Jon 12
12
Maria Ga Gos Luxangkedek At Ne Iesu Ro Beteni
(Mt 26:6-13; Mk 14:3-9)
1At lavanna aleng avot ti leluxa at Lovovolo Pe, Iesu gat pas uto Beteni, mo lemenemen ne Lasaro gak lox e; ni laradi ne Iesu ga lox arooro amlong i basinge lanmet. 2Limixin at ne Lasaro diga lox agagas li leveluxa rin go, la ne Mata ga raba luxa di, la ne Lasaro la leventaba luvuttadi bok diga anan eburu mi ne Iesu. 3La ne Maria ga lok ka lubuxom#12:3 Na lubuxom tuntu diga lox i mi luat bunbun. ga umsu mi laxadan mavak, laasen teren naat. Mo laxadan somavak luunun teren ga silok aleng. La neni ga soli i ro at luxangkedek at ne Iesu, la ga ves amesemes i mi lavatkabinim at lavatlak teren. Losomavak at na laxadan ga umsu go xeneng ap mo loogu.
4La lara laradi loklok ka anasa at ne Iesu, ne Judas Iskariot, neni mo lara ga song araba ne Iesu ri limixin kapmek, ga lok keretna, 5“Kereva, ixo epovo dina sesep mi na laxadan mavak la naba epovo at lavantun sangaun kobot (300) denarias kusu dina raba limixin banbalo min?” 6Ni ga tong i na, mila neni laradi xipkip pilo la kopmen do ni ga doxoma limixin banbalo, ketla neni ga vara i do neni ba xip pilo xaka i. Neni gak lok tatao lempilas atdi la amisik ni gam nem teren.
7Ketla ne Iesu ga lok, “Keke mulus na latkin. Na ladan neni gam tebeng i xusu rik mir ia. 8Limixin banbalo dibat pot pasa amisik nimi xusu mibak lok tooro di, ketla nenia noxo nemen eburu amisik minimi.”
Lavamaasa Diga Puse Ngas Ti Sev Amet Ne Lasaro
9Buaang limixin me Judaia diga ronga i do ne Iesu gak lok to Beteni, kuren la digat pas ugo; digat pas mila diga vara i do dina ven ne Iesu mi ne Lasaro, mo ne Iesu ga lox arooro amlong i basinge lanmet. 10Kuren la lavamaasa silok diga tong li levelinga do diba sev amet bok ne Lasaro, 11mila buaang nedi limixin me Judaia diga sok tixirixes lavamaasa la diga nuunu nga at ne Iesu.
Iesu Ga Beles To Jerusalem
(Mt 21:1-11; Mk 11:1-11; Lu 19:28-40)
12Ap mo laaleng petpes buaang nedi limixin mo diga vot ti leluxa at Lovovolo Pe la diga ronga i do ne Iesu mo gat pas uto Jerusalem. 13Kuren la diga ra ka laxangkakan bisi la diga vas su xusu ri ekip tangarang min. La diga lok,
“Ata emi asu mi ne Moroa. Luvukat ti mo laradi it pas mi laasen at Leeme Silok. Luvukat ti Loorong Silok boro Israel.” Sam 118:25-26
14Iesu ga lok ka lodongki maxat la ga xis teren, kerekngan Lovoang Kaala ga tong i xeretna,
15“Limixin me Saion. Nemen mita marat. Loorong Silok atnimi nom it pas saparap nimi, it kis at lodongki maxat.” Sak 9:9
16Ap mo laaleng na lavanga ga ravasu, luvuttadi loklok ka anasa di goxo xasep at lavasuun ap mo levelinga; ketla se at laaleng ne Iesu ga rooro xat amlong digaklen ba i do Lovoang Kaala ga tong asu na lavanga, la mo limixin diga lox i na ri ne Iesu.
17La mo limixin diga nemen eburu mi ne Iesu ap mo laaleng neni ga roo asu ka ne Lasaro boro at lamaaut, la ga lox aroo amlong i basinge lanmet. Diga tong asu na lavanga ro Jerusalem. 18La buaang nedi limixin digat pas kusu ri ekip tangarang min, mila diga ronga i do neni ga lox aroo amlong ne Lasaro. 19Kuren la lubung Parisi diga lok tinedi getgesara, “Mina ven ba i. Ata noxo lox asoxos toxot at levendoxoma atdik. Limixin axap mo dia mumu asu nga ne Iesu.”
Limixin Petpes Diga Lok Do Dina Epaase Eburu Mi Ne Iesu
20Ap mo laaleng at leluxa, leventaba limixin me Grik diga nemen kantubu ap mo limixin mo digat pas uto Jerusalem kusu ri lotu. 21Diga vosiga ne Pilip, neni boro Betsaida at lenep Galili la diga lok tin, “Leeme Silok. Ma vara i do mana vot pasa ne Iesu.” 22Pilip gat pas la ga tong i ri ne Endru, la nedu buru dugat pas la duga tong i ri ne Iesu.
23La ne Iesu ga lok tidu xeretna, “Loxonaleng mo ia epovo vam kusu ne Moroa na lox asilox ia, Laradi Mevana. 24A tong tuturun i rinumu. Luxuvenit piao, do limixin di noxotlo i, noxo visik. Do i mang la ditlo li i at laxangka, melemu ba visik buaang levempeven piao. 25Do tara i balamu aleng lorooro ren, neni naba sang apkav i. La do tara ixo balamu aleng lorooro ren at na lavatbung menemen kopok, neni nabam tebeng amisix i ri lorooro avolo. 26Do tara i vara i do na lok lugugu rak, neni na lok kaka be loklok tarak, kusu neni ba lok ngan lasaxaruki rak la ba nemen ap mo lenep nenia anak lox e. Ne Tamak naba lox asilox i do neni na lok lugugu rak.”
Iesu Ga Paase Mumu Lanmet Teren
27La ne Iesu ga lok bok tidi, “Mo nga labalak ixo xis saga la aba tong ka lavanga salai? Agut aba lok do, ‘Tamak, i epovo do una lok kepe na lumumuat basinge ia?’ Kopmen. Nia aga si ude xusu ri beles at na loxonaleng at losongsongot.” 28La ne Iesu ga sing ne Temen keretna, “Tamak. Una lox asuusu i nom lisisixam taram ti limixin kusu diba ven kibis i do nenu ne Moroa u silok aleng.”
Melemu laxaka at lara ga si boro vana at laxalibet, ga lok, “Ara lox ase vam di mi lisisixam tarak la aba lox amu box i.” 29La limixin diga tu go diga ronga na levelinga la diga lok, “I mumuat ngan leretepaavat.” La leventaba diga lok, “Laangelo i paase rin.”
30La ne Iesu ga lok tidi, “Na levelinga mi ronga vam i, kopmen ti lok tooro ia, ketla ti lok tooro nimi. 31Mo nga loxonaleng kusu ne Moroa na ila mumu loklok at limixin at lavatbung menemen; la ne Moroa naba lox axap lololos at ne Satan, neni lamgomgo at na lavatbung menemen. 32Do dina vaxarem ia uto vana at laxaba la nia ana urut upana basinge na lavatbung menemen, nenia aba sat tomtom ka limixin axap saparav ia.” 33Ni ga vaase i na mumu lanmet neni naba ekip tangarang min.
34La limixin diga lok, “Lenavolo atnama i tong i do Lanarong na rooro amisik. Kereva u tong i do Laradi Mevana diba vaxarem i upana? La nege mo Laradi Mevana?”
35Iesu ga vorang i ridi xeretna, “Laxasep at ne Moroa noxo nemen abao eburu minimi. At lavatpas atnimi at na lavatbung menemen, mina nemen at laxasep mila laxasep move i nemen eburu minimi, kusu laxakapmek noxo los kis pavaa nimi ngan lamain; mila lara do it pas at lamain ixokleklen i do neni it pas ua. 36Laxasep at ne Moroa move i nemen eburu minimi; kuren la mina nuunu ren, kusu nemi miba nemen ngan limixin at laxasep.” Melemu at na levelinga ne Iesu ga tong i, neni ga vas kaxat la ga lox alipe i basinge di.
Buaang Atdi Limixin Me Judaia Di Goxo Nuunu At Ne Iesu
37Iesu ga lok buaang levempanga sangsangu ro melamgo at leme Judaia, ketla move di goxo nuunu ren. 38La kerepmo diga lox aruturun levelinga at leeme vapaase alii ne Aisaia, ni ga lok,
“Leeme Silok, nege ga nuunu at levelinga maga tong i? Kopmen tara. Leeme Silok ga lox asuusu lololos teren ti nege? La kopmen tara goxo ven kibis i.” Ais 53:1
39Na mun i lavasuun teren la di goxo epovo do dina nuunu. Ne Moroa ga paase alii at lungusno ne Aisaia, neni ga lok,
40“Moroa ira lox amain pam lengkatli atdi, la ira vipe vam levendoxoma atdi xusu lengkatli atdi noxo reven la levendoxoma atdi noxokleklen. La di noxo vosiga ia xusu nenia aba lox arooro di.” Ais 6:10
41Aisaia ga tong i na mila neni ga ven lisisixam silok at ne Iesu la ni ga paase alii min.
42La buaang luvuttadi amgomgo bok diga nuunu at ne Iesu, ketla diga e amarat at lubung Parisi. Kuren la di goxo paase asu lunuunu atdi ri tentaba vetpes, mila lavanga lubung Parisi dina sep pepe di xusu di noxo pubeles bok ba at loogu singising. 43Diga vavara aleng i xusu limixin dina emi asu midi; la di goxo doma solo mumu leemi asu boro at ne Moroa.
Levelinga At Ne Iesu Naba Vaxaru Limixin At Lavapaase
44Iesu ga vaase silok ti limixin keretna, “Do tara na nuunu rak, i nuunu bok ap mo lara ga riki ia ude. 45Do neni i ven ia, i ngan do i ven mo lara ga riki ia ude. 46Nia aga rupot ti na lavatbung menemen ngan laxasep kusu tara na nuunu rak, neni noxo nemen at lamain.
47Do tara na ronga levelinga rak la kopmen na ronga res teren, nenia noxo lok li i at lavapaase, mila aga vot ti lox arooro limixin, la kopmen do ti lok li di at lavapaase. 48La do tara i raba aralu ia la kopmen na sisiam ka levelinga rak, neni ira sok ka vam lenep tin, mila levelinga mun tarak naba lok li mo lara at lavapaase at laaleng ete. 49Anai i ruturun aleng, mila kopmen nenia xusuk mo a paase mi lololos axa rak, ketla ne Tamak neni ga riki ia, ni ga tong lolos mo levelinga ria do nia aba tong i, la langas salai nia aba mu i ri vaase axasev i. 50La aklen i do levelinga lolos teren naba lok li limixin at lorooro avolo. Levelinga axap tarak, ni levelinga ne Tamak ga tong i ria xusu ana paase i asu.”
S'ha seleccionat:
Jon 12: mmx
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.