Lucas 17
17
Jesupa jarateeda pꞌekꞌau kꞌachiade baainaadamerã
(Mateo 18.6-7, 21-22; Marcos 9.42)
1Jesupa mãgaji chi kꞌõpꞌãyoorãmaa:
—Na pꞌekꞌau eujãde ichita pꞌekꞌau kꞌachia paraaitꞌee. ¡Mamĩda Tachi Akꞌõrepa kꞌachiadee pëiitꞌeepɨ chi eperãpa pꞌekꞌau kꞌachia oopi bɨ awaraarãmaa! 2Piara bakꞌaji kꞌũruma iru otaude jɨ̃ atadapꞌeda, pꞌusa jãde batꞌatꞌaadaitꞌee, ichia na warrarãmaa pꞌekꞌau kꞌachia oopii kꞌãyaara. 3¡Kꞌĩrakꞌaupai parãpa mãga oodai!
ʼAwaraa ijãaparipa pꞌekꞌau kꞌachia ooru pɨrã, ɨtrɨ́atɨ. Mamĩda irua pꞌekꞌau kꞌachia oo amaa bɨ pɨrã, chupɨria kꞌawáatɨ mãikꞌaapa ma kꞌachia ooda perdonáatɨ. 4Ewari abaade pɨmaa ne–inaa kꞌachia ooda siete ooru pɨjida, jarada siete irua jara cheru pɨrã mãga waa oo–e, ichita chupɨria kꞌawáaji mãikꞌaapa ma kꞌachia ooda perdonáaji.
Ijãapataarãpa wãara ijãadakꞌãri
5Mãpai chi kꞌõpꞌãyoorãpa Jesumaa iidijida:
—Taimaa waapɨara ijãapíji Tachi Akꞌõrede.
6Jesupa pꞌanauji:
—Mostaza tau pꞌisi kꞌedee mĩda, waibɨadaipari pakꞌurukꞌa. Mãga pɨkꞌa ɨ̃rá parãpa wãara ijãaruta pɨrã, ma–ãri pida, ne–inaa oodai Akꞌõrepa kꞌinia bɨkꞌa. Waapɨara ijãadakꞌãri, ne–inaa waibɨara oodai iru–itꞌee. Mãga pꞌanadakꞌãri, na nejõ bɨɨrɨmaa jaradai: “Jãmãikꞌaapa ãyaa wã́ji mãikꞌaapa pꞌusa jãde baaináji.” Mãgá wãara ijãarutara, ma nejõ bɨɨrɨpa ooi parãpa jararutakꞌa.
Ichita oodaipia bɨ Akꞌõrepa oopi bɨkꞌa
7—Parãdepemapa chokꞌapari aba iru bɨ ne–uu kꞌãide mimia bapꞌeda maa–e pɨrã oveja akꞌɨdeepa cheru pɨrã, ¿nãga jarakꞌajikꞌã? “Su–akꞌɨ béeji mãikꞌaapa nekꞌóji.” 8Mãga–e. Ma kꞌãyaara nãga jarai: “Mɨ–itꞌee nejóoji mãikꞌaapa mɨa iidiruta anéeji, mɨ nekꞌomaa, ne–inaa tomaa bɨ misa. Tꞌẽepai pɨ nekꞌoi mãikꞌaapa ne–inaa toi.” 9Ma awara pɨa gracias jara–e paitꞌee ma chokꞌaparipa ooda pari pɨa jaradakꞌa. 10Mãga pɨkꞌa parãpa oodapꞌeda jõmaweda Akꞌõrepa jaradakꞌa, irumaa nãga jaradaipia bɨ: “Pɨata tai chokꞌapari. Jĩpꞌa oojida pɨa jaradakꞌa.”
Jesupa leprapa kꞌayaa beerã diez jɨpada
11Jesús ode wãde Jerusalendee, wãyaaji Samaria eujãde mãikꞌaapa Galilea eujãde. 12Panaji pꞌuuru chakꞌede. Mama irumaa chejida diez ɨmɨkꞌĩraarã leprapa kꞌayaa pꞌanɨ. Mamĩda tꞌɨmɨ́ pꞌaneejida mãgá kꞌayaa pꞌanadapꞌedaa perã. 13Mãga nɨde biajida:
—Jesús, Tachi Jarateepari, ¡tai chupɨria kꞌawáaji!
14Jesupa ãchi unukꞌãri, mãgaji:
—Pꞌaareerãmaa wã́tɨ jarade Tachi Akꞌõre juapa pãchi kꞌapꞌɨa jɨpakꞌooda.
Mãgá wãrutade, jɨpa pꞌaneejida. 15Ma diezdepema abaapa unukꞌãri ichi kꞌapꞌɨa jɨpada, ãpɨtee o–ĩa cheji. Tachi Akꞌõremaa golpe pedee pia jara cheji. 16Mãpai Jesús kꞌĩrapite bedabaidachi ichi tau bɨɨrɨ eujãde tꞌõbairumaa. Mãga ooji gracias jaraitꞌee ichi jɨpada perã. Ma eperã judio–e paji. Samaria eujãdepema paji. 17Mãpai Jesupa mãgaji:
—¿Diez paji–ekꞌã aji, jɨpa pꞌaneedapꞌedaarã ãchi kꞌayaadeepa? ¿Sãma pꞌanɨma apemaarã nueve? 18¿Na kꞌĩra tewaraa aupaita chejikꞌã aji, gracias jarade Tachi Akꞌõremaa?
19Mãpai Jesupa mãgaji ma eperãmaa:
—Pꞌirabáiji mãikꞌaapa wã́ji. Pɨa wãara ijãada perã, jɨpa beejida aji.
Sãga paitꞌee Tachi Akꞌõrepa eperãarã ichideerã papikꞌãri
(Mateo 24.23-28, 36-41)
20Fariseorãpa Jesumaa iidijida:
—¿Sãapaita Tachi Akꞌõrepa ichia pëida rey papiitꞌee na eujãde?
Jesupa pꞌanauji:
—Tachi Akꞌõrepa pëida rey papi–e paitꞌee eperãarã taide. 21Eperãarãpa jarada–e paitꞌee: “Iru nama bɨ” maa–e pɨrã “iru jãma bɨ”. Mãga pꞌoyaa jarada–e iru parã ome bapari perã, unuda–e pꞌanɨ mĩda.
22Mãpai Jesupa chi kꞌõpꞌãyoorãmaa mãgaji:
—Ewari cherude parãpa mɨ, chi Eperã Akꞌõre Truadepema, audú unu kꞌinia jõnadaitꞌee. Mamĩda unuda–e paitꞌee. 23Eperãarã ũkꞌuruurãpa jaradaitꞌee: “Iru nama bɨ” maa–e pɨrã “iru jãma bɨ”. Mamĩda wãnáatɨ ãchia jara pꞌanɨmaa mãikꞌaapa ijãanáatɨ ãchi pedee. 24Atu pꞌanɨde pa tau pꞌorepꞌorekꞌãri pajã jõmaweda ɨ̃daa ataparikꞌa, mãga pɨkꞌa atu pꞌanɨde mɨ, chi Eperã Akꞌõre Truadepema, waya cheitꞌee. 25Mamĩda mãga pai naaweda ɨ̃rapemaarãpa mɨ chupɨria papidaitꞌee mãikꞌaapa yiaraa iru pꞌanadaitꞌee. 26Noé bada ewaride pꞌasadakꞌa, mãga pɨkꞌa pꞌasaitꞌee mɨ, chi Eperã Akꞌõre Truadepema waya chekꞌãri. 27Maapai eperãarã nekꞌopachida, ne–inaa topachida mãikꞌaapa miakꞌãipachida Noé ichi barcode bataurumaa. Mãpai kꞌoi che nɨ̃beeji, na pꞌekꞌau eujã ũudachi mãikꞌaapa eperãarã jõmaweda kꞌiniidachida. 28Mãga paji ichiaba Lot bapariikꞌãri. Eperãarã nekꞌo para bapachi, to para bapachi, ne–inaa neto para bapachi, ne–uu para bapachi mãikꞌaapa te oo para bapachi. 29Mamĩda Lot Sodoma pꞌuurudeepa uchiakꞌãri, ma ewate ɨtꞌariipa kꞌoi tau baaiparikꞌa, azufre mãukꞌa baaiji tꞌɨpɨtau ome ma pꞌuuru ɨ̃rɨ. Mapa ma pꞌuurudepemaarã jõmaweda kꞌiniidachida. 30Mãga pɨkꞌa paitꞌee Eperã Akꞌõre Truadepema waya chekꞌãri. Eperãarãpa Tachi Akꞌõrede kꞌĩsiada–e pꞌanadaitꞌee.
31ʼMa ewate eperã terrazade bɨ pɨrã, mamãikꞌaapa ɨrabaikꞌãri, teedaa tꞌĩukꞌaraa bɨ ichi netꞌaa pꞌe atade. Ma awara eperã ichi ne–uu kꞌãide ni pɨrã, teedaa cheikꞌaraa bɨ ichi netꞌaa atade. 32Kꞌirãpátɨ Lot wẽra pꞌasada. 33Eperã piuamaa bɨ pɨrã mɨde ijãapari kꞌaurepa, mãgɨ́ piukꞌãri atuaitꞌee. Mamĩda eperã piuru pɨrã mɨde ijãapari kꞌaurepa, mãgɨ́ eperã piukꞌãri, ɨtꞌaa wãitꞌee.
34ʼMɨa jara bɨ: Ma ewate pꞌãrikꞌua mɨ waya cheitꞌee. Omé araa pꞌaru abaade kꞌãi pꞌanɨde angeleerãpa aba ɨtꞌaa ateedaitꞌee; chi apema atabëidaitꞌee. 35Ichiaba wẽraarã omé trigo bamaa pꞌanadaitꞌee kꞌũrumade. Aba ɨtꞌaa ateedaitꞌee; chi apema atabëidaitꞌee. 36[Ichiaba ɨmɨkꞌĩraarã omé ne–uu kꞌãide mimiamaa pꞌanadaitꞌee. Aba ɨtꞌaa ateedaitꞌee; chi apema atabëidaitꞌee.]
37Mãpai Jesús kꞌõpꞌãyoorãpa iidijida:
—Tachi Waibɨa, ¿sãma mãga pꞌasaitꞌeema? ajida.
Pꞌanauji:
—Piuda kꞌapꞌɨa bɨmãi, ãkoso seedaipatada aji.
S'ha seleccionat:
Lucas 17: sjaB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.