JAŊ 3
3
Yesu u Nikodem
1San dew duk suu Farisenna, nammi mul ma vi suu Juifna, sem ana Nikodem. 2Nam mbay eg Yesu njeŋge, dam ana, «Mala Haɗta, ami wi ana Lona sunuŋ ay a haɗami ni namu, sa Lona ka u nambina ka ndak a li dlara mbuɗta ko aŋ laɗta naɗi.» 3Yesu dam ana, «An daŋ ha ni gasira, sana vuɗ ka vuɗta wiliraɗi ni, nam ndak a kal hu Mul Lonaraɗi.» 4Nikodem dam ana, «Sana mbuɗ ki ŋgolla wa ni, nam hin vuɗ yam mba' ni nanage? Nam hoŋ hu sum yam mba' su, sum ndak a vuɗum yam mba' su?» 5Yesu dam ana, «An daŋŋi gasira, sana vuɗ ka u yonaɗi may ka u Musuk Lonaraɗi may ni, nam ndak kal hu Mul Lonaraɗi. 6Va vuɗ ay u minda vi sanara ni sana may, va vuɗ ay hu Musuk Lonara ni Musukka may. 7An dagi ana, lini nanagelay agi hin vuɗ wiliya, aŋ kak jim kay boy nammaɗi. 8Semeɗna sii ni, aŋ huma, hu li ma nam col ay siira huna aŋ ka wiɗi lay. Sa ma vuɗ ay hu Musuk Lonara ni na may.» 9Nikodem dam ana, «Dla ndaɗta hin li ni ana mege?» 10Yesu hoŋom dira ana, «Aŋŋi sa ŋgolna vi suu Israelna may ni ka wi boy nammaɗi su? 11An daŋ ni gasira, ami ɓakŋi dla tlege suu ami wasina, ami di ni dlara ami waɗta. Agi ka min vi dlara ami dagi kaɗtaɗi. 12Agi ka tin hurugi kay tlesuu an dagisina kay ndaŋgaraɗi may ni, an li dagi tlesuu mbay kolo huulona ni, agi hin humusi su? 13Sa tuɗ ay kolo huulona dew kaɗi, Goŋ Sanna ay kolo huulona mbay kaŋga ni nam dew.
14«Ko Moiz gaɓ guy ŋgamina ki kolo hu fulla, suuna hin gaɓ Goŋ Sanna ki kolo ni na may. 15Gegelay ma tin hurum kamma fi iirira ka daɓ kiɗira. 16Lona min suuna cocoo, nam ɦasi Gorom ma dewna, a gegelay ma tin hurum kamma ba kiɗi, fi iirira bay daɓa. 17Lon sun goromma ay hu duliyara ka a ba suuna kiɗi. Nam sunum ay ni a suuna fi suɗta u namu.
18«Sa ma tin hurum kay Goona ka ba kiɗi. Sa ma tin hurum ka kambi na, ki ni baaya kay nam tin hurum ka kay Goŋ Lona ma dewnaɗira. 19Agi gola, kaɓakŋa col ay ni ana, kiɗikka mbay hu duliyara, suuna min ndufunda su kiɗikka, kaymege, dlaasira ki coo. 20Suu li dla cora ka min a mbay ki hu kiɗikkaɗi. Asi li ndaana ana suuna hin wasi dlaasira cora. 21Sa li dlara gasira mbay ki hu kiɗikka a suuna wi dlara nam laɗta ana nammi sa hum vun Lonna.»
Yesu u Jaŋ
22Ŋgoo dagan dla ndaɗta, Yesu u suu haɗi mamsina tuɗ hu mbassa Yudera. Asi li buu ay u asi ca ni, mbus batemma maŋ suuna may. 23Jaŋ mbus batemma hu Enon eg zi Salima tok, kayme yona ka hu ŋgolo. Suuna mbay egemi, nam mbususi batemma may. 24(Ni asi bay vi Jaŋ daŋgayna tuwa.)
25Suu haɗi suu vi Jaŋŋa wayra col duk tasi u sa Juifna kay dla gaɗ masira mbussa. 26Asi tuɗ eg Jaŋ dam ana, «Aŋ gol sa ma li ay egeŋ ŋgoo lumma Yurdanna, ma aŋ ɓakami kamma, nam ka mbus suuna batemma. Suuna halaŋ tok ha ki egemu.» 27Jaŋ hoŋ dira ana, «Va Lona ɦam kaɗina, sa ndak ka a fam kay tambi. 28Agi ndak a diki kan ana an di ana, Anni ka Sa Lona Fuurummaɗi. Anni sa Lona sunun ay ki fokom jewna. 29Sa ɗum carana, nammi malaɗna. Na may ni, banaŋ njuf carana coli egem a humba, hum del njuf cara na ni, li furira ana, furi ndaɗta ni manda. Dla ndaɗta cecemi li wa ɗaŋ. 30Nam hin mbuɗ ma ŋgolna an hin varak a ma goona.»
Sa col ay huulona
31Sa col ay kolona ni kay tlegena halaŋ. Sa ma kay ndaŋgarana ni maŋ ndaŋgara, ɓakŋi tlesuu kay ndaŋgarana may. Sa ma col ay huulona ni kay tlegena halaŋ. 32Nam ɓakŋi dla tlege suu nam wasina may, humusina may. Sa ma vam boy mamma kaɗi. 33Sa ma vam boy mammana wi ana Lona di ni gasira. 34Sa Lona sunum ay na di ni boy ma vi Lonna, kayme Lona ɦam Musuk mamba cocoo. 35Buna min Goona, ɦam tlena halaŋ komu. 36Sa tin hurum kay Goonana, fi iirira ka daɓ kiɗira. Sa ka tin hurum kay Goonaɗina, ka fi iiri ndaɗtaɗi. Yara vi Lonara hin tok kamu.
S'ha seleccionat:
JAŊ 3: BMS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Moussey © Bible Society of Chad, 2002.