Azã 7
7
Azezi yɩbsɩ ka bɔ ẽ sɩra
1Bɛla poorʋm, Azezi daan gilgri la Galile, a ka boorɩ tɩ a gilge Zude, Zifdõma nẽŋadõma n eerɩ ẽ tɩ ba kʋ la ĩyã. 2Tɩ Zifdõma põnsɩ kibsa daan lɛm, 3tɩ Azezi yɩbsɩ yele ẽ yetɩ: «Basɛ kalam dee sẽŋɛ Zude tɩ fʋ karẽnbiisi mẽ yẽ fʋ tõoma la tɩ fʋ tõnnɩ na. 4Se'ere n soe la, nẽra sãn bɔɔra tɩ nẽrba bãŋɛ ẽ, a ka sʋgrɩ a tõoma. Fõn tõnnɩ tõon-bãna wã, botɩ nẽrba wuu bãŋɛ fɔ.» 5La a yɩbsɩ la daan ka bɔ ẽ sɩra. 6Tɩ Azezi yele ba yetɩ: «Mam wakatɛ nãn ka paagɛ, la wakatɛ woo ãn sõŋa mɛ bɔ yãma. 7Dũnia dõma kãn tã'agɛ sise yãma, la ba sisri mam mɛ, mam n tɔgrɩ pa'ala tɩ ba tõoma de la be'em na ĩyã. 8Yãma sẽŋɛ kibsa la, tɩ mam nãn kãn sẽŋɛ, se'ere n soe la, mam wakatɛ nãn ka paagɛ.» 9A yele ba bɛla dee weege la Galile.
Azezi boe la põnsɩ kibsa
10La a yɩbsɩ la n daan sẽŋɛ kibsa la, a mẽ sẽŋɛ mɛ, la a ka botɩ nẽrba yẽ ẽ. 11Tɩ Zifdõma nẽŋadõma ɛɛra ẽ kibsa la pʋam, sɔkra yetɩ: «A boe la bɛ?» 12Tɩ nẽrba waasna tɔgra a yelle nẽr-kʋʋŋɔ la pʋam zozo'e, tɩ sɛba yetɩ: «A de la nẽr-sõŋɔ», tɩ basɛba yetɩ: «Ayɛɩ, a pã'asrɩ la nẽrba.» 13La nẽra nẽra daan ka saagɛ tɔgɛ a yelle nẽrba la zẽ'am, ban zotɩ Zifdõma nẽŋadõma la ĩyã.
14La kibsa la daan paagɛ la pʋsʋka, tɩ Azezi kẽ Wẽnde-kãtʋm na zãsna nẽrba. 15Tɩ la di'ige Zifdõma, tɩ ba yetɩ: «Bʋra-ẽna ẽŋɛ la wãne mina Nawẽnnɛ gõŋɔ sõŋa, dee ka yẽ zãsŋɔ?» 16Tɩ Azezi yele ba yetɩ: «Mam zãsŋɔ la ka ze'ele mam mẽŋa zẽ'am, la ze'ele la sɛka n tõm mam na zẽ'am. 17Nẽra sãn bɔɔra tɩ a ẽŋɛ Nawẽnnɛ n boorɩ se'em, a wʋn bãŋɛ zãsŋɔ la sãn ze'ele la Nawẽnnɛ zẽ'am, bɩɩ mam sãn tɔgra la mam mẽŋa pãŋa. 18Nẽr-sɛka n tɔgrɩ la a mẽŋa pãŋa, eerɩ la a mẽŋa pẽka. La nẽr-sɛka n eerɩ sɛka n tõm ẽ na pẽka, ẽŋa de la sɩra dãana, la sɛla n ka masɛ ka boe a pʋam. 19Amoyisi n bɔ ya lɔɔ la, dagɩ bɛla? La ya nẽra nẽra ka ɩtɩ lɔɔ la n yele se'em na. Bẽm tɩ ya ɛɛra mam tɩ ya kʋ?» 20Tɩ nẽr-kʋʋŋɔ la lerge ẽ yetɩ: «Kʋlkã'arga n dolɩ fo! Ãn eerɩ fʋ tɩ a kʋ?» 21Tɩ Azezi lerge ba yetɩ: «Mam daan tõm tõon-yãlma ayɩla mɛ, tɩ la di'ige ya. 22Amoyisi n yʋʋn bɔ ya nõorɛ yetɩ, ya wãta ya budimto. La, la dagɩ Amoyisi n pɔsɛ ẽŋɛ bɛla, la de la tɩ sɔ-yaabdõma. La yãma wãtɩ mɛ baa vo'osgo daarɛ. 23Yãma sãn wãta ya budimto vo'osgo daarɛ tɩ la ka sã'am Amoyisi lɔɔ la, bẽm tɩ yãma sũnsõa yĩige la mam, mam n daan botɩ bʋraa la yẽ ĩmã'asʋm vo'osgo daarɛ la ĩyã. 24Da kãn dɩkɛ-ya nini n yẽ se'em mõŋɛ nẽra bʋʋrɔ, bɔ-ya bʋʋrɔ wʋ lan masɛ se'em na.»
25Tɩ Zerizalɛm nẽrba basɛba soke yetɩ: «Dagɩ bʋra-ẽna tɩ ba eerɩ tɩ ba kʋ la? 26Bɩsɛ-ya, a tɔgrɩ la nẽr-kʋʋŋɔ pʋam, dee tɩ ba ka yele ẽ se'ere. Nẽŋadõma la na'an bãŋɛ mɛ tɩ a de la Krisi tɩ Nawẽnnɛ tõm na bɩɩ? 27Tõma mi bʋra-ẽna n ze'ele zẽ'a, la Krisi la sãn wa sẽna, nẽra kãn bãŋɛ ẽn ze'ele zẽ'a.»
28Bɛla tɩ a Azezi daan tɔgɛ ke'enke'em ẽn zãsnɩ nẽrba Wẽnde-kãtʋm na yetɩ: «Ya tẽ'esɛ tɩ ya mi mam mɛ dee bãŋɛ mam n ze'ele zẽ'a, la mam ka wa'am na m mẽŋa nõorɛ. La sɛka n tõm mam na de la sɩra dãana, yãma ka mi ẽ. 29La mam nõo mi ẽ, se'ere n soe la, mam ze'ele la ẽŋa zẽ'am, ẽŋa n tõm mam.» 30Tɩ ba ɛɛra sore tɩ ba yõkɛ ẽ, la nẽra nẽra ka kalʋm ẽ, se'ere n soe la, a wakatɛ daan nãn ka paagɛ. 31La nẽr-kʋʋŋɔ la nẽrba zozo'e daan bɔ ẽ sɩra mɛ, dee yɛta tɩ: «Krisi la sãn wa wa'am, a kãn yãŋɛ ẽŋɛ bõn-yãlma gãnna bʋra-ẽna n ẽŋɛ wã.»
Farisi dõma tõm nẽrba tɩ ba yõkɛ Azezi
32Tɩ Farisi dõma wõm nẽrba la n waasnɩ Azezi yelle, tɩ bãma la Nawẽnnɛ kãabgɔ kẽma nẽŋadõma tõm gu'urba tɩ ba ka yõkɛ Azezi.
33Tɩ Azezi yele yetɩ: «Mam wʋn ken bɔna la ya la wakatɛ fẽe, dee lebe sɛka n tõm mam na zẽ'am. 34Ya wʋn ɛɛra mam, la ya kãn yẽ mam, la mam n boe zẽ'a na, ya kãn tã'agɛ wa'am bilam.» 35Bɛla tɩ Zifdõma yele taaba yetɩ: «Bʋra-ẽna wʋn wa sẽŋɛ la bɛ tɩ tõma kãn yẽ ẽ? A yetɩ a sẽŋɛ la Zifdõma n wɩrgɛ bɔna Grɛkɩdõma tẽŋasʋka la zẽ'am, ka zãsʋm Grɛkɩdõma bɩɩ? 36Yetɔg-ẽna wã võorɛ de la bẽm tɩ a yetɩ: ‹Ya wʋn ɛɛra mam, la ya kãn yẽ mam, la mam n boe zẽ'a na, ya kãn tã'agɛ wa'am bilam?› »
Nawẽnnɛ Sɩa n bɔ'ɔrɩ vɔm
37La kibsa la ba'asgɔ daarɛ n de a dabs-kãtɛ daarɛ, tɩ Azezi daan isge ze'ele tɔgra ke'enke'em yetɩ: «Koyũuro sãn tara nẽr-sɛka, a wa'am mam zẽ'am wa yũ. 38Nẽr-sɛka n bɔ mam sɩra, ko'om n bɔ'ɔrɩ vɔm wʋn bulla a pʋam, wʋ Nawẽnnɛ gõŋɔ n yele se'em na.» 39Azezi n yele bɛla la, la de la Nawẽnnɛ Sɩa tɩ sɛba n bɔ'ɔrɩ ẽ sɩra la wʋn wa to'oge. Se'ere n soe la, Nawẽnnɛ daan nãn ka bɔ a Sɩa la, Azezi n daan nãn ka yẽ a na'am pãŋa la ĩyã.
Nẽrba la welse mɛ Azezi ĩyã
40Nẽr-kʋʋŋɔ la n wõm yetɔg-bãna la, tɩ basɛba yetɩ: «Ẽna sɩrɩ de la Nawẽnnɛ nõtɔ'ɔsa la.» 41Tɩ basɛba yetɩ: «Ẽna de la Krisi la.» Tɩ basɛba daan yetɩ: «Krisi la wʋn ze'ele la Galile bɩɩ? 42Nawẽnnɛ gõŋɔ la yele tɩ Krisi la wʋn dɛna la naba Adavidi yɩɩŋa, a wʋn ze'ele la Bɛtelɛm, tẽn-sɛka tɩ Adavidi yʋʋn boe la.» 43Bɛla tɩ welgre wa'am nẽrba la pʋam Azezi ĩyã. 44Tɩ ba nẽrba basɛba daan bɔɔra tɩ ba yõkɛ ẽ, la nẽra nẽra ka kalʋm ẽ.
45La gu'urba la tɩ kãabgɔ kẽma nẽŋadõma, la Farisi dõma la tõm na lebe ba zẽ'am mɛ, tɩ ba soke ba yetɩ: «Bẽm tɩ ya ka yõkɛ ẽ wa'am?» 46Tɩ ba lerge yetɩ: «Nẽra nãn ka tɔgɛ wʋ bʋra-ẽna wã.» 47Tɩ Farisi dõma la soke ba yetɩ: «A pã'asɛ yãma mẽ yãŋɛ mɛ? 48Tõma nẽŋadõma nẽra ayɩla, bɩɩ Farisi nẽra bɔ ẽ sɩra mɛ bɩɩ? 49La de la nẽr-kʋʋŋɔ la n ka mi lɔɔ la, ba wʋn yẽ la kã'a-be'ero.» 50Tɩ Anikodɛm n de ba nẽra ayɩla n daan sẽŋɛ ka yẽ Azezi la, yele ba yetɩ: 51«Tõma lɔɔ la bɔ sore tɩ tɩ mõŋɛ nẽra bʋʋrɔ, dee ka selse ẽ bãŋɛ ẽŋa n ẽŋɛ sɛla?» 52Tɩ ba lebse yele ẽ yetɩ: «Fõn mẽ de la Galile nẽra bɩɩ? Ɛ bɩsɛ, fʋ wʋn bãŋɛ tɩ Nawẽnnɛ nõtɔ'ɔsa ka ze'etɩ Galile.» [ 53Tɩ nẽra woo daan kule a yire.
S'ha seleccionat:
Azã 7: gurDBL
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2008, 2010, Wycliffe Bible Translators, Inc. All rights reserved.