphiak rãngrãng phiak lahma etonga. Nenâng nâ metong hènko arepa tat en!
Ahuhriem wah Ngun Nginthakthô
44“Rangkhethung Hahsông pa arerãngrãng. Mihnyan wathema pitnâng huhriem wah ngun choh eka. Phumma atema erepa ngak huhriem lahma, nyahrãng rinroan bahsa wãng lahma ate chhahkhem chentô heh sengwâng wah, ngale erediko atema ngakka lahma ere pitpa riieka.
Litpha Nginthakthô
45“Rangkhethung Hahsông pa arerãngrãng min dângmin. Mihnyan wathema litpha phasen lemeka, 46Chenthu tema asenthôanpa mechohtahko, chhoan lahma ate chhahkham heh phangtang senglahma ere litphapa riieka.
Chaak Nginthakthô
47“Rangkhethung Hahsông pa arerãngrãng min dângmin. Ngahloatte mihnyan pumma ate chaakpa josiko hatkat lahma jatrup ngah loeka. 48Chaakko mênchong memen tahko, thinma bamko chaakpa sietwên lahma, hahko tonglahma ngah heh renwak eka: asen senpa thin tõngko sekwak eka, ngale achhih chhihpa petphe rewak eka. 49Rangle hah thôan sanpoat komin erohjô dângmin: rangwah Joban ngintatte heh chhoan lahma mihnyan chhih heh mihnyansen chhang wah ekhôansiet a 50ngale ereheh pap wendô khohko ephekat a, enâng thin asep nungma pâchupkek lahma etonga.
Toangtang Nyan ngale Toangtang pa
51“Nema are heh jet ekenle?” Ngama Jisu ma thinnâng chhienwah.
Thinma, “Jet eki” ngama dânthâng wah.
52Ephumma atema thinnâng dânthâng wah, “Are ngaeka pa chentô, niemarang hethôte hehma rangkhethung Hahsông dijunte rãng dangwak eka, erepa hum tângte wama ate pum wah chhahkhem anyan ngale apã aroamma loatsiet rãngrãng dangeka.”
Nazarat nâng Jisu Thãsê
(Mak 6.1-6; Luk 4.16-30)
53Jisu ma nginthakthô heh tathô kolahma erethe kowah loatchhoan wah 54ngale ate songtah hahdaangko ngakhok wah. Atema Sanagog nâng hûlahma hethô wah, ngale ate ngin chohtatte heh bârit rewakwah. Thinma thôngphâ wah, “Atema are ngin ariat pa chenko wah chohjet eka?” “ngale are patritli moatlem heh chenroh jienmo eka? 55Atea khoangtekte chha ledangne? Mariam pa ate nyong ledangne? ngale Jems, Josep, Simon, ngale Juda heh ate naa ledangne? 56Ate naa dihiaknya heh anângwah sôngte heh ledangne? phumma atema are chaanpa chenwah choh eka?” 57Ere diphumma thinma ate thãsê wah.
Jisu ma thinnâng dânthâng wah, “Mõng pa chentô thenâng toaksân wakeka, rohkomin thinnok ahah ngale ate humkâ kololoba toaksân mah.” 58Thinma leputedâlem junko, atema enâng ajahthem patritli moatlem moho.
S'ha seleccionat:
MATHIU 13: NOKTBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.