URA TIN AYRA 1
1
GIJAŊŊA
Lona li tlena halaŋ u suu warna lay
1Lona gijaŋŋa ay jewni li huulona, li ndaŋgara. 2Ndaŋgara ay ka liiɗi, va ay ka kaɗɗi lay. Lina ay kuluɓi, ndufunda kay mbo ŋgolna, Musuk Lonara mbusuk kolo kay mbona.
3Lona di ana, «Ko kiɗikka liya!» ndaɗ li gaw.#2 Kor. 4.6 4Lona wi ana kiɗikka jiviya ni, nam ɓorow duk kiɗikka ki u ndufunda. 5Lona yi kiɗikka ana faalira, nam yi ndufunda ana njeŋgera. Njeŋgera liya, maɗiira fo may, ni buu dew.
6Lona di ana, «Ko va ma ŋgol li a ɓorow duk hoŋ mbona ki mba'!»#2 Piy. 3.5 7Lona hin li va namma ɓorow duk ɦoŋ mbo ma kaŋgana ki u ma kolona. Nam hin li na gaw may. 8Lona yi va namma ana huulona. Njeŋgera liya, maɗiira fo may, ni buu ma mbana.
9Lona di olo ana, «Mbo ma kaŋgana tok ki hu lina dew, kay yam ndaŋgara tak ki kiɗiki!» ndaɗ hin li na gaw may. 10Lona yi li ki sooyna ana ndaŋgara, li ma mbona huna nam yam ana lum ŋgolna. Lona wi ana dla ndaɗta ni jiviya.
11Lona hin di ɗaŋŋi ana, «Tlena day kay ndaŋgara, tlesuu dayna zul njafasi ha ki kay ndaŋgara, guguni suu tira vuɗ njafasi hu zeɗ zeɗ may!» Asi hin li na may. 12Ni kay ndaɗta tlena zul kay ndaŋgara, tlena day ki u njafasi zeɗ zeɗ, guguni suu vuɗusi tina day u ii njafasi hu zeɗ zeɗ may. Lona wi ana dla ndaɗta ni jiviya. 13Njeŋgera liya, maɗiira fo may, ni buu ma hindina.
14Lona di ana, «Ko tlesuu ɓo lina li kolo huulona, kay a ɓorow duk njeŋgera ki u faalira, kay a tak ki kay luuna u buuna u basara, 15a asi ay kolo huulona li kiɗikka kay ndaŋgara!» Asi hin li na may. 16Lona li tlesuu ŋgolo suu li kiɗikka mba', ta ŋgolla li a mul kiɗikka faalira, ma goona li a mul kiɗikka njeŋgera may. Nam li ki ciciwra may. 17Lona njarasi ay kolo a li kiɗikka kay ndaŋgara. 18Kay a ti mulla kay faalira u njeŋgera, kay a ɓorow ii kiɗikka ki u ndufunda. Lona wi ana dla ndaɗta ni jiviya. 19Njeŋgera liya, maɗiira fo may, ni buu ma fiɗina.
20Lona di ana, «Ko tlesuu iirina li duk mbona na ŋgamat ŋgamat, layagina pii kolo kay ndaŋgara huulona may!» 21Lona li vabak ma duk mbona u tlesuu iirina lus duk mbona ŋgamat ŋgamat, njafasi zeɗ zeɗ, nam li layagi suu piira u njafasi zeɗ zeɗ may. Lona wi ana dla ndaɗta ni jiviya. 22Lona paɗ vunum kasiya, ɦasi saɓakŋa ana asi vuɗa, zul duk mbona, oy lumma ŋgolna ki lay, layagina zul kay ndaŋgara na may. 23Njeŋgera liya, maɗiira fo may, ni buu ma vadlna.
24Lona di ana, «Ko ndaŋgara zul tlesuu iirina u njafasi zeɗ zeɗ, tlesuu tuɗ u sesina, tlesuu ɦaram kaŋgana, u mburi suu bagina lay!» Asi hin li na may. 25Lona li mburi suu kay ndaŋgarana u njafasi zeɗ zeɗ, u tlesuu ɦaram kaŋgana, u njafasi zeɗ zeɗ u tlesuu tuɗ u sesina u njafasi zeɗ zeɗ may. Lona wi ana tle asina irim jiviya.
26Lona di olo ana, «Laygi sana tli tam ko aygi na. Kay nam a ti mulla kay kulufna duk lum ŋgolna, kay layagi suu pii kolona, kay tlesuu tuɗ u sesina halaŋ, u ndaŋgara lay, kay tlesuu ɦaram kaŋga kay ndaŋgara na halaŋ!»#1 Kor. 11.7
27Lona li sana ko tamba na.
Nam lammi tli tam u Lona.
Nam li sa njufna may li cara may.#Mat. 19.4; Mark 10.6#Ura 5.1-2
28Lona paɗ vunum ki kasi dasi ana, «Vuɗugiya, zulugiya, oyogi yam ndaŋgara. Tagi mulla kaɗu, tagi mulla kay kulufna duk lum ŋgolna may, kay layagi suu pii kolona may, kay tlesuu ɦaram kay ndaŋgara halaŋ.»
29Lona di ana, «Gola an ɦagi tlesuu ŋgolom suu kay ndaŋgara u irisi hu halaŋ, u guguni suu tira u vuɗusi halaŋ lay, asi hinni a tiigina. 30Ni kay ndaɗta an ɦal usu ma ŋgolomma maŋ mburina kay ndaŋgara u layagina suu kolo huulona, u tlesuu iiri suu ɦaram kay ndaŋgara halaŋ a tiisina, ni maŋ tlesuu iirina halaŋ.» Dla ndaɗta hin li na gaw may. 31Lona wi ana tlesuu nam lasina halaŋ jivi cocoo. Njeŋgera liya, maɗiira fo may, ni buu ma karkiyana.
S'ha seleccionat:
URA TIN AYRA 1: BMS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Moussey © Bible Society of Chad, 2002.