LUK 22
22
Jisu Nyüm Arah
(Mat 26.1-5; Mrk 14.1-2; Jhn 11.45-53)
1 #
Nüch 12.1-27
Phungkhu Thsüti pü dsiba Bhüpza müyohba Hümdhse thsüti shikhe tsü chii rocho. 2Bebü ayingti ko yuzeng dorütinü nyitsarüti drücho, achotsü arühnü Jisu aranglangnü süsohnung lang yangchicho.
Judas-nü Jisu Kihyochünung Nyengchocho
(Mat 26.14-16; Mrk 14.10-11)
3Hütsüde mono dhüreanyüh yola khüdu Iskariot pü dsiba Judas chah Satan züducho. 4Achotsü Judas-nü wü bebü ayingti ko amübükuh nyahrü anüchirü te arüh khyang abinü Jisu khüta khakhuchüjünung hütsü nengdang chotacho. 5Arüh künyangcho ko abi khyang thsi jünung nyengchocho. 6Judas-nü hütsü nyengchocho ko nyitsarüti khyang mümüdhesohpü arüh khyang Jisu khakhuchüjünung thsatsa tsa yangchimüsucho.
Phungkhu Thsüti Tsunung Rungnümcho
(Mat 26.17-25; Mrk 14.12-21; Jhn 13.21-30)
7Bhüpza müyohba Hümdhse thsüti nengdang phungkhu sanza müpsehba nyümong chihcho. 8Ko Jisu-nü Peter ko Johan nyüh müthehnü yocho: “Wüng ko Ihsa nengdang Phungkhu Thsüti tsunung rungnüm.”
9Arühnü tsingdhingcho, “Nühnü hütsü khüde rungnümsohnyüro?”
10Abinü lalingcho, “Nührünü yangdila tsü züdude, nyüh khüdu kih shinga dhipü nührü shirünung. Abi züduba kuh la tsü züdung, 11ko kuh abüdongba te tsü young: ‘Athsingyubanü nüte yore, Ih ko I monoti nengdang Phungkhu Thsüti tsunung kuh tsü khüdeo?’ 12Abinü nührü te amungthriba arungnümcho kuchongsah amülah khüdu thongunung, hütsüla rungnüm.”
13Arühnü wücho ko adhangpi Jisu-nü yocho roh-i tsü ngucho, ko arühnü Phungkhu Thsüti tsü rungnümcho.
Abüdongba Thsüti
(Mat 26.26-30; Mrk 14.22-26; 1 Kor 11.23-25)
14Khode becho chihcho, Jisu-nü riwürüti yola tsingthsangte pümcho. 15Abinü arüh te yocho, “Ih müchongchaede Ihnü nührü yola Phungkhu Thsüti hi khütang tsunyüre! 16Tunüo Ihnü nührü te yore, Tsingrangba Yanglih la hi mütikehde Ihnü hi khodesü mütsunung.”
17Hütsüpü Jisu-nü shing khüdu khyücho, ko Tsingrangba khyang anengse jüpü yocho, “Hi khyüng ko nührü yola changtaang. 18Ihnü nührü te yore, Ade tinü Tsingrangba Yanglih mürode, Ihnü hiba cikih hi müyongnung.”
19Hütsüpü abinü hümdhse khyücho, ko Tsingrangba khyang anengse jüpü hütsü chenahcho ko arüh khyang jonü yocho, “Hi Ifü lile, khüiba nührü nengdang jücho. Ih lümchehnung nengdang hi bichieng.” 20#Jer 31.31-34Hütsü roh-i, thsüti tsupü abinü shing tsü jonü yocho, “Shing hi nührü nengdang khatohcho I shüh la asi azengtacho lile.
21 #
N. Khi 41.9
“Ta dhing! Ih kihyochüjünung tsü hila Ite tsingthsang chah lile! 22Nyitsarü Tsurü tsü Tsingrangba-nü lümcho roh-i sünung, ta sünü kihyochüro, abi nengdang khütoh-i adrünung thsanung!”
23Achotsü arüh yola hütsü nguchinung tsü sü thsanungpü tsingdhingtamüsucho.
Adiu Thsanung Rehtacho
24 #
Mat 18.1; Mrk 9.34; Luk 9.46 Monoti yola sü adiuba khichinungpü yujitacho. 25#Mat 20.25-27; Mrk 10.42-44Jisu-nü arüh te yocho, “Müyudsirü yangthsarüti arüh müyurü michah tase lile, ko athsarütinü, ‘Müyurü shangrü’ pü dsisohnyüre. 26#Mat 23.11; Mrk 9.35Ta nührülü hütsüta mah; hütsü mahpü, nührü yola adiuba tsü achangba roh-i, ko langnüba tsü kulirü roh-i kang. 27#Jhn 13.12-15Tsunung pümbae achahlaba nyüh tsü sü adiuo? Tsunung pümba tsü mahrü do? Ta Ih nührü yola achahlaba tsü lile.
28“Ih chongcha ayung nührü Ite licho; 29I U-nü I khyang thsanung tase jücho roh-i, Ihnü nührü khyang hütsüba tase jüre. 30#Mat 19.28Nührünü I yanglih la I tsingthsang chah tsuyongnung, ko nührünü yangthsaba pümjila pümpü Israel hung dhüreanyüh michah yangthsathsanung.
Peter-nü münyengchonung Jisu-nü Yojungre
(Mat 26.31-35; Mrk 14.27-31; Jhn 13.36-38)
31“Simon, Simon! Nyieng! Luthsarünü mayü lanü fürü müthrachehcho roh-i, atsa ko amütsa changshonung ko nührü atümung thsadsünung nengdang satan amülaba nguko. 32Ta Simon, nü yudsi amükoh müngunung nengdang Ihnü nü nengdang dangkhidangnangjüko. Ko khode nü lasih thsamüla I yanglang thali ronang, nühnü nü jünirüti rezehsohng.”
33Peter-nü lalingcho, “Abüdongba, Ih nü yola rangyohnung ko sünung mii rungnüm lile!”
34Jisu-nü yocho, “Peter, Ihnü nüte yore, nühnü Ih mümüdhepü asangpili müyode shomülang hünanü mükhongnung.”
Thsiyohbong, Shibha ko Nohsheng
35 #
Mat 10.9-10; Mrk 6.8-9; Luk 9.3; 10.4 Hütsüpü Jisu-nü amonoti te tsingdhingcho, “Ihnü nührü thsiyohbong, shibha mahkhang jingkhüm tu mühipü müthehdesü, nührü lango dunüsü müdsicho mah-o?”
Arühnü lalingcho, “Tunüsü mümüdsi.”
36Jisu-nü arüh te yocho, “Ta adelü, sü thsiyohbong mahkhang shibha liro hütsüri tsü bieng; ko sü nohsheng müliro abinü shü ieng ko hütsü lihng. 37#Isa 53.12Tunüo Ihnü nührü te yore, amüsa yu khüila, ‘Abi münyirü yola khiyohko’ pü thrah liro hütsü tikehnungbae, tunüo I nengdang tu thrah licho hütsü tikehre.”
38Monotinü yocho, “Dhing! Abüdongba, Hila nohsheng anyüh lile!”
Abinü yocho, “Hütsü akükyüe.”
Olive Zong la Jisu-nü Dangkhidangnangcho
(Mat 26.36-46; Mrk 14.32-42)
39Jisu-nü yangdi tsü pehjüpü apu nanathsacho roh-i Olive Zonglang wücho; ko monoti abi yola wücho. 40Khode hütsü chihcho, abinü arüh te yocho, “Nührü athsadsüla mülongnung dangkhidangnang.”
41Hütsüpü abinü arüh tenü rüm-o wüpü mükhukeh dangkhidangnangcho. 42“Uwa, nühnü lümkhang, hiba chongcha shing hi I chahnü khyükhujüng. Ta I lümcho mah, nü lümcho thsaang.” 43Ko ninglangnü riwürü khüdu ro abi rezehsohcho. 44Khütang lümtohseh abinü khüsha dangkhidangnangcho, ko ashikih ashüh roh-i alih la pohchocho.
45Dangkhidangnang lanü shemüsu amonoti yang wüde abinü arüh awahchonü kyahseh yüpseh ngucho. 46Abinü arüh te yocho, “Tuepü yüpjoro? Surung ko nührü athsadsüla mülongnung nengdang dangkhidangnang.”
Jisu Rangcho
(Mat 26.47-56; Mrk 14.43-50; Jhn 18.3-11)
47Jisu yu müchozah-e, amülung khüdu mono dhüreanyüh yola khüdu Judas-nü nüpü rocho. Abinü Jisu chah müthsüpnung yang rocho. 48Ta Jisu-nü yocho, “Judas, nühnü be müthsüpchonü Nyitsarü Tsurü kihyochüjünung ang?”
49Jisu yola yarü monotinü atikehnung liba tsü ngunü yocho, “Ihrünü noh bichi o, Abüdongba?” 50Ko arüh yola nyüh khüdunü amungthriba bebü kuliba nangku tsalang thsüp-pehjücho.
51Ta Jisu-nü, yocho, “Hitadung!” Abinü nyitsarüba nangku chah thahpüjo kyangjücho.
52Hütsüpü Jisu-nü abi rangnung rorüh bebü ayingti, amübükuh nyahrü anüchirü ko azibarü te yocho, “Ih afüashi khüdu kyo nührünü Ih rangnung nohsheng ko singdümpi bipü ronungthsa kangcho ang? 53#Luk 19.47; 21.37Amübükuh la Ih nührü yola nyümong mükhu licho ko nührünü Ih mürang. Ta amanü yangthsade, hi nührünü nguchinung bekhyah-e.”
Peter-nü Jisu Münyengchore
(Mat 26.57-58, 69-75; Mrk 14.53-54, 66-72; Jhn 18.12-18, 25-27)
54Arühnü Jisu rangcho ko bebü amungthriba kuh yang nowücho; ko Peter-nü ahongkoh thü-thünü iiwücho. 55Kuh bete michangthsa licho ko hütsü mükang pümrü yola Peter-sü pümcho. 56Khode kulilarü nyüh khüdunü abi michang he püm ngu, abükyünü abi chah dhinglahnü yocho, “Hivi mii Jisu yola zehchoe!”
57Ta Peter-nü mühnyengcho yocho, “Khingkurü, Ihnü apu mii mümüdhe!”
58Khü lipü nyüh khüdunü Peter mütsinü yocho, Nüh mii arüh yola khüdu mado!
Peter-nü lalingcho, “Nyitsarü, Ih mah!”
59Rehtseh khüdu-o lipü aparü nyüh khüdunü emüthsa yocho, “Hiba nyitsarü hi Jisu yola zehtsatsako, tunüo abisü Galilrüe!”
60Ta Peter-nü lalingcho, “Nyitsarü, nüh tu chorünang Ihnü mümüdhe!”
Hütsüde abi müchozah-e hüna khongcho. 61Abüdongba-nü ximüla Peter chah dhingkehcho. Ko hütsüde “Nühnü Ih mümüdhepü asangpili müyode shomülang hünanü mükhongnung” pü Abüdongba-nü yocho abinü lümchehcho. 62Ko abinü dongkhu chüdunü khah-a tracho.
Jisu Müthsamünyücho ko Xüpcho
(Mat 26.67-68; Mrk 14.65)
63Jisu nyahrütinü abi müthsamünyücho ko abi chah xüpcho. 64Arühnü anah rümjüpü abi te tsingdhingcho, “Nü chah shingba tsü sünang ihrü te young!” 65Ko arühnü abi nyüpmüseh yu adrong chocho.
Jisu Ashimükhong Bete
(Mat 26.59-66; Mrk 14.55-64; Jhn 18.19-24)
66Tsingsede, azibarüti, bebü ayingti ko yuzeng dorüti müjang shibülungcho ko Jisu ashimükhong bete norocho. 67Arühnü yocho, “Nüh Mesia tsü mah-o?”
Abinü lalingcho, “Ihnü nührü te yonye, nührünü müyudsinung; 68ko Ihnü nührü te tsingdhingnye, nührünü mülengchonung. 69Ta ade tinü Nyitsarü Tsurü tsü Akohba Tsingrangba tsalangthring pümnung.”
70Arüh atümungnü yocho, “Akhang, nüh Tsingrangba Tsurü tsü do?”
Abinü arüh te lalingcho, “Nührünü Ih-e pü yore.”
71Ko arühnü yocho, “Ihsanü yuzi alaa tu müdhsütah! Apu be lanü chocho Ihsanü yuchiko!”
S'ha seleccionat:
LUK 22: SANGBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.