O Kandɔɔ 17
17
Tɔɔmasele cɔm maa Hala yii kpemaa-o: diola Abram-ndan la mangalan
1Vɔsi Abram suili vɔsilan belaŋɔmahiɔɔlu a laŋɔmahiɔɔlu-o, mí Mɛlɛka cɔmnun ndu, mó dimul ndu aa: «Ya co Hala Vana-Kpaayaa-Kpow ni. Kela kela kɛndɔɔ ya o hɔl, mà tosa ɲɛ hɛnan ya-o. 2I yiinin kpemaa a nɔm mì kuilul nɔm polale nɔmnden taw-taw.» 3O kon mí Abram baŋ vulan, mó tundu hɔlla lɛŋ. Mí Hala hiaw laci a ndu dimullo aa: 4«Kpema ya co nɔm yiilu-o co hoo ni: a siŋnunnin fuɲa-mamaa le vanaa-mangalaa-isɔɔa súúlan taw. 5Kandɔɔ hau, diola nɔmndan la co lɛ aa Abram te, kɛ Abraham (kon co dimio ni aa ‹Fuɲaa fàngà-kundaa›). Kani i siinguunin nɔm fuɲa-mamaa le vanaa-mangalaa-isɔaa bɔɔ-bɔɔ. 6I co nɔm cuavaa-imamaa kuilul taw, mì vanaa-mangalaa-isɔɔa súúlan taw a fula o polale nɔmnden nin. Masaa bɛɛ a fulanin o polale nɔmnden nin. 7Kpema ya yii hoo-o co va naa tɛɛn naa nɔm, a naa tɛɛn naa cuavaa nɔmaa imamaa le fɛɛn a fɛɛn, haliko mi va Hala nɔmndo a Hala cuavaa nɔmaa imamaa nɔm kɔɔli. 8Lɛŋnde n co len icali nin o sumialle len, lɛŋnde Kanaan-nden pɛɛn, i co nɔm len yɔngu niaa cuavaa nɔmaa imamaa mì le va lɛŋnde niaa le fɛɛn a fɛɛn. I vanin vɛlɛ Hala cuavaa nɔmaa imamaa.»
9Mí Hala dimi vɛlɛ aa: «Lelan, la bii kpema nuu ho balan latiɔn niaa cuavaa nɔmaa imamaa, mì la manda ndu le fɛɛn a fɛɛn. 10Kpema niaa bɛnda kon le biyɔɔ a mandaa niaa cuavaa nɔmaa imamaa-o co hoo ni: ɲɛ-ɲɛ co vanpiaandua o nɔm ndo cɛinin kpede, a bɛnda mà dii toomaa. 11Kon vanin tɔɔmasele kpemaa naa tɛɛn naa niaa ni. 12Le fɛɛn a fɛɛn, te la velu pɛ hɔ́ɔ́ piaandoo, la dii ndu tooma o paale ŋɔmaandɔlen coo. Hɔ́aa piaandua vialunnin o polale nɔmnden coo-a bɛnda mà dii toomaa, cɛa niaa co piondɔɔ mialla o ba a volion-nda bɛɛ, hali a co bɛɛ polale nɔm kɛsɛ-kɛsɛ le, a bɛnda mà dii toomaa. 13Vanpiaandua kpow a bɛnda mà dii toomaa, o va poaa vialunnin o polale nɔmnden coo-a, o va vɛlɛ cɛa niaa piandunin a volion-nda, a bɛnda mà sɔla tuisio. Tɔɔmasele kpema ni vanin o dialii niɛi coo-o co kon ni. La bɛnda mì la va tosaa lende le fɛɛn a fɛɛn. 14Vana dii tooma kon te, a faŋa ndu vanaa ndɔa tɛɛn, le tùú o kɛɛ tɔɔmasele kpema nuu cɛlɔɔ-o.»
Vana bɛnda mò cua kɛ Abraham-ndo-o
15Mí Hala dimul vɛlɛ Abraham aa: «Le Sarai laa nɔm yɛ, a bɛnda lɛ ma veelu ndu aa Sarai le, kɛ diola ndɔlan nin aa Sara. 16I co ndu duaa dɔvɔɔ mò vilul nɔm hɔ́ɔ́ piaandoo. I co ndu duaa dɔvɔɔ mo siŋnun kala-mama vanaa-mangalaa-isɔɔa súúlan taw. Masaa súúlan taw a fulanin ndu o ipulu.» 17Mɛɛ Abraham tuei sɔɛi ken, mó baŋ vɛlɛ vulan, mó tundu hɔlla lɛŋ, mó mam ciki-ciki. Mó dimi o kɔl ndɔɔ nin aa: «Vanapɔnɔ yuuvɛi cii nin vɔsilan kɛmɛ-o nɔla pá mo velu hɔ́ɔ́? Yee Sara cii nin hoo vɔsilan belaŋɔmahiɔɔlu-o nɔla vɛlɛ mò cua folio, mo velu hɔ́ɔ́?» 18Mó dimul Hala aa: «Ya ya, ɲɛ ya yeema nɔm o ba-o co ni, nɔ́ hɔlten Ismaɛl coo mà dɔw ndu duaa.» 19Mí Hala dimul ndu aa: «Ɛ-ɛ, Sara laa nɔm kpeekpei co nɔm poo vilul ni. O velu ndu pɛ, a ke ndu diolan aa Isaak» (kon co dimio ni aa «O mam»). I yiinin kpemaa a ndu a á cuavaa ndɔa imamaa le fɛɛn a fɛɛn. 20Le Ismaɛl-lɛ, i tuei piɛile n piɛi le ndu len. I co ndu duaa dɔvɔɔ mì yɔngu ndu cuavaa-imamaa taw. O kuinin ipulu, polale ndɔlen le vanin sɛ́lɛ́. I vangalanin cuavaa ndɔa imamaa. Langbaa kɛsun kálàá tɔ́ a à ŋiɔn a fulanin ndu nin. I siinguunin ndu fuɲa-mamaa le vanaa-mangalaa-isɔɔa sɛ́lɛ́ bɛndoo. 21Kɛ a Isaak ya co hunɔɔ kpema nuu yii ni, po Sara laa nɔm vilulnin nɔm a boondei he ɲinasiaŋ-ndo pɛɛn.
Abraham a vanaa ndɔa dii toomaa
22Mɛɛ Hala cii sɔɛi o Abraham-ndo, mó faŋan ndu ikɛi. 23Paale len, mí Abraham dii Ismaɛl po ndɔ tooma, mó tuisi vɛlɛ vanpiaandua velun o ndu lo cɛinin-nda a cɛa piaandua o pendu-a. Mí vanpiaandua va Abraham o ba bɛngu-a kpow a dii toomaa mɛɛ Hala dimul ndu le tosaa yɛ. 24Abraham pila ndóò nɔ vɔsilan belaŋɔmahiɔɔlu a laŋɔmahiɔɔlu, mó dii toomaa, 25Ismaɛl po ndɔ ndu, ndóò nɔ vɔsilan tɔ́ a layàá, mó dii toomaa. 26Paale pilɛlen kpé Abraham nda Ismaɛl po ndɔ a dii toomaa ni. 27Paale len koni vanpiaandua velun o ndu lo cɛinin-nda a cɛa nda pendu mialla o ba a volion-nda bɛɛ a dii toomaa ni.
S'ha seleccionat:
O Kandɔɔ 17: BKG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Alliance Biblique en Guinée