Ñwaè' Luêk 21
21
1Jisòs à naa mmir a yɛ àmbò ŋgǎa mbàa a ce fa rfa njep ŋkùp rfa embe Ndàp Nyʉ̀. 2E m yɛ ŋgwaŋkʉŋwɛ̀ mò' ce e m ba ŋwɛ̀ fùp àmbò e fa mbàa baa njep ŋkùp anà. 3E m làa enɛ̂, “M ce suŋ wèe nè mini-ŋwɛ̀ enɛ ŋgwaŋkʉŋwɛ̀ ce e yu ŋwɛ̀ fùp na, à fa a caa bèe wɛɛwɛ. 4Bèe ca wɛɛwɛ a gàpni buu mò' efa ku' yàp buu ce a tʉr, a fa rfa àgho, ŋgwaŋkʉŋwɛ̀ ca ce e tʉr yuu ka' à lor mʉ yuu wɛɛwɛ ce e tʉr, à ba yì ce yi ba jà' ye, a fa.”
5Bèe mo' a m ce suŋ buu àmbò Ndap Nyʉ̀, a ce làa enɛ a bà'ri ndap anà nè blǔr bbòŋboŋ, buu ce bèe a m fa nè Nyʉ̀ a susi ndap anà àgho vi boŋ foŋ sê. Jisòs à laa enɛ̂, 6“Buu wɛɛwɛ ce wèe ce yɛ na, nfè' mò' be kè ba tɛ lùr mo' cu nje Ndap Nyʉ̀ ca ka'. A be kè kɛ̀ɛshi vi wɛɛwɛ.” 7Wowèe a bipshì nè ye enɛ̂, “Ŋwɛ̀ ryɛ'nì, buu ca vi be ba ba à se'kɛ? Yuu ce yi be dùŋshi enɛ nfè' ce buu ca be koni à ghɛɛ, be ba kɛ?” 8E laa nè wowèe enɛ̂, “Lòr nè nfè' fà dì' ŋwɛ̀ mò' bo' wèe ka', njobè' bèe magòr a be vʉ̀ a mɛ̌ rlii ce làa enɛ̂, ‘A mɛ̀ Krǎis anà,’ kèr làa foŋ enɛ̂, ‘Nfè' ce ghɛɛ.’ Wèe fa dù àmbùu wowèe ka'. 9Wèe à ka' ke yu' enɛ a ce mà' bìr, ker yu' àmbò ŋgǎa ŋgɛ' a ce kɛ̀' ŋgɛ', wèe fa wɛp ka'. Buu ca be kù ke kɛ' koni, vi koni wa'a, ke' ba enɛ nfè' ce ŋgòŋ yi be mì à ghɛɛ ka'.” 10E m ker laa nè wowèe enɛ̂, “To' yi be mà' bìr a to' mo', tɛ ŋkʉʉ mò' ma' bìr a mò'. 11Ŋgòŋ yi be cì'ti sê, tɛ njè koo, tɛ byaŋ vi gwe à ndù bèe à bdì' jɛɛ jɛ̀ɛ jɛɛ. Buu bwɛp, ker ba mncǒo btatap sê, vi be yɛɛti mbe bùu.
12“Tɛ buu ca ka' koni, a be koo wèe fa wèe ŋgɛ', dù nè wèe à mndap mloo, fa wèe à bshaŋ, dù nè wèe njeptii bkʉʉ ba bgovanò njo' mɛ̀. 13Ca yi be gèe tɛ wèe koni fɛŋ à rsuŋ wowèe buu kuu mɛ̀. 14Tɛ nfè' ka' ghɛɛ, wèe fa mà'shi tɛ mntee vi ce bu' wèe tɛ wèe ce kwà'shi enɛ wèe be dù làa wee kɛ lɛ ka', 15njobè' m be fa wèe blàa kù cùu, ba bfee à njɛ̀ɛ ce àde' mò' efa bèe ce a bàa wèe riŋ yuu ce e beesi ka'. 16Wêe bta ba wêe mmâ, ba bfʉr wee ba bèe ce wèe wowèe à ràte, ba bkar wee, a be fyèni wèe, tɛ a yʉshi bèe mo' efa wèe. 17Bèe wɛɛwɛ a be bàa wèe njo' mɛ̀. 18Geewa'a, mbʉ̀ nyʉ̀'tu embe tu mò' efa wèe be bʉ ka'. 19Wèe à ka' tɛɛ tatap banɛ wèe be so me myòŋ.
20“Wèe à ka' yɛ àmbò bsoogɛ̀ a sìr Jɛ̀rusalɛ̀m a fa mbetar, wèe riŋ weenɛ nfè' ce a be sà'si rla' anà ce ghɛɛ. 21Nfè' anà à ka' ghɛɛ banɛ bèe ce a yu à ŋgǒŋ Jùdiyà a caŋ duse à mtùu, tɛ bèe ce a yu à mʉ̀ la' a fʉʉ, tɛ bèe ce a yu à mŋkʉ̀ a ker kʉti à là' ka', 22njobè' nfè' ca be ba nfè' ce Nyʉ̀ be kʉsi mcucu' àtu buu bbebep ce bèe a m gèe, tɛ yuu ce a saŋ mbe Ŋwǎ' Nyʉ̀ yi bo ghɛɛte njo. 23Mlù mi be koo bbyèŋge ce a yu nè mmbʉ̀ ba bbyèŋge ce a ce nyoŋsi boo. Mlù mi be ba nè běe à ŋgòŋ ca, tɛ Nyʉ̀ bepsi ntee nè wowèe. 24A be yʉshi bèe mo' nè bkàafà', tɛ a koo bèe mo' à rkòŋ, dù àgho à bto' jɛɛ jɛ̀ɛ jɛɛ, tɛ bèe enje jɛɛ a nyɛŋshi Jɛ̀rusalɛ̀m nè mkùu caar tɛ yàp nfè' mi tɛ a ka' borni.
25“Mncòo vi be yɛɛti mbe rlir nyʉ̀, ba mbe ŋwɛɛ, ba mbe mkàŋsì, tɛ mlù mi ba njep ŋgòŋ na, tɛ bjep vi ba njo' rcòo ce rdip rgòr li be ce còo, kèr ce baŋti ce ko' mbekì ce gwè. 26Bèe a be kwe bwɛp, àmbò wowèe a be cu ce fyɛ' yuu ce yi be koni ŋgòŋ à nfè' anà, njobè' buu ŋger embe bùu na vi be cì'ti. 27Buu ca vi ce koni wa'a, tɛ a lo yɛ àmbò Muu Ŋwɛ̀ ce vʉ̀ mbe mʉ̀ mmbà' nè ŋger-ŋwɛ̀ ba nè fòo-ŋwɛ̀. 28Buu ca à ka' kɛ' ce koni, wèe tɛɛ mbekì, naa btu, njobè' nfè' ce Nyʉ̀ be tee wèe efa ŋgɛ' ce ghɛɛ.”
29E m mà' ŋgàa nè wowèe enɛ̂, “Fyɛ' nè ce fîk, ker ba bce wɛɛwɛ. 30Wěe ke yɛ à nfè' ce bce anà vi kɛ̀' a ce top, wèe ku riŋ weenɛ nfè' mbèŋ yu àtʉtʉ. 31Banɛ wèe à ka' ke yɛ àmbò buu ca vi ce koni, wèe riŋ weenɛ nfè' kʉʉ Nyʉ̀ à ghɛɛ. 32M ce suŋ wèe nè mini-ŋwɛ̀ enɛ ŋgʉ̀ bèe ca be kweŋger wɛɛ tɛ buu ca ka' koni ka'. 33Rbuu ba nshe a be kè mì, geewa'a, wa blàa vi be kè mì à nfè' mò' ka'. 34Lòr nè nfè', buwa'làr wèe lo fa nyor à buu bcicì, ba buu mno ba buu ce mlù mi ke koo bèe àgho njep ŋgòŋ na, tɛ nòŋ anà yi lo bʉ̀ʉ wèe bʉ̀ʉ àmbò taa yi bʉ̀ʉ nyàa wa'a. 35Nòŋ anà yi be kè ba nè bèe wɛɛwɛ enjep ŋgòŋ na. 36Ce ke'ni nè à nfè' wɛɛwɛ, ce loo enɛ Nyʉ̀ fa wèe ŋger, buu ca vi lò koni bo jòo wèe ka', tɛ wèe bo tɛɛ njeptii Muu Ŋwɛ̀.”
37Jisòs à m ce yɛ'ni mbe Ndàp Nyʉ̀ à mnòŋ wɛɛwɛ, e ba à mbùuŋkùr e du mbe rtùu Olèf cu mbo tʉ̀' raa. 38Tʉ̀' e raa, bèe wɛɛwɛ a du mbe Ndàp Nyʉ̀ à mʉ ŋgàptʉ' tɛ a bo yu' buu ce e ce yɛ'ni.
S'ha seleccionat:
Ñwaè' Luêk 21: LNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Limbum New Testament © Bible Society of Cameroon, 2003.