LUK 24
24
Kangchehli Rocho
(Mat 28.1-10; Mrk 16.1-8; Jhn 20.1-10)
1Mübünyü nyangnyü nyajang khingkurüti tsünü rungnümcho axümlichi tsü bipü konglang wücho. 2Arühnü kong trahtri la lung tsü dhipehpü ngucho, 3achotsü arühnü züducho; ta Abüdongba Jisu me tsü müngucho. 4Arüh hütsüla lümkücha yade, dhrongyengnü nyüh anyüh shü ariri müpipü arüh müshüm yacho. 5Adrüchonü khingkurüti tsü alih la hümkeh lide, riwürü tsünü arüh te yocho, “Tuepü nührünü asürü yola akang lirü yangchiro? 6Abi hila mühle; abi kangli roko. Abi Galil la lide abinü nührü te tu yocho hütsü lümchehng:#Mat 16.21; 17.22-23; 20.18-19; Mrk 8.31; 9.31; 10.33-34; Luk 9.22; 18.31-33 7‘Nyitsarü Tsurü tsü münyirü kheh la khakhuchüjünung, ko hamkehsohnung, ko nyümong asang lipü kangli ronung.’ ”
8Hütsüde khingkurüti tsünü abi yu lümchehcho, 9ko kong lanü thali wü hiri apüm tsü dhürekheh ko aparü atümung te yocho. 10Khingkurüti tsü Mary Magdalin, Joana, Jakob atpa Mary; arüh ko arüh te liba aparü khingkurütinü riwürüti te hiri nengdang yocho. 11Ta riwürüti tsünü khingkurütinü yoba tsü arahkheh-epü lüm arüh chah yumüdsicho. 12Ta Peter-nü tsohmüsu kong yang shangcho; ko abinü mükhurang dhingcho ta me müshücho shünana chah khu apa tusü müngucho. Achotsü abinü atikehcho nengdang nyemüyang kulang thalicho.
Emaus Lang
(Mrk 16.12-13)
13Hütsü nyümong tsü Jisu yola mono nyüh anyüh, Jerusalem lanü lutri dhürekheh-o wüpü liba yang khüdu Emaus lang, 14atikehcho apüm nengdang chotanü wüchi yacho. 15Arüh chota wüyade, Jisu ro arüh yola tsehcho; 16arühnü abi ngucho, ta abi müdhingchehcho. 17Jisu-nü arüh te yocho, “Nühjü langtseh chah tu nengdang chotaro?”
Anyünü romih mükhümpü tohli yacho. 18Anyüh yola khüdu anengnü Kleopas-nü abi te tsingdhingcho, “Jerusalem la mungpü hütsüla atüzitü kahla tu tikehcho nüh dunü mümüdhere ang?”
19Abinü tsingdhingcho, “Tu tikehcho?”
Anyünü lalingcho, “Nazaret-rü Jisu chah tikehbasü ha, nyitsarü hi azikehrü khüdu thsacho tunüo abi chocho nguchicho lüpchola tase zeh khüduepü Tsingrangba ko nyitsarü atümungnü khichicho. 20Ihsa bebü ayingti ko yangthsarütinü abi süsohnung khakhuchüjücho, ko abi khala chah hamkehcho. 21Israel khümchonung tsü abi thsanungepü ihrü alongdi thsacho. Hiri apüm tikehpü chünyenü nyümong asangu rore. 22Ko ihrü mülung la khingkurü khürünü ihrü nyemüyangsohcho; arühnü konglang tsü nyajang wüdhingcho, 23ta arühnü me tsü müngucho. Arühnü ninglang riwürü mii nguko ko arühnü arüh te abi akang lilepü yochoepü ro yocho. 24Ihrü yola khürünü konglang tsü wüdhingko ko khingkurütinü yocho roh-i ngucho, ta arühnü apu müngu.”
25Hütsüde Jisu-nü arüh te yocho, “Nührü dohrale, azikehrünü yocho atümung yudsinung khairale! 26Mesia tsü hiri achongcha ngupü du ahechi la züdunung müdhsütahcho mah-o?” 27Ko Jisu-nü arüh te amüsa yula abi nengdang Mosa vakha chahnü dikehpü azikehrünü thrahcho apüm la tu yo liro changnah yocho.
28Arüh wüba yang tsü chinyü rode, Jisu-nü abilü khü wünung roh-i ngusohcho; 29ta arühnü abi nüli yocho, “Ihrü yola müdong; nyümong ashengu tsiko ko adelü male.” Achotsü abinü arüh te müdongnung züducho. 30Khode abinü arüh yola yangtsunung pümcho, abinü hümdhse khyonü müwajücho, hütsüpü chenah arüh khyang jücho. 31Hütsüde arüh nah khangthrucho ko arühnü abi dhingchehcho, ta abi arüh tenü mülipehcho. 32Anyübünyünü chotacho, “Abinü Ihjü te langla chotade ko amüsa yu changnah yodesü Ihsa lasih mütahcho ang?”
33Hütsüde tsünü arühnü shemüsu Jerusalem lang thalicho, ko mono dhürekheh tsü müjang aparü yola shibülung ngu 34yocho, “Yuje Abüdongba kangliko! Abinü Simon te chüro nguko.”
35Hütsüpü anyünü langla tu tikehcho ko abinü hümdhse chenahde anyünü khüta abi dhingchehcho hütsü arüh te changnah yocho.
Jisu-nü Amonoti te Ngusohcho
(Mat 28.16-20; Mrk 16.14-18; Jhn 20.19-23; R. Ngu 1.6-8)
36Anyünü arüh te yu hi yochi yade, dhrongyengnü Abüdongba arüh longla yacho ko arüh te yocho, “nührü te atbachi lieng.”
37Anbü khüdu ngurepü lüm arüh nehcho. 38Ta abinü arüh te yocho, “Tuepü nehro? Tuepü tütohnyünyeh lümro? 39I kheh ko I jing dhing, ko hi Ipue ko müdheing. I chah thahpüng ko dhing, tunüo nührünü I chah ngucho roh-i anbü khüdu chah shutsa ko arüh zeh müngunung.”
40Abinü hütsü yopü akheh ko ajing arüh te ngusohcho. 41Arühnü hütsüpü mii müyudsicho, arüh akünyangnü jeng nyemüyang lide, abinü arüh te yocho, “Nührü hila lango atsunung mülio?” 42Arühnü abi khyang ngu achongcho azikyah khüdu jücho, 43ko hütsü khyo arüh betenü tsucho.
44Hütsüpü abinü arüh te yocho, “Mosa vakhala, azikehrütinü thrahchola ko Nengsekhi la I nengdang thrahcho lüpcho tikehnungepü Ih nührü te lide yobasü hiri nengdange.”
45Hütsüpü abinü amüsa yu nyichehnung arüh lasih kangthrujücho, 46ko arüh te yocho, “Hita thrah lile: Mesia tsü chongchabae ko asücho lanü asang nyümong kangchehli ronung, 47ko Jerusalem lanü dikehpü yucho atümung te lasih thsamüla ko münyi mülang pehba yusi nengdang abi nengla thsingyubae. 48Hiri nengdang nührü yuzi lile. 49Ko I U-nü nyengchochoba, Ihnü nührü michah Anbü Amüsa müthehnung. Ta nührü michah amilangnü zii tsü mürode, yangdila du lieng.”#R. Ngu 1.4
Jisu Ninglang Nükeh Tsicho
(Mrk 16.19-20; R. Ngu 1.9-11)
50Hütsüpü abinü arüh Bethany chii nowücho, hütsüla abinü akheh dhimüsu arüh müwajücho.#R. Ngu 1.9-11 51Abinü arüh müwajüyade, abi arüh tenü zacho ko ninglang nükeh tsicho. 52Arühnü abi mübücho ko akünyangnü jeng Jerusalem lang thalicho, 53ko amübükuh la arühnü mütozah Tsingrangba nengse licho.
S'ha seleccionat:
LUK 24: SANGBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.