Luk 18
18
Sana ghwaɗaka mnda tsa guma
1Ka mnə *Yesu ta mahdihdi ŋa taŋ, ŋa gɗavata taŋ nda maga duʼa, yaha malandugwa taŋ da rwaku, da zlanatá həŋ. 2Kaʼa mantsa: « Mamu sana mnda tsa guma ma sana luwa kul zləŋa Lazglafta, haɗ ghuya ni nda mnda səla wa. 3Mamu sana markwa wadgu ma va tsa luwa ya guli, ta va gɗata ta lagha da mnay ŋa ni kazlay: Dgaŋna guma mataba ŋni nda ghuma ɗa, kaʼa tazlay. 4Nda kɗa fitika kwalaghuta ni ta tsanatá tsa guma ni ya. Tahula tsa, kaʼa ma ghəŋa ni mantsa: “Dər ma zləŋa a yu ta Lazglafta wu, haɗ ghuya ɗa nda mnda səla guli wu, 5tsaw wana na wadgu na ta ghuya iʼi, dər tsanata ɗa ta na guma ni na, yaha da gɗata ta sagha da ghuya ghəŋa ɗa,” » kaʼa. 6« Fawa sləməŋ ka sna kuni ta skwi mnə tsa ghwaɗaka mnda tsa guma ya ɓa! 7Lazglafta yeya dzaʼa kwal kul maganatá zɗaku ta mnduha ni ta wahu da tsi gifitik nda rviɗik tani ŋa gərɗa həŋ rki na? 8Ka iʼi ta mnaghunata, dzaʼa gi magana maga ta zɗaku ta həŋ gi hada hada. Nziya nza tsi, baɗu vragata dzaʼa vragata *Zwaŋa mndu ní, dzaʼa slanagha sla ta gwal ta zlghafta nda ŋuɗuf rki na? »
Mnda la Farisa nda sana mnda tska dzumna
9Ka mnə *Yesu ta sana mahdihdi guli kabga sanlaha ta ngha ghəŋa taŋ ka gwal tɗukwa ta kəma Lazglafta ka ghuɓasa sanlaha. 10Kaʼa mantsa: « Mamu sana mnduha his ta ŋladafta da həga Lazglafta da maga duʼa. La *Farisa sani, mnda tska dzumna sani. 11Ka sladatá tsa la Farisa ya ka maga duʼa ma ghəŋa ni. Kaʼa mantsa: “Ari Lazglafta, ta rfay yu ta kagha, kabga nza a iʼi manda sanlaha ma mnduha, gwal ghali, ka ghwaɗak mnduha, nda gwal hliri wa. Nza a yu manda ya mnda tska dzumna ya wa. 12Fitik his ta fata yu ka suma ma luma, ta vlay yu ta skwi turtuk ŋa gha ma skwiha ɗa ghwaŋ kəʼa.” 13Na tsa mnda tska dzumna ya kay ka nzagaghata kətsaʼu, walaŋ a ta kapaŋtá ghəŋ nda ta luwa wa. Mbaɗa kəʼa ka wuslikay dzvu, ka dza ghuva. Kaʼa mantsa: “Ari Lazglafta, tawa ta hiɗahiɗa ta iʼi ta nzakway ka mnda dmaku na,” kaʼa. 14Ka iʼi ta mnaghunata, ta lagha tsa mndu ya dzagha ni, nda dzra ŋa ni nda Lazglafta. Mantsa a nzakwa ŋa tsa la Farisa ya wa. Nzakwa ni ná, dər wa ta kapanaftá ghəŋa ni, dzaʼa gwitsaganagwitsa lu. Ka hanana hana mndu ta ghəŋa ni, dzaʼa kapanaf kapa lu, » kaʼa.
Ŋa gwal ta gara vgha nda zwani, ga mghama Lazglafta
Mat 19:13-15, Mak 10:13-15
15Mbaɗa mnduha ka va hlaktá zwani kwitikw kwitikw da *Yesu ŋa tfanaghata ni ta wi ta həŋ guli, Na nghaŋta duhwalha ni ta tsa hladaghatá zwani ya, ka ghəzlə həŋ ta həŋ. 16Ka hgaŋtá Yesu ta həŋ, kaʼa mantsa: « Zlaŋwa zla ta zwani ka sagha həŋ da iʼi! Ma piy kuni ta həŋ. Nda nza ga mghama Lazglafta ka ŋa gwal ta gara vgha nda həŋ. 17Kahwathwata ka yu ta mnaghunata, dər wa ta kwal kul tsuʼaftá ga mghama Lazglafta manda zwaŋ kwitikw ná, haɗ dzaʼa walaŋta lami dida ɗekɗek wu, » kaʼa.
Sana mnda gadghəl
Mat 19:16-30, Mak 10:17-31
18Ka ɗawaŋtá sana mghama la *Yahuda da *Yesu kaʼa mantsa: « Ŋərma mgham, nu da a yu magay ka da mutsafta yu ta hafu ŋa kɗekedzeŋ na? » kaʼa.
19Ka Yesu nda tsi mantsa: « Kabgawu ta kəl ka hga iʼi ka ŋərma na? Lazglafta turtukwa ni ŋərma. 20Nda sna ka, ka zlahu ta mnay: “Ma hlu ka ta iri, ma dza ka ta mndu, ma ghali ka ta ghali, ma tsanava ka ta gwaɗa ta mndu, vlatá glaku ŋa i da gha nda ma gha#18:20 Ngha ta Sabi 20:12-16, Vrafta ta Zlahu 5:16-20., kəʼa,” » ka Yesu nda tsi. 21« Aʼ! Sna a iʼi ta tsaha ya daga ma ga zwaŋa ɗa ra, » kaʼa. 22Na snaŋta Yesu ta tsaya, kaʼa mantsa: « Turtuk skwi ta pɗəgədaghawta. La dzawiŋtá skwiha gha, ka daganafta ka ta tseda ni ta la ka pɗu, dzaʼa mutsay ka ta gadghəl ta luwa, ka vrakta ka, ka dzaʼa ka mista ɗa, » kaʼa. 23Na snaŋta ni ta tsa gwaɗa ya, suʼanak kuma ni kabga gadghəl ya katakata.
24Nghanata Yesu ta tsa suʼanaka ta ŋuɗufa ni ya, kaʼa mantsa: « Eʼ! Nda bla ka lama gadghəl da ga mghama Lazglafta. 25Ta draŋ lama ŋalibwa nda ta ghuruma lipir, ka lama gadghəl da ga mghama Lazglafta, » kaʼa. 26« Ka si mantsa tsi, wa ya dzaʼa mbafta ɓa? » ka tsa gwal ta sna skwi ta mnə tsi ya. 27« Tsa skwi nda bla nzakwa ni da mnda səla ya ná, bla a da Lazglafta wu, » ka Yesu zlghanaftá wa taŋ. 28Ka *Piyer mantsa: « Aʼa! Wana aŋni ta zlaŋtá inda skwa ŋni, ka dzaʼa mista gha, » kaʼa. 29Ka Yesu nda həŋ mantsa: « Kahwathwata ka yu ta mnaghunata, ka zlaŋ zla mndu kabga ga mghama Lazglafta, ta hga ni, ka markwa taŋ a tsi, ka zwana ma ni a tsi, ka i da ni nda ma ni a tsi, ka zwana ni a tsi, 30dzaʼa kwal kul mutsaftá skwi dagala ma na zamana na, ŋa mutsafta ni ta hafu ŋa kɗekedzeŋ dazlay wu, » kaʼa.
Mnəgəlta Yesu ta dzaʼa ni mtaku nda sliʼagaptani
Mat 20:17-19, Mak 10:32-34
31Ka hgadaghatá *Yesu ta duhwalha ni ghwaŋpəɗ his da tsi, kaʼa nda həŋ mantsa: « Wana mu ta dzaʼa da Ursalima hada dzaʼa kɗafta skwi vindaf la anabi ta ghəŋa *Zwaŋa mndu. 32Dzaʼa vlaŋ vla lu ta gwal kul nzakway ka la *Yahuda, ŋa gagay taŋ, ŋa rarazay taŋ, ŋa tafay taŋ ta sərɗək tida. 33Tahula sləvapta taŋ nda krupi, ŋa dzata. Ta mahkəna fitik, ŋa sliʼagaptani. » 34Sna a duhwalha ni ta tsa skwi ta mnə tsi ya wa. Gwaɗa nda ɗifa ya ta snə hahəŋ, sna a həŋ ta klatá ghəŋa ni wa.
Mbanafta Yesu ta sana mndu nda ghulpa
Mat 20:29-34, Mak 10:46-52
35Ndusadaghata *Yesu ta vata luwa Yeriku, mamu sana ghulpa ta mndu ta nzaku ta wa tvi ta gatá skwi. 36Snaŋta ni ta dəmga ta sliʼadaghatá, ka ɗawaŋtá tsi ta skwi ta magaku. 37Ka mnanatá lu kazlay, Yesu mnda la Nazaret ya ta lab kəʼa. 38Kaʼa mantsa: « Yesu zwaŋa Dawuda, tawatá hiɗahiɗa ta iʼi, » kaʼa dzatá lawlaw. 39Lagha tsa gwal ta kəma ya ka davay, ka mbəl ŋa hanaftá wi. « Zwaŋa Dawuda, tawatá hiɗahiɗa ta iʼi! » kaʼa sganaghatá lwi dagala dagala. 40Ka sladavatá Yesu. « Klakwa kla, » kaʼa mnanatá mnduha. Manda gavadanaghata, 41« nu ta kum ka ta magaghata ɗa na? » ka Yesu ɗawaŋta da tsi. « Maləma ɗa, ka nghəglaŋta yu ta vli, » kaʼa nda tsi. 42Ka Yesu nda tsi mantsa: « Nghəglaŋ ngha gha, zlghay nda ŋuɗufa gha ta mbaghafta, » ka Yesu nda tsi. 43Gi hada hada, nzuwiɗiɗ ira ni, ka sliʼaftá tsi ka dzaʼa mista Yesu nda zləzlva Lazglafta. Inda mndu ta nghaŋta ka zləzlvu tsi ta Lazglafta.
S'ha seleccionat:
Luk 18: xed
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.