Genesis 4
4
Da Cain En Abel
1Pag siya di et nandaag da Adan en Eva ay asawa na et mawad-an sisya. Idi nan-anak pay, lalaki, et nginadananas Cain ay nangwani, “Binadangan Diyos sak-en ay mangipabelas lalaki.” 2Man-anak pay kasin, esa abe ay lalaki, et nginadanan das Abel.
Idi nadakdake din sin-agi ay sana, nankinalasi di obla da. Si Abel di nangay-ayowan sin karnero da. Si Cain pay et nansamsama. 3Idi namingsan, nan-as Cain sin naom ay lames di inis-ek na et indatona en Diyos. 4Mo si Abel pay yan nanpilis malames ay besag di karnero, et indatona en Diyos din kamayatan ay parti na ay waday taba na. Idi inilan Diyos din indaton da ay sana, napnek en Abel ya din indatona, 5ngem adi napnek en Cain ya din indatona. Isonga palalo di bonget Cain yan manmimidoot.
6Asi et nginalat Diyos sisya yan kanana, “Apay nga manmimidoot kas bonget mo? 7Mo doy ya kosto di inamag mo koma, inawat ko abe din indaton mo.#4:7 Di esa abe ay kaiologan nina sin Hebreo et: masiyek ka abe. Ngem gapo ta lawa din inamag mo, nakasaganas Satanas ay manolisog en sik-a kasin. Laydena ay awisen sik-a ay manbasol, isonga masapol ay abakem sisya.”
8Idi siya di, nakingalat si Cain sin iyogtana ay si Abel yan kanana, “En ta sin dontog.” Idi nadipos da, binigla na ay pinse din iyogtana.
9Siya pay di kanan Diyos en Cain, “Intoy kad-an iyogtan mo ay si Abel?”
“Toan adi. Ay tan sak-en od di makaammo en sisya?” kanana.
10Asi et kanan Diyos, “Apay nga say inamag mo di? Inilak din dadan iyogtan mo ay inmayos sin lota, yan kaman mankedaw ay maibaes. 11Isonga din lota met laeng di kapoan di dosam, tan sinepsepana din dadan iyogtan mo. 12Manipod ed wani, mo way is-ek mo sin lota et matiltil ya manngidngid. Pilit abe ay lomikeliked kas owaoway sinan daga, tan mamaga di kosto ay ilim.”
13Idi dinngen Cain din inkeddeng Diyos ay dosa na, kanana, “Adiak kaya din dosa ay sana, tan nalabes ay madagsen. 14Nay et ay omipakaan ka sin lota, yan maisianak abe en sik-a. Maga abe di kosto ay ilik, mo adi lomikelikedak si owaoway sinan daga. Mo wada pay di mangabet en sak-en, pomse da.”
15“Aga met a,” kanan Diyos, “tan mo way mamse en sik-a, maibaes si biyag di pito ay ipogaw.” Et minalkaanas Cain ta adi peslen di mangabet en sisya. 16Pag komaan si Cain sin kad-an Diyos et inmey ed Nod#4:16 Di olog di Nod et “lomikeliked.” ay esay ili ay naibanda sin belaan di agew mo ed Eden.
Din Polin Cain
17Idi siya di, nangasawa si Cain et nan-anak da si lalaki ay nginadanan da si Enok. Pag man-amag sisya si siyodad, et inngadana din ngadan di anak da ay si Enok sin siyodad ay doy. 18Nangasawa abe si Enok et waday anak na ay manngadan si Irad ay say aman en Mehujael. Si Mehujael et sisya di aman en Metusael ay say nangin anak en Lamek. 19Dowa di asawan Lamek ay da Ada en Zilla. 20In-anak Ada si Jabal ay say nangipoli si mantaltalaken si animal ya manbebbeey si tolda. 21Si Jubal din iyogtan Jabal ay nangipoli si omaayam si gitara ya tongali. 22Inmanak abe si Zilla et nangadanan si Tubal Cain, et sisya abe di nangipoli si manpanpanday si nankakalasi ay laminta ay bronsi ya landok. Wada di agin Tubal Cain ay babai ay manngadan si Naama.
23Sin namingsan, inayagan Lamek din dowa ay asawa na yan kanana en daida ay nangikanta,
“Dakayo ay asawak ay da Ada en Zilla,
dengngen yo kod nan enak ikanta.
Waday nanakit en sak-en ay baro,
et pinsek ay inbaes ko.
24Si Cain, mo waday mamse en sisya,
maibaes si biyag di pito ay ib-a,
ngem si sak-en pay et mo pomse da,
pitopolo ya pito di matey. Siya man sa.”
25Idi nan-anak kasin da Adan si esa ay lalaki, kanan asawa na, “Indawtan Diyos sak-en si anak ay lalaki ta waday maiskat en Abel ay pinsen Cain.” Siya di et nginadanana si Set din anak na ay doy. 26Idi nangasawa si Set et doy bemela din anak da, nginadanana si Enos. Din timpo ay doy et say nangilogian di ipogaw ay mangosal sin ngadan Diyos sin panaydayawan da en sisya.
S'ha seleccionat:
Genesis 4: KD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2000, 2017 Wycliffe Bible Translators, Inc. All rights reserved.