Ñwaè' Luêk 18
18
1E m mà' ŋgàa nè wowèe à ryɛ'ni wowèe enɛ wowèe a ba ce loo à nfè' wɛɛwɛ, kè' ce koosi bsɛ̀ à nfè' mò' ka'. 2E m mà' ŋgàa anà enɛ̂, “Ŋwɛ̀ nsa' mnsa' mò' à m ba à rla' mo' a ce wɛp Nyʉ̀ ka', a ker ce lòr bèe à yuu ka'. 3Ŋgwaŋkʉŋwɛ̀ mò' à m ba à rla' anà foŋ. E m ku ce vʉ̀ ce bu' mbo nè ye, ce làa enɛ̂, ‘Jà' mɛ̀ sa' mnsa' ce wèr yà ŋwɛ̀ bbàa tʉr na, teni mi yɛɛnì.’ 4Ŋwɛ̀ nsa' mnsa' ca à ku ce kani. A ka' lò a laa nè yì nyor enɛ̂, ‘Ka' m ce wɛp Nyʉ̀ ka', a ce lòr bèe à yuu ka' wa'a, 5àmbò njeŋwɛ̀ ca à fa mɛ̀ ŋgɛ' gòr na, m be sa' mi mnsa', teni mi yɛɛnì, buwa'làr e ku ce vʉ̀, tɛ m misi sɛ̀.’ ” 6Tata à laa enɛ̂, “Yu' yuu ce ŋwɛ̀ nsa' mnsa' ce e m ba ŋwɛ̀ mnàŋ na à m làa. 7Mbò Nyʉ̀ be sa' mnsa' tɛ vi ba yɛɛnì à mbèp yì bèe ce a ce war nè ye nèmootì ba nètʉ' foŋ a? Wà' àde' e caasì nfè' efa rteni wap mnsa' a? 8M ce suŋ wèe mɛnɛ, e be sa' wap mnsa' tɛ vi ba yɛɛnì à mbèp yàp, sa' vi cɛrcɛr sê. Ka' yi yu wa'a, wà' Muu Ŋwɛ̀ be kè vʉ̀, tɛ e yɛ bèe enjep ŋgòŋ ce a byemi, àmbò a tɛɛ tatap a?”
9Jisòs à m ker ma' ŋgàa nè bèe mo' ce a m rìŋ yap enɛ wowèe a yu běe byɛɛnì, a ce fyɛ' bèe mo' à yuu ka' enɛ̂, 10“bèe a mmbaa a m dù mbe Ndàp Nyʉ̀ à rgèe rloo, mò' à ba ŋwɛ̀ Farìsî, mò' à ba ŋwɛ̀ ŋkùu mbǎa bàrà'. 11Ŋwɛ̀ Farìsi à tɛɛ, a loo nè yì nyor, a laa enɛ̂, ‘Nyʉ̀, m ce yòŋshi wɛ̀ njobè' m yu àmbò bèe mo' ka'. M yu ŋwer ka', a ba ŋwɛ̀ nfìp ka', a ce koo bbyèŋge bèe ka'. M ce yòŋshi wɛ̀ enɛ m yu àmbò ŋwɛ̀ ŋkùu mbǎa bàrà' ca ka'. 12Mɛ̌ ke jì mdip nfè' baa njep ŋgàa, ce gèe rloo, ce fa ŋgʉ̀' mò'sir efa rʉʉ efa yà buu wɛɛwɛ.’ 13Ŋwɛ̀ ŋkùu mbǎa bàrà' à tɛɛ yi yu encàŋ, a naa yi yu mi mmir a ke' mbe bùu ka'. E m la' mi mbo mbe yě ntee a laa enɛ̂, ‘Nyʉ̀, koosimnse nè mɛ̀ ce m yu ŋwɛ̀ ŋgèe buu bbebep.’ 14M ce suŋ wèe enɛ ŋwɛ̀ ce e m dù mbe yě ndàp a ba yɛɛnì à bsii Nyʉ̀ à m ba ŋwɛ̀ ŋkùu mbǎa bàrà', à ke' ba ŋwɛ̀ Farìsi ka'. Ŋwɛ̀ ce e ka' naa yì nyor mbekì banɛ a be sùusi ye njep nshè. Ŋwɛ̀ ce e ka' suusi yì nyor njep nshè banɛ a be nàa ye mbekì.”
15Bèe a m vʉ̀ nè bghàrbèe foŋ enɛ Jisòs joo wowèe, ghoni wowèe. Ŋgǎa yɛ'ni yì buu a ka' yɛ wa'a, a lapni bèe anà. 16Jisòs à kɛ' wowèe a laa enɛ̂, “Mà'shi nè tɛ boo ca a vʉ yɛ mɛ̀. Wèe fa jepsi wowèe ka' njobè' kʉʉ Nyʉ̀ yi yu ba nè bèe ce a yu àmbò boo ca. 17M ce suŋ wèe nè mini-ŋwɛ̀ enɛ ŋwɛ̀ ce e ka' tɛ koo kʉʉ Nyʉ̀ àmbò muu ŋkɛ' ka' banɛ àde' ŋgàŋ niŋ mbe dǐ' kʉʉ Nyʉ̀ anà ka'.”
18Ŋwɛ̀ rsa' mò' à m bipshi nè ye enɛ̂, “Ŋwɛ̀ ryɛ'nì ce mbòŋmboŋ, yuu ce àde' m gee ka' koni ryòŋ ce nfesè yu kɛ?” 19Jisòs à laa nè ye enɛ̂, “Ǎ too mɛ̀ enɛ ŋwɛ̌ mbòŋmboŋ njokɛ? Ŋwɛ̀ mò' yu ŋwɛ̌ mbòŋmboŋ ka', ŋwɛ̌ mbòŋmboŋ ku ba Nyʉ̀ cà'cà'. 20To à ku riŋ mncir wɛɛwɛ. Fa koo ŋgwa ŋwɛ̀ kɛ̀ nòŋ wèe nduu ŋwɛ̀ ka', fa yʉ ŋwɛ̀ ka', fa yɛ̀ɛ ka', fa tɛɛ njìnsa' mnàŋ ka', yu'ni nè yò ma ba yò tâ.” 21E laa nè Jisòs enɛ̂, “Mɛ̀ lɛ̀ mncir ca wɛɛwɛ kɛ' à nfè' ce mɛ̀ m ba muu ŋkɛ'.” 22Jisòs à ka' yu' wa'a, a laa nè ye enɛ̂, “Yuu yi bɛti yi mo'sir ce wɛ̀ ba gèe. Fyèni buu wɛɛwɛ ce a tʉr, lor mbàa efa gho, gapshi nè ŋgǎa fùp, tɛ à bo tʉr bkù' mbe bùu. Wɛ̌ gèe wa' wɛɛ, vʉ fa mɛ̌ mbùu.” 23E ka' yu' wa'a, nyor à bep ye sê, njobè' e m tʉr ku' buu sê. 24Jisòs à ka' yɛ wa'a, a laa enɛ̂, “Yi yu tatap sê, nè ŋgǎa mbàa à rniŋ mbe dǐ' kʉʉ Nyʉ̀. 25Yi yu àtɛ̀r nè kàmɛl à rtose nje rlir nsàrà' nè ŋwɛ̀ mbàa à rniŋ mbe dǐ' kʉʉ Nyʉ̀.” 26Bèe ce a m yu' yuu ce e m làa na, a bipshì enɛ̂, “Banɛ ŋwɛ̀ ce àde' e luŋ yu ba nda?” 27Jisòs à beesì enɛ̂, “Yuu ce yi yu btatap se nè ŋwɛ̀, yi yu àtɛ̀r nè Nyʉ̀.”
28Pità à laa nè ye enɛ̂, “Yɛ̂, wèr à mà'shi yèr buu wɛɛwɛ a vʉ fa wɛ̌ mbùu.” 29E laa nè wowèe enɛ̂, “M ce suŋ wèe nè mini-ŋwɛ̀ enɛ ŋwɛ̀ ce e ka' ma'shi li rla' kɛ̀ ŋgwa yì ɛ̀, kɛ̀ bfʉr vi ɛ̀, kɛ̀ yì ma ba yì ta ɛ̀, kɛ̀ boo vi ɛ̀, njobè' kʉʉ Nyʉ̀, 30banɛ ŋgàŋ be koni ku' buu se à nfè' e sè'ni na, kèr koni ryòŋ ce nfesè à nfè' ce e bii ka' vʉ̀.”
31E lòr bèe ce ncòp-baa-à-rrʉ̀ʉ, a lɛ'si nyor a wowèe, a laa nè wowèe enɛ̂, “Yɛ̂, sèe ce dù à rla' Jɛ̀rusalɛ̀m tɛ buu wɛɛwɛ ce ŋgǎa ncep ntuu Nyʉ̀ a m saŋ àmbò Muu Ŋwɛ̀ nà, vi bo ghɛɛte njo. 32A be fa ye mbe mmbo bèe enje jɛɛ. Wowèe a be jàasi ye, cɛp ye, ce ye nè mce. 33A be lìp ye nè byɛɛnsò, yʉ ye, mnòŋ vi ba btaar tɛ e fʉʉ efa rkwe.” 34Ŋgǎa yɛ'ni yì buu a m rìŋ yuu mo' efa buu ce e m làa anà ka'. A m sʉ̀ti mbùu efa yuu ce e m làa anà ese wowèe, wowèe a ke' riŋ yuu ce e m ce làa anà ka'.
35Jisòs à m lò a ce dù, a ka' bà' àtʉtʉ rla' Jɛ̀rikù, nfèp mò' a cu àwǎa nduunjì a ce loo buu. 36E ka' yu' àmbò kʉr bèe a ce càa, e bipshì enɛ yu ba kɛ lɛ? 37A suŋ ye enɛ̂, “Jisòs ce à rla' Nasarɛ̀t ce càa.” 38E waa, a laa enɛ̂, “Jisòs, Muu Dɛvìd, koosimnse nè mɛ̀.” 39Bèe ce a m ba yap entombì nà, a lapnì ye a laa enɛ e cu nyaŋ. E ker misi yi yu a waa gòr a laa enɛ̂, “Muu Dɛvìd, koosimnse nè mɛ̀.” 40Jisòs à tɛɛ, a laa enɛ a vʉ nè ŋwɛ̀ anà fa nè ye. E ka' vʉ̀ bà' àtʉtʉ, e bipshì nè ye enɛ̂, 41“Wɛ̀ ce kòŋ enɛ m gee mɛkɛ nè wɛ̀?” E beesì enɛ̂, “Tatâ, m ce kòŋ mɛnɛ à gee tɛ m ker yɛ buu.” 42Jisòs à laa nè ye enɛ̂, “Yɛ buu, lo rbyemì li gèe wɛ̀, wɛ̀ ke'sè.” 43E ku kɛ' a ce yɛ buu, a nati a du a yě mbùu, a ce yòŋshi Nyʉ̀. Bèe wɛɛwɛ a ka' yɛ, a yoŋshi Nyʉ̀ foŋ.
S'ha seleccionat:
Ñwaè' Luêk 18: LNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Limbum New Testament © Bible Society of Cameroon, 2003.