Mwanzo 12
12
Mola amwamuru Buraimu alawe inti yake
1Basi, Mola kamwámbira Buraimu (Iburahima noyo): “Lawa inti yako, wase rikolo rako pamoja na wawazo, uke inti yanisaka kukolotera. 2Nukutenda kuwa taifa ulu, núkujanliya, níkurisa zina rako, na wanu wengine tena wájanliiwa julu yako. 3Níwajanliya wenye kukulebelela meema, na níwalani wenye kukulani. Kwa sababu yako wájanliiwa wanu piya duniya nzima!”
4Basi Buraimu akitwala njira kamba Mola wetu vyaâmwamurire, akilawa pamoja na Loti akuka naye. Buraimu paalawire Harani ari na humuri wa myaka sabini na mitanu. 5Kânsukula nkawake Sarai pamoja na Loti, mwana wa nduye, pamoja na mali zawo na watumisi wake waákiwa nawo Harani kure, wakukirira njira ya Kanaa. Pawafikire inti ya Kanaa, 6Buraimu akipita kati-kati ya inti ire akuka Sekemu, mpaka mahala patakatifu penye muti nkulu wa More. Kwa wakati-wo, noyo inti-yo wákikalanga waKanaa. 7Noparepare Mola wetu kanlawírira Buraimu kamwámbira: “Eyi inti-yi níwapa ujukulu wako.” Basi Buraimu nopare mahala panlawirire Mola pare, akinjengera uralu wa kocera nyama za kafara. 8Akipunda pare, akuka mpaka kumyango upande wa malawira-juwa wa Beteli, akijenga ema yake akikala kati. Beteli upande wa maswera-juwa na Ai upande wa malawira-juwa. Nopare akinjengera Mola uralu wa kafara mwengine, na akintukuza kwa zina rake. 9Ikisa akilawa tena akukirira Negebu upande wa suheli.
Buraimu inti ya Miswiri
10Kwa wakati noure, nkaya mure íkilawirira njala ulu futi. Kwa javyo Buraimu ikinlazimu kuka Miswiri kwikala noko muda wa suku aba javi. 11Ari karibu kufika Miswiri, Buraimu akimwambira nkawake Sarai javi: “Ona nkawangu! Nukwijiwa kamba uwe úwoniwa kuwa mwema. 12WaMiswiri pawasaka kukuwona wakwamba, ‘Eyu ndi nkawake’ basi wánulaya, fala uwe wákwasa hai. 13Tafadali, uwe wambire kuwa ‘eyu nyenye’, ipate wanihínshimu kwa kwajibiwa nawe na kwa sababu yako nipate kunusurika.”
14Basi Buraimu wakati wafikire Miswiri, WaMiswiri ware kweli-kwelini nkawake ire wammona kuwa mwema pakulu sana. 15Mafalume wa Firyauna pawamónire Sarai, woka wansifu mbere yake mwanyewe. Kwa javyo, Sarai akiperekiwa kunyumba ulu ya Firyauna. 16Kweli-kwelini kwa sababu ya nkawake ire, Buraimu katafitiwa vyema sana, mpaka akifikirira kupata makondoo, ng'ombe, maburu waka na walume, ngamiya, pamoja na watwana waka na walume.
17Fala Mola wetu akimukumu Firyauna kwa kumperekera makutuba na pakaya pake piya, kwa sababu ya Sarai, muka wa Buraimu. 18Sambi Firyauna akitumiza kumwita Buraimu akindairi: “Ona vyaunitendire-vi! Pá! Mbana aunijiwise kuwa Sarai nkawako? 19Mbana kwamba eyu nlumbwangu? Ntamana omi ninlomba! Basi epa nkawako ndiyu! Ntware muke vyenu!” 20Noparepare Firyauna akiwatuma wanu wake wakinsafiriza Buraimu na nkawake pamoja na vinu vyawere nawo piya.
S'ha seleccionat:
Mwanzo 12: wmwBI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.