Luk 20
20
Ya꞉su e wi alano꞉ abe dimiya꞉le a꞉la꞉dabu kedo꞉
Madi 21.23-27, Mak 11.27-33
1Ho꞉len no amio꞉ Ya꞉su e Godeya꞉ malilo꞉ a tolo꞉ us a꞉namio꞉, Godeya꞉ to nafayo꞉ kaluka꞉isalemo꞉ sa꞉la꞉liki wida꞉labikiyo꞉, bobalo꞉ so꞉mea꞉sen misa꞉ kaluwo꞉lo꞉, elelo꞉ wida꞉sen kaluwo꞉lo꞉, a꞉la꞉ta꞉ga꞉ Yuwa꞉ misa꞉ kalu i o꞉lia꞉yo꞉ Ya꞉sulo꞉wa ya꞉sa꞉ga꞉, emo꞉wo꞉ a꞉la꞉sio꞉, 2“Nanog gilo꞉ dimida꞉lab a꞉no꞉, abe wiya iliki dimidaya? Ge abe iliga꞉tabi dimidaya?” 3-4A꞉la꞉dabu ba꞉dabiki Ya꞉su eyo꞉ imo꞉wo꞉ a꞉ma꞉la꞉bo꞉ a꞉la꞉sio꞉, “Niyo꞉lo꞉ to nowo꞉ gimo꞉wo꞉ dabu ba꞉ba꞉nigo꞉l. Yo꞉na꞉lo꞉ ho꞉n amilo꞉ to꞉lola꞉len man a꞉no꞉, eyo꞉ o꞉ba a꞉la꞉ta꞉ga꞉ diya꞉le? A꞉no꞉ Hebene a꞉la꞉ta꞉ga꞉ mio꞉wa꞉le, mo꞉ kaluwa a꞉la꞉ta꞉ga꞉ fa꞉la꞉dowo꞉wa꞉le? Giliyo꞉ nemo꞉wo꞉ a꞉ma꞉la꞉ sama.” 5Ya꞉su eyo꞉ a꞉la꞉sa꞉labiki, iliyo꞉ a꞉ma꞉la꞉bo꞉ waga sa꞉ma꞉no꞉wa꞉le a꞉la꞉liki, egele nenelakiyo꞉ a꞉la꞉sio꞉. “Niliyo꞉ ‘Man a꞉no꞉ Hebene a꞉la꞉ta꞉ga꞉ mio꞉’ a꞉la꞉sa꞉lalega, Ya꞉suwa꞉yo꞉ nimo꞉wo꞉ a꞉la꞉dabu ba꞉ba꞉ib, ‘Gio꞉ e amio꞉ waga mo꞉tili dabuwo꞉?’ a꞉la꞉sa꞉ma꞉ib. 6Ko꞉sega kaluka꞉isaleyo꞉ tambo Yo꞉n e Godeya꞉ dinali sa꞉lan kalu a꞉la꞉tili asulufo꞉lab ko꞉lo꞉, niliyo꞉ ‘Man a꞉no꞉ henfelo꞉ kaluwa a꞉la꞉ta꞉ga꞉ fa꞉la꞉dowaka꞉’ a꞉la꞉sa꞉lalega, iliyo꞉ nio꞉ uwa꞉ agodaki sana soma꞉ib.” 7A꞉la꞉nenela꞉sa꞉ga꞉yo꞉ Ya꞉sumo꞉wo꞉ a꞉la꞉sio꞉, “Yo꞉na꞉ halaido꞉ we o꞉ba diya꞉le nio꞉ babalab.” 8A꞉la꞉fo꞉ko꞉lo꞉ Ya꞉su eyo꞉ a꞉la꞉sio꞉, “A꞉la꞉galega niyo꞉lo꞉ nanog nilo꞉ dimida꞉len a꞉no꞉, wema꞉ wiya iliki dimida꞉len a꞉la꞉bo꞉ gimo꞉wo꞉ mo꞉fanda sa꞉ma꞉no꞉.”
Egelo꞉lo꞉ bo꞉fo꞉len kalu mogago꞉wa bale sio꞉
Madi 21.33-46, Mak 12.1-12
9 #
Ais 5.1
Ya꞉su eyo꞉ kaluka꞉isalemo꞉wo꞉ bale sio꞉ to nowo꞉ widaki a꞉la꞉sio꞉, “Hendo꞉ biso꞉ kalu nowo꞉ waino꞉ gele alita꞉ga꞉, kalu nolbo꞉ bo꞉fo꞉melea꞉ki ta꞉fo꞉. A꞉la꞉ta꞉ga꞉ e ko꞉na꞉ hen nowa ha꞉na꞉sa꞉ga꞉, ho꞉leno꞉ modo꞉wo꞉ a꞉na sen. 10Waina꞉ folo꞉ tuma꞉no꞉ ho꞉leno꞉ dowabikiyo꞉, hendo꞉ biso꞉ kalu eyo꞉ fo nolo꞉ enedo꞉wa dia꞉mena꞉ki, ene nanog dian kalu nowo꞉ ilo꞉wa iliga꞉fo꞉. Kalu a꞉no꞉ a꞉na fa꞉la꞉dowo꞉ ko꞉sega, egelo꞉lo꞉ bo꞉fo꞉len kalu iliyo꞉ e yame tandea꞉sa꞉ga꞉, e hendo꞉ biso꞉lo꞉wa a꞉ma꞉la꞉ madali iliga꞉fo꞉.
11“A꞉la꞉ta꞉ga꞉ hendo꞉ biso꞉ eyo꞉ nanog kalu nowo꞉ wa꞉ka iliga꞉fo꞉ ko꞉sega, iliyo꞉ kalu a꞉no꞉ yame tandea꞉sa꞉ga꞉, sasedeaki sendelo alifa꞉ ko꞉lo꞉, e a꞉ma꞉la꞉ madali hamana꞉ki iliga꞉fo꞉. 12A꞉la꞉go꞉lo꞉biki, hendo꞉ biso꞉ kalu eyo꞉ nanog kalu asol a꞉no꞉ a꞉na iliga꞉fo꞉. Kalu a꞉no꞉ alan mada yame tandea꞉sa꞉ga꞉, ha꞉la꞉ya sandifo꞉. 13A꞉la꞉fo꞉ko꞉lo꞉ hendo꞉ biso꞉ eyo꞉ a꞉la꞉sio꞉, ‘Niyo꞉ waga dimidama꞉no꞉wa꞉le? Niyo꞉ a꞉la꞉dimidama꞉nigo꞉l. No꞉no꞉n so꞉wa ha꞉fo꞉lo꞉ disa꞉ a꞉no꞉ ko꞉lo꞉ iliga꞉fa꞉nigo꞉l. Iliyo꞉ ni so꞉wa we iligi ba꞉da꞉sa꞉ga꞉ kudu ha꞉na꞉iba꞉le?’ 14Ko꞉sega egelo꞉lo꞉ bo꞉fo꞉len kalu iliyo꞉ ene so꞉wa a꞉no꞉ ba꞉da꞉sa꞉ga꞉yo꞉, egele nenelaki a꞉la꞉sio꞉, ‘Ene so꞉wa imilig yab wema꞉yo꞉ iyayo꞉ sowalikiyo꞉ dabuno꞉ e tambo dia꞉ib. Dabun a꞉no꞉ nili dia꞉no꞉ ko꞉lo꞉ e sana soma꞉niki.’ 15A꞉la꞉sa꞉la꞉sa꞉ga꞉yo꞉ iliyo꞉ e ta꞉lia꞉sa꞉ga꞉, egelo꞉ ha꞉la꞉ya sanditaki, a꞉na sana sowo꞉.”
Ya꞉su eyo꞉ to a꞉na edakiyo꞉, kalu kegeo꞉ o꞉mo꞉wo꞉ a꞉la꞉dabu ba꞉ba꞉, “A꞉la꞉galega, hendo꞉ biso꞉ a꞉ma꞉yo꞉ egelo꞉lo꞉ bo꞉fo꞉len kalu i o꞉mo꞉wo꞉ waga dimidama꞉iba? 16Hendo꞉ biso꞉ e ya꞉ga꞉yo꞉, egelo꞉lo꞉ bo꞉fo꞉len kalu a꞉no꞉ tambo yasala꞉sa꞉ga꞉, wain egelo꞉ a꞉no꞉ kalu nolbo꞉ dimia꞉ib.” Iliyo꞉ Ya꞉suwa꞉lo꞉ to sa꞉lab a꞉no꞉ da꞉da꞉sa꞉ga꞉yo꞉ a꞉la꞉sio꞉, “A꞉la꞉bo꞉ mada mo꞉fa꞉la꞉doma꞉ki asulo꞉l.” 17#Song 118.22A꞉la꞉sa꞉labikiyo꞉ Ya꞉su eyo꞉ iyo꞉ tigini ba꞉da꞉sa꞉ga꞉, imo꞉wo꞉ a꞉la꞉sio꞉, “Giliyo꞉ a꞉la꞉asulufo꞉lalega, Godeya꞉ bugo꞉ amilo꞉ to sa꞉sa꞉lo꞉ we ha꞉go꞉ o꞉b ko꞉lo꞉ sio꞉wo꞉?
“ ‘U ko꞉lo꞉ alo꞉ dian ililo꞉ mo꞉beakilo꞉ sandifo꞉ a꞉no꞉,
o꞉go꞉ ayo꞉ halaido꞉ dofo꞉melea꞉kilo꞉ u wa꞉la꞉b ko꞉lo꞉ fa꞉la꞉dowo꞉wo꞉ o꞉m.’
18 #
Ais 8.14-15
Kaluka꞉isale o꞉ba꞉le u a꞉na ifikidakilo꞉ u wa꞉l amilo꞉ tulu alilab a꞉no꞉, e kiyo꞉ go꞉go꞉bela꞉ma꞉ib. A꞉la꞉ta꞉ga꞉ kaluka꞉isale o꞉ba꞉le u we tinda꞉ga꞉ e wa꞉la ti alilalikiyo꞉, u a꞉ma꞉yo꞉ e tambo mula꞉la꞉ma꞉ib.” Ya꞉su eyo꞉ imo꞉wo꞉ a꞉la꞉wido꞉.
19Elelo꞉ wida꞉sen kalu i o꞉lia꞉ bobalo꞉ so꞉mea꞉sen misa꞉ kalu i o꞉lia꞉ma꞉yo꞉ Ya꞉suwa꞉lo꞉ bale sa꞉lab a꞉no꞉ iyo꞉ ko꞉lo꞉ sa꞉lab a꞉la꞉asulaki, iliyo꞉ Ya꞉suwo꞉ wigibo a꞉naka ta꞉lia꞉sa꞉ga꞉ mo꞉walilima꞉no꞉ asulo꞉. Ko꞉sega iliyo꞉ kaluka꞉isale kegeo꞉ a꞉no꞉ tagilaki kata꞉fo꞉.
Moleyo꞉ Sisamo꞉ dimia꞉no꞉wa꞉le a꞉la꞉dabu ba꞉ba꞉
Madi 22.15-22, Mak 12.13-17
20 #
Luk 11.54
A꞉la꞉fo꞉ko꞉lo꞉ iliyo꞉ Ya꞉suwa꞉lo꞉ dimidab a꞉no꞉ bo꞉fo꞉liki, elo꞉ to sa꞉lab a꞉no꞉ ka꞉la꞉gedema꞉ki, kalu nolo꞉ a꞉na iliga꞉fo꞉. Iyo꞉ Ya꞉suwa꞉lo꞉ to widab a꞉no꞉ hendele da꞉ba꞉ni yab a꞉la꞉asuluma꞉ki go꞉, ko꞉sega iliyo꞉ Ya꞉suwa꞉lo꞉ to imilig hala sa꞉lab nowo꞉ da꞉da꞉sa꞉ga꞉yo꞉, gamani misa꞉ kaluwa꞉ dagiya dia꞉ta꞉sa꞉ga꞉, eyo꞉ Ya꞉suwo꞉ mo꞉walilima꞉ki a꞉na dimido꞉. 21A꞉la꞉go꞉ko꞉lo꞉ iliyo꞉ Ya꞉sumo꞉wo꞉ a꞉la꞉dabu ba꞉ba꞉, “Widan kalu, nili asulakiyo꞉, ge to hendele sa꞉laki wida꞉sen a꞉la꞉asulo꞉. Giyo꞉ wilo꞉ kalumo꞉wo꞉lo꞉, wilo꞉ma kalumo꞉wo꞉lo꞉ man imilise a꞉la꞉ka dimida꞉sen. Godeya꞉ mano꞉ giyo꞉ digalo꞉le wida꞉sen. A꞉la꞉fo꞉ko꞉lo꞉ niliyo꞉ gemo꞉wo꞉ we au dabu bo꞉do꞉l. 22Niliyo꞉ Loma꞉ gamani kalu alan, Sisa o꞉mo꞉wo꞉ takis moleyo꞉ dimia꞉no꞉wo꞉ o꞉liya꞉le?” 23A꞉la꞉dabu ba꞉dabiki, Ya꞉su eyo꞉ ililo꞉ madali dikidakilo꞉ dimidab a꞉no꞉ fanda ba꞉da꞉sa꞉ga꞉yo꞉, imo꞉wo꞉ a꞉la꞉sio꞉, 24“Loma꞉ mole us nowo꞉ nemo꞉wo꞉ walama. Mole wema꞉ wa꞉l amio꞉ abe wo꞉lokano꞉lo꞉bo꞉? A꞉la꞉ta꞉ga꞉ mole wa꞉l amilo꞉ wi sa꞉sa꞉lo꞉ a꞉no꞉ abeno꞉lo꞉bo꞉?” Iliyo꞉ a꞉ma꞉la꞉bo꞉ a꞉la꞉sio꞉, “Sisa eno꞉.” 25A꞉la꞉sa꞉labiki, Ya꞉su eyo꞉ imo꞉wo꞉ a꞉la꞉sio꞉, “A꞉la꞉fo꞉ko꞉lo꞉ kelego꞉ Sisa elo꞉wo꞉, a꞉ma꞉la꞉ Sisamo꞉ dimia꞉bi. A꞉la꞉ta꞉ga꞉ kelego꞉ Gode elo꞉wo꞉, a꞉ma꞉la꞉ Godemo꞉ dimia꞉bi” a꞉la꞉sio꞉. 26A꞉la꞉fo꞉ko꞉lo꞉ iliyo꞉ Ya꞉suwa꞉lo꞉ to kalab amilo꞉ sa꞉lab a꞉ma꞉yo꞉ e mo꞉ta꞉lia꞉no꞉ dowo꞉. Elo꞉ a꞉ma꞉la꞉lo꞉ sa꞉lab a꞉no꞉ iliyo꞉ molo asulaki hela꞉fo꞉.
Sowo꞉ kaluwo꞉ dasima꞉nigab a꞉no꞉ wagama꞉iba꞉le?
Madi 22.23-33, Mak 12.18-27
27Sadusi kalu iliyo꞉ tili asulakiyo꞉, sowo꞉ kaluwo꞉ a꞉ma꞉la꞉yo꞉ mada mo꞉dasima꞉ib a꞉la꞉asula꞉sen. A꞉la꞉fo꞉ko꞉lo꞉ iyo꞉ nolo꞉ Ya꞉sulo꞉wa ya꞉sa꞉ga꞉ a꞉la꞉dabu ba꞉ba꞉. 28#Lo 25.5“Widan kalu, mo꞉lu Mo꞉sa꞉s elo꞉ ele nimo꞉lo꞉ sa꞉sa꞉li me a꞉ma꞉yo꞉ a꞉la꞉sio꞉, ‘Kalu nowo꞉ so꞉walo꞉ mo꞉sa꞉la꞉li ka sowalega, kalu sowo꞉ a꞉ma꞉ ga sa꞉ba꞉lo꞉ a꞉no꞉, ene aowa꞉ mada dia꞉ib. A꞉la꞉ta꞉ga꞉ kalu sowo꞉ a꞉ma꞉ wiyo꞉ mo꞉elema꞉ki, aowa꞉ inga sa꞉ba꞉lo꞉ a꞉no꞉ ene dia꞉sa꞉ga꞉ so꞉wa sa꞉la꞉liab a꞉no꞉, ao sowo꞉ a꞉ma꞉no꞉ doma꞉ib.’ Mo꞉sa꞉s eyo꞉ a꞉la꞉saefa꞉. 29Nio꞉ a꞉no꞉ ko꞉lo꞉ da꞉feaki maloloma꞉nigo꞉l. Kalu noma꞉yo꞉ kalu so꞉wayo꞉ doma꞉la꞉fo꞉ ko꞉lo꞉ sa꞉la꞉li. Ao wa꞉la꞉bo꞉ gayo꞉ di, ko꞉sega e so꞉wayo꞉ mo꞉sa꞉la꞉li ka sowo꞉. 30-31Ga sa꞉ba꞉lo꞉ a꞉no꞉ wa꞉la꞉ba꞉ fa꞉s a꞉ma꞉ a꞉di, ko꞉sega elo꞉ so꞉walo꞉ mo꞉sa꞉la꞉li ka sowabiki, ao asol a꞉ma꞉yo꞉lo꞉ a꞉la꞉ka dimido꞉. Ao i doma꞉la꞉fo꞉ a꞉no꞉ tambo ga imilise a꞉no꞉ko꞉ dia꞉li ane ko꞉sega iyo꞉ tambo so꞉walo꞉ mo꞉sa꞉la꞉li ka danili. 32Tif amio꞉ ga a꞉no꞉lo꞉ sowo꞉. 33Kalu doma꞉la꞉fo꞉ a꞉ma꞉yo꞉ ga imilig a꞉no꞉ko꞉ dia꞉i ane. A꞉la꞉fo꞉ko꞉lo꞉ kalu sowo꞉lo꞉ a꞉ma꞉la꞉ dasi alifelab ho꞉len a꞉namio꞉, ga a꞉ma꞉ indeyo꞉ o꞉b doma꞉iba?”
34Iliyo꞉ a꞉la꞉dabu ba꞉dabiki, Ya꞉su eyo꞉ a꞉ma꞉la꞉bo꞉ a꞉la꞉sio꞉, “O꞉g henfelo꞉ wena silikiyo꞉, kaluwa꞉yo꞉ gayo꞉ diaki a꞉la꞉ta꞉ga꞉ gayo꞉ kalulo꞉wa ha꞉na꞉lab. 35Ko꞉sega tif amio꞉ kaluka꞉isaleyo꞉ a꞉ma꞉la꞉ dasila꞉sa꞉ga꞉lo꞉ Godeya꞉lo꞉ bo꞉fo꞉mela꞉no꞉ hen a꞉namio꞉ o꞉li mia꞉ib a꞉la꞉do꞉ asulakilo꞉ da꞉feyo꞉ kaluka꞉isale i a꞉no꞉, kaluwa꞉yo꞉ gayo꞉ mo꞉diaki, a꞉la꞉ta꞉ga꞉ gaya꞉lo꞉ kaluwo꞉ mo꞉ha꞉na꞉ib. 36Mo꞉wo꞉ iyo꞉ ma꞉mula꞉ kalu sab o꞉leo꞉ngo꞉ dowaki, wa꞉kabiyo꞉ mada mo꞉soma꞉ib. Gode eyo꞉ iyo꞉ a꞉ma꞉la꞉ a꞉dasi alifa꞉ib ko꞉lo꞉, iyo꞉ Godeya꞉ so꞉wale doma꞉ib. 37#Kis 3.6Ko꞉sega i amilo꞉ de wa꞉sowa sasada꞉lab malolo꞉ a꞉no꞉ Mo꞉sa꞉s eyo꞉ sa꞉sa꞉lo꞉ ko꞉lo꞉, malolo꞉ a꞉ma꞉yo꞉ sowo꞉ kaluka꞉isaleyo꞉ hendele a꞉ma꞉la꞉ a꞉dasima꞉ib a꞉la꞉li widaki go꞉. Mo꞉sa꞉s eyo꞉ malolo꞉ a꞉no꞉ sa꞉sa꞉lab amio꞉, Ablahamo꞉, Aisa꞉go꞉, Ya꞉kobo꞉ i a꞉no꞉ mo꞉lu sowo꞉ ko꞉sega, Mo꞉sa꞉s eyo꞉ Alano꞉ da꞉feakiyo꞉ a꞉la꞉sa꞉sa꞉lo꞉, ‘Ablahama꞉ Gode, Aisa꞉ga꞉ Gode, a꞉la꞉ta꞉ga꞉ Ya꞉koba꞉ Godeyo꞉’ a꞉la꞉sa꞉sa꞉lo꞉. 38Gode e kalu sowo꞉ a꞉ma꞉no꞉ma. Gode e kalu mela꞉no꞉lo꞉ a꞉lab a꞉ma꞉no꞉. A꞉la꞉fo꞉ko꞉lo꞉ ene kaluka꞉isale sowo꞉ a꞉no꞉ mada a꞉ma꞉la꞉ dasila꞉sa꞉ga꞉, e ha꞉ga mela꞉no꞉ mesa꞉ib.” 39-40Ya꞉su eyo꞉ a꞉la꞉widabikiyo꞉, kalu kegeo꞉ a꞉no꞉ tambo tagilaki wa꞉kabiyo꞉ mo꞉dabu kedo꞉ ko꞉lo꞉, elelo꞉ wida꞉sen kalu nolba꞉yo꞉ a꞉ma꞉la꞉bo꞉ a꞉la꞉sio꞉, “Giyo꞉ to ko nafale sa꞉lab.”
Godeya꞉lo꞉ Da꞉feyo꞉ kaluwo꞉ o꞉ba
Madi 22.41-46, Mak 12.35-37
41Ya꞉su eyo꞉ imo꞉wo꞉ a꞉la꞉dabu ba꞉ba꞉, “Kalu nolba꞉yo꞉ Godeya꞉lo꞉ Da꞉feyo꞉ kalu a꞉no꞉ Da꞉ibida꞉ inso꞉ a꞉la꞉sio꞉ ko꞉lo꞉, a꞉no꞉ mo꞉wo꞉ waga asulaki sio꞉wo꞉? 42-43#Song 110.1Gisalo꞉ bugo꞉ a꞉namio꞉ Da꞉ibid eneno꞉ a꞉la꞉sio꞉,
“Gode Alan eyo꞉ ni Alanbo꞉ sa꞉lakiyo꞉,
‘Niyo꞉ gis kalu gilo꞉wo꞉ gi ha꞉g amio꞉ semo꞉ difa꞉ amio꞉,
Nani bo꞉fo꞉mela꞉niki, ge ne dagi ililiba mesa꞉ni mena.’
44Da꞉ibid eyo꞉ Godeya꞉lo꞉ Da꞉feyo꞉ kalu a꞉no꞉ ‘ni Alan’ a꞉la꞉ da꞉feyo꞉ ko꞉lo꞉, kalu a꞉no꞉ Da꞉ibida꞉ inso꞉ka꞉ a꞉la꞉bo꞉ waga sa꞉laba꞉le?”
Ya꞉su eyo꞉ hagugo꞉ towo꞉ sio꞉
Madi 23.1-36, Mak 12.38-40, Luk 11.37-54
45Kaluka꞉isale kegeo꞉ a꞉no꞉ da꞉da꞉labikiyo꞉, Ya꞉su eyo꞉ enedo꞉ tili wida꞉sen kalumo꞉wo꞉ a꞉la꞉sio꞉, 46“Gio꞉ elelo꞉ wida꞉sen kaluwa꞉ man a꞉no꞉ dinafa aloba꞉daki, kudu ha꞉na꞉so꞉bo. Iyo꞉ helebeso꞉go꞉ mada nafale tigilo꞉ sa꞉ga꞉lela꞉sa꞉ga꞉yo꞉, kalu nolba꞉yo꞉ e momado꞉ a꞉no꞉ ba꞉da꞉sa꞉ga꞉, iyo꞉ wabuluma꞉ki, kegea꞉sen hen a꞉na sia꞉mela꞉no꞉ asulab. Tolo꞉ wida꞉sen ayamio꞉lo꞉, ilo꞉ mesa꞉no꞉ i fofodo꞉wo꞉lo꞉ ko꞉li nafale nowa mesa꞉no꞉ asulab. A꞉la꞉ta꞉ga꞉ ma꞉no꞉wo꞉ alan ma꞉niki kegeakiyo꞉, iyo꞉ kalu alando꞉ sa꞉sena mesa꞉no꞉ asulab. 47Iliyo꞉ ga sa꞉ba꞉lo꞉ i a꞉no꞉ dikida꞉sa꞉ga꞉, a ililo꞉wo꞉ afale dia꞉sen. A꞉la꞉ta꞉ga꞉ kalu nolba꞉yo꞉ iyo꞉ nafa kalu a꞉la꞉bo꞉ba꞉ki, Godemo꞉ dulugu sa꞉lakiyo꞉, towo꞉ sambo sa꞉la꞉sen. A꞉la꞉fo꞉ko꞉lo꞉ kalu a꞉la꞉do꞉ dimida꞉lab o꞉mo꞉wo꞉ mada alan falasila꞉ma꞉ib.”
S'ha seleccionat:
Luk 20: BCO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved.