JAŊ 9
9
Yesu mal ii sa ma vuɗ ay dugina kiyo
1Yesu a jak tuɗta na ni, wi sa ma vuɗ ay dugina. 2Suu haɗi mamsina joɓom ana, «Mala Haɗta, sa namma vuɗ ay dugira na ni kay mege? Nam vuɗ na ni ko coomba ɗowba vi somoyomba su?» 3Yesu hoŋosi dira ana, «Ka kay coombaɗi lay, vi somoyombaɗi lay. Lona lam dla ndaɗta egemmi a tak ki ni saɓak mamma. 4Hu li ma faɗta kolo tu ni, an li sunda vi sa ma sunun ayna, njeŋge ni sa ndak ka a li sun oloɗi. 5An duk suuna tu wanni, an ni kiɗikka irisira.» 6Yesu di boy namma na ni, tofoɗ yoyona, yeres ndaŋgara u namu, hoo ndaŋga ndaɗta ii sa ma dugina dam ana, 7«Tuɗ mbus iriŋ ay ki hu goloŋ ma yam ana Silowena,» (sem namma ni ana sun aya). Sa dugina tuɗ mbus irim mbusni, hoŋ ay na ni mbuɗ wi gaw.
8Suu vok zina u namma wam kaa day cen jewna di ana, «Ni ka sa ay wam kaa day nam cenaɗi su?» 9Suu ɦiw di ana, «Ni namu.» Suu hiŋŋa ana, «Ka nambi, tli tasi ni tliya.» Nam di ana, «Ni an daŋ may.» 10Asi hin joɓom ana, «Iriŋ hin mal ki ni nanage?» 11Nam dasi ana, «Sa yam ana Yesuna yeres ndaŋgara ew ni, hooronda irinu, dan ana an tuɗ mbus irin ay ki hu goloŋ ma yam ana Silowena. An mbus irin ay ki mbusni, mbuɗ wi ni na gaw.» 12Asi joɓom ana, «Sa namma ka ni arage?» Nam di ana, «An wiɗi.»
Suu Farisenna joɓ sa ma irim mal kina
13Sa ma irim li dugi namma, asi tuɗum ha maŋ suu Farisenna, 14kay Yesu yeres ndaŋgara mal ii sa ma dugi namma ki ni hu buu ma vi Lonna. 15Suu Farisenna joɓ sana ana nam dasi u dlara li ay ndaɗta, kay irim mal kira. Nam dasi ana, «Nam yeres ndaŋgara ew, tininda irinu, an mbus irin kiyo, cecem wanda an mbuɗ wiya.» 16Suu Farisenna suu ɦiw di ana, «Sa namma col ay ka vi Lonaɗi kay nam ka hum u gaɗta kay buu ma vi Lonnaɗi.» Suu ɦiw di ana, «Sa cona ndak a li dlara mbuɗta na su?» Vunusi ɓorow zeɗ zeɗ.
17Suu Farisenna joɓ sa irim li dugina ana, «Aŋ hin di kay sa malaŋ iriŋ kina ni ana mege?» Nam hoŋosi dira ana, «Ni sa jok vun Lona.» 18Suu Juifna vi ka ana sana wanni ay jew dugiya, cecemmi nam mbuɗ wiya bay yam somoyom ay a joɓosi baɗi. 19A joɓosira wanni asi dasi ana, «Gasi ni gorogi su? Nam vuɗ ay dugi gasi su? Va ma li a nam mbuɗ wi cecemma ni mege?» 20Somoyom hoŋ dira ana, «Ami wi ana ni goromina, nam vuɗ ay ni dugiya. 21Ami wi dla mayra li ana nam mbuɗ wi cecem wanda kaɗi. Ami wi sa malam irim ki wanna kaɗi lay. Joɓogina nam mbuɗ ki sa warna a dagi u tamba.» 22Somoyom ɓak na ni kay asi li ndaana ko suu Juifna, kay suu Juifna vi vun tasi ki ana sa ma di ana Yesu ni Sa Lona Fuurumma na, asi dikim ki hu Zira Tokka. 23Ni kay ndaɗta somoyom di ana, «Joɓogina nam mbuɗ ki sa warna a dagi u tamba.»
24Sa ma irim li ay dugina, suu Farisenna yam a mbara olo dam ana, «Ŋga Lona ami wi ana sa namma ni sa cona.» 25Nam hoŋ dira ana, «Lini nam sa cona an wiɗi, va ma an wam dewna ni an ay jew dugiya, cecemmi an mbuɗ wiya.» 26Asi joɓom ana, «Nam laŋŋi ana me a malaŋ iriŋ kira ge?» 27Nam hoŋosi dira ana, «An dagi ki fok jewe, agi hum kaɗi, agi min a an hoŋogi dira olo ni kay mege? Agi min a mbuɗ ki suu haɗi mamsina may su?» 28Asi ŋgulumu, dam ana, «Aŋŋi sa haɗina vi sa namma, ami ni suu haɗina vi Moiz. 29Ami wi ana Lona ɓak maŋ Moiz, namu ami ka wi li ma nam col ay hunaɗi.» 30Sana hoŋosi dira ana, «Ni dla mayra su ki kanda ɗaŋ. Nam malan irin kiyo, agi ka wi li ma nam col ay hunaɗi. 31Aygi wi ana Lona ka hum vun suu conaɗi. Nam hummi vun sa humum vunum li u min mambana. 32Sa hum ka jew dew ana sa mal ii sa ma vuɗ ay dugi kiyo kaɗi. 33Lini sa namma col ay ka vi Lonaɗi ni, nam ndak ka a li vaɗi.» 34Asi hoŋom dira ana, «Aŋ sa vuɗ ay u cora egeŋŋa paŋa, hin haɗami ni aŋŋa ɗow su?» Asi dikim ay ki hu Zira Tokka.
Dugga gasira ni taarage?
35Yesu hum ana asi dikim ay ki wa ni, nam ŋgaf u nam dam ana, «Aŋ tin huruŋ kay Goŋ Sanna su?» 36Nam hoŋ dira ana, «Dan aya, Mala Haɗta, Goŋ Sanna ni ge an a tin hurun kamba ge?» 37Yesu dam ana, «Aŋ wamu, ni sa ɓakaŋ cecem wanna.» 38Sana hoŋ dira ana, «Bu Suuna an tin hurunu.» Nam goɓ kaŋga fokomu.
39Yesu hin di ana, «An mba ni kay a ɓorow ii suuna kiyo, kay a suu dugina mbuɗ wiya, suu wina mbuɗ dugi may.» 40Suu Farisenna suu egem ɦiw hum boy namma na ni, joɓom ana, «Ami ni suu dugina lay su?» 41Yesu hoŋosi dira ana, «Agi lini suu dugina ni coogira kaɗi, cecemmi agi di ana agi ni suu wira ni, coogira ka gak gak.»
S'ha seleccionat:
JAŊ 9: BMS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Moussey © Bible Society of Chad, 2002.