Azã 6
6
Azezi bɔ nẽr-kʋʋŋɔ dia
(Amatie 14:13-21, Amarkɩ 6:30-44, Aluki 9:10-17)
1Bɛla poorʋm, Azezi daan sẽŋɛ la Galile mõgrɛ tɩ ba ken wi'ira tɩ Tiberiadɩ mõgrɛ la doone. 2Tɩ nẽr-kʋʋŋɔ doose ẽ, ban yẽ tɩ a tõnnɩ tõon-yãlma botɩ bã'adõma yẽta ĩmã'asʋm na ĩyã. 3Tɩ Azezi la a karẽnbiisi zom tãŋa zuo ka zẽa. 4La Zifdõma kibsa n de Zɔɔg-basɛ la daan lɛm mɛ. 5Tɩ Azezi zẽkɛ zuugo yẽ nẽr-kʋʋŋɔ n sẽm a zẽ'am, tɩ a soke Afilipi yetɩ: «Tɩ wʋn yẽ dia la bɛ da bɔ nẽr-bãna wã tɩ ba di?»
6A daan yele wãna tɩ a di la a yɛm bɩsɛ, bẽm ĩyã, a mẽŋa daan põn mina ẽŋa n wʋn ẽŋɛ se'em mɛ. 7Tɩ Afilipi lerge ẽ yetɩ: «Baa tɩ sãn da dia lig-kõba kɔbsyi, la ka tã wʋn seke tɩ nẽra woo to'oge fẽfẽe.» 8Tɩ Azezi karẽnbia ayɩla yʋ'ʋrɛ n de A'ãndre n de Asimõ-pɩyɛɛrɩ yɩbga yele ẽ yetɩ: 9«Budibla n boe kalam tara borborɩ banuu, la zũn-pɩgsɩ bayi. La bãna de la bẽm, tɩ tɩ wʋn dɩkɛ bɔ nẽrba n zo'oge wãna?»
10Tɩ Azezi yetɩ: «Basɛ-ya tɩ nẽrba la zĩ'ire.» La mõogɔ n daan boe zẽ'e-ẽŋa zo'oge. Tɩ ba zĩ'ire, la bʋraasɩ kãllɛ daan de wʋ tʋsanuu. 11Tɩ Azezi to'oge borborɩ la pʋ'ʋsɛ Nawẽnnɛ, dee pʋɩ bɔ nẽrba la n zĩ la, la a daan ken ẽŋɛ zũma la mẽ na bɛla. Tɩ nẽra woo to'oge ẽn boorɩ se'em di tɩgɛ.
12La ban daan di tɩgɛ la, tɩ Azezi yele a karẽnbiisi la yetɩ: «Lagsɛ-ya borbor-gito la n deege la, tɩ sɛla da sã'am.» 13Tɩ ba lagsɛ borborɩ banuu la tɩ ba di deege la gito, tɩ ba pɩrɛ pɩtɔ pia la ayi. 14Nẽrba la n yẽ Azezi n ẽŋɛ bõn-yãlma la, tɩ ba yetɩ: «Ẽna wã sɩrɩ de la Nawẽnnɛ nõtɔ'ɔsa la tɩ ba yetɩ a sẽm dũnia zuo la.» 15La Azezi daan bãŋɛ mɛ tɩ ba boorɩ tɩ ba pẽrgɛ ẽŋa mɛ tɩ a di na'am, tɩ a lebe sẽŋɛ tãŋa la zuo ẽŋa ayɩla mã'a.
Azezi sẽnnɩ ko'om zuo
(Amatie 14:22-33, Amarkɩ 6:45-52)
16Tɩ zaanõorɛ daan paagɛ, tɩ Azezi karẽnbiisi la sige mõgrʋm, 17ka kẽ õorŋɔ pãrgra ko'om na wɛ'ɛsa Kapɛrnaʋm, mõgrɛ la ke bɔba. Tɩ wẽnnɛ daan sobe, dee tɩ Azezi nãn ka sẽŋɛ ba zẽ'am. 18Tɩ kʋseb-kãtɛ vugra tɩ ko'om na wẽ'era ke'enke'em. 19Tɩ ba sẽŋɛ masɛ wʋ kilomẽtrɩ anuu bɩɩ kilomẽtrɩ ayoobɩ, yẽ tɩ Azezi sẽnnɩ ko'om na zuo lɛnna õorŋɔ la, tɩ dabeem yõkɛ ba. 20Tɩ Azezi yele ba yetɩ: «La de la mam. Da zoe-ya dabeem.» 21Tɩ ba bɔɔra tɩ a kẽ õorŋɔ la pʋam. Tɩ õorŋɔ la darɛ paagɛ zẽ'e-sɛka tɩ ba we'esɩ la.
Azezi de la dia n bɔ'ɔrɩ vɔm
22Tɩ beere daan wiige, tɩ nẽr-sɛba n weege mõgrɛ la doone ke bɔba la bãŋɛ tɩ õorŋɔ ayɩla mã'a n zaam boe. La ba yẽ tɩ Azezi ka kẽ õorŋɔ la pʋam la a karẽnbiisi la, a karẽnbiisi la mã'a n fõrgɛ. 23Tɩ õornɔ basɛba ze'ele Tiberiadɩ wa'am wa lɛm zẽ'e-sɛka tɩ Zuudãana Azezi daan pʋ'ʋsɛ Nawẽnnɛ dia la ĩyã, dee tɩ ba di la. 24La nẽr-kʋʋŋɔ la n yẽ tɩ Azezi, la a karẽnbiisi la ka boe zẽ'e-ẽŋa la, tɩ ba kẽ õornɔ sẽŋɛ Kapɛrnaʋm tɩ ba ka ɛ ẽ.
25La ba daan sẽŋɛ ka yẽ Azezi la mõgrɛ la doone ke bɔba, soke ẽ yetɩ: «Karẽnsãama, wãne mã'a tɩ fõn wa'am kalam?» 26Tɩ a lerge ba yetɩ: «Mam yetɩ ya la sɩra sɩra, tɩ yan eerɩ mam na, dagɩ tɩ ya bãŋɛ la mam bõn-yãlma la võorɛ, la de la yan di tɩgɛ la ĩyã. 27Da tõnna-ya dia n wʋn sã'am ĩyã, tõnna-ya di-sɛba n bɔ'ɔrɩ vɔm n ka ba'asrɩ ĩyã, Nẽrsaala Dayʋa n wʋn bɔ ya vɔm ẽŋa. Se'ere n soe la, la de la ẽŋa tɩ Nawẽnnɛ n de Sɔ la bɔ ẽ a nõorɛ.» 28Tɩ ba soke Azezi yetɩ: «Tɩ wʋn ẽŋɛ la wãne tõm tõon-sɛba tɩ Nawẽnnɛ boorɩ?» 29Tɩ Azezi lerge ba yetɩ: «Tõon-sɛka tɩ Nawẽnnɛ boorɩ tɩ ya tõm, de la ya sakɛ sɛka tɩ a tõm na.» 30Tɩ ba yele ẽ yetɩ: «Tõon-yãlma kãna tɩ fõn wʋn ẽŋɛ tɩ tõma yẽ, bɔ fʋ sɩra? Tõon-kãna tɩ fõn wʋn tõm? 31Tɩ yaabdõma yʋʋn di la dia tɩ ba wi'iri tɩ mannɩ weem, wʋ lan gʋlsɛ se'em na, a yʋʋn bɔ ba la dia n ze'ele Nawẽnnɛ yire, tɩ ba di.» 32Tɩ Azezi lerge ba yetɩ: «Mam yetɩ ya la asɩra, tɩ la dagɩ Amoyisi n yʋʋn bɔ ya dia n ze'ele Nawẽnnɛ yire la, la de la mam Sɔ Nawẽnnɛ n bɔ'ɔrɩ ya dia sɩra sɩra n ze'ele Nawẽnnɛ yire. 33Dia sɩra sɩra tɩ Nawẽnnɛ bɔ ya la, de la sɛka n ze'ele Nawẽnnɛ yire sige dũnia bɔ'ɔra nẽrba vɔm na.» 34Tɩ ba yele ẽ yetɩ: «Zuudãana, bɔ'ɔra tɔ di-ẽŋa daarɛ woo.»
35Tɩ Azezi lerge ba yetɩ: «Mam n de dia n bɔ'ɔrɩ vɔm na. Nẽr-sɛka woo n sẽm mam zẽ'am, kɔm kãn malɩn yõkɛ ẽ, la sɛka n bɔ mam sɩra, koyũuro kãn malɩn tara ẽ. 36La mam yele yãma mɛ, tɩ ya yẽ mam mɛ, la ya ka bɔ mam sɩra. 37Sɛba wuu tɩ mam Sɔ Nawẽnnɛ bɔ'ɔrɩ mam, sẽm mam zẽ'am mɛ. La sɛka n sẽm mam zẽ'am, mam kãn dige nẽra baa ayɩla basɛ. 38Se'ere n soe la, mam ka ze'ele Nawẽnnɛ yire sigum tɩ m ẽŋɛ mam n boorɩ se'em, mam sigum tɩ m tõm na sɛka n tõm mam na n boorɩ se'em. 39La sɛka n tõm mam na n boorɩ se'em de la m da botɩ nẽr-sɛba wuu tɩ a bɔ mam na baa ayɩla sã'am, la de la m vo'oge ba wuu dũnia ba'asgɔ daarɛ. 40Mam Sɔ la n tõm mam na n boorɩ se'em de la sɛka woo n yẽ a Dayʋa la, dee bɔ ẽ sɩra wʋn yẽ vɔm n ka ba'asrɩ. Mam wʋn vo'oge ẽ dũnia ba'asgɔ daarɛ.»
41Tɩ Zifdõma yõnna Azezi, ẽn yetɩ, ẽŋa n de dia n ze'ele Nawẽnnɛ yire sigum na ĩyã. 42Tɩ ba daan yɛta taaba yetɩ: «Bʋra-ẽna dagɩ Azozɛfʋ bia Azezi, sɛka tɩ tõma mi a sɔ, la a ma la? La bẽm tɩ a yetɩ, ẽŋa ze'ele la Nawẽnnɛ yire?» 43Tɩ Azezi yele ba yetɩ: «Da yõnna-ya. 44Nẽra ka tã wʋn wa'am mam zẽ'am tɩ la sãn dagna mam Sɔ n tõm mam na n tarɩ ẽ wa'am. La mam n wʋn vo'oge ẽ dũnia ba'asgɔ daarɛ. 45La gʋlsɛ Nawẽnnɛ nõtɔ'ɔsrɩba gõnnɔ pʋam yetɩ: ‹Nawẽnnɛ n wʋn pa'alɛ ba wuu.› La sɛka woo n selse mam Sɔ la, dee to'oge a pa'algɔ la, sẽm mam zẽ'am mɛ. 46Nẽra nãn ka yẽ Sɔ Nawẽnnɛ, sãn dagna sɛka n ze'ele a zẽ'am na mã'a n yẽ ẽ. 47Mam yetɩ ya la asɩra, tɩ sɛka n bɔ mam sɩra tarɩ la vɔm n ka ba'asrɩ. 48Mam n de dia n bɔ'ɔrɩ vɔm na. 49Yãma yaabdõma yʋʋn di mannɩ mɛ weego pʋam, la ba ki mɛ. 50La di-sɛka n ze'ele Nawẽnnɛ yire sigum na, de la dia tɩ nẽr-sɛka n di kãn ki. 51Mam n de di-sɛka n bɔ'ɔrɩ vɔm n ze'ele Nawẽnnɛ yire sigum, tɩ nẽra sãn di di-ẽna, a wʋn vɔa wakatɛ wuu. La di-sɛka tɩ mam wʋn bɔ dũnia dõma tɩ ba yẽ vɔm na, de la mam ĩyã.»
52Tɩ Zifdõma la wẽ'era nõke'ene la taaba yetɩ: «Nẽr-ẽna wã wʋn ẽŋɛ la wãne bɔ tõma a ĩyã tɩ tõma di?» 53Tɩ Azezi yele ba yetɩ: «Mam yetɩ ya la sɩra sɩra, tɩ ya sãn ka di Nẽrsaala Dayʋa la ĩyã, la ya sãn ka yũ a zɩɩm, ya ka tarɩ vɔm na ya pʋam. 54Sɛka n diti mam ĩyã dee yũura mam zɩɩm tarɩ la vɔm n ka ba'asrɩ, la mam wʋn vo'oge ẽ dũnia ba'asgɔ daarɛ. 55Se'ere n soe la, mam ĩyã de la dia mẽŋa mẽŋa, la mam zɩɩm de la bõn-yũula mẽŋa mẽŋa. 56Sɛka n diti mam ĩyã, dee yũura mam zɩɩm boe la mam mɛ, tɩ mam bɔna la ẽ. 57Mam Sɔ n tõm mam na, de la vɔm dãana, ẽŋa ĩyã tɩ mam tara vɔm, bɛla, sɛka n diti mam ĩyã mẽ wʋn vɔa mam ĩyã. 58Ẽna de la dia n ze'ele Nawẽnnɛ yire sigum, a ka ãn wʋ di-sɛka tɩ ya yaabdõma yʋʋn di ki la. Sɛka n di di-ẽna wʋn vɔa wakatɛ wuu.» 59Azezi n daan zãsnɩ nẽrba Kapɛrnaʋm wẽndeego la pʋam na, tɩ a tɔgɛ yetɔg-bãna.
60La a karẽnbiisi basɛba zozo'e n daan wõm bɛla la, tɩ ba yele taaba yetɩ: «Yetɔg-ẽna to'ore tɔ mɛ, ãne n wʋn tã'agɛ sakɛ yetɔg-ẽna wã?» 61Tɩ Azezi bãŋɛ tɩ a karẽnbiisi la yõnnɩ mɛ bõn-ẽna yelle, tɩ a yele ba yetɩ: «Bõn-ẽna botɩ yãma lɛbra la poorʋm kãn le doose mam? 62La ya sãn yẽ tɩ Nẽrsaala Dayʋa la zonnɩ ẽn daan boe zẽ'a na, ya wʋn ẽŋɛ la wãne? 63La de la Nawẽnnɛ Sɩa n bɔ'ɔrɩ vɔm na, nẽrsaala ka tã wʋn ẽŋɛ sɛla sɛla. Yetɔg-sɛba tɩ mam tɔgɛ bɔ ya la, ze'ele la Nawẽnnɛ Sɩa zẽ'am bɔ'ɔra vɔm. 64La basɛba n boe ya tẽŋasʋka ka bɔ mam sɩra.» Se'ere n soe tɩ Azezi yele bɛla la, a daan dẽŋɛ bãŋɛ mɛ halɩ pɔspɔsɩ sɛba n kãn bɔ ẽŋa sɩra, la sɛka n wʋn pa'alɛ tɩ ba yõkɛ ẽŋa. 65Tɩ a le yele ba yetɩ: «Bɛla n soe tɩ mam yetɩ, nẽra ka tã wʋn wa'am mam zẽ'am, tɩ la sãn dagna mam Sɔ la n bɔ ẽ sore.»
66Azezi n tɔgɛ bɛla la poorʋm, a karẽnbiisi la zozo'e basɛ ẽ mɛ dee fõrgɛ ka le doose ẽ. 67Tɩ Azezi soke a karẽnbiisi pia la ayi la yetɩ: «Yãma mẽ boorɩ tɩ ya basɛ mam dee fõrgɛ mɛ bɩɩ?» 68Tɩ Asimõ-pɩyɛɛrɩ lerge ẽ yetɩ: «Zuudãana, tõma wʋn basɛ fõn dee sẽŋɛ la ãn zẽ'am? Fõn tarɩ la yetɔga n bɔ'ɔrɩ vɔm n ka ba'asrɩ. 69La tõma bɔ sɩra mɛ dee bãŋɛ tɩ fõn de la Pʋpeelem Dãana tɩ Nawẽnnɛ tõm.» 70Tɩ Azezi lerge ba yetɩ: «Mam n looge yãma pia la ayi la. La ya nẽra ayɩla de la Asũtãana nẽra.» 71A daan tɔgrɩ la Asimõ bia Azudaasɩ Iskariyo yelle. Se'ere n soe la, ẽŋa n daan de a karẽnbiisi pia la ayi la nẽra ayɩla n wʋn wa pa'alɛ tɩ ba yõkɛ ẽ.
S'ha seleccionat:
Azã 6: gurDBL
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2008, 2010, Wycliffe Bible Translators, Inc. All rights reserved.