LUK 8
8
Jisu Iiwüba Khingkurüti
1Azachah lipü yangditi ko yangdongti bongnü Tsingrangba Yanglih Yuse Atsa thsingyu wücho. Mono dhüreanyüh tsü abi yola wücho, 2#Mat 27.55-56; Mrk 15.40-41; Luk 23.49hütsü roh-i khingkurü khürü amünyi nbü ko dhsara lanü kyangjücho: Mary (süte Magdalin pü dsicho) sü chahnü amünyi nbü dhünyeh iipehjücho; 3Joana, Chuza nitpü, sü Herod kuh la khehthsithsarü licho; ko Susana ko aparü khingkurü adrong sürünü arüh kuthsi Jisu ko amonoti nengdang jücho arühsü abi yola wücho.
Mashurünü Yukitacho
(Mat 13.1-9; Mrk 4.1-9)
4Jisu yanglang nyitsarü yangdi khüdu khanglang khüdu lanü mütozah rocho; ko khode sühdi amülah shibülungcho, abinü yukitaba hi yocho:
5“Mashurü khüdu mashunung wücho. Abinü mashude, khürü langthsilang longcho, ko ajingnü dhrümnahcho, ko uzatinü hütsü tsupehcho. 6Khürü lungsüh la longcho, ko khode fürü tsü surocho, alih kungrachonü mükupehcho. 7Majüh khürü zengtrung la longcho, ko hütsü zide khüpsehcho. 8Ko majüh khürü alih asu la longcho; ko anu tsü chinü thsihpinü asih sihcho.”
Ko Jisu-nü yocho, “Hütsüeko nührü nangku kehkhang nyieng!”
Yukitaba Alümcho
(Mat 13.10-17; Mrk 4.10-12)
9Abi monotinü Jisu te hiba yukitaba adüzü tuopü tsingdhingcho, 10#Isa 6.9-10ko abinü lalingcho, “Nührü khyanglü rang liba Ninglang yanglih lümlong müdhenung jüko, ta aparü nengdanglü yukitaba khu dunü hütsü rore, hütsünü arühnü ngunung ta müdhingchehnung, ko yuchinung, ta mühnyichehnung.
Yukitaba Changnah Yocho
(Mat 13.18-23; Mrk 4.13-20)
11“Yukitaba adüzü tsü hi: Majüh tsü Tsingrangba yu. 12Langthsilang longba majüh adüzü tsü sürünü yuchirü; ta arüh müyudsisohnung ko mükhümchosohnung motsingnü ro arüh lasih lanü yusi tsü hitsire. 13Lungsüh yola longba majüh adüzü tsü sürünü yusi tsü yuchiro ko hütsü künyangseh khyüchore. Ta hütsü arüh chah soh mürare; arühnü azachah du yudsire ta khode athsadsü ronang, arüh shohjore. 14Zengtrung yola longba majüh adüzü tsü sürünü yuchiro; ta hiba akang nengdang lümtpanah, kuthsi ko künyangküshi lümlong tsü zürorü ko arüh khüpsehre, ko arüh asih khodesü müzire. 15Alih asu la longba majüh adüzü tsü sürünü yusi tsü yuchiro ko lasih la yochonyi atsanü yohpüro ko asih müsih tashi arühnü rangchore.
Loh Pohki Dsi Khüdu
(Mrk 4.21-25)
16 #
Mat 5.15; Luk 11.33 “Sünüsü dsi tahkehpü lohnü mühaptipüre mahkhang chongnong pohki müyohpüre. Ta kuh la zürorünü atsingse tsü ngunungthsa abinü hütsü avihpüsing chah vipüre.
17 #
Mat 10.26; Luk 12.2 “Tuturü rang liro hütsü mishanung ko tuturü hapti liro hütsü ngunung ko müdhenung.”
18 #
Mat 25.29; Luk 19.26 “Hütsüeko, nührünü khüta yuchiro müzahng; tunüo sü lango liro, abi khyang alaa jükehnung, ta sü müliro abi chahnü azikyah licho tsü mii hitsinung.”
Jisu Atpa ko Anirüti
(Mat 12.46-50; Mrk 3.31-35)
19Jisu atpa ko anirüti abi yang rocho, ta sühdirachonü abi müshirüchehcho. 20Khürünü Jisu te yocho, “Nü tpa e nü nirüti nüh shirünyü kuh bete yale.”
21Jisu-nü arüh atümung te yocho, “Sürünü Tsingrangba yu yuchiro ko bichiro arüh Itpa ko Inirütie.”
Jisu-nü Tsingxinyübong Zahsohcho
(Mat 8.23-27; Mrk 4.35-41)
22Nyümong khüdu Jisu-nü amonoti yola kihtang khüdula züducho ko arüh te yocho, “Ihsanü kihdi khüulang tsü wünung.” Hütsüpü arühnü shemüsucho. 23Arüh wüyade, Jisu yüpsehpecho. Dhrongyengnü tsingxinyübong ro kihtang chah nyümkehcho, ko kihtang tsü kihnü jeng kangchonü arüh atümung dhsürü la licho. 24Monotinü wünü Jisu khamüsu yocho, “Athsingyurü, Athsingyurü! Ihsa achangrüdue!”
Jisu-nü shemüsu nyübong ko kiloh khyang yuzengjücho; ko arühnü zahpehcho, ko longlüm kangcho. 25Hütsüpü abinü monoti te yocho, “Nührü yudsi khüde liro?”
Ta arüh nyemüyang drücho, ko khüdunü khüdu te yocho, “Nyitsarü hi süo? Abinü nyübong ko kiloh khyangsü yuzeng jüre ko arühnü ayu nyire!”
Amünyi Nbünü Rangcho Nyüh Khüdu Kyangjücho
(Mat 8.28-34; Mrk 5.1-20)
26Jisu ko amonoti Galil kihdi khüulang Gerasa lih tsü chihcho. 27Jisu kihdi lanü chüroyeng, amünyi nbünü rangcho nyüh khüdu yangdi langnü ro abi mütohcho. Bekhyah asheng hiba nyitsarü hi kuh la mülipü, tbhüdeng kongyo la du li rachicho. 28Khode abinü Jisu ngucho, abinü tasenü khong ajingte thsürang züdecho, “Amichahba Tsingrangba Tsurü Jisu! Nüh Ite tu nguchinyüro? Ihnü nüte kihchire, Ih tükhingchi!” 29Abinü hi yoba hi, Jisu-nü amünyi nbü te tsü nyitsarüba chah tsünü tsieng pü yuzengjücho khunü licho. Adrongpi hütsünü abi rangcho, ko ixilihnü ajing akheh rahpü akhangti la yohpünye abinü hütsü tohnahrü ko amünyi tsünü abi rangmülang tsisohcho.
30Jisu-nü abi te tsingdhingcho, “Nü neng süo?”
Abinü lalingcho, “I neng khütango” tunüo abi chah amünyi nbü khütango züdu licho. 31Amünyi tsünü Jisu te arüh jongnah müliba shukuh la tüyohjüpü kihchicho.
32Hütsü amünyeh shüka tii arangcheh khüdu, akhanglangthring thütsuthüyong rachicho. Achotsü amünyi tsünü Jisu te arüh shüka tii yola tsü züdusohng pü kihchicho, ko abinü arüh khyang mülajücho. 33Arühnü nyitsarüba chah tsünü chüro shüka tii la tsü züducho. Atii shünü lungdhonglang tsohnah jowü kihdi la tsü dhsangsehcho.
34Khode shüka nyahrütinü hütsü ngucho, arühnü shang wünü yusi tsü yangdi ko yangdongti la sobhocho. 35Nyitsarütinü atikehcho tsü dhingnung wücho, ko khode arüh Jisu yanglang rocho, nyitsarü sü chahnü amünyi nbüti tsicho abi tsü atsatsa kangpü shü müpipü Jisu jingte püm ngucho, ko arüh atümungnü drücho. 36Angurü tsünü nyitsarüba tsü khüta kyangcho hütsü nengdang aparü te yocho. 37Hütsüpü, hütsü lih la lirü atümungnü Jisu te tsipehnung kihchicho, tunüo arüh dee drücho. Achotsü Jisu kihtang la züdu pümpü tsicho. 38Nyitsarü sü chahnü amünyi tsicho abinü Jisu te kihchicho, “Ih nü yola ronung.”
Ta Jisu-nü abi te hiroh-i yo tsisohcho, 39“Kulang thali wüng ko Tsingrangba-nü nü nengdang tu nguchicho hütsü young.”
Nyitsarüba tsünü yangdi bongnü abi nengdang Jisu-nü tu nguchicho hütsü yo wücho.
Jairas Tsulatpü ko Jisu Fükhüm chah Thahpüba Khingkurü
(Mat 9.18-26; Mrk 5.21-43)
40Khode Jisu Galil khüulang thali rocho, nyitsarütinü abi khyüchocho, tunüo arüh atümung abi yingyacho. 41Hütsüde nyüh khüdu anengnü Jairus rocho; abi Sinagog la aying thsarü khüdu licho. Abinü ajangjang Jisu jingte mükhukeh abi te arüh kulang ronung kihchicho, 42tunüo atsulatpü khüdu du, sü kang dhüreanyüh azirü licho, hütsü asürü du licho.
Jisu wüchi yade, nyitsarüti atümunglangnü ro abi mükangticho. 43Arüh yola khingkurü khüdu kang dhüreanyüh ashüh shonü dhsa licho khüdu zehcho; abükyü licho kuthsi apüm müzang akyangba yangchinye sünüsü abükyü mükyangjüchehcho. 44Abükyünü amülungla Jisu khanglang ronü abi fükhüm bemi chah thahpücho; ko hütsüde tsünü ashüh shozahpehcho. 45Jisu-nü tsingdhingcho, “Sünü I chah thahpücho?”
Atümungnü richo, ko Peter-nü yocho, “Athsingyurü, nyitsarü sühdinü nüh tsütire.”
46Ta Jisu-nü yocho, “Khürünü I chah thahpüko, tunüo I chahnü zii tside Ihnü müdhecho.” 47Khingkutpü tsünü abükyü rangchehko pü müdhe dhridhri ro Jisu jingte mükhukehcho. Abükyünü atümung linü tuepü abükyünü thahpücho ko khüta hütsüde tsünü kyangpehcho hütsü yocho. 48Jisu-nü abükyü te yocho, “Alechü, nü yudsinü nüh kyangjüko. Mülümxüpü tsieng.” 49Jisu-nü hi yoyade, yusi hirü khüdu ayingthsaba kuh lanü ro yocho, “Nü tsulatpü süko,” “Athsingyuba tsü tülongmüzi.”
50Ta Jisu-nü hütsü yuchi Jairus te yocho, “Tüdrü; ta yudsing, ko abükyü kyangnung.”
51Khode abinü kuh chihcho, Peter, Johan ko Jakob ko azatpü atpa au chah khu süsü müzürosohcho. 52Hütsüla lirü atümung azatpü nengdang metra pümcho. Jisu-nü yocho, “Tütra; azatpü tsü sücho mah ta yüpjorü due!”
53Arüh atümungnü abi münyodhingcho, tunüo abükyü tsü sükopü arühnü müdhecho. 54Ta Jisu-nü abükyü kheh la ramehpü dsinü yocho, “Surung, asi la!” 55Hütsüde abükyü akang kangli shemüsucho, ko Jisu-nü abükyü khyang lango atsunung jüng pü yocho. 56Abükyü tpurüti nyemüyangcho, ta Jisu-nü arüh te atikehcho nengdang tsü sütesü müyonung yuzengjücho.
S'ha seleccionat:
LUK 8: SANGBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.