Lucas 19
19
Jesús Zaqueo ome
1Jesús Jericó pꞌuurude panakꞌãri, nipaji calle jãde. 2Mama bapachi eperã pꞌaratꞌara bɨ, tꞌɨ̃jarapatapꞌedaa Zaqueo. Mãgɨ́ Cesar–itꞌee impuesto pꞌepataarã poro waibɨa paji. 3Ma eperãpa Jesús kꞌawa kꞌinia baji. Mamĩda pꞌoyaa unukꞌaa paji, eperãarã audú chokꞌara nipadapꞌedaa perã iru ome. Ma awara ichi audú jepꞌeda baji. 4Mapa Jesús naa pꞌiraji mãikꞌaapa ɨtꞌɨ́ padachi pakꞌuru o bi ikꞌaawa badade Jesús wãyaaitꞌeemãi. 5Mãpai Jesús Zaqueo badamãi wãyaa wãkꞌãri, ɨtꞌaa akꞌɨji mãikꞌaapa mãgaji:
—Zaqueo, isapai ɨrabáiji jãmãikꞌaapa, idi mɨ pɨ tede beeitꞌee perã.
6Aramãgá Zaqueo ɨrabaidachi mãikꞌaapa tꞌãri o–ĩa Jesús ateeji ichi temaa. 7Mãga unudakꞌãri, arii pꞌanadapꞌedaarã jõmaarãpa ikꞌachia pedee pꞌaneejida Jesús ãpɨte, iru wãda perã pꞌekꞌau kꞌachia ooyaa bɨda apata tede. 8Tꞌẽepai teeda pꞌanadakꞌãri, Zaqueo bainɨ̃ beeji mãikꞌaapa mãgaji:
—Tachi Waibɨa, mɨa netꞌaa pꞌe iru bɨdepema esa–aukꞌa chupɨria beerãmaa teeitꞌeeda aji. Ichiaba chĩara pꞌaratꞌa chɨadoo pɨrã, ma chɨada aba chaachaa pari kꞌĩmari teeitꞌeeda aji.
9Mãpai Jesupa mãgaji:
—Idi Tachi Akꞌõrepa na te chipari kꞌaripa ataji iru o kꞌachiade wãdadeepa, aukꞌa Tachi Akꞌõrede ijãapari perã, ichi chonaarãwedapema akꞌõchona Abrahampa ijãadakꞌa. 10Ma–itꞌeepɨ mɨ, chi Eperã Akꞌõre Truadepema cheji; atua beerã jɨrɨitꞌee mãikꞌaapa o kꞌachiadeepa kꞌaripa ataitꞌee.
Jesupa pꞌaratꞌade nepɨrɨda
(Mateo 25.14-30)
11Eperãarãpa ũrimaa pꞌanajida Jesupa mãga jarakꞌãri. Jerusalén kꞌaitꞌa bada perã, ãchia kꞌĩsiajida taarã–ee Tachi Akꞌõrepa iru rey papiitꞌee. Mapa Jesupa nãga nepɨrɨji jarateeitꞌee.
12—Pꞌaratꞌara beerãdepema aba bapachi. Mãgɨ́ tꞌɨmɨ́ wãji awaraa eujãdee, Cesarpa ichi rey bɨmerã mãikꞌaapa tꞌẽepai ichi ãpɨtee chemerã ichi eujã akꞌɨde. 13Mamĩda wãi naaweda, tꞌɨ̃ pꞌeji ichi mimiapataarã diez mãikꞌaapa pꞌaratꞌa waibɨa#19.13 Hebreo pedeede jara kꞌinia bɨ mina. Mina aba vale baji pꞌaratꞌa pꞌaadapꞌedaa ewari cien mimiada pari. teeji ãchi chaachaa. Mãpai mãgaji: “Na pꞌaratꞌapa netꞌaa neto pꞌe atátɨ mãikꞌaapa netótɨ awaraarãmaa waapɨara eepadamerã, mɨ cheru misa.” 14Mamĩda ichi eujãdepemaarãpa iru kꞌĩra unuamaa iru pꞌanapachida. Mapa iru tꞌẽe eperãarã pëijida jaradamerã: “Kꞌiniada–e jã eperã tai rey pamerã.”
15ʼMãga jara pëijida mĩda, Cesarpa iru rey bɨji. Ma tꞌẽepai waya cheji ichi eujãdee. Pachekꞌãri, tꞌɨ̃ pëiji ichi mimiapataarã, mãgɨ́ pꞌaratꞌa teedaarãmaa, kꞌawaa kꞌinia bada perã jõmasaa eepa iru pꞌanɨ ãchi chaachaa. 16Chi naa chedapa mãgaji: “Señor, pɨa pꞌaratꞌa teeda mɨmaa, ma pꞌaratꞌa tau chaa waa diez eepa wãjida” aji. 17Reypa mãgaji: “¡Pɨ pia bɨda aji, pia mimiapari perã! Mɨa atabëida pia akꞌɨji mãikꞌaapa aɨ ɨ̃rɨ waapɨara uchiapiji. Mãga ooda perã ɨ̃rá mɨa pɨ eperãarã poro waibɨa papiitꞌee pꞌuuru diez akꞌɨpariimerã.” 18Araarepema mimiaparipa ichiaba jara cheji: “Señor, pɨa pꞌaratꞌa teeda mɨmaa, ma pꞌaratꞌa tau chaa waa joisomaa eepa wãjida” aji. 19Ichiaba mãgɨmaa reypa mãgaji: “Mãgara pɨa pꞌuuru joisomaa akꞌɨpariitꞌeeda” aji.
20ʼMamĩda awaraa mimiapari chedapa mãgaji: “Señor, acha bɨda aji, pɨa pꞌaratꞌa mɨmaa teeda. Pꞌarude pia jɨ̃ bɨpꞌeda, ɨa iru bajida aji. 21Mɨa pɨ waawee bapari, kꞌawa bairã pɨa eperãarã pia chupɨria kꞌawakꞌaa. Kꞌawa bɨ pɨchia ne–inaa jõma pꞌe atapari awaraarã mimiadapꞌedaa pari.” 22Mãpai ma reypa mãgaji: “¡Mimiapari kꞌachia! Pɨa jaradakꞌa ooitꞌeeda aji, pɨ ome. Kꞌawa bɨda a bɨ, mɨa pia chupɨria kꞌawakꞌaa mãikꞌaapa mɨa ne–inaa jõma pꞌe atapari awaraarã mimiadapꞌedaa pari. 23Mãgara ¿sãapꞌeda pɨa mɨ pꞌaratꞌa ɨana–e pajima aji, pꞌaratꞌa ɨapata tede, mɨ chekꞌãri, mãpemaarãpa mɨmaa waya teedamerã aɨ ɨ̃rɨ eepadapꞌedaa ome?” 24Mãpai ma reypa mãgaji arii pꞌanadapꞌedaarãmaa: “Jãri atátɨ mɨa pꞌaratꞌa teeda irumaa mãikꞌaapa téetɨ ma pꞌaratꞌa tau chaa waa diez eepadamaa.” 25Mãpai ãchia mãgajida: “Mamĩda tachi poro waibɨa, ¡irua ma tau chaa waa diez eepada iru bɨda!” ajida. 26Mãpai ma reypa mãgaji: “Mɨa jara bɨ: Chi iru bɨmaa waapɨara teeitꞌee. Mamĩda chi makꞌɨara wẽe bɨpa ma–ãri iru bɨ paara jãri ataitꞌeeda aji. 27Ma awara jɨrɨnátɨ mɨ kꞌiniada–ee pꞌanadapꞌedaarã ãchi rey pamerã. Anéetɨ mɨ kꞌĩrapite mãikꞌaapa peekꞌóotɨ.”
Jesús Jerusalén pꞌuurudee wãda
(Mateo 21.1-11; Marcos 11.1-11; Juan 12.12-19)
28Ma pedee jara aupapꞌeda, Jesús wãji Jerusalén ode. 29Olivo Eede, Betfagé mãikꞌaapa Betania pꞌuuru kꞌaitꞌa panadakꞌãri, chi kꞌõpꞌãyoorã omé naa pëiji. 30Ãramaa mãgaji:
—Wã́tɨ ara bɨ pꞌuuru tachi kꞌĩrapite bɨmaa. Panadakꞌãri, ununadaitꞌee burro jɨ̃ bainɨ̃ bɨ, waide apida batauda–e pꞌanɨ iru ɨ̃rɨ. Ẽra atátɨ mãikꞌaapa anéetɨ. 31Apidaapa iidiruta pɨrã kꞌãare–itꞌee ẽramaa pꞌanɨ, jarátɨ: “Tachi Waibɨapa arakꞌatɨa atee kꞌinia bɨ.”
32Mãpai Jesús kꞌõpꞌãyoorã wãjida mãikꞌaapa ununajida jõma irua jaradakꞌa. 33Ma burro ẽramaa pꞌanɨ misa, chipariirãpa iidijida:
—¿Kꞌãare–itꞌee ẽramaa pꞌanɨma? ajida.
34Pꞌanaujida:
—Tachi Waibɨapa arakꞌatɨa atee kꞌinia bɨda ajida.
35Mãpai ma burro Jesumaa ateedapꞌeda, ãchi ɨ̃rɨpema pꞌaru jɨ̃patapꞌedaa ata bɨjida aɨ ɨ̃rɨ mãikꞌaapa bataupijida. 36Wãruta misa, eperãarãpa ãchi ɨ̃rɨpema pꞌaru tꞌõ jẽra bɨjida o jãde, ãchi rey pai jĩakꞌaapa. 37Mãpai Olivo Eedeepa ɨrabaipata o kꞌaitꞌa pa wãdakꞌãri, jõmaweda iru ome nipapataarã o–ĩapa biukꞌa para beeji, taarã–ee ãchi rey pai jĩakꞌaapa. O–ĩapa Tachi Akꞌõremaa pedee pia pedeepachida, ãchia unudapꞌedaa perã Jesupa oo bɨ; ne–inaa eperãarãpa pꞌoyaa oodakꞌaa ãchi juadoopa. 38Mãgapachida:
—‘¡Kꞌĩra wãree Akꞌõre eujãde, Tachi Kꞌaripapari reykꞌa cheru perã! ¡Ɨ̃rá Tachi Akꞌõre kꞌãiwee bapariitꞌee ichi eperãarã ome! ¡Iru jõmaarã kꞌãyaara waibɨara bɨ!’ (Salmos 118.26)
39Mãpai ũkꞌuru fariseorã ma eperãarã tꞌãide pꞌanadapꞌedaarãpa Jesumaa mãgajida:
—Tachi Jarateepari, pɨ ome nipapataarã ɨtrɨapáde ajida, mãga jaranaadamerã.
40Mamĩda Jesupa pꞌanauji:
—Na eperãarã kꞌĩupꞌee pꞌaneeruta pɨrã, mãu paara mãga biadaitꞌeeda aji.
Jesús Jerusalen–itꞌee jẽeda
41Jerusalén pꞌuuru kꞌaitꞌa parutade Jesupa araa akꞌɨkꞌãri, jẽedachi. 42Mãpai mãgaji:
—¡Pɨdepemaarãpa mɨde ijãadapꞌedaa paara, idi weda mɨa parã kꞌãiwee pꞌaneepikꞌaji! Mamĩda mãga kꞌawada–e pꞌanadairã, parã–itꞌee mera pɨkꞌa bɨ. Mapa pꞌoyaa unuda–e Tachi Akꞌõrepa oo bɨ. 43Jerusalén, ewari cherude pɨmaa ne–inaa kꞌachia pꞌasaitꞌee. Pɨ kꞌĩra unuamaa iru pꞌanapataarãpa muralla yoorodee oodaitꞌee pɨ ikꞌaawa. Pɨ wapꞌɨra atadaitꞌee mãikꞌaapa ma muralladeepa pɨ kꞌidaa chaa wawadaitꞌee. 44Pɨ muralla jõma tꞌeetꞌaadaitꞌee, edajãdepema te jẽra bɨ paara. Aɨde pꞌanɨɨrã chokꞌara peedaitꞌee. Mãu apida bee–e paitꞌee awaraa mãu ɨ̃rɨ, pɨdepemaarãpa ũridaamaa pꞌanadapꞌedaa perã mɨa parã kꞌaripa chekꞌãri.
Jesupa ne–inaa netopataarã jërekꞌooda Akꞌõre te waibɨadeepa
(Mateo 21.12-17; Marcos 11.15-19; Juan 2.13-22)
45Jerusalén pꞌuurude panadakꞌãri, Jesús Tachi Akꞌõre te waibɨade tꞌĩuji mãikꞌaapa jëremaa beeji aɨde ne–inaa netomaa pꞌanadapꞌedaarã. 46Mãgaji:
—Tachi Akꞌõre Ũraa pꞌã jẽra bɨde jara bɨ:
‘Mɨ te ɨtꞌaa tꞌɨ̃pata teda apatadaitꞌee.’ (Isaías 56.7)
‘Mamĩda parãpa nechɨapataarã tékꞌata oo iru pꞌanɨ.’ (Jeremías 7.11)
47Ewari chaa Jesupa jarateepachi Tachi Akꞌõre te waibɨade. Maapai pꞌaareerã poroorã, Moisepa pꞌãda jarateepataarã mãikꞌaapa Jerusalén pꞌuuru pidaarã poro waibɨarãpa jɨrɨpachida Jesús peepitꞌaadaitꞌee. 48Mamĩda pꞌoyaadakꞌaa paji, eperãarãpa iru pedee audú ũri kꞌinia pꞌanadapꞌedaa perã.
S'ha seleccionat:
Lucas 19: sjaB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.