Lucas 20
20
Tachi Akꞌõrepa Jesús pëida
(Mateo 21.23-27; Marcos 11.27-33)
1Ewari aba Tachi Akꞌõre te waibɨade Jesupa jarateemaa baji pedee pia Akꞌõrepa jara pëida. Mãga nɨde pachejida pꞌaareerã poroorã, Moisepa pꞌãda jarateepataarã mãikꞌaapa judiorã poro waibɨarã. 2Mãɨrãpa Jesumaa iidijida:
—¿Tachi Akꞌõrepa tai bɨji–ekꞌã ichi te waibɨa akꞌɨdamerã? ¿Kꞌaipa pɨmaa nãga oopi bɨma? ajida.
3Jesupa pꞌanauji:
—Mɨa pida parãmaa iidiitꞌeeda aji. Pꞌanáutɨ pꞌoyaa pꞌanaudai pɨrã. 4¿Kꞌaipa pëijima aji, Juan Bautistapa poro choo chemerã; Tachi Akꞌõrepa maa–e pɨrã eperãarãpa?
5Mãpai ãchi pitapai pedee para beeji:
—Tachi Akꞌõrepa pëidada aruta pɨrã, irua iidiitꞌee: “Mãgara, ¿sãapꞌeda Juan ũraa ijãada–e pajima?” aitꞌee. 6Ichiaba jaradaikꞌaraa bɨ: “eperãarãpa Juan pëijida”. Mãga jararuta pɨrã, na eperãarã kꞌĩraudaridaitꞌee tachi ome mãikꞌaapa tachi mãupa batꞌa peedai. Jõmaarãpa ijãa pꞌanɨ Juan Tachi Akꞌõre pedee jarapari paji.
7Mapa ãchia pꞌanaujida:
—Kꞌawada–e pꞌanɨda ajida, kꞌaipa Juan pëiji poro choo chemerã.
8Mãpai Jesupa mãgaji:
—Mãgara mɨa pida jara–eda aji, kꞌaipa mɨmaa nãga oopi bɨ.
Mimiapataarã kꞌachia beerãde nepɨrɨda
(Mateo 21.33-44; Marcos 12.1-11)
9Maapꞌeda Jesupa nãga nepɨrɨmaa beeji jarateeitꞌee eperãarãmaa:
—Eperãpa uva eujã uuji. Maapꞌeda ne–uu eujã akꞌɨpataarã jɨrɨji aɨde mimiadamerã. Mãpai awara ãyaa tꞌɨmɨ́ wãji. 10Tꞌẽepai uva oropata ewari pakꞌãri, ma eujã chiparipa ichi mimiapari pëiji ma ne–uu akꞌɨpataarãmaa, ichi eere bee bɨ chauda tee pëidamerã. Mamĩda ãchia ma mimiapari sĩkꞌoojida mãikꞌaapa pëitꞌaajida waya chiparimaa, maarepida netꞌaa wẽe. 11Mãpai ma ne–uu chiparipa awaraa mimiapari pëiji. Mamĩda mãgɨmaa ichiaba ikꞌachia jaradapꞌeda, pꞌua ootꞌaajida mãikꞌaapa jua arajãgaa pëitꞌaajida. 12Ma tꞌẽepai awaraa mimiapari pëiji. Mamĩda ma ne–uu akꞌɨpataarãpa iru aukꞌa pꞌua oojida mãikꞌaapa taawaa pëijida.
13ʼMãpai ma ne–uu chiparipa mãgaji: “Ɨ̃rá, ¿kꞌãata ooyama? aji. Pëiitꞌeeda aji, mɨ warra kꞌinia iru bɨ. Taawa iru waaweedayada” aji. 14Mamĩda ma ne–uu akꞌɨpataarãpa iru warra tꞌɨmɨ́ cheru unu atadakꞌãri, ãchi pitapai mãgapachida: “Jãgɨpa ichi akꞌõre netꞌaa jõmaweda ataitꞌee chi akꞌõre piukꞌãri. Peetꞌaadáma ajida, tachi–itꞌee na ne–uu eujã beemerã.” 15Mapa ma uva eujãdeepa uchia atajida mãikꞌaapa peetꞌaajida.
Mãpai Jesupa mãgaji:
—Parãpa, ¿kꞌãata kꞌĩsia pꞌanɨma aji, ma uva eujã chiparipa ooitꞌee ma eujã akꞌɨpataarã ome? 16Mɨa jaraitꞌee. Wãkꞌãri, ma eujã akꞌɨpataarã peekꞌooitꞌeeda aji, mãikꞌaapa chi eujã teeitꞌeeda aji, awaraarãmaa ãchia akꞌɨpataadamerã.
Mãga ũridakꞌãri, eperãarãpa mãgajida:
—¡Mãga pꞌasa–e paitꞌeeda! ajida.#20.16 Mãga jarajida kꞌawadapꞌedaa perã Jesupa judiorãdeta nepɨrɨ baji. Kꞌiniada–e paji ãra kꞌãyaara Tachi Akꞌõrepa judio–eerã papimerã ichi jua ekꞌari ichideerã pꞌaneedamerã.
17Mamĩda Jesupa ãramaa akꞌɨji mãikꞌaapa mãgaji:
—Mãgara, ¿kꞌãata jara kꞌinia bɨma aji, na pedee Tachi Akꞌõre Ũraa pꞌãdadepema?
‘Te oopataarãpa mãu kꞌiniada–e padapꞌedaa pipɨara padachi.’ (Salmos 118.22)
18Eperã ma mãu pipɨara bɨ ɨ̃rɨ tꞌĩutɨru pɨrã, chupɨria nɨ̃beeitꞌee. Jõdee ma mãu eperã ɨ̃rɨ baairu pɨrã, iru peetꞌaaitꞌee.
19Pꞌaareerã poroorãpa Moisepa pꞌãda jarateepataarã ome ma nepɨrɨda ũri aupadakꞌãri, kꞌawaajida Jesupa ãchideta pedee baji. Mapa aramata jita atapi kꞌinia pꞌanajida. Mamĩda mãga ooda–e paji eperãarã waawee pꞌanadapꞌedaa perã.#20.19 Dn 2.34, 44; Isaías 8.14.
Judiorãpa Cesar–itꞌee impuesto pꞌaapatapꞌedaa
(Mateo 22.15-22; Marcos 12.13-17)
20Maperã tꞌẽepai ma judiorã poroorãpa pëijida tꞌãri jĩpꞌa pɨkꞌa beerã Jesús ome pedeede. Kꞌinia pꞌanapachida ma eperãarãpa iidi pꞌanɨpa Jesupa pedee kꞌachia jarapidai Romadepemaarã poro waibɨarã ãpɨte. Mãgá ma eujã akꞌɨpari, Romadepemaarã poro waibɨapa iru atapii. 21Ma–itꞌee ma pëida eperãarãpa Jesumaa iidijida:
—Tachi Jarateepari, taipa kꞌawa pꞌanɨda ajida, pɨa pedee wãara jarapari mãikꞌaapa jarateepari eperãarãpa ne–inaa pia oo kꞌawaadamerã. Eperãarã maarepida kꞌũrakꞌaa. Ichita jara bɨ eperãarã kꞌĩra jĩpꞌa pꞌanapataadamerã Tachi Akꞌõrepa kꞌinia bɨkꞌa. 22Mãga bɨta, nãga iidi kꞌinia pꞌanɨ: ¿Pia bɨkꞌã ajida, taipa Cesarmaa impuesto pꞌaadaitꞌee wa mãga–e?
23Jesupa kꞌawa bada perã mãɨrãpa kꞌĩsia kꞌachia iru pꞌanɨ, mãgaji:
24—Akꞌɨpítɨ denario pꞌaratꞌa tau. ¿Kꞌai kꞌĩrata nade bɨ mãikꞌaapa kꞌai tꞌɨ̃ta pꞌã bɨma? aji.
Pꞌanaujida:
—César kꞌĩra mãikꞌaapa ichi tꞌɨ̃ta pꞌã bɨda ajida.
25Mãpai Jesupa mãgaji:
—Mãgara téetɨ Cesarmaa irua netꞌaa iidipari, mãikꞌaapa aukꞌa téetɨ Tachi Akꞌõremaa irua iidipari.
26Mãga ũridakꞌãri, kꞌawaajida Jesumaa pedee kꞌachia pꞌoyaa jarapida–e pai eperãarã taide. Mapa akꞌɨtrua para beeji mãikꞌaapa kꞌĩupꞌeekꞌoodachida.
Piudapꞌedaarã chokꞌai pꞌirabaipatade iididapꞌedaa
(Mateo 22.23-33; Marcos 12.18-27)
27Maapꞌeda saduceorã ũkꞌuru wãjida Jesumaa. Saduceorãpa ijãadakꞌaa eperã piupꞌeda waya chokꞌai pꞌirabaii. Maperã iidijida:
28—Tachi Jarateepari, Moisepa nãga pꞌã bëijida ajida. Eperã miakꞌãi bɨ warra wẽe piuru pɨrã, chi ɨ̃pemapa iru wẽra ataipia bɨ mãikꞌaapa aɨ ome warra ooipia bɨ chi ɨ̃pema piuda kꞌapꞌɨa pari.#20.28 Deuteronomio 25.5-10. 29Mãga jaradapꞌeda, ma saduceorãpa nãga nepɨrɨjida. Pꞌanajida ɨ̃pemaarã siete. Chi naapema miakꞌãiji. Mamĩda warra wẽe piuji. 30Chi araarepema 31mãikꞌaapa araarepema miakꞌãijida ma pꞌẽtrãa ome. Mamĩda aukꞌa warra wẽe piujida. Ma tꞌẽepai chi apemaarã jida miakꞌãijida ma pꞌẽtrãa ome. Mamĩda ãchi jõmaweda warra wẽe piujida. 32Maapꞌeda ma wẽra ichiaba piuji. 33Ɨ̃rá taipa nãga kꞌawa kꞌinia pꞌanɨ. Piudapꞌedaarã waya chokꞌai pꞌirabaidakꞌãri, ¿chisãgɨ́ ɨ̃pemata ma wẽra ɨmɨkꞌĩra paitꞌeema ajida, ãchi jõmaweda iru ome miakꞌãi pꞌanadapꞌedaa perã?
34Jesupa pꞌanauji:
—Na pꞌekꞌau eujãde ɨmɨkꞌĩraarã mãikꞌaapa wẽraarã miakꞌãipata. 35Mamĩda Akꞌõrepa jɨrɨtꞌeradaarã ichi eujãde pꞌanadakꞌãri, ɨmɨkꞌĩraarã wẽraarã paara waa miakꞌãida–e paitꞌee, 36waa piuda–e paitꞌee perã. Angeleerãkꞌa pꞌanadaitꞌee mãikꞌaapa Tachi Akꞌõre warrarã padaitꞌee, chokꞌai pꞌirabaidapꞌedaa perã. 37Moisepa paara tachimaa kꞌawapipari piudapꞌedaarã chokꞌai pꞌirabaidaitꞌee. Chonaarãweda Tachi Akꞌõrepa irumaa pedeekꞌãri pakꞌuru jepꞌeda urua jira bɨdeepa tꞌɨpɨtaukꞌa, jaraji ichi Abraham, Isaac, Jacob ijãadapꞌedaa Akꞌõre Waibɨa.#20.37 Éxodo 3.6. 38¡Tachi Akꞌõre piudapꞌedaarã Akꞌõre Waibɨa–e! ¡Chokꞌai pꞌanɨɨrã Akꞌõre Waibɨa, iru–itꞌee eperãarã jaureerã jõma chokꞌai pꞌanadairã!
39Mãpai ũkꞌuru Moisepa pꞌãda jarateepataarãpa mãgajida:
—Tachi Jarateepari, pia pꞌanaujida ajida.
40Maadamãiipa waawee pꞌaneejida waa iididaitꞌee.
Tachi Akꞌõrepa pëida eperãarã rey pamerã
(Mateo 22.41-46; Marcos 12.35-37)
41Mãpai Jesupa iidiji:
—¿Sãapꞌeda jara pꞌanɨma aji, Mesías chonaarãwedapema Rey Daviddeepa uchiaitꞌee? 42Salmos pꞌãdade Rey Davidpa paara jara bɨ:
‘Tachi Akꞌõrepa jaraji Tachi Waibɨamaa: “Pɨ mɨ ome aukꞌa waibɨa bairã, su–akꞌɨ beepáde aji, mɨ juaraare, 43mɨa pɨ kꞌĩra unuamaa iru pꞌanapataarã pꞌoyaaru misa.” ’#20.43 Griego pedeede: pɨchi bɨɨrɨ ekꞌari bɨru misa. (Salmos 110.1)
44Davidpa ichi ëreerãdeepa uchiaitꞌee bɨmaa tꞌɨ̃jaraji “Tachi Waibɨa”. ¿Mapa kꞌawada–ekꞌã aji, Mesías waibɨara bɨ chonaarãwedapema Rey David kꞌãyaara?
Jesupa Moisepa pꞌãda jarateepataarã ɨmɨateeda
(Mateo 23.1-36; Marcos 12.38-40; Lucas 11.37-54)
45Eperãarã jõmaarãpa ũrimaa pꞌanajida, Jesupa chi kꞌõpꞌãyoorãmaa mãgakꞌãri:
46—Kꞌĩrakꞌaupai pꞌanapataadai Moisepa pꞌãda jarateepataarãkꞌa. Ãchi audua pꞌanadairã pꞌaru teesoo jɨ̃i awaa pꞌanapata mãikꞌaapa kꞌinia pꞌanapata jõmaarãpa ãchimaa saludaadamerã plaza bee chaa, tachi poro waibɨarã ome oopatakꞌa. Ichiaba su–akꞌɨ pꞌaneepata su–akꞌɨ beepari pipɨara bɨde Tachi Akꞌõre Ũraa jarateepata tede mãikꞌaapa nekꞌodakꞌãri, chi su–akꞌɨ beepari pipɨara bɨde su–akꞌɨ pꞌaneepata. 47Ma awara pꞌẽtrãarã kꞌaripadai kꞌãyaara, ãra te jãri atapata mãikꞌaapa taarã ɨtꞌaa tꞌɨ̃pata, eperãarãpa ãchi tꞌo pꞌanadamerã. Mãga pꞌanapata perã, Tachi Akꞌõrepa ãra audupɨara miapiitꞌee, kꞌachia beerã miapikꞌãri ichi ewari waibɨa ewate.
S'ha seleccionat:
Lucas 20: sjaB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.